Devidi-Anume 2
2
Tamụnọ Ḅarana Sẹlẹ Pakama-ḅo Amadaḅọ
1 #
Fịr 4.25,26 Tomikiri ḅẹ asịẹ ma tiegotẹ kọngọ kụrọma ḅẹ aḅẹrẹ-ḅiyarị?
Tomi tiegotẹ sọye mịẹ ịn pịrị ḅịa aḅẹrẹ-ḅiyarị?
2Ịna amadapụ ma ịn ḍụkụ ḅịa ḅẹ amịẹaị mịẹarị,
ịna ḅẹrẹtọn apụ ma sịḅị gboloma tẹ ḅẹrẹ-ḅiya KỊNỊNYANAḄỌ ḅe pịrịarị,
pịkị ori sẹlẹ pakama-ḅo amadaḅọ ḅe na.
3Ini mẹẹ, “Ó yee wa ịna ḅẹrẹtọn suku-ḅio paka so,
ó yee wa ịna fịna ḍiki ḅụ fima so.”
4KỊNỊNYANAḄỌ ḅe So-ḅio ori emine ọgọnọ lẹgị
tẹ ịn ḍẹrịarị
tẹ ịn tọn-arị papaa aị ma komboarị.
5Ọkọẹrẹsị ori ịganị kẹ ịna aḅeri nụnụarị
tẹ owi ịganị kẹ ịna tẹmẹ-naịn-naịnmarị.
6Ori mẹẹ, “Zayọnị, ị̀ fịafịa tụndụ mẹ ọgọnọ
àrị ama-da ị̀ pịrị ḅẹ ḅọ tọn pakama tẹ.”
7 #
Fịr 13.33; Hib 1.5; 5.5 Amadaḅọ ḅe ḅẹẹm, “À KỊNỊNYANAḄỌ ḅe ḍuko
ye mẹ ḍuko wasama ḅa.
Ori ị̀ ḅẹm, ‘Ị́yẹrị ì owiḅọtụḅọ,
mịmgba à ḅo ị́ ḍa sọ tẹẹ.
8Ḅii, tẹ à tomikiri ḅẹ asịẹ mamgba kẹ ị́ pịrị ḅa;
bebe tomikiri mẹ í nye sọ ḅa.
9 #
Mịẹ 2.26,27; 12.5; 19.15 Í ikulele mkpara kẹ ịn fomu kọsịma ḅa;
ị́ ịn ḅaa gẹrẹ-gẹrẹma ḅa,
aḅaịn-ḅẹlẹ ḅaa gẹrẹ-gẹrẹma ḅara.’ ”
10Amadapụ, mịọkụ ọ́ mị ḅeri nụnụ ẹkwẹn mẹ pokii;
Ọmịnị tomikiri ḅẹrẹtọn-arị apụ, ó miemẹ ḍawọọ;
11Ọ́ ḅalafa ḅụ fịrịmẹnjị KỊNỊNYANAḄỌ ḅe pịrịị;
12Ọmịnị oju sẹkịma mu ọ̀ tọrọkọ iḅoo;
ọkọ-a kụma ori ịganị ala-a saakị ḅa,
tẹ ó ḅiotọn-a sakị kẹ fịị ḅa.
Ḅioḅẹlẹ sime ọ̀ ḍọkụma-ḅo tẹ ọ̀ gbaịn-arị apụ ma pịrịm.
(C) The Bible Society of Nigeria