OKHUCHIAKA 30
30
1Nebutswa Raheli siyayibul'lakhwo Yakobo abaana tawe, ma nasiendekhela omukhaana wabwe ne nabool'la Yakobo mbu, “Norambakhwo abaana, ise nafwe.”
2Yakobo nasinyikhila Raheli ma naboola, “Ise sinyala okhubukula obweyangu bwa Nyasaye tawe. Ye niye owakhwima abaana.”
3Raheli namubool'la mbu, “Omukhaana undiyilanga Biliha ngwoyu, obe n'naye ma yanzibul'le omwana, khe nase nangwekhwo mama okhubir'ra muye.” 4Ma nahaana Biliha khumusaatsawe ma naba n'naye. 5Biliha nabelekha ma niyebul'la Yakobo omwana omusiani. 6Raheli naboola, “Nyasaye ungobokheeye. Uhuliye lisaayo lianje ma umbelesisie omwana omusiani.” Ma namukulikha Dani. 7Biliha nabelekha khandi ma niyebul'la Yakobo omwana wakhabili. 8Raheli naboola, “Ndalwaan'ne nende omukhaana wefwe libwi likali, nebutswa ndechele.” Ma namukulikha Nafutali.
9Olwa Lea yalola mbu wasinjila okhwibula, yabukula omutiiyiwe Silipa namuhaana khu Yakobo abe omukhasiwe. 10Silipa niyebul'la Yakobo omwana omusiani. 11Lea naboola mbu, “Ndi neikhabi indahi,” ma namukulikha Gadi. 12Silipa niyebul'la Yakobo omwana undi omusiani, 13ma Lea naboola mbu, “Ndi nobusangali obwinji. Abakhasi basianje nabanangenge owobusangaali,” ma namukulikha Asheri.
14Mumatukhu kokhuchesa ingano Rubeni yatsia m'mukunda ne nanyoolamwo tsindula, ne naleer'ra Lea, nyina. Raheli nareeba Lea mbu, “Mbeekhwo khutsindula tsiomwanawo yitsio.”
15Lea namukalusia mbu, “Ibe ololanga okhubukula omusaatsa wanje sikhuhel'le tawe? Luno wenyanga khandi unuule tsindula tsiomwana wanje.” Raheli naboola, “Niumbakhwo tsindula tsiomwanawo ne okona nende Yakobo obutukhu buno bwosi.”
16Olwa Yakobo yarula m'mukunda khubwiile Lea yatsia okhumwakan'na naboola mbu, “Leelo witse okhukona owanje sichila khukul'le netsindula tsiomwana wanje.” Ma Yakobo naba n'naye obutukhu yibwo.
17Nyasaye yakalusia amasaayo ka Lea, ma nabelekha niyebul'la Yakobo omusiani wakharaano. 18Lea naboola, “Nyasaye umbeeye omukabwa kwanje, sichila ndahaana omutiiyi wanje khumusaatsa wanje,” ma nakulikha omwanawe Isakari. 19Lea nabelekha khandi ma niyebul'la Yakobo omusiani wakhasasaba. 20Naboola, “Nyasaye umbeeye esihanwa esilahi. Leelo omusaatsa wanje nayambuchil'le sichila mwibuliye abasiani basasaba,” ma namukulikha Sabuloni. 21Olunyumakhwo yebula omwana omukhaana, namukulikha Dina.
22Nyasaye yamala niyetsul'la Raheli, nakalusia amasaayoke ma namwikul'la okhunyoola abaana. 23Yabelekha ma niyebula omwana omusiani. Naboola mbu, “Nyasaye umbinisiekhwo tsisoni ma umbeeye omwana omusiani. 24OMWAMI kenyekhanga yameete omusiani undi,” ma namukulikha Yosefu.
