2 Amadapụ 2
2
Ini Ịlayịja Ọkị So Iwo Tẹẹ
1Anị ḅo KỊNỊNYANAḄỌ kụrọ-fẹrụ kẹ Ịlayịja ọkị so iwo ḅẹ sakị la ḅẹ-yearị ogbo Ịlayịja na Ịlayịsa na nwẹnị Giligalị ḅụ saakị ye muarị anga ḅụ. 2Ịlayịja nwẹnị Ịlayịsa ḅẹẹ, “Àrị ị́ tẹkẹm, mịanga simee, gbala KỊNỊNYANAḄỌ ḅe ị̀ kẹ Bẹtẹlị jụjụ-ḅio fịrịma tẹẹ.” Kụma Ịlayịsa nwẹnị ḅẹẹ, “KỊNỊNYANAḄỌ ḅe ḍumo wararị, tẹ ị́yẹrị ḅe sọ ḍumo wararị ogbo àrị ị́ wẹrịso ḅịa.” Anieḅụ ịn nwẹnị Bẹtẹlị mu.
3Bẹtẹlị ḅụ simearị ịkịankoroapụ gbọrụ ogbo nwẹnị paka Ịlayịsa ḍọkụma-ḅo, tẹ ọ̀ ḅẹẹ, “í gbeke nimi mịnẹ mịmgba KỊNỊNYANAḄỌ ḅe ị́ ḅụụ ḅụ ị́ sịḅịdaḅọ ḅe ọkị so ḅẹ?” Tẹ ọ̀ nwẹnị ḅẹẹ, “Inn, à nimi wararị, ó dein simee.”
4Anịtẹso Ịlayịja nwẹnị ọ̀ ḅẹẹ, “Ịlayịsa, mịanga simee, àrị ị́ tẹkẹm; gbala KỊNỊNYANAḄỌ ḅe ị̀ kẹ Jeriko fịrịma tẹẹ.” Kụma ọ̀ nwẹnị ḅẹẹ, “KỊNỊNYANAḄỌ ḅe ḍumo wararị, tẹ ị́yẹrị ḅe sọ ḍumo wararị ogbo àrị ị́ wẹrịso ḅịa.” Anieḅụ ịn nwẹnị Jeriko mu.
5Jeriko ḅụụ simearị ịkịankoroapụ gbọrụ ogbo nwẹnị sọma Ịlayịsa kpeki tẹ ọ̀ ḅẹẹ, “í gbeke nimi mịnẹ mịmgba KỊNỊNYANAḄỌ ḅe ị́ ḅụụ ḅụ ị́ sịḅịdaḅọ ḅe ọkị so ḅẹ?” Tẹ ọ̀ nwẹnị pakịrị, “Inn, à nimi wararị, ó dein simee.”
6Anịtẹso Ịlayịja nwẹnị ọ̀ ḅẹẹ, “Mịanga simee, àrị ị́ tẹkẹm; gbala KỊNỊNYANAḄỌ ḅe ị̀ kẹ Jodanị tọrụ mẹ fịrịma tẹẹ.” Kụma Ịlayịsa nwẹnị ḅẹẹ, “KỊNỊNYANAḄỌ ḅe ḍumo wararị, tẹ ị́yẹrị ḅe sọ ḍumo wararị ogbo àrị ị́ wẹrịso ḅịa.” Anieḅụ ini maa apụ ma nwẹnị mẹnjị ma-mu. 7Ịkịankoroapụ ma ḅụ, kịnị amesi oyi finji tombi kẹ ịn pịrị-pịrị mẹnjị mu ala-jụ sịẹsimem ini maa apụ ma Jodanị tọrụ mẹ akaka ḅụ sịẹ sime sakị. 8Anịtẹso Ịlayịja nwẹnị ori opu kapa mẹ sin, tẹ anị iko, tẹ nwẹnị anị kẹ minji mẹ fomu; minji mẹ nwẹnị amịna ḅụụ ḍiema tẹ pakịrị-pakịrị ḅụ sime, nwenii ini maa apụ ma samụnọ kiri ḅụ inetẹ mẹnjị saḅa korom. 9#Dit 21.17Ịn saḅa koro tẹso Ịlayịja nwẹnị Ịlayịsa ḅẹẹ, “À mịẹ ị́ pịrị ḅẹ ye ḅii, tẹrẹmẹ ini ị́ ḅụụ ḅụ ị̀ ọkị sakị la.” Ịlayịsa nwẹnị ḅẹẹ, “Àrị ị́ tẹkẹm, yee àrị ị́ ḅụụ ḅụ simearị tẹmẹ mẹ ḅụ ḅẹ maa akiri nyana.” 10Ọ̀ nwẹnị ḅẹẹ, “Kụrọ tẹ ye mie í ḅii yee; anịsọ ị́ nwẹnị ini ị́ ḅụụ ị̀ ọkị soarị sakị ḅụ ị̀ ẹrị-ẹrị, anị ọkọ sime ị́ pịrị ḅa; kụma ị́ ị̀ ẹrị-a ḅẹḅẹ, anị ọkọ sime ḅịa.”
11Ịn paa mẹnjị-mẹnjị tẹ ẹkwẹn-arị ogbo, ḍikii, kọrị fịnị ọmụ-arụ na asụ na nwẹnị bẹkẹ-ḅara-ḅụ ḅo ini maa apụ ma ogbo puu. Ịlayịja nwẹnị kụrọ-fẹrụ ḅio ḅụụ so iwo. 12#2 Ama 13.14Ịlayịsa anị ẹrịm, tẹ nwẹnị oloku, “Ị̀ ḍa, ị̀ ḍa! Izirẹlị kirimẹnjị-ọmụarụ na anị ḅẹ asụ-dọkụ-ọmụapụ na!” Tẹ ọ̀ ḅarị jen kẹ ori ẹrị-a.
