2 Ịsamụwẹrị 15
15
Abịsarọmị ộ jị ẹnya ịrẹkụ tù ohinọyị
1Ịjị ọ dà kù ana Abịsarọmị vavọọ vavẹ Ijerusarẹmị, ẹkụhị ọnya dị ọ na kụ́ ịkẹkẹ ana a sịị kụ̀ ịrẹkụ, dị ọ rẹ kụ́ umaata tụ́ ọ nị. Dị ọ nyị aza ẹnị ẹtarẹwụ ka ẹ̀ vị ọdọvịdị anị nị. 2Abịsarọmị vị anaā kwẹẹtẹ ẹnẹnẹ viri-viri dị ọ na jẹẹ ụtọ oze ịzị a zịị nọ ịnị ẹkụra. Ọ̀ọ vavọọ jẹẹ ịzọọ dị a nyị ọza oni o re ene ee sì ka ọnị ọ̀ sị ịrẹyị ọza ọnị ọnịrịị kụ́ va tụ̀ ohinọyị ịrẹka dị ọ̀ mẹ̀ ọkarẹyị tụ́ ọ nị, dị Abịsarọmị hị́ ọ. Ọ́ọ vavọọ sị ọ hị́ vẹ, dị ọ họ̀ ọ ka ye re ẹkụra ọnị ọ hụrẹ vẹ. Dị aza ẹnẹẹ rẹ ká a yọ ka ịrẹsụ ọnya ẹnị rẹ vị ini Anisirẹrị nị. 3Di Abịsarọmị ka, “wéē re, ịrẹyị ọkụmị-ọkụmị ịrẹyị awụ vị nọ. Ama ẹ yị nyị ọza ọnị ohinọyị nyị ka òo tụ́ ohii tụ́ ịnị ẹngụ ịrẹyị ẹnẹnị!” 4Dị ọ rẹ ka, “Aa yẹ à nyị mị ka maa mẹ̀ ọkarẹyị ịnị ẹtẹ ọnọnị. Avaba aza ana àa nyị ịrẹyị vi ana yaanị ee vee tù mị. Ịrẹyị ọzọza ọ̀ọ mẹmẹ zị kẹnẹ mị yaanị kà a nị.” 5Àa nyị ọza ana kà pè Abịsarọmị ka oni ò ne kú ẹtẹ kụ́ ọ, dị ọ za a, di o kú ọ irenu. 6Avọọ Abịsarọmị maa mẹ̀ avaba Anisirẹrị ana àa ka ẹnị aa nọ ịda ohinọyị ka ọ̀ mẹ̀ ọkarẹyị yị ẹnị nị.
7Ọ sị mẹ ịrayị ẹbẹẹba ana Abịsarọmị vavẹ Ijerusarẹmị. Ẹkụhị ọnya dị ọ va hị́ ohinọyị ka ọ̀ navọ ọnị ọ̀ nọ Ihebirọnị nị. Ọ kà â nyị ịzẹzẹ ọnị ọnị zẹẹ Ẹnẹyịmavara oni ee nee sị ọ. 8Abịsarọmị ka, Taarụ, m mẹ̀ yà Igesuri ịnị ẹtẹ Aramị, mâ zẹẹ ịzẹzẹ ọnya. Mâ kà a ka àa vị ka Ẹnẹyịmavara ộ sị mị vavẹ Ijerusarẹmị, mị va naa kụ́ ọ avọ. 9Dị ohinọyị kà a yọ ka ọ̀ọ na ka ẹ yị nyị ịrẹyị nị. Ịzẹyịza dị Abịsarọmị kwẹẹtẹ dị aa nọ Ihebirọnị nị.
