2 Ịsamụwẹrị 21
21
 wụ́ ezi Ịsọọrụ
1Ịnị ụmẹ oni Idevidi sị rị ohinọyị, â nyị ụngwẹ ana kụ̀ ịrayị ẹẹta tụra ẹngụ tụra ẹngụ. Di Idevidi va họ̀ Ẹnẹyịmavara use ka sị ẹ vẹ nị. Dị Ẹnẹyịmavara kà a yi Idevidi ka Ịsọọrụ ọnịrị aneehi anị ẹ sị ịvị rị agụvị ka Ịsọọrụ ộ wụ Anigibiyọnị. 2#Ijos 9.3-15Anigibiyọnị ẹnị ẹ yị vị Anisirẹrị. Anamọrị ẹ vị nị, dị ahịka vị ẹ yà chee aanị nị. Anisirẹrị ệ vịdị raà hị́ eku yị wa ka ẹnị vee sere wa. Ama agụvị ka Ịsọọrụ o reè sì ịrẹyị Anisirẹrị ọnịrị Anijuda baaba, ee sì ka ọnị ọ wụ Anigibiyọnị.
3Di Idevidi ohinọyị va hị́ Anigibiyọnị dị ọ ka, “Sị a vọrọ ka ma mẹ wụ nịnị? Mee sì ka ịsa odivi ana a mẹ wụ nịnị aanị, ma mẹ ọyịza dọ ọ ịrẹsụ dị wa zụ mẹ̀ aduwa yị aza Ẹnẹyịmavara nịnị.”
4Di Anigibiyọnị tụ́ Idevidi ohi dị ẹ ka, “Ẹkẹhị ọnịrị igooru ọ yị zụ kụ́ ịrẹyị ana yà ịnị akakana ẹyịrị Ịsọọrụ ọnịrị aneehi anị kwooze; rẹ nyị ọza oni yee sì ka ya wụ ini Anisirẹrị.” Di Idevidi rẹ ka, “Ẹhẹẹ, sị wụ ka ma mẹ wụ nịnị?” 5Dị ẹnịnị ka à yị ohinọyị dị ẹ ka, “Ọnọrụ ọnọọ vị ana ka ọnị aa wụ̀ avaba ayị dị asị ọza ikonya kụkụ tụ́ ịnị ẹtẹ Isirẹrị. 6Sị aza ẹnị ịhịmba ini ezi Ịsọọrụ yị di ye zù wa gẹ ọchị ọvịdị Ẹnẹyịmavara ịnị ataba Ịsọọrụ, ataba ẹnị Ẹnẹyịmavara sị nyị.” Di ohinọyị ka ọnị vaa kụ́ waa yị wa nị.
7 #
1 Ịsa 20.15-17; 2 Ịsa 9.1-7 Ohinọyị ọ yị zẹẹ ka à nyị ịsị ẹ kanyị Imehwibọsẹtị ozi Ijonatani ana vị ozi Ịsọọrụ, agụvị ka â nyị eku ẹnị ẹnịrị Idevidi ne beri Ijonatani ozi Ịsọọrụ a vịdị sị hí yị ẹngụ. Ẹnịnị ệ sị Ẹnẹyịmavara tẹ ivenu ini eku ọnọọ. 8#1 Ịsa 18.19Ama di ohinọyị kụ́ Amoni ọnịrị Imehwibọsẹtị ana vị ezi Irizipa ẹyịva ne beri ezi Imikari ẹnị ẹyịhị, dị ọ kụ́ wa yị wa Anigibiyọnị nị. Irizipa ọnọọ vị ozi Aya ana a ma yị Ịsọọrụ. Ezi anị ẹnẹẹ ẹ vị Arinọnị ọnịrị Imehwibọsẹtị nị. Imikari ọnị rẹ vị ozi Ịsọọrụ ana a ma yị Adiriyeri ana vi ozi Ibarizirayi ana vị Animehora. 9Di Anigibiyọnị kụ́ aza oni ohinọyị kụ́ yị wa, di e zù wa gẹ ọchị ịnị ataba éyi Ẹnẹyịmavara nị. Avọọ ẹnị ịhịmba mè sú vabẹ nị. Ụmẹ ana aā sịị ịsa ịnị aarẹ ana aā hị́ ibaari a vavọọ sị wụ̀ nị. Ụmẹ ọnọọ vị ana a sẹsẹ nyima aa mẹ ibaari.
Irizipa ô sere oku ene hi ẹtẹ
10Di Irizipa ozi Aya na sị ịta arụwẹ, dị ọ sị mẹ ajẹngụ kụ́ ẹngụ anị ịzị oku ẹnẹẹ hi nị. Ộ vavọọ ya ịzọọ pooro hụụnị ụmẹ eni e si nyima aa mẹ ibaari ne tù ụmẹ ọnị orihi aa sịị zụụ kú wa nị. Ọ yị zẹẹ ka inomi è kú wa ụmẹ ọọdụ. Ọ yị rẹ zẹẹ ka uye ịnị avị ẹ̀ kanyị wa ịrahụ.
