2 Ịsamụwẹrị 23
23
Ịrẹyị ọdịrẹma Idevidi
1Ịrẹyị ẹnẹnị Idevidi ka ọdịrẹma nị. Idevidi ozi Ijeese ọ kà ịrẹyị ẹnẹnị nị. Idevidi vị ọza ọnị Ohomorihi sị tụ́ ẹba. Ọnị ọ maanị kà ịrẹyị ọnọnị nị. Ohomorihi oni Ijekọvụ hẹkẹ ọ nyị Idevidi vị ohinọyị nị. Ọnị ọ vị ahẹ ohine ọnị Anisirẹrị nịnị jị nị. 2Ọ kà; ụhwẹ Ohomorihi aa sị mị kà ịrẹyị. Ịrẹyị anị yà ịnị irenu amị. 3Ohomorihi Anisirẹrị ọ sị ịrẹyị kà, Ọza ene ee sere Anisirẹrị ọ sị ịrẹyị kà yị ẹmị. Ọ kà ọza ana sị ịzẹyịza dị ọ yàa sịị̄ mẹ ịjọva tụra ọza. Aza ana yaā mẹ ịjọva, dị ẹnịnị nyị angwahi Ohomorihi, 4Irima ẹngụ aza ẹnẹẹ, vị ana sị mẹẹ ẹtohweyi ẹnịnị. Ẹnịnị vị ana sị mẹẹ ọ́yị ana yaa tụ̀ụ vẹ. Ọyị ẹnẹnẹ ẹnẹ ẹ̀ yị nyị eguhi ana dà kú ọ. Aa zẹtẹ ini orihi ana yaā zụ̀ hi avị eteesu. 5Ịnị eyi Ohomorihi, avọọ irehi amị mẹ̀ yà. Ịsị ọ ka ọnị vaa mẹẹ mị ọnị ọ mā vara pooro zịna. Avaba 6Vị aza edivi sị mẹẹ ikeyi ene e ne ta avọọ nị. Wẹ yị nyayịnẹ sị ụvọ osusu kanyị ẹngụ aza ẹnẹẹ o! 7Wèe si ka wa kanyị aza ẹnẹẹ, enyusẹ ụ waa sị nị. Ẹ̀ yị, vị avọọ ahịka ọpa ụ sị nị; ịra a va sị rị wa nị, ịzị e hi ẹtẹ hi avọọ.
Ịrẹha isoja Idevidi ẹẹta
(1 Ịtọ 11.10-19)
8Ịrẹha isoja Idevidi ẹẹta ene eyi yẹ ẹ vị ẹnẹnị nị: Ijosẹbị Ibasebeti ana vị Anitakemoni ọ vị ọga ẹnịnị nị. Ộ sị ọha wụ̀ aza ẹnị akana ẹkụhị ọnya eyi ịrẹkụ. 9Eriyaza ozi Idodo ana vị Anahohi ọ vị ọgwọhụva ịnị ẹnị ọkụrẹkụ ẹẹta ẹnẹnị nị. Â nyị ụmẹ ọnya ana ahịka Eriyaza ọnịrị Idevidi kẹnẹ ẹ gẹ ịrẹkụ tu Anihwirisiti nịnị ana gụ eyi ịrẹkụ tu Anisirẹrị nịnị. Ụmẹ ọnọọ, Anisirẹrị nịnị ana vọ e si zwe varẹma. 10Ama di Eriyaza nyayịnẹ wụ̀ Anihwirisiti nịnị ha nị. Ộ wụ̀ wa pooro, dị ụvọ anị kata, dị ọ kụkụ aa za ọza ìrèrè vaka ụhwọ anị nị. Ịhị ọnọọ Ẹnẹyịmavara ộ dọ Anisirẹrị ha ẹnẹmẹhị. Di Anisirẹrị nịnị vavẹ ve tù Eriyaza, dị ahịka ẹnya ịrẹkụ kẹnẹ ẹ kụkụ ngwa hụụnị ẹngụ oku ẹnẹẹ nị. 11Ọza ana rẹ va tụra Eriyaza aā hị́ Isama nị, ọnị vi ozi Agii Anịhararị. Ẹkụhị ọnya di Anihwirisiti rẹ sị wara gụ ẹkụra ana aā hị́ Ireehi nị. Â nyị aarẹ ọnya aanị ịzọọ anị avị ịsẹpẹ ẹnyị aanị gụ ẹtẹ ịnị anị. Ịhị ọnọọ Anisirẹrị nịnị vi ene ee zwe agụvị Anihwirisiti nịnị. 12Ama di Isama tenyi ẹngụ jẹẹ ịnị aarẹ ọnọọ, dị ọ̀ yị zẹẹ ka isoja Anihwirisiti ẹ̀ ngụ ịzọọ nị. Ẹnẹyịmavara vị ana nyayịnẹ dọ ọ tụ́, dị ọ wụ̀ Anihwirisiti nịnị. 13Ịnị ụmẹ ọnya a maa vaa mẹ̀ ịsa ịnị aarẹ, dị a nyị ọdọvịdị ẹẹta hụụnị ẹnị ọdọvịdị ohurẹẹwụ ene ne tù Idevidi ịnị ụtẹha ana aā hị́ Adurami nị. Isoja Aniwihirisiti ẹnị vi ene hi ini ozi Irehwayimi. 14Ịjọnọọ Idevidi ọnị yà aha ẹvagu. Isoja Anihwirisiti ẹnị hi Ịbẹtịrẹhẹmị. 15Di Idevidi aa vá ụva dị ọ ka ẹnị aa naa ká enyi hụụnị ịkangga ana yà ịzị a zị naa ngụ ẹkụra Ịbẹtịrẹhẹmị vaa yị ọnị. 16Â nyị isoja ẹẹta aanị, dị ẹ sị ụkata-ụkata na ngụ udi isoja Anihwirisiti, dị ẹ na ká enyi hụụnị ịkangga ana yà oze ana a zị naa ngụ Ịbẹtịrẹhẹmị, dị ẹ sị va yị Idevidi nị. Idevidi o yi si ka ọnị ò hu ọ, dị ọ và a hi ẹtẹ yị Ẹnẹyịmavara nị. 17Dị Idevidi kà: Ẹnẹyịmavara, enyisi ọnị ẹ yị nyayịnẹ hú enyi ọnọnị. Ọ kà ọsọnị vị ịsị aza sị ịrẹsụ tụ́ isu dị ẹ mẹ̀. Ọ kà ụhwẹ ẹnịnị ọ vị nị. O yi sì ka ọnị ọ̀ hú enyi ọnọọ. Isoja ẹẹta ẹnẹẹ ẹ maanị mẹ nị.
