OKHUCHIAKA 36
36
Tsinzibulo tsia Esau
(1 Aketsi. 1:34-37)
1Tsino nitsio tsinzibulo tsia Esau, owalangwa khandi Edomu. 2Esau yateesia abakhasi Abakanaani, Ada, omukhaana wa Eloni Omuhiti, nende Oholibama, omukhaana wa Ana omwana wa Sibeoni, Omuhiwi,#Okhuch. 26:34 3ma nende Basematsi omukhaana wa Ishimaeli mbotsonyene Nebayotsi.#Okhuch. 28:9 4Ada yebula Elifasi, Basematsi niyebula Reueli, 5ne Oholibama naye niyebula Yeushi, Yalamu nende Kora. Yaba bosi nibo abasiani ba Esau, ababakhasibe bamwibul'la nali musibala sia Kanaani.
6Ma Esau nabukula abakhasibe, abaanabe abasiani nabakhaana, nende abandu bosi abemwitaala, halala nende emirukochie chiosi ma nende emianduchie echiali eminji echiayanyoola musibala sia Kanaani, natsia musibala siehale okhurula khu Yakobo. 7Yarula sichila esibala siabalimwo sisiali esiabanyala okhumenyamwo bosi tawe, siali nende emiruko eminji ma sibaali abanyala okhumenya halala tawe. 8Ma Esau namenya musibala siebikulu esia Edomu.
9Tsino nitsio tsinzibulo tsia Esau, kukanyene Abaedomu. 10Ada yebula Elifasi ne Basematsi niyebula Reueli. 11Elifasi yali nabasiani barano, Temani, Omari, Sefo, Gatamu nende Kenasi. 12Ne okhurula mumukhasi undi Timina yamala niyebula Amaleki. 13Reueli naye yali nabaana bane, Nahatsi, Sera, Shama, nende Misa.
14Oholibama mukha Esau, omukhaana wa Ana wa Sibeoni yebula abaana bataru. Yeushi, Yalamu nende Kora.
15Tsino nitsio tsinzibulo etsiarula khu Esau. Elifasi, omwana wokhuranga wa Esau yali kukanyene tsinzibulo tsilondakhwo tsino: Temani, Omari, Sefo, Kenasi, 16Kora, Gatamu, nende Amaleki. Bano bosi nolwibulo lwarula mu Ada mukha Esau.
17Omwana wa Esau owalangwa Reueli yali kukanyene tsinzibulo tsilondakhwo tsino: Nahatsi, Sera, Shama, nende Misa. Bano bosi nolwibulo lwarula mu Basematsi mukha Esau.
18Tsinzibulo tsilondakhwo tsino natsio tsiarula mu Oholibama mukha Esau, omukhaana wa Ana: Yeushi, Yalamu, nende Kora. 19Tsinzibulo tsino tsiosi tsiarula khu Esau.
Tsinzibulo tsia Seiri
(1 Aketsi. 1:38-42)
20Abaana ba Seiri Omuhori, beene esibala sia Edomu bebulwa mutsinzibulo tsilondakhwo tsino: Lotani, Shobali, Sibeoni, Ana, 21Dishoni, Eseri nende Dishani.
22Lotani naye yali kukanyene ebilibwa bia Hori nende Hemani. Lotani yali na mbotsonyene owalangwa Timina.
23Shobali yali kukanyene ebilibwa bia Alawali, Manahatsi, Ebali, Shefo nende Onamu.
24Sibeoni yali nabasiani babili, Aya nende Ana. Ana niye owanyoola esitaho siamaatsi amayu musitsiimi olwa yali niyayanga etsipunda tsia samwana. 25Ana yali samwana Dishoni 26naye niyebula Hemedani, Eshebani, Itsirani nende Cherani.
27Eseri yali kukanyene ebilibwa bia Bilihani, Saawali nende Akani.
28Dishani yali kukanyene ebilibwa bia Usi nende Arani.
29Tsino netsinzibulo etsiarula mu Babahori abomusibala sia Edomu: Lotani, Shobali, Sebeoni, Ana, 30Dishoni, Eseri nende Dishani.
Abaruchi ba Edomu
(1 Aketsi. 1:43-54)
31Bano nibo abaruchi abaruka esibala sia Edomu omuruchi undi wosi nasili okhurukakhwo abaana ba Isiraeli tawe. 32Bela omusiani wa Beori okhurula Dinihaba. 33Olwa yafwa, Yobabu omusiani wa Sera okhurula Bosora yaruka. 34Olwa Yobabu yafwa ne Hushamu okhurula Temani naruka. 35Olwa Hushamu yafwa, Hadadi omusiani wa Bedadi okhurula Awitsi, owaleka Midiani musitsiimi sia Moabu, yaruka musilenjesie. 36Olwa Hadadi yafwa, Samula okhurula Masireka naruka musilenjesie. 37Samula olwa yafwa, Shauli okhurula Rehobotsi khumuchela kwa Efurate yaruka. 38Olwa Shauli yafwa ne Bali Hanani omusiani wa Akibori naruka musilenjesie. 39Olwa Bali Hanani yafwa, Hedari okhurula Dau owomukhasiwe owalangwa Mehetabeli omukhaana wa Metaredi, omwitsukhulu wa Mesahabu, naruka musilenjesie.
40Kano niko amera kabemeli betsinzibulo etsiarula khu Esau, okhulondokhana khubilibwa biabwe, nende habundu habwe okhulondokhana obwa amera kabwe kali: Timina, Aliwa, Yetsetsi, 41Oholibama, Ela, Pinoni, 42Kenasi, Temani, Mibisari, 43Magadieli nende Iramu.
Àwon tá yàn lọ́wọ́lọ́wọ́ báyìí:
OKHUCHIAKA 36: EBAIBO
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©Bible Society of Kenya, 2019