OKHUCHIAKA 49
49
Amang'ana ka Yakobo akokhumalilikha
1Yakobo yalanga abasianibe ma naboola mbu, “Mwitse halala mwesi, m'mbool'le akaliekhola khu inyw mumatukhu keetsa:
2“Yitse ahembi muhulile, inywe abaana ba Yakobo.
Hul'le aka papa wenywe Isiraeli.
3“Rubeni, niwe omwana wanje owokhuranga,
khandi niwe tsingufu tsianje.
Niwe omwana wokhuranga mulusaatsa lwanje,
oli oweinjinia khandi owetsingufu okhuyomba abasiani banje bandi bosi.
4Ofwana singa emikhula chiamaatsi,
nebutswa siwakhabekhwo omukhongo tawe, sichila wakona nende omukhasi wanje omubiikha.
Wafwabia esitanda sia papawo.
5“Simioni nende Lawi nabomunda ndala.
Barumikhilanga ebikhupan'no biabwe okhusaalisia abandu.
6Sindakheinjisiekhwo mubumonyani bwabwe obwamembiswi tawe,
khandi kata sindakhabekho ahembi mubwakaani bwabwe tawe, sichila bali okhwira muburima,
ne balemia tsing'ombe khulwokhwesangaasia mumusino.
7Esilaamo sibe khuburima bwabwe, sichila nobwesilache,
khandi sibe khubululu bwabwe, sichila bubula tsimbabasi.
Ndakhabasalaanie musibala sia Isiraeli; nimbakabula mubandu basio bosi.
8“Yuda, abasiani benywe bakhakhwitsoomie,
wakhatiile abasukubo m'makosi kabwe nomukhonokwo.
Abasiani benywe bakhakhwinamile.
9Yuda afwana singa esimba,
eyiranga ma ekalukha hayamenya ma ekona hasi,
ne abulaho onyala okhutsinyasia.#Obub. 24:9; Okhub. 5:5
10Yuda yakhachinge indabusi yoburuchi,
ne abolwibulolwe bakhamihenje khasotso.
Abetsinzibulo bakhamuhulilenje nibamuha obusuru,
ma nibamusikamila khulwokhumuha oluyali.
11Abohanga esimoosi esiepundaye khumusabibu omulahi.
Yosianga tsingubotsie mutsinzabibu,
ne ebichendelwabie mumatsahi kemisabibu.
12Tsimonitsie tsiayakhanya khulwokhunywa ewaini,
ne amenoke kaalaba okhusila khulwokhunywa amabeele.
13“Sabuloni yakhamenye khundulo khweinyanza.
Oluchingalwe lwakhabekhwo etsimeeli tsinyinji.
Esibalasie biakhoole khu lwakho lwa Sidoni.
14“Isakari sayombele epunda ekonanga hakari webikuuli tawe.
15Nebutswa alolanga mbu habundu hokhuhulukhila yaho nahalahi.
Makhandi esibala nesikaasu.
Ma yenamanga okhuchingila ebisirobie khumukongo,
khandi atiiyanga singa omusumba.
16“Dani yakhabe omukhalachi wabandube.
Bakhabe butswa singa tsinzibulo tsindi tsia Isiraeli.
17Dani yakhabe singa inzokha khundulo khweinjila,
inzokha yesihilikoma khunjila.
Eyokhuluma tsimbakayu tsiesululi,
ma omwilusi wayo alakwe inyuma makalama.
18“OMWAMI nindil'langa umbonie.
19“Gadi yakhaseerwe nende abanuuli,
nebutswa yakhasukhane alabataabie.
20“Liloba lia Asheri liakhaame ebiakhulia ebinolu.
Yakhahaane ebiakhulia ebitoro ebikwan'ne omuruchi.
21“Nafutali ali singa esitsusu esilakhuuywe esiibulanga abaana abalahi.
22“Yosefu afwana omusaala okwaamanga, hamuchela,
okwamasaka kakwo kalandanga khwisisi.
23Abasukube bamuseeranga noburima nibamulondel'la okhumulasa tsisele.
24Nebutswa obuyingobwe noburalilu,
ne amakhonoke kakufuhasibwa nende obunyali bwa Nyasaye wa Yakobo nende obwo omwayi,
Omulindi wa Isiraeli.
25Nyasaye Wokhunyala Biosi niye okhukhonyanga tsikhabi,
Nyasaye onyala biosi niye okhuhetsanga ikhabi,
tsikhabi tsieifula okhurula khwikulu
khandi etsiamaatsi okhurula hasi,
tsikhabi tsiebiayo nende abaana.
26Tsikhabi tsiobuswache nende obwamu,
tsikhabi tsiebikulu biakhale,
ebindu ebilahi okhurula mubikulu bieinziayo.
Tsikhabi tsino tsiosi tsilaba khumurwe kwa Yosefu.
Khulwotosi lwomurwe okwe uyo oweelwa mubaana babwe.
27“Benjameni ali singa esibwe esilulu,
mukamba nende mukolooba siiraanga nisirandula.”
28Yabo nibo tsinzibulo likhumi natsibili etsia Isiraeli, ne kano niko aka samwana yababool'la nabalaamilanga ikhabi yokhusebula buli mwana.
Okhufwa nende okhuyabilwa khwa Yakobo.
29Ma Yakobo nalaka abasianibe mbu, “Ise kho ndi ahembi okhufwa ma nzia okhuba halala nende abandu banje. Namunzabile halala nende abapapa banje, mulwangaywa oluli mumbinga m'mukunda kwa Efuroni Omuhiti, 30mu Makapela ebukwe wa Mamure musibala sia Kanaani. Aburahamu yakula imbinga iyo nende omukunda yiku okhurula khu Efuroni lube olwebilindwa.#Okhuch. 23:3-20 31Niho ahabayabila Aburahamu nende omukhasiwe Sara. Niho ahabayabila Isaka nende omukhasiwe Rebeka, khandi niho ahandayabila Lea.#Okhuch. 25:9-10; 35:29 32Omukunda yikwo nende olwangaywa olulimwo biakulwa okhurula khu Bahiti. Namunzabileyo.” 33Olwa Yakobo yali namal'le okhuhaana amalako khubaanabe, yakona hasi khandi, ma nafwa.#Ebikh. 7:15
Àwon tá yàn lọ́wọ́lọ́wọ́ báyìí:
OKHUCHIAKA 49: EBAIBO
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©Bible Society of Kenya, 2019