Ê ne Ịsọọrụ ọnịrị ezi anị
11A va kà a yi Idevidi ịsị oni Irizipa ozi Aya ana vị onyeehi Ịsọọrụ mẹ. 12#1 Ịsa 31.8-13Anihwirisiti nị nịnị vị ana wụ̀ Ịsọọrụ ịnị ataba Igibiya. Dị ẹnịnị sị oku ọnịrị Ijonatani ozi anị, di ê zù wa gẹ ọchị ịnị orere Ị́bẹtị-Isani ịzị anọrụ Ijabesi-Igiriyadi ne were-were kụ wa. Di Idevidi va nọ Ijabesi-Igiriyadi, dị ọ na kụ́ ẹchụkụ Ịsọọrụ ọnịrị ẹchụkụ Ijonatani ozi anị hụụ ịnị ụvọ anọrụ Aniyabesi-Igiriyadi nị. 13Idevidi mẹ̀ raà kụ ẹchụkụ Ịsọọrụ ọnịrị Ijonatani ozi anị hụụ ịzọọ, dị ọ kụ́ ẹchụkụ ẹnẹẹ gụ hi ẹtẹ nị. 14Di Idevidi ne ne ẹchụkụ Ịsọọrụ ọnịrị Ijonatani ozi anị ịnị ikuta Ikisi ada Ịsọọrụ ana ya Izera ịnị ẹtẹ Ịbẹnjamịnị nị. Ịjị ẹ sị avaba ịsa oni ohinọyị ka ẹ̀ mẹ mẹ, di Ohomorihi va wụ́ ịnị ịpẹ tụ́ ịrẹsụ ẹtẹ ọnọọ nị.
Ịrẹkụ ana aza Idevidi kụ̀
(1 Ịtọ 20.4-8)
15Ịnị ụmẹ ọnya ịrẹkụ ọ rẹ sị chị yị Anihwirisiti ọnịrị Anisirẹrị. Di Idevidi ọnịrị aza anị chi na, dị ẹnịrị Anihwirisiti na kụ̀ ịrẹkụ nị. Ama ọ sị ngụ Idevidi ẹngụ.
16Â nyị ọnọrụ ọnya aanị ana aā hị́ Isibi-Ibenobi ọnya ịnị ịpa aza ana hụ ẹtẹẹtẹrẹ ọ vị nị. Ọha anị ộ rata ẹnẹmẹhị, ộ gụ ikirogirami ẹẹta rị ẹjịjị. Enyusẹ ana aā hị́ ibironzi a sị mẹ̀ ẹ nị. Ộ hara ụhwọ ọwọọwa, dị ọ ka ọnị aa wụ Idevidi nị. 17#1 Ohi 11.36; Ahẹ 132.17Di Abisayi ozi Izeruya va gụ Idevidi dị ọ và ịsa hị́ ọmụha ẹbayịrẹtẹ ọnọọ ẹngụ, dị ọ wụ̀ ọ nị. Dị aza Idevidi hị́ eku dị ẹ kà a yi Abisayi dị ẹ ka, “wẹ yị kụkụ vaa saasa yịị jịnẹ nọ ịrẹkụ agụvị ka ye yi sì ka à wụ wụ. Anisirẹrị ê si eyi kà wụ.”
18A rẹ nyị ịrẹsụ ọsa ana ene e pè Anihwirisiti kụ̀. Ọnọọ vị ana a kụ̀ ịzị aā hị́ Igobi. Â nyị Anisibekayi ọnya aanị ana vị Anihusa. Ộ wụ Isahwi ana vị ọnya ịnị ọmụha ẹbayịrẹtẹ ẹnẹẹ.
19A rẹ nyị ịrẹkụ ọsa ene e pè Anihwirisiti kụ̀ ịzị aā hị́ Igobi. Ịzọọ ọnọrụ ana aā hị́ Erihanani ozi Ịjarị ana vị Anịbẹtịrẹhẹmị yà wụ Igorayati ana vị Anigiti nị. Ọchị ọha anị vị ana yà anka ọchị oguntoro avọọ. 20Â rẹ nyị ịrẹkụ ọsa ana chị tụ́ Igati. Â nyị ọmụha ẹbayịrẹtẹ ọnya aanị ịzọọ, igege ụvọ anị ọnịrị igege ahụ anị vị ịhịnọnyị-ịhịnọnyị. Avaba igege anị vị ohurẹẹna. Ọnị rẹ vị ọnya ịnị ịpa ọmụha ẹbayịrẹtẹ nịnị. 21Ẹkụhị ọnya dị ọmụha ọnọọ aa sị Anisirẹrị mẹ ịyẹyẹ nị. Di Ijonatani ozi Isimịya ọyịnyara Idevidi wụ ọ nị.
22Aza ẹnị ẹyịna ẹnẹẹ ana hụrẹ ịpa ọmụha bahị-bahị ene hi Igati vẹ. Ẹnịnị vị oni Idevidi ọnịrị ezi ịdị anị wụ.
Àwon tá yàn lọ́wọ́lọ́wọ́ báyìí:
2 Ịsamụwẹrị 21: EBTP
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Ebira First Bible © Bible Society of Nigeria, 2014.