10Abịsarọmị ộ tụ́ aza ka è were nọ ịnị ẹtẹ Anisirẹrị. Ọ kà aza ẹ̀ẹ yị wụ́ ọpanyị kẹnẹ, e nowu dị ẹ̀ kà a ka, “Abịsarọmị ọ raà rị ohinọyị tụ́ Ihebirọnị.” 11Â nyị aza ẹnị ịrẹka ana Abịsarọmị tụ̀ hị́ hụrẹ Ijerusarẹmị ana saasa a. A mẹ̀ hị́ wa, vị ẹnị kẹnẹ nị, ẹ yị yẹ ịrẹyị ana aa na.
12Abịsarọmị maa mẹ̀ ịsọvọ, dị ọ tụ́ na hị́ Ahitohwẹrị ana vi Anigiro ka ọ̀ hụrẹ Igiro ana vị ẹkụra anị vẹ ịnị ịsọvọ ọnị ọnị aa mẹ nị. Ahitohwẹrị vi ọnịwọjị Idevidi. Ịrẹkụ ana Abịsarọmị jị ẹnya anị aa nyị ụkataa hu avọọ, dị aza ana aa saasa Abịsarọmị raa rụrụụ hu avọọ nị.
Idevidi ọ sị zwe hụrẹ Ijerusarẹmị
13Â nyị ọnụtụ ọnya ana va kà a yi Idevidi dị ọ ka, “Wáá yẹ ka Abịsarọmị avaba Anisirẹrị kụkụ sị ayị yị nị?” 14Di Idevidi wụsẹ hị́ avaba ezi ahụ anị ene hi Ijerusarẹmị pè e, dị ọ ka vẹ vị yee zwe nịnị ka à yị vị avọọ ẹ yị nyị ọza ayị ana aa haa hụụnị ụvọ Abịsarọmị. Vẹ ya wusee zwe buru-buru ka à yị vị avọọ ọ̀ọ saasa ayị, ịrẹyị odivi vee tù yị. Vị aa sị ụhwọọ wụ̀ anẹkụra ọnọnị ha nị. 15Di ezi ahụ ohinọyị tụ́ ohi dị ẹ ka avaba ịsị ohinọyị ọ̀ kà kẹnẹ, ẹnị aa mẹ nị. 16Di ohinọyị si hu nị. Avaba aneehi anị ọnịrị ezi ahụ anị vị ana saasa a. Dị ọ navọ onyeehi anị ẹẹwụ tịtẹ ka ẹnị è si eyi pè irehi nị. 17Ohinọyị ọnịrị avaba aza ana saasa a e si hu. Ệ dà zị na, dị ẹ jẹẹ nị. 18Avaba aza ohinọyị ệ tara aa parahu. Avaba Anikereti ọnịrị Anipereti ne beri Anigiti ana vị ẹnị akata ana saasa a hụrẹ Igati vẹ ệ vavọọ tara para hu ọvịdị ohinọyị.
19Di ohinọyị hí Itayi ana vị Anigiti dị ọ kà a yọ ka, “Sị ẹ daka vẹ dị waa dụ yịị vẹ? Varẹma dị wa na jẹẹ pè Abịsarọmị ana vị ohinọyị. Ẹwụ vị ọzọga, vị a dụ wụ hụrẹ ẹkụra awụ nị. 20Óò yi kù ọnị ụ vẹ ịzẹnị. Mẹ yị wụsẹ nyẹngụ sị wụ ka waa ngụ ọ zị beri eyi. Ẹmị ịnyẹmba ọ yị hyakụ yẹ ịzị maa nọ. Varẹma dị wa na sị anẹkụra awụ dị ẹwụrị wa ọ̀ zị. Ohomorihi ọ̀ navọ ọ̀ vayị awụ, dị ọ̀ sị ịzẹyịza anị jẹẹ pè wu.”
21Di Itayi tụ́ ohi dị ọ ka, Taarụ, ọnị ộ sị Ẹnẹyịmavara ọnịrị ịrẹsụ ohinọyị tẹ ivenu ka aha tụra aha oni ohinọyị ọ̀ọ yà ịzọọ ọnị raa yà nị. Ọ kà ọ̀ọ daka tù iisu, ọnịrị ohinọyị yọ nị. 22Di Idevidi ka Itayi ọ̀ọ para hu kẹ. Ịzẹyịza di Itayi Anigiti ọnọọ ne beri avaba aza anị ọnịrị avaba ezi anị ana yà pè e na para hu nị.