Isoja ohurẹẹwụ
(1 Ịtọ 11.20-47)
18Â nyị ọza ịnya aanị ana aā hị́ Abisayi. Ọyịnyara Ijowabi ozi Izeruya ọ vị nị, dị ahịka ọnị ọ vị ọga ẹnị isoja ohurẹẹwụ. Ộ sị ọha anị pè aza ẹnị ịrẹkẹẹchẹhị kụ̀ ịrẹkụ, dị ọ wụ̀ wa nị. Dị ọ sị ọnọọ mẹ ịrẹha yị ẹngụ anị nị. 19Ịrẹha Abisayi ọ ngụ ịrẹyị hu ịnị ẹnị isoja ohurẹẹwụ ẹnẹẹ nị. Ọnị ọ vana vị ọga isoja ẹnẹẹ nị, ama a nyị nyị ẹnị ẹẹta ọnị udi anị ò yi re vee tù. 20Â nyị ọnọrụ ọnya ana a rẹẹ̄ hị́ Ịbẹnaya ozi Ijehoyada. Anikabizeeri ọ vị nị, dị ahịka ọ̀kà ọ vị ịnị ịrẹkụ nị. Ộ mẹ̀ ịsa ẹbanyị-ẹbanyị. Ộ wụ ozi Ariyeri ẹẹva ana vị Animowabi; dị ọ hyahu rẹ wụ idu ini orozi ọnya aanị nị. Ụmẹ ọnọọ eguhi ene hunẹnẹ dọdọdọ aanị vị ene ee chire. 21Ọ rẹ wụ Anijipiti ọnya ene zoza ẹtẹẹtẹrẹ. Anijipiti ộ nyị ọha rị ụvọ. Ama dị Ịbẹnaya sị okutẹ rị ụvọ di tere pè ọnọrụ ọnọọ nị. Dị ọ dọ ọha ọnọọ hụrẹ Anijipiti ọnọọ ụvọ, dị ọ sị ọha ọnọọ dị ọ sị wụ ọ nị. 22Ịsa ẹbanyị ẹnẹnị Ịbẹnaya ozi Ijehoyada mẹ, dị ọ sị mẹ ịrẹha yị ẹngụ anị ịnị isoja ohurẹẹwụ ẹnẹẹ nị. 23Ịrẹha anị ộ ngụ ịrẹyị ịnị ẹnị isoja ohurẹẹwụ ẹnẹẹ, ama a nyị nyị ẹnị ẹẹta oni udi anị ò yi tù. Dị Idevidi sị ọ mẹ ọga isoja ene ee sere e nị. 24Aza ẹnẹnị re hi ini isoja ohurẹẹwụ ẹnẹẹ: Asahẹrị ana vị ọyịnyara Ijowabi, Erihanani ozi Idodo ana vị Anịbẹtịrẹhẹmị. 25Isama Aniharodi, Erika Aniharodi, 26Iherezi Anipariti, Ịra ozi Ikesi ana vị Anitekowa, 27Abiyezeri ana vị Anatọtị; Imebunayi ana vị Anihusa, 28Ịzarịmọnị ana vị Anahohi; Imaharayi ana vị Aninetohwa. 29Iherebi ozi Ibaana ana rẹ vị Aninetohwa, Itayi ozi Iribayi ana hụrẹ Igibiya ana hụụnị ezi Ịbẹnjamịnị vẹ, 30Ịbẹnaya Anipiratoni, Ihidayi ana hụrẹ ịnị okuha Ịgaasị vẹ, 31Abi-Ariboni Anaribati, Azimaveti Anibahumi, 32Eriyaba Anisaariboni ana vị ezi Ịjasẹnị; ọnị á rẹẹ̄ hị́ Ijonatani nị; 33Isama Anịhararị, Ahiyamị ozi Ịsara ana vị Anịhararị. 34Ana vọ ẹ vị Eriparati ozi Akasebayi ana vị Animaaka, Eriyami ozi Ahitohwẹrị ana vị Anigiro. 35Iheziro ana vị Anikamẹrị, Ipaarayi ana vị Aribite, 36Ịgarị ozi Ịnatanị hụrị Izoba, Ibani Anigadi, 37Ịzẹrẹkị Anamọnị, Inaharayi Anịbẹẹrọtị anaā za ẹnya ịrẹkụ Ijowabi ana vị ozi Izeruya. 38Iira Anitiri, Igarebi Anitiri. 39Uriya Anihiti Avaba aza ẹnẹnị vị ẹnị ohurẹẹwụ tụra ịhịmba.
Àwon tá yàn lọ́wọ́lọ́wọ́ báyìí:
2 Ịsamụwẹrị 23: EBTP
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Ebira First Bible © Bible Society of Nigeria, 2014.