योएल 3
3
1“क्यूँके सुणो, जिन दिनां म्ह अर जिस बखत मै यहूदा अर यरुशलेम वासियाँ नै गुलाम्मी तै बोहड़ा ले आऊँगा, 2उस बखत मै सारी जात्तां नै कठ्ठा करकै यहोशापात की तराई म्ह ले जाऊँगा, अर ओड़ै उनकै गैल अपणी प्रजा यानिके अपणे खास भाग इस्राएल के बारै म्ह जिसनै उन ताहीं जात्ति-जात्ति म्ह तित्तर-बितर करकै मेरे देश ताहीं बाँट लिया सै, उनतै मुकद्दमा लड़ूँगा। 3उननै तो मेरी प्रजा पै चिट्ठी गेरी, अर एक लड़का वेश्या के बदले म्ह दे दिया, अर एक लड़की बेचकै दाखमधु पिया सै।”
4“हे सोर, अर सीदोन अर पलिश्तीन के सारे प्रदेशों, थमनै मेरे तै के काम? के थम मेरे ताहीं बदला द्योगे? जै थम मेरे ताहीं बदला भी द्यो, तो मै तावळा-ए थारा दिया होया बदला, थारे ए सिर पै गेर दियुँगा। 5क्यूँके थमनै मेरा चाँदी-सोन्ना ले लिया, अर मेरी आच्छी अर मनभावणी चिज्जां ताहीं अपणे मन्दरां म्ह ले जाकै धर लिया सै; 6अर यहूदियाँ अर यरुशलेमियाँ ताहीं यूनानियाँ के हाथ इस करकै बेच दिया सै के वे अपणे देश तै दूर करे जावैं। 7इस करकै सुणो, मै उननै उस जगहां तै, जड़ै के जाण आळयां के हाथ थमनै उन ताहीं बेच दिया, बुलाण पै सूं, अर थारा दिया होया बदला, थारे ए सिर पै गेर दियुँगा। 8मै थारे बेटे-बेट्टीयाँ नै यहूदियाँ के हाथ बिकवा दियुँगा, अर वे उननै शबाइयाँ के हाथ बेच देवैंगे जो दूर देश के रहण आळे सैं; क्यूँके यहोवा नै यो कह्या सै।”
9जात्ति-जात्ति म्ह यो प्रचार करो, युद्ध की त्यारी करो, अपणे शूरवीरां नै उभारो। सारे योद्धा धोरै आकै लड़ण नै चढैं। 10अपणे-अपणे हळ की फाळ नै पीटकै तलवार, अर अपणी-अपणी दात्ती ताहीं पीटकै बर्छी बणाओ; जो कमजोर हो वो भी कह्ये, मै वीर सूं#3:10 जो कमजोर हो वो भी कह्ये, मै वीर सूं यो सृजनहार के बिरुध्द विश्व-शक्तियों का आखरी संगठन सै, परमेसवर के बिरुध्द माणस के विद्रोह का आखरी दृश्य।।
11हे च्यांरु और की जात-जात के माणसों, फुर्ती करकै आओ अर कठ्ठे हो जाओ। हे यहोवा, तू भी अपणे शूरवीरां नै ओड़ै ले जा। 12जात्ति-जात्ति के माणस उभर कै चढ़ जावै अर यहोशापात की तराई म्ह जावैं, क्यूँके ओड़ै मै च्यांरु और की सारी जात्तां का न्याय करण नै बैठूँगा।
13दात्ती लगाओ, क्यूँके खेत पक ग्या सै। आओ, दाख रौंदो, क्यूँके हौद भरग्या सै। रसकुण्ड उमड़ण लाग्गै, क्यूँके उनकी बुराई घणी बड़ी सै।
14निबटारे की तराई म्ह भीड़ की भीड़ सै! क्यूँके निबटारे की तराई म्ह यहोवा का दिन धोरै सै#3:14 यहोवा का दिन धोरै सै परमेसवर कै बिरुध्द उनका कठ्ठा होणा उसके आगमन का संकेत सै।। 15सूरज अर चाँद अपणी-अपणी रोशनी न्ही देवैंगे, अर ना तारे चमकैगें।
16अर यहोवा सिय्योन तै गरजैगा, अर यरुशलेम तै बड़ा शब्द सुणावैगा; अर अकास अर धरती थरथरावैंगे। पर यहोवा अपणी प्रजा कै खात्तर शरणस्थान अर इस्राएलियाँ कै खात्तर गढ़ ठहरैगा।
17इस तरियां थम जाणोगे के यहोवा जो अपणे पवित्र पर्वत सिय्योन पै वास करे रहवै सै, वोए म्हारा परमेसवर सै। अर यरुशलेम पवित्र ठहरैगा, अर परदेशी उस म्ह होकै फेर न्ही जाण पावैगें।
18अर उस बखत पहाड़ां तै नया दाखमधु टपकण लागैगा, अर टील्यां तै दूध बहण लागैगा, अर यहूदा देश के सारे नाळे पाणी तै भर जावैंगे; अर यहोवा के भवन म्ह तै एक चोवा फूट लिकड़ैगा, जिसतै शित्तीम की घाटी सिंची जावैगी।
19यहूदियाँ पै हुड़दंग करण कै कारण, मिस्र उजाड़ अर एदोम उजड़या होया मरुस्थल हो जावैगा, क्यूँके उननै उनके देश म्ह निर्दोष का खून करया था। 20पर यहूदा सदा अर यरुशलेम पीढ़ी-पीढ़ी ताहीं बण्या रहवैगा। 21क्यूँके उनका खून, जो इब ताहीं मन्नै पवित्र न्ही ठहराया था, उसनै इब पवित्र ठहराऊँगा, क्यूँके यहोवा सिय्योन पर्वत पै वास करै सै।
Àwon tá yàn lọ́wọ́lọ́wọ́ báyìí:
योएल 3: BGC
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.