Josua 9
9
1KE haba je than hia ödrin e long, walʼ ödrin hnyi ke keihen Joridano e jio hnyi je bucen me hnyei ae ca hut, me hnyi hobat köien köiö ae gan hia cicö Lebanona, wale at Heth, me Amora, me Kanana, me Perizi, me Hivi, me Jebusi; 2me ödrin e ûkhacaköu he ka tot metâ kö Josua me at Isaraela hnyi hnyok a khaca.
3Ke a long at Gibeona ûnyi a ânyâ Josua ka Jeriko me Ai, 4me ödrin e huliwa iyawö, kʼ ödrin e ûcûcûbongoâ hnyat metâ, me hom je tang ae bobot hon haledrin je asina, me je tangen waina ae bobot ut, ke khekhe, ke adre ca; 5ke bobot ut me hna tibet hmetu je tangen hnyeûcadrin, kʼ ödrin e khavâ je ûkhaû ae bobot ut; ke meleca but me om but jeûiny kamejidrin hia. 6Me ödrin e he kö Josua hnyi hna hunuma e Gilegala, kʼ ödrin e ha kâu, me at Isaraela, ha habe, Ûhehmun hnyi hnyei ae sâkâû: ke walang ang e so öbun e ânyâ ûhihinyköu möhmun. 7Ke haba at Isaraela adre me ha ka at Hivi, ka habe, Hawa la, öbun e ne tha laba unyihmun, ke öhmun e he ka kâmâu ka ûhihinyköu möbun? 8Me ödrin e ha kö Josua, ka habe, Öhmun lathnyabaem. Ke haingö Josua ködrin, ka habe, Öbun ie je hnyat? kʼ öbun je hnyat ua? 9Me ödrin e ha kâu, ka habe, Ûhehmun hnyi hnyei ae ti sâkâû lathnyabaem can iö Iehova Khongom: anyin a öhmun e hia but long ûlunginy, me hnen hna ânyâ hia hnyi Aigupito, 10me je ûnyi hia e ame ânyâ ka li thaniny at Amora, wale hoton Joridano, kö Sihona than Hesebona, me Oga than Basana hnyi Aseterotha. 11Ke ame ha kohmun wahingatihmun, mödrin hia aten ihmun, ka habe, Bi kamejibun hobi kâu he, me he thö me ûkhanö mödra, me ha ködra, ka habe, Öhmun lathnyabaibun: ke walang ang e so öbun e ânyâ ûhi-hinyköu möhmun. 12Waleû kamejihmun öhmun e hom ke tiga kahwa ûnyi hnyi umöhmun je uma hnyi bong öhmun e to-drö hnyin he ka he köbun; ke walang ang, wâ bi, e meleca thö me om but: 13me je tangen waina eang a teb ûnyi öhmun e ounöngötâ; ke wâ bi, e khekhe but: ke bobot ut je khaûhmun eang me je tangen hnyeûcahmun ûnyi hnyi gethen ae sâkâû. 14Me ame kop ödrin hnen tavat ge je kamejidrin, ke ödrin e ca hnö unyi Iehova. 15Ke haba Josua ame ânyâ ûsoköu mödrin, me ûhihinyköu mödrin, me ödrin e möt: me ame khemanyin ködrin hnen je taben ûkhacaköu. 16Ke hnyi kun ta bong hwaban hna ûhihinyköu mödrin, ödrin e long a tavat ae hakekeny ködrin, me tavat adre me laba unyidrin. 17Ke haba lakon Isaraela ödrin e he me o hnyi anyidrin je taun hnyi bong a kuniny. Ke waleû anyidrin je taun, me Gibeona, me Kefira, me Berotha, me Kiriatha-jarim. 18Ke a ca kuc ödrin hnen lakon Isaraela, anyin a hia but khemanyin ködrin hnen je taben ûkhacaköu, me haiö Iehova Khongu Isaraela. Ke ame ulidro je taben hnen ûkhacaköu hia. 19Ke ame ha hnen je taben hia ka ûkhacaköu hia, ka habe, Öhmun e hia but khemanyin ködrin me haiö Iehova Khongu Isaraela: anyin a wale, e ca khanʼ öhmun he ka kalʼ ödrin. 20Walang ûnyi otin e he ka ânyâ ködrin, me omeli ödrin; wâ e nye takû ota ge hmönyin, can hnöta hna khemanyin ködrin. 21Me ame ha ködra je taben, ka habe, Hnʼ ödrin ju he ka möt, mʼ ödrin e bi hnyat höcö me hnyat soû köiö hobi kâu ûkhacaköu hia, helâ me je taben ame ha ködrin. 22Me Josua ame hawʼ ödrin, me ha ködrin, ka habe, Ieû gabun öbun e iyawʼ öhmun, ke ha, ka habe, Öhmun ûsâkâûö hmönyin möbun; ke öbun e tha laba bi möhmun? 23Ke walang ang e hu gabun ûhangö, ke ba ke at gabun adre me ca he ka thaluâ he ka höcö, me soû köiö hobi kâu uma umen Khonguk. 24Ke ödrin e thu kö Josua, ka habe, Adre me ha hnathoâ ka lathnyabaem a Iehova Khongom ame hûna kö Mose a athnyabainy he ka ham köbun hnyei hia thithö, me he ka ohia aten hnyei hnyi hnyimaköbun, anyin a wale öhmun e ot gan hmâ me bemöt gabun, waleling mʼ öhmun e ânyâ ûnyi e. 25Ke haba walang ang wâ bi öhmun ang hnyi hnyamâm: ânyâ thö kohmun helâ me u je ûnykûme so me wisa he ka ânyâ. 26Me e ame ânyâ helâe ködrin, me omeli ödrin ûnyi hnyi hnyamen lakon Isaraela, mʼ adre me ca hlingʼ ödrin. 27Ke haba Josua ame wiʼ ödrin hnyi bong eling mödrin e he ka tavat höcö me seköiö hobi kâu ûkhacaköu, me hobi kâu taben hut kö Iehova, ke ne o but hnyi bong ang, hnyi dok e ame ke ka ûca.
maintained by the British and Foreign Bible Society