Matewuzhu 16
16
Mafwarizeewu na Masatukhi anveka alama
1Mafwarizeewu na masatukhi khumwaattama Yinsa khusala amweeza anvekelaka alama moote yoolankha pinkuuni.
2Ye khuwaajipu araka: “Amana njuwa liveva, mweeyo mwinraka, ‘Onttela wiiya wakathi wooshapweya, maana pinku ti yookhuttuwa,’ 3na leelo supu, ‘Enttela opuwa pheevo, maana pinku ti yookhuttuwa na yetaala mawiku.’ Mweeyo mwinjuwa otaphulela nanna ya pinku, ila khamwinjuwa otaphulela alama za wakathi! 4Khapila yootakhala na yooraruwa enveka alama ya minjuza, ila hatha alama khinlawa winkhiwa yohiiyi alama ya Yuunusa.” Aphano Yinsa khuwaalikha khulaavo aphale vaya.
Fwaramento ya Mafwarizeewu na Masatukhi
5Paata ya olokhela kaapu kiina ya pahari, anakhiyoni khusophela yoori asahawu othuula phaawu. 6Yinsa khuwooza yoori: “Mwiiye wa woona na mwiiyane phoole na fwaramento ya mafwarizeewu na ya masatukhi.” 7Anakhiyoni apale khwaaza onyakulisana atthaaporu, araka, “mwaasa aya ohithuuli phaawu.” 8Asiiliyeevo onyakulisana opule, Yinsa khuwooza yoori: “Atthu oopushuwa amini, mwaasa aya niini mwinyakulisanaka, mwaasa woohiina phaawu? 9Nalelo khina weeleyeni? Khamwimfikhiri phaawu epile thaanu miiyo kawaawanyeziyeeyo atthu alufu thaanu? Khelenke kavi mweetaaziyeezo? 10Wala khwa phaawu sapa aarafuniyeeyo atthu alufu nne, na zaari khelenke kavi mwaalokottheliyeezo? 11Nanna ni ehiniweeleyaanini yoori akaari owuuzani monkoni wa phaawu? Mwiiyane phoole na fwaramento ya mafwarizeewu na ya masatukhi.” 12Aphano khuweeleya yoori khaari owooza wiiyana phoole na fwaramento ya phaawu, ila khwa masomi a Mafwarizeewu na masatukhi.
Otukhuru wa Pheeturu
13Yinsa afiyeevo nti wa Sezareeya ya Filiipe, khuwoozela anakhiyoni awe yoori: “Atthu anlupanini monkoni wa Mwaana wa Pinaatamu?”
14Yo khunjipu yoori: “Akina anri o Yaahaya namoosa, akina, anri o Aliyaasi, akina anri o Jeremiiya ama mmote wa manapiyu.”
15Khurutela owoozela theenya yoori: “Khi mweeyo mwinri miiyo ki paani?”
16Simawu Pheeturu khujipu yoori: “Weeyo o Al-Masiihu, Mwaana wa Nluku wa ohaayi.”
17Yinsa khujipu yoori: “Wooshapweyiwa ti weeyo, Simawu mwaana wa Yoona! Maana vitthu zaya epi khuthoonyeziweeni ti pinaatamu, ila ti Paapa ariiye pinkuuni. 18Miiyo kiniwuuza yoori weeyo o Pheeturu, khwa liwe nttintthi kinjekana ojama wa Nluku na milako za ahera khazinlawa oshintta. 19Miiyo kiniwinkha efukulo ya ofwalume wa pinkuuni; etile onfukaaye vathi apha na pinkuuni entta ofukiwa, na etile weeyo onfukulaaye vathi apha na pinkuuni eniiya yoofukuliwa.” 20Aphano khuwaahirimiza anakhiyoni awe yoori ahiwooze akinoko yoori ye aari Al-Masiihu.
Yinsa onlupa ofwa wawe na osisimuwa wawe
21Waaza wakathi otthuupule, Yinsa khwaaza oweeleza anakhiyoni awe yoori yaari ohithajiya olawa Yeruzaleemu ahoochaniwe vitthu zawaatta mmakhono wa attunkhulu a tiini, mahaakhimu a tiini na anamanozela a kano, ooliiwe, siikhu ya ttaatthu asisimuwe. 22Aphano Pheeturu, khunkhuwelela othetekele khusala anshowera araka: “Wala Mbwanaaka aka! Khinteela wuurettikhanela!” 23Yinsa khuzukuluwa khumuuza Pheeturu yoori: “Osale nyuma waka, Epiliisi! Weeyo ori nkhama liwe liriiye ntarikhi mwaka yoori likikwakwattule, maana khunuupuwela vitthu za Nluku, ila za enaatamu.”
Anakhiyoni a Al-Masiihu ana yoothuula nsalapa aya
24Aphano Yinsa khuwooza anakhiyoni awe yoori: “Nkhama ntthu ontakha okilotta, ajikatthale mweenyewe, athuule nsalapa awe akilotte. 25Maana otule antakhaaye wuusuru ohaayi awe ontta ompwetheya, ila otule onimpwetheyaaye ohaayi awe mwaasa wa miiyo ontta wuusurukha. 26Nakataalikha, ena fwayita ni ntthu opattha fwayita olumwenku wooshi na khumwaashikha ohaayi awe? Ama niini pinaatamu antakhaaye opatilana nafusi yawe? 27Apho Mwaana wa Pinaatamu onlawa ate nnuuru wa Papaawe na malayikha awe, amwinkhe phakari wakhula ntthu khwa etile arettiyeeyo. 28Miiyo kiniwuuzani khweele yoori, awaapho apha atthu akina ahinttelaaye ofwa ahimooneni khapula Mwaana wa Pinaatamu ataaka muufwalume mwawe.”
Àwon tá yàn lọ́wọ́lọ́wọ́ báyìí:
Matewuzhu 16: eko
Ìsàmì-sí
Pín
Ṣe Àfiwé
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Wycliffe Bible Translators, Inc. All rights reserved.
