OKHUCHIAKA 43
43
Abaana banga Yosefu bakalukha Emisiri nende Benjameni.
1Inzala yameetekha okhusila mu Kanaani, 2ma Olwa abeinyumba ya Yakobo bali nibaliiye obuswache bwosi obwabaleera okhurula Emisiri, Yakobo yabool'la abaanabe mbu, “Kalukhe, mukhukul'lekhwo ebiakhulia bindi.”
3Yuda namubool'la mbu, “Omusaatsa we Misiri yakhulaka obutinyu mbu sinakhuhuchil'lwekhwo okhumulola nikhurali nende omwana wefwe omukhokosi tawe. 4Nikakhaba uhuchiliye khutsie nende omwana wefwe, ne khutsia okhukhukul'la ebiakhulia. 5Ne norahuchiliye, ne sikhutsia tawe, sichila omundu uyo yakhubool'la sinakhuhuchil'le okhumulola nikhurali no mwana wefwe tawe.”
6Yakobo naboola mbu, “Busina nimundeer'ra amanyakhano okhubool'la omundu uyo mbu muli nende omwana wenywe undi?”
7Nibamukalusia mbu, “Omundu uyo yakhurebelesisie amang'ana amenji khubeinyumba yefwe singa, ‘Papa wenywe asiliho mwoyo? Mulikhwo nende omusiani wenywe undi?’ Kakhuhachia okhwola khukalusie amareebo kaake. Khwakhamanyile mbwena nakhureebe okhumuleer'ra omwana wefwe?”
8Yuda nabool'la samwana mbu, “Ruma omusiani khutsie n'naye, ma khurule bwangu, khe omundu wosi abule okhufwakhwo khulweinzala. 9Nzia okhuhaana obulamu bwanje singa esiesingo. Nimba niramuleera naali omulamu, mbuchiliye okhutulwa. 10Khulaba abaralin'de oluhono khane khutsiye esiakhabili nikhuchel'langa.”
11Samwana nababool'la mbu, “Nikali okhwola kekhole mbwo, khe mubukule ebihanwa ebilahi musibala siefwe mure mumakunia kenywe bibe ebihanwa khu mwami. Mumuhil'le omusaala kwomwayo omulahi, obuukhi, obubaane, obusakisaki, tsinjuku, nende etsilusi. 12Khandi mubukule amapesa esiakhabili sichila okhwola namukalusie akamwakaluchisisie mumakunia kenywe. Haundi kabeye amabi. 13Bukule omusiani wenywe mutsie n'naye nebutswa namukalukhe bwangu. 14Nyasaye Wokhunyala Biosi achile omundu uyo amubeele esirenda, khe abe onyala okhumuhelesia Benjameni nende omwana wenywe undi. Ne nase, nikali mbu okhwola ngosie abaana banje khe okhwola mbakosie.”
15Ma abasiani yabo nibabukula ebihanwa nende amapesa esiakhabili, nibachaaka oluchendo lwokhutsia Emisiri nibali nende Benjameni. Olwa boolayo nibemanyia khu Yosefu. 16Olwa Yosefu yalola Benjameni nali n'nabo yabool'la omukholi womunyumbaye mbu, “Yila abandu yaba munyumba mwanje. Betsa okhulia n'nase ebiakhulia biam'basu, khe muber're omuruko ma mukutekhe.” 17Omukholi nakhola singa yalakwa ma nahila abasiani yabo munyumba mwa Yosefu.
18Olwabali nibahilwanga munyumba, baria okhusila nibapaala, “Khulerwanga hano khulwamapesa kakalusibwa mumakunia kefwe olwokhuranga. Betsa okhukhwinjil'la ma babukule etsipunda tsiefwe ne nefwe bakhukhole okhuba abasumbabe.” 19Khe olwa boola m'muliango kweinyumba nibabool'la omukholi mbu, 20“Omwami, ifwe khwetsakhwo yino okhukula ebiakhulia. 21Olwa khwoola habundu hokhuhulukhila nikhuli khuluchendo lwokhukalukha ingo, khwekula amakunia kefwe ne buli siamulala khu ifwe nanyoola amapesa kaake mwikunialie – kosi butswa obwakali. Khukakalusisie khuibe. 22Khandi khwitsile nende amapesa kandi okhukula ebiakhulia bindi. Sikhumanyile niwina owakalusia amapesa mumakunia kefwe tawe.”
23Omukholi uyo naboola mbu, “Murahenda emioyo nohomba okhuria tawe. Nyasaye wenywe, Nyasaye wa papa wenywe niye owamureela amapesa mumakunia kenywe. Ise ndanyooye omurungo kwenywe.” Ma nabaleer'ra Simioni.
24Omukholi uyo nahila abasiani yabo munyumba. Nabahelesia amaatsi besaabe ebilenje biabwe, ma naliisia etsipunda tsiabwe. 25Barechekha ebihanwa biabwe okhuhaana khu Yosefu olwa yeetsa khubilibwa biam'basu, sichila bali nibabooleywe mbu beetsa okhulia n'naye. 26Olwa Yosefu yoola munyumba, bamuhil'la ebihanwa ne nibamwinamila bosi. 27Nabareeba nibali abalamu ma naboola, “Mwambool'la aka omusakhulu papa wenywe – ali mbwena? Asili omulamu?”
28Nibakalusia mbu, “Omurumikhiliwo papa wefwe, asili omulamu khandi ali bulahi.” Ma nibasikama nibamwinamila.
29Olwa Yosefu yalola amwabowe, Benjameni, yaboola mbu, “Uno khane niye omusiani wenywe omukhokosi, owamwambool'la? Nyasaye akhulaamile ikhabi, omusiani wanje.” 30Ma Yosefu narula matetekhana, sichila omwoyokwe kwalimwo amahofu amenji khumwana wabwe, niyenjila musikoti sindi natsia okhulakaya. 31Olwayali niyakhosia m'moni yakalukha niyetinyia ma nalaka mbu ebiakhulia bileerwe. 32Yosefu yaheelwa ebiakhulia khumesa ndala ne abasiani babwe khumesa yindi. Abaamisiri abalimwo baheelwa ebiakhulia khumesa yindi sichila balola nomusilo okhulia halala nende Abayahudi. 33Abasiani yabo bali nibekhaye khumesa eyali nehenjele Yosefu, nibeloosisie okhulondokhana nelikhula liabwe, okhurula khumukhulundu okhwola khumukhokosi. Olwabalola singa bali nibekhaye nibahengana ma nibahuka. 34Baleer'rwa ebiakhulia okhurula khumesa ya Yosefu, ne Benjameni yaheebwa ebiakhulia esiakharaano okhuyomba abandi bosi. Ma nibalia khandi nibanywa okhwola nibakholwa.
Àwon tá yàn lọ́wọ́lọ́wọ́ báyìí:
OKHUCHIAKA 43: EBAIBO
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©Bible Society of Kenya, 2019