Ta je Vejec 31
31
1JE hofuc bo Kemuela than; wale hofuc ame ûne kâu hnen hinyen.
2Nokuk lö, ieû? nokuk lö, ûheny û hnyi hnyekuk, ieû?
Nokuk lö, oge bi khöbi gan, ieû?
3Ca ham hwegiâm ka ta je momo,
Ke ca ânyâ ûnyi wale ame okongoâ je than.
4Kemuela lö, e ca ûcû je than, e ca ûcû ka je than he ka ic waina;
Ke ca ûcû ka je taben he ka ha, ka habe, ewa grâg?
5Wâ adre nye ic me hnying ut hnanyibu,
Me omonoâ iwatretra anyin at ame vec.
6Ham bi grâg ka at ame he but ka mok,
Me waina ka at ae vec hnyekon:
7E ame he ka ic me hnying anyin theduoc,
Me ca ûnykûme hmetu bi anyin vec.
8Fuc dö hobi kâu at ame laba hnyibû,
Hnyi ivino anyin tavat adre mok degecâ.
9Fuc dö, owisa wia ju, Ivinoâ thö hobi kâu at ae vec me theduoc.
10Ie at ame wâ momo ae so hwakecin?
E beönua hwaban e hon je penina.
11Ame labageju kâu hnyekon âiân,
Kʼ ame ca he ka hia gan troban.
12Ame ânyâ so kâu hnen momo, ke ca kong bi
Hnyi je bonginy hia anyin möt.
13A momo ame elâm je leûnen mamoe me lino,
Me huliwa senyin ge li hnyamen.
14Momo ame helâ me je hu ûcû;
E ame hok an jeû ûheny sâkâû.
15E ame vesâ ke tiga hnyinghet,
Me han anyin lap,
Me khene hanymen lathnyabainy a je hlu.
16E ame ûnykûme utkânâ me ûco e:
E ame te vine troban li hnyamen.
17Momo ame weikâ e ge tang hwege,
Me ohwegiâ li benyin bi.
18E ame wâ ae so tang omjeû a ûco:
Kʼ ame ca mok anyin lamepa hnyi hnyinghet.
19E ame ip hnyamen hon ûnyi hnân amu tö mano;
Me kât taben tö hnyi hnyamen.
20E momo ame lau li hnyamen ka at ae vec:
Eke, e ame hinobeny ka at ae theduoc.
21E ame ca outen kiona ge anyin lap:
Anyin ame khavâ ûkhaû ae dra vec anyin lap hia.
22E ame hwâwâ je kubö me omecâ:
Kʼ ame khavâ ûkhaû lino ae so ke udrudrâ hlit.
23E manen dut âiân hnyi homagöule,
A ne tha laba me wahingatiny hnyei.
24E momo ame tibet je ûkhaû lino me ûco
Kʼ ame hna je wen hnyok ka at ûcû.
25Tang hwege me hmanenang anyin ûkhaû;
Ke ame hluma buhlumâ je bong ame he ka o.
26E momo ame ha metâ;
Ke e hnyi bohmen hnanyibuiny ibetengiö.
27E ame tuö wia hwakecin anyin lap,
Kʼ ame ca an jeû ke laba baû bi.
28Ame tot je lakon me haisoâ e;
Kʼ ame ogânâ e ge âiân, me ha, ka habe,
29E se hia omomo ae so hwakecidra,
Ke u beönua hudrin hia.
30Ame thoi hmai, ke thatûnyi bi hmanenang:
Ke haba momo a at ame outö Iehova, me adre me he ka haisoâ momo e.
31Ham but ka momo wan li hnyamen;
Ke hamen ta je huliwa anyin momo he ka ogânâ e hnyi je homagöule.
maintained by the British and Foreign Bible Society