OKHURULA 4
4
Nyasaye yaha Musa obunyali bwokhukhola akamangalimwa
1Kho Musa nakalusia OMWAMI mbu, “Nikakhaba Abaisiraeli sibakhaasubila tawe ma babule okhuhulila amang'ana akambabool'la, khe ndakhakhola sina nibaba nibaboola mbu ibe siwali okhumbisukhila tawe?”
2Ma OMWAMI namureeba mbu, “Nisina esioli n'nasio m'mukhono yisio?”
Musa namukalusia mbu, “Ne indabusi.”
3OMWAMI naboola mbu, “Chifuube hasi.” Olwa Musa yali nachifuubile hasi, yakalukhana nekwa inzokha ma Musa nachiilukha. 4Ma OMWAMI nabool'la Musa mbu, “Inama hasi ochibukul'le enamusila.” Ma Musa niyenama nachibukula ma nekalukhana okhukwa indabusi khandi. 5OMWAMI namubool'la mbu, “Okhole mbwo okhumanyia Abaisiraeli mbu OMWAMI Nyasaye wabakuka babwe, Nyasaye wa Aburahamu, Isaka nende Yakobo yali okhubisukha khuibe.”
6OMWAMI khandi nabool'la Musa mbu, “Ore omukhono kukwo hasilifu mukanzu yawebikhile.” Musa yakhola mbwo, ne olwa yakuhiniamwo, kwali nikukwiye obuchele ma nikulabile tser're. 7Ma OMWAMI namubool'la mbu, “Kalusia omukhono kukwo hasilifu mwekanzu yiyo.” Yakhola mbwo ne olwa yakuhinia esioba, kwakalukha omulamu nikufwanana nende omubili kundi kwosi. 8OMWAMI namubool'la mbu, “Nibaba nibarakhusubila, nohomba okhusubila esilole siokhuranga, khe esiakhabili yisi nasichile nabasubile. 9Nikakhaba sibakhakhusubila khulwe ebilolelo b'bili yibi ma basuule okhuhul'la akobabool'la, otahe amaatsi okhurula m'muchela kwa Naili ma okasundule hasi khumaloba. Amaatsi yako keetsa khukalukhana okhukwa amatsahi.”
10Nebutswa Musa naboola mbu, “OMWAMI oraaruma ise tawe. Ise sindi omul'lomi omulwenyukhu tawe, khandi sili butswa mbwo kata okhurula nochiaka okhul'loma nase. Ndi owesiboyo khandi owesilimi.”
11OMWAMI namubool'la mbu, “Niwina ohetsanga omundu omunwa kwokhul'loma? Niwina omukholanga okhuba owesikala marwi nohomba omusilu? Niwina ochilanga nalola nohomba naba omubofu? Ise OMWAMI nise okholanga mbwo. 12Luno tsia; nakhukhonye okhul'loma khandi nakhubol'le akoboola.”
13Nebutswa Musa nakalusia mbu, “Tawe OMWAMI, ruma omundu undi.”
14Khulwe yaka OMWAMI yasinyikhila Musa ma naboola mbu, “Ne omusiani wenywe Haruni Omulawi saliho? Manyile nomul'lomi omulahi. Kata khandi luno yetsanga okhukhwakan'na ne yeetsa okhuyanzisibwa okhukhulola. 15Onyala okhul'loma n'naye ma omubool'le akayenyanga aboole. Namukhonye mwesi babili okhul'loma khandi namubool'le akamukwana okhukhola. 16Niye owanokhul'lomelenje khu bandu. Nawe nobe singa Nyasaye okhumubool'la akakwana okhuboola. 17Otsie neindabusi m'mukhono kukwe, okhuba nochirumikhilenje okhukhola akamangalimwa.”
Musa yakalukha Emisiri
18Kho Musa yakalukha khu Yetsero kukanyene ma namubool'la mbu, “Yanza umbuchil'le ngalukhe khubekho banje abali Emisiri ndole nibaba nibasili mwoyo.” Yetsero yahuchil'la ma namuseebula.
19Olwa Musa yali nasili musibala sia Midiani OMWAMI yamubool'la mbu, “Kalukha Emisiri okhuba bosi abarunanga okhukwira bamala okhufwa.” 20Kho Musa nabukula omukhasiwe nende abasiani baabe, nabaninia khupunda ma nachaaka okhutsia Emisiri halala n'nabo, nachingile indabusi ya Nyasaye yali namubooleye abukule.
21Khandi OMWAMI nabool'la Musa mbu, “Luno olwotsitsanga Emisiri witsul'le okhukhola imbeli womuruchi akamangalimwa kosi akandakhuhelesia obunyali okhukakhola. Nebutswa nakhole omwoyo kwomuruchi okhuba omutinyu naye sinalakhuule abandu batsie tawe. 22Nawe okhwola omubool'le mbu Ise OMWAMI mboolanga mbu, ‘Isiraeli nomusiani wanje omukhulundu. 23Ndakhubooleye olakhuule omusiani wanje atsie khundekayakaya nebutswa nawe wasuuye. Luno nzitsanga okhwira omusiani uwo omukhulundu!’ ”#Okhur. 12:29
24Olwa bali nibakhoola habundu hokhuhuluukha nibali khuluchendo lwokhutsia Emisiri, OMWAMI yakaana na Musa ma naba ahembi okhumwira. 25-26Ma Sipora, omukhasiwe, nabukula lichina eliochi naseba likhoba lieikulu lio omusianiwe, ma nalitisia khubilenje bia Musa. Khulwo omulukha kwees'sebo Sipora yabool'la Musa mbu, “Oli omusaatsa we esitsayi khu ise.” Kho OMWAMI nalekha okhwira Musa.
27Olwa yako kekholekha, OMWAMI yali nabooleye Haruni mbu, “Tsia musitsiimi wakaan'ne Musa.” Kho yatsia okhumwakan'na hasikulu esitsienukhu; ne olwa yakaana n'naye yamufumbel'la ma namutsunzuna. 28Musa yabool'la Haruni kosi ako MWAMI yali namubooleye olwa yamuruma okhukalukha Emisiri. Khandi yamubool'la akamangalimwa ako MWAMI yali namulachile okhukhola. 29Kho Musa nende Haruni batsia Emisiri ma nibabunjikha halala abemeli ba Baisiraeli bosi. 30Haruni yababool'la kosi ako MWAMI yali nabooleye Musa, ma Musa nakhola akamangalimwa kosi imbeli wabandu. 31Bakasubila ne olwa bahul'la mbu OMWAMI yali nabetseeye khandi yali naluutsi obwa bakhupibwanga esibi, basikama hasi ma nibamwekayakaya.
Àwon tá yàn lọ́wọ́lọ́wọ́ báyìí:
OKHURULA 4: EBAIBO
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©Bible Society of Kenya, 2019