OKHURULA 6
6
1Ma OMWAMI nabool'la Musa, “Luno witsa khulola akanzia okhukhol'la omuruchi. Nzia okhumuhakia alakhuule abandu banje batsie. Khandi nzia khumuhakia abakhunge okhurula musibala sisie.”
Nyasaye yalanga Musa
2Nyasaye yal'loma khu Musa naboola mbu, “Ise nise OMWAMI.#Okhuch. 17:1; 28:3; 35:11; Okhur. 3:13-15 3Ndebisukhila Aburahamu, Isaka nende Yakobo singa Nyasaye Wokhunyala Biosi, nebutswa sindayemanyiakhwo khubo muliira lianje litsienukhu, mbu OMWAMI tawe. 4Khandi ndalomba indakano yanje ninabo nindesuha okhubahelesia esibala sia Kanaani esiabamenyamwo singa abali ebucheni. 5Luno mal'le okhuhul'la okhubinda khwa Abaisiraeli, aba Bamisiri bara mubuhambe, ma nzitsuliye indakano yanje. 6Kho bool'la Abaisiraeli mbu mboolanga khubo mbu, ‘Ise nise OMWAMI; namununule ma namukhole abaluukhe okhurula mubuhambe bwenywe khu Bamisiri. Nanginge omukhono kwanje kwobunyali okhuhaana esinyasio esikali khu Bamisiri ma nenywe namusoole. 7Namukhole abandu banje, nase nambe Nyasaye wenywe. Namumanye mbu ise nise OMWAMI Nyasaye wenywe olwa namununule okhurula mubuhambe Emisiri. 8Namuleere musibala esiandesuha okhuhelesia Aburahamu, Isaka nende Yakobo ne nasihaane khu inywe sibe omukabwa kwenywe. Ise nise OMWAMI!’ ” 9Musa yabool'la Abaisiraeli amang'ana yaka nebutswa sibamuhulila tawe, sichila emioyo chiabwe chiali nichisaaliye khulwo okhusandibwa khwabwe mubuhambe.
10Ma OMWAMI nabool'la Musa mbu, 11“Tsia obool'le omuruchi we Misiri mbu okhwola alakhuule Abaisiraeli barule musibala sisie.”
12Nebutswa Musa nakalusia mbu, “Kata Abaisiraeli sibeetsa khumbul'la tawe, khe omuruchi we Misiri naye nayambul'le mbwena? Ise sindamanya okhul'loma tawe.”
13OMWAMI, yabool'la Musa nende Haruni mbu, “Bool'la Abaisiraeli nende omuruchi we Emisiri mbu mal'le okhumuha obunyali okhuhiinia Abaisiraeli Emisiri.”
Obwibulani bwa Musa nende Haruni
14Bano nibo abali abemeli betsinyumba tsiabwe. Abasiani ba Rubeni omusiani wa Yakobo omukhulundu bali; Hanolei, Palu, Hesironi, nende Karimi: Bino nibio ebilibwa bia Rubeni. 15Abasiani ba Simioni bali Yemweli, Yamini Ohadi, Yakini, Sohari, nende Shauli omusiani womukhasi Mukanaani. Yibi nibio ebilibwa bia Simioni. 16Kano niko amera kabasiani ba Lawi singa kaloosibwa: Gerishoni, Kohatsi nende Merari. Lawi yamenya musibala emihika emia ndala namakhumi kataru nachine nachitaru.#Obub. 3:17-20; 26:57-58; 1 Aketsi. 6:16-19 17Gerishoni yali nabasiani babili: Libini nende Shimei bebula abandu abenji. 18Kohatsi yali nabasiani bane: Amuramu, Isare, Heburoni nende Usieli. Kohatsi yamenya emihika emia ndala namakhumi kataru nachitaru. 19Merari yali nabasiani babili: Mahili nende Musi. Ibi nebilibwa bia Lawi nende tsinzibulo tsiabwe.
20Amuramu yateesia omukhaana wanga samwana olangwanga Yakobedi owamwibul'la Haruni nende Musa. Amuramu yamenya emihika emia ndala namakhumi kataru nachine nachitaru. 21Isare yali nabasiani bataru: Kora, Nefeki, nende Sikiri. 22Usieli yali nabasiani bataru: Mishaeli, Ekisafani, nende Sitiri.
23Haruni yateesia Elisheba omukhaana wa Aminadabu mbotso nyene Nahashoni. Elisheba yebul'la Haruni Nadabu, Abihu, Eliasa, nende Itsamari. 24Kora yali nabasiani bataru: Asiri, Elikana, nende Abiasafu, nibo abali abakuka bebilibwa bia Kora. 25Eliasa omusiani wa Haruni yateesia omukhaana wa Putieli naye namwibul'la Fenihasi. Bano nabemeli betsinyumba nende olwibulo lwa Lawi.
26Haruni nende Musa nibo abo MWAMI yabool'la mbu, “Hinie tsinzibulo tsia Isiraeli Emisiri.” 27Nibo abasaatsa ababool'la omuruchi we Misiri alakhuule Abaisiraeli
OMWAMI yaruma Musa nende Haruni okhutsia Khumuruchi we Misiri.
28Olwo MWAMI yal'loma nende Musa nali musibala sie Misiri, 29yamubool'la mbu, “Ise nise OMWAMI. Obool'le omuruchi we Misiri kosi akakhubool'la.”
30Nebutswa Musa yakalusia mbu, “Umanyile obulahi mbu ise sin'nomanga bulahi tawe, nisina esiakhachila omuruchi yambul'le?”
Àwon tá yàn lọ́wọ́lọ́wọ́ báyìí:
OKHURULA 6: EBAIBO
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©Bible Society of Kenya, 2019