Ta je Vejec 12
12
1HABA at ame weny hna ûne, me ame hnyok wâhmakhmeto:
Ke hwakecin meno at ame hociâ hna nâ.
2Haba at ae so, me ame he ka hu ibetengiö ga Iehova;
Ke e ame he ka ohnaûhangoâ at ae kong.
3Ame ca he ka tethmâ at ge hulo:
Kʼ adre me ca he ka oc degecâ iwân tavat ae wisa.
4Haba momo ae so hwakecin, me korono anyin âiân:
Ke haba momo ame ohmehma, me helâke amam but ta je jeien.
5Ame ûcû ta je hna ûnykûme hnen at ae wisa,
Ke tang iyawo je ûhnenamö anyin tavat ae kong.
6Haba ta je hofuc hwan tavat ae kong, me ame ha ge dra adre me mokulec tuö:
Kʼ ame he ka omeli ödra ge hnyimen tavat ae wisa.
7Adre me hagutâ tavat ae kong, me ame hiʼ ödra but:
Kʼ ame he ka tethmâ uma umen tavat ae wisa.
8Adre me he ka haisoâ at hoton anyin metâ:
Kʼ adre me he ka hûkotiâ at ae hwali hnyekon.
9E so at adre me ca oûnyihnatho, kʼ ame hu athnyabainy,
Hon at ame ogânâ e bi, ke ba an jeû.
10Haba at ae wisa, me ame betenge ge haleny meno:
Ke haba ibetengiö anyin at ae kong, me wale beovecâ.
11Haba at ame belökâ kânân kânâ, me ame he ka sekon ge jeû:
Ke ba hnyekon at ame hnu hoton ta je ûnyi baû.
12Haba tavat ae kong, me adre me weny ert ûten tavat ae monu:
Ke haba iwân tavat ae wisa me ame wa wan.
13Ame hnok dö at ae kong ge hna hanyâûâ ge li esongodiny:
Ke ame he at ae wisa ka khulu but ûnyi hnyi vec.
14Ame he at ka sekon ge so hnen wan hnyimen bi:
Ke haba troban li hnyamen at, me ame he ka hmetu kâu.
15Haba gethen deny at ae monu, me ka wisa bi kâu:
Ke metâ bi at ame long hna ûne.
16Ame ie manen hmonyin anyin at ae monu:
Ke ame tube hmehma hnen at ae metâ.
17Haba at ame ha hnathu, me ame omanenâ wisa,
Ke haba at ame ohnathoâ thoi, me ame omanenâ iyawo.
18E hu tavat adre me ie fuc, helâke adre dâ ge hele vat:
Ke haba bohmen at ae metâ, me hnân ometo.
19Haba esongot ae hnathu, me ame he ka tethmâ nyiele balua:
Ke helâ me hna thuthubademak bohmen ae thoi.
20E hu iyawo eû hnyi hnyekon tavat adre me ûnykûme hulo;
Ke ame senyin tavat adre me ûhnenamö me me hnahic.
21E ba ûnyi ae kong ame he ka o ka at ae wisa:
Ke ame he ka unöngöt tavat ae monu ge hulo.
22Hmiö Iehova ta je esongot ae thoi:
Ke e ame senyin ge tavat adre me mâdrâ hnathu.
23Haba at ame wâ wia, me e ame ikhâlâ metâ:
Ke haba hnyekon tavat ae monu, me ame omanenâ hwen monu.
24Ame he hnyamen tavat ae hwege huliwa ka musi:
Ke adre me he ka kunâ üsënyin he ka ânyâ je huliwa.
25Haba hloûhloû eû hnyi hnyekon at, me ame okhudrungo at:
Ke ame osenyinâ e hofuc ae so.
26Haba at ae wisa, me ame kû gethen ka lahanen:
Ke haba gethen deny tavat ae kong, me ame omonu ödra.
27Haba üsënyin, me, ame ca le haniny:
Ke haba wakomjeû anyin tavat, me hobi kâu bi at ae hwege huliwa.
28E hu möt bi eû hnyi gethen deny hwakecin ae wisa;
Ke ba mok bi hnyi deny gethen.
maintained by the British and Foreign Bible Society