Anịtẹso ọ̀ nwẹnị ori akapa ọlọ tẹ kẹ maa apakịrị puu. 13Tẹ ọ̀ nwẹnị Ịlayịja opu kapa mẹ tẹ ọ̀ ḅara ḅụ siin-koro ye mẹ sakị ọkị tẹ pịkị-so mu Jodanị tọrụ akaka mẹ ḅụ sịẹsime. 14Anịtẹso ọ̀ nwẹnị Ịlayịja opu kapa mẹ tẹ ọ̀ ḅara ḅụ siin-koro ye mẹ ọkị tẹ kẹ minji mẹ fomu, tẹ ḅẹẹm, “Ndẹẹ KỊNỊNYANAḄỌ, Ịlayịja Tamụnọ ḅe mọ?” Tẹ ọ̀ pịkị kapa mẹ kẹ minji mẹ fomu tẹso, minji mẹ nwẹnị maa anga ḍie tẹ Ịlayịsa nwẹnị mẹnjị saḅa. 15Ịkịankoroapụ amesi oyi finji ma tẹ Jeriko ḅụ ḅo apụ ma ori ịna tọrọkọ ḅụ mẹnjị ḅoarị ẹrị tẹso, ịn nwẹnị ḅẹẹ, Ịlayịja tẹmẹ mẹ Ịlayịsa ọgọnọ gbana tẹẹ. Ịn nwẹnị ori na bịama ḅẹ ḅo tẹ ọ̀ tọrọkọ sịḅị-tuu mu kiri lama, 16tẹ ọ̀ ḅẹẹ, “Ḍikii, ị́ afịrịmẹnjịapụ ma ḅụụ wamịnị ịnyọ nyana tẹ kịnị amesi oyi finji mịanga emii, yee wa mu ị́ sịḅịdaḅọ ḅe ḍọkị; sosi-ọkụma KỊNỊNYANAḄỌ ḅe Tẹmẹ ḅe ò dogi-so mu gbọrụ tụndụ ọgọnọ gbana tẹẹ anịanịa gbọrụ tụndụ-ogboku ḅụ koroma tẹẹ.”
Ịlayịsa nwẹnị pakịrị, “Ẹn-ẹn, ó mu ma.”
17Kụma ịn ọ̀ tịngị-tịngịma nwenii anị nwẹnị ọ̀ ḅụụ-jịrịma, tẹ ọ̀ nwẹnị ḅẹẹ, “Ó muu.” Ini kịnị amesi oyi finji ma ọkọẹrẹsị mum; tẹ tẹra aḍin kẹ ọ̀ ḍọkịm kụma ini ọ̀ dọkị ẹrị-a. 18Anịtẹso ịn nwẹnị pịkị-so ọ̀ ḍọkụma-ḅo, anịsakị ò Jeriko ḅụụ sime ịn koruarị, tẹ ọ̀ nwẹnị ịn ḅẹẹ, “Àrị ọ́ ḅẹẹ-a, ó mu ma?”
Ịlayịsa Mịẹ Ḅụụ-gbiripuma-aị
19Jeriko mẹ ḅio ḅẹ apụ nwẹnị Ịlayịsa ḅẹẹ, “Ḍikii, mị opu ama mẹ sime-ḅara iḅi-lama wararị, kịnịnyanaḅọ, ị́ ẹrị ḅara ḅụ; kụma anị ḅẹ minji mẹ iḅi-a, anị pịkị inetẹ ḍiḅi asịnmgbọlị so-pakama-a.”
20Ọ̀ nwẹnị ḅẹẹ, “Ọmịnị ịwọ bọlị ọkị-ḅo ị̀ pịrị, tẹ fụn kẹ anị ḅio sụa.” Anieḅụ ịn nwẹnị anị ọkị-ḅo ọ̀ pịrị 21Anịtẹso ọ̀ nwẹnị ngụngụḅa minji mẹ sime anga muu, tẹ fụn kẹ anị ḅio sụa, tẹ ḅẹẹ. “Mie KỊNỊNYANAḄỌ ḅe ḍuko yee, À mị minji mẹ mịẹ iḅima tẹẹ; mịọkụ sakị tọrọkọ mu fịị anịanịa fura-so ḅarị anị ḅụ ḅo ḅịa.” 22Anieḅụ Ịlayịsa ẹkwẹn-ḅịḅị mẹ wẹrịtẹ ḍuko ḅara ḅụ minji mẹ iḅi ḅo mịmgba lam.
23Ò Jeriko ḅụ so Bẹtẹlị muarị ogbo ḅụ, etela mẹ ḅụ ḍọkọḍọkọ tẹ owiapụ-awọmẹ nwẹnị opu ama mẹ ḅio paka-ḅo tẹ ò sule-sule tẹ ḅẹẹ, “ị́yẹrị ḅie sịḅị-firi tẹ ḅọ, soo; ị́yẹrị ḅie sịḅị-firi tẹ ḅọ, soo.”
24Ịlayịsa vuunma pịkị tẹ ini ẹrị tẹso, ọ̀ nwẹnị KỊNỊNYANAḄỌ ḅe ẹrẹ ḅụ ịn wori. Ịyọrọ tuu amẹngbọ nwẹnị piri-ḅio paka-ḅo tẹ ḍọkọḍọkọ owiapụ-awọmẹ ma ḅụ kịnị amesi maa apụ finji kanị-kọsịma. 25Anịjụ ḅụ ò so Kamẹlị Tụndụ ọgọnọ mum; Kamẹlị Tụndụ ḅụ ọ̀ pịkịma-so Sameriya mum.
(C) The Bible Society of Nigeria