Yakobo yalakana nende Labani akomurungokwe
25Olwa Yosefu yali niyebuywe, Yakobo yabool'la Labani, “Useebule ngalukhe musibala siefwe. 26Umbelesie abakhasi banje nende abaana banje abandanyoola khulwokhukhutiiyila, ma rule ngalukhe ingo wefwe. Ibe umanyile singa ndakhutiiyila obulahi.”
27Labani namubool'la mbu, “Ndaluutsi mbu OMWAMI yambelesia ikhabi khulweibe. 28Mbool'la omurungo okwawakhenya nase khurunje.” 29Yakobo nakalusia mbu, “Ibe umanyile singa obwandakhutiiyila khandi singa obwebiayobio biakaasa mubulindi bwanje. 30Situ siawali n'nasio nisili okhwitsa siakhula maleelo nesikali okhusila, ne OMWAMI wakhulaamila tsikhabi hosi ahandabeyenje. Luno tsinyinga tsiol'le etsianase nyenyanga ndekhabilekhwo ebiowanje.”
31Labani namureeba mbu, “Wenyanga khurunje sina?”
Yakobo nakalusia mbu, “Sinyenyakhwo omurungo kwosi tawe. Nanzilil'le okhwaya ebiayobio nikali wakhahuchil'la kano: 32Mbir're mubiayo bibio biosi ninzahulamwo amakondi amamwamu nende tsimbusi tsiamapalapala nende etsiamakondokondo. Yikwo nikwo omurungo okwanaumbelesie. 33Okhurula olwaleelo naomanyenje mbu ndi omusubilwa. Olwa nawiitsenje okhukoola omurungo kwanje ne nonyoola likondi elirali limwamu nohomba imbusi erali eyamapalapala nohomba eyamakondokondo ne omanya mbu biebwa.”
34Labani nakalusia mbu, “Mbuchiliye. Khulakhola singa obwobooye.” 35Ne litukhu yilio Labani yaahula tsimbusi etsikhole etsiali nende obukondokondo nende tsikhasi tsiosi etsiali namapalapala nohomba tsindafu, khandi niyahula amakondi amamwamu. Nabihaana mumakhono kabasiani babe, 36ma natsia ehalekhwo okhurula khu Yakobo nende ebiayo, singa oluchendo lwamatukhu kataru. Yakobo yatsilil'la okhwaya ebiayo bia Labani ebiali nibisikaaye.
37Yakobo yabukula tsisaka tsimbisi etsiomulibina, etsiomuluusi nende etsiomwaramoni, natsikhoboolakho emikhoosi emilafu chilolekhe khutsisaka tsana. 38Nasinjisia tsisaka yitsio imbeli webiayo habundu habianyweelanga amaatsi. Yabiraho sichila ebiayo bienyanga okhuruuma olwa bietsanga okhunywa amaatsi. 39Khe olwe biayo biebul'langa imbeli wetsisaala yitsio, biebulanga ebimeme ebiobukondokondo khandi ebiamapalapala.
40Yakobo yabukhanianga amakondi okhurula mutsimbusi ma akahenjia elubeka wamakondi ka Labani akali nebipalapala nende amamwamu kalinji. Ma munjila iyio yabukhania ebiayo bibie, naratsokania nende ebia Labani tawe.
41Olwebiayo ebikhomefu biaruumanga, Yakobo yaretsanga tsisaka imbeli wabio ahembi nende habianyweelanga amaatsi, khe bibe ebinyala okhwibul'la mutsisaka yitsio. 42Nebutswa siyareetsanga tsisaka imbeli webiayo ebiang'aha tawe. Ma nikanyolekha mbu Labani ali nende ebiayo ebing'ahu ne Yakobo ali nende ebiayo ebikhomefu. 43Munjila yino Yakobo yamala naba omuhinda. Naba nende ebiayo ebinji, abakholi, tsingamia nende etsipunda.
Àwon tá yàn lọ́wọ́lọ́wọ́ báyìí:
OKHUCHIAKA 30: EBAIBO
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©Bible Society of Kenya, 2019