Matewuzhu 9
9
Yinsa oninvonisa nasupiyaani
1Yinsa noopakhira mmwaatiya, khulokha ntthatta khweetta sitati ya owawe. 2Atthu akina khuntiisa nasupiyaani attattikheliwe va nrepa. Wakathi ooniyeevo amini ya atthu apale antiisiyeeyo, khumuuza nasupiyaani otule yoori: “Ofurahi mwanaka! Twampi zawo zaswaamihiwa.”
3Noolupa toowo anamanozela a kano khwaaza waapa araka: “Ntthu otu ontta okufuru!”
4Yinsa noojuwa etthu aari wuupuwelaaye yo, khuwooza yoori: “Mwaasa wa niini mweeyo muupuwelaka nroho mweenu vitthu zootakhala? 5Apho yookhweya ti tiivi? Olupa yoori: ‘Waswaamihiwa twampi zawo,’ ama olupa yoori: ‘Olankhe weettette?’ 6Mwijuwe yoori Mwaana wa Pinaatamu onaaye ruhusa ya oswaamihi twampi vathi apha,” khumuuza nasupiyaani yoori: “Olankhe, othuule nrepa lawo olawe owawo.” 7Ye khulankha khusala alawa owawe. 8Paata ya atthu woona vitthu epile khuwaapattha woova, khunsifu Nluku, awenkhiyeeyo anaatamu ofwalume nkhama opo.
Okhuweliwa wa Matewuzhu
9Elottelanaka Yinsa khulaawo okhule waya, khumoona mwinyi mmote aniitthiwaaye Matewuzhu eekhaliye vahali laari oriphiwaavo lumpuru, khumuuza yoori: “Okilotte!” Ye khulankha khunlotta.
10Yinsa eekhaliyeevo va meeza owawe Matewuzhu, anamariphisa lumpuru enkeene na anatwampi aatiiye khwiikhala attaapho vamote na anakhiyoni awe. 11Mafwarizeewu nawoona toole khuwoozela anakhiyoni awe araka: “Mwaasa wa niini mwaaliimu enu ajaka na anamariphisa lumpuru na anatwampi?”
12Yinsa noosiila, khulupa yoori: “Akumi khaninhithajiya tothoro, ila alwele. 13Mwilawe mwanozeliwe maana a nttakhuzi linlupaaye yoori: ‘Kintakha tthakaraka, khahiyo twaha.’ Maana miiyo akawaateeliye anashariya, kawaateeliye anatwampi.”
Yinsa onuuzeliwa monkoni wa ofuka
14Aphano khuta anakhiyoni a Yaahaya omuuzela yoori: “Fweeyo na mafwarizeewu ninfuka, khi anakhiyoni awo khanfuka mwaasa wa niini?”
15Yinsa khujipu yoori: “Enretteya toovi ofuka anamalaleyiwa harusi, namaposa ari attaapho? Zinlawa zafiye siikhu anteelaaye othuuliwa mposi, siikhu zaya etthiipo anlawa afuke.
16“Khina antthaaye yaapa ya tarapu pheeya kuwo yoovutta, maana yaapa etile pheeya enttela ofutthela kuwo yoovutta etepe othaala. 17Wala khinthuliwa viinyu pheeya khutthiiwa nttompwiyo ya shapala ya raku, nooretta toowo entta ophutuwa, viinyu yiittikhe, ttompwiyo yaya eharipweye. Ila viinyu pheeya entthiiwa nttompwiyo pheeya, na toowo zoopiiri zintta opweheya.”
Owahi wa Yinsa monkoni wa olwele na ofwa
18Eettaka ottakhula etthiipile, khutavo nttunkhulu wa tiini, khunkokhorela na khumuuza yoori: “Mwanaka wankha afwa nasaapi ethiiti; nlawe wanttheele nkhono ontta osisimuwa.” 19Yinsa khulankha khusala anlotta na anakhiyoni awe.
20Attaaphale, aarivo muukha mmote aarina nyaakha khumi na miwiri emwiittikhaka taamu, khuta onyoko wa Yinsa khusapa ajapi yawe. 21Maana ye eettiye ojilakelela yoori: “Kisaparu ajapi yawe paasi, kintta ovona.”
22Azukuluwiyeevo Yinsa khumoona khumuuza yoori: “Ofurahi, mwanaka; amini yawo yoovonisa. Wakathi otthuupule muukha otule khwiiya woovona.”
23Afiiyeevo owawe nttunkhulu wa tiini khuwaasiila atthu eepaka liipo la miifwa na enkeene ari ootapanyeya, 24Yinsa khuwooza yoori: “Mwisaruwe! Otu khafweeni, ontta olala.” Ooshi khusala antheya. 25Paata ya atthu apale osusa, ye khuvira khunkholela nkhono, khunlansa. 26Hapari epile khumwazeyela nti opule wooshi.
Ovonisiwa wa ananhooni awiri na nanhittakhuli mmote
27Noolaavo aphale vaya, ananhooni awiri khusala anlotta akhuwaka araka: “Mwaana wa Daawuuda, noonele huruma!”
28Yinsa noofiya owawe, ananhooni apale khumwaattama, ye khuwoozela yoori: “Mweeyo mwinkhupali yoori miiyo kinaaye owahi wa oretta epo zaya?” Yo khujipu yoori: “Aayo, Mbwana!” 29Ye khuwaasapa maasho aya araka: “Erettikhane khwa matakhelo a amini yenu!” 30Maasho aya khwiiya oovona. Aphano Yinsa khuwooza saaneene yoori: “Phoole ahiiyevo anttelaaye ojuwa vitthu epi.” 31Yo khulawa, khumwaza hapari zaya epile nti opule wooshi.
32Paata ya olaavo aphale, namasheethwani ahaari ottakhulaaye khutiiseliwa Yinsa. 33Noomwiikara sheethwani otule, ye khwaaza ottakhula. Khuntti etile khwiiya yooshanka na khuri: “Khinarettikhane vitthu nkhama epi Ezirayiilu.”
34Ila mafwarizeewu aari olupa yoori: “Oniikara masheethwani khwa owahi wa mfwalume wa masheethwani.”
Anakhaazi vattitthiiru
35Yinsa aari weettetta sitati zooshi na mmwanttiwa. Ye aari osomisa mmasinakooka, na olaleya hapari monkoni wa Ofwalume wa Nluku, na ovonisa wakhula nanna ya marati na moolwele mawulweene a atthu. 36Paata ya woona khuntti zawaatta, khoonela huruma, maana zaari zoovelavela na zawanswiwa, nkhama pwittipwitthi zoohiina nshuki. 37Aphano khuwooza anakhiyoni awe yoori: “Wuurula nwulweene, ila anakhaazi vattitthiiru. 38Apho, mwinvekele Mweenyewe nshapa awaaperekhe anakhaazi a wuurula.”
Àwon tá yàn lọ́wọ́lọ́wọ́ báyìí:
Matewuzhu 9: eko
Ìsàmì-sí
Pín
Ṣe Àfiwé
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Wycliffe Bible Translators, Inc. All rights reserved.