Idevidi ộ sị apoti oto Ohomorihi varẹma nọ Ijerusarẹmị
23Avaba aza ẹnẹẹ màa parahu, dị avaba anẹkụra ọnọọ aa tụ́ orere vavavaa nị. Ohinọyị ọnị rẹ na para okuha Ikidironi hu, dị avaba aza ẹnẹẹ sị ịrẹsụ kà ụnọmị aa na nịị. 24Ịzadọkị ana vị ohirẹsụ irehi Ohomorihi oni rẹ yà ịzọọ ne beri avaba Anireevi nịnị ana za apoti oto Ohomorihi. Ẹnịnị ê chi apoti oto Ohomorihi ọnọọ tịtẹ, dị Abiyata aa mẹ̀ ịsọvọ nị. Avọọ ọ mẹ̀ mẹ̀ ịsọvọ ọnọọ pooro dị avaba aza hụụnị ẹkụra nị.
25Di ohinọyị va hị́ Ịzadọkị dị ọ ka ọ̀ sị apoti oto Ohomorihi ọnọọ va nọ ịnị ẹkụra nị. Idevidi ka Ẹnẹyịmavara òo nyị ọnị iyi, ọ vaa sị ọnịị vaa vẹ dị ọnị re apoti ọnọọ ọnịrị ịzị ọ yà. 26Ọ kà àa vị Ẹnẹyịmavara kà o yi zee ọnị eyi ka ọnị ọ̀ vavọọ nyị oni iyi nị, ọnị ộ dọ. Ọ kà ịsị èe zee e eyi kẹnẹ ọ mẹ̀ ọnị.
27Di ohinọyị rẹ kà a yi Ịzadọkị dị ọ ka, “Ẹwụ vi eneē re ẹtẹ. Ẹwụrị ozi ewu Ahimaazị ọnịrị Ijonatani ozi Abiyata ọ̀ varẹma nọ ịnị ẹkụra ka ẹ yị nyị ịrẹyị. Ẹwụrị Abiyata ọ̀ kụ́ ezi ewu nịnị ẹyịva za. 28Mi tangwa aa jẹẹ zị wụ ịnị ụnọmị pooro dị ma wụ́ ụtụ ọnị wàa tụ́ hi mị.” 29Ịzẹyịza dị Ịzadọkị ọnịrị Abiyata si apoti oto Ohomorihi varẹma nọ Ijerusarẹmị dị ẹ na yà ịzọọ nị.
30Di Idevidi kà tụ́ ọvịdị dị aa hịrẹ ịrẹsụ ataba orivii na nị. Ọ màa na, di ee sụ́ ùnè nị. Ịrẹsụ anị vị ọnị ọ sị ịsa kụ́, ọ yị sị adava tụ́ ahụ. Avaba aza ana saasa a aa na vị ana sị ịsa kú ịrẹsụ ẹnịnị, dị ẹ yaa jị oreree na.
31A va sị ọ kà yi Idevidi ka Ahitohwẹrị yà ịnị aza ọnị ọnịrị Abịsarọmị kụ́ ịrẹkụ tù Idevidi. Di Idevidi mẹ̀ aduwa dị ọ ka, “Ẹnẹyịmavara, aarịhịnị navọ avaba ẹnya ana Ahitohwẹrị jị aanị ọ̀ vara ịrẹyị kẹnẹ-kẹnẹ.”
Idevidi ộ tụ́ Ihusayi ne were-were re ẹtẹ
32Idevidi ọ na sị ngụ ịrẹsụ ataba ịzị aza yàa hẹkẹ Ohomorihi. Di o ne tù ka Ihusayi Anaakị yà ịzọọ ka ọnị ọ̀ va gẹrị ọ nị. Awuru Ihusayi vị ana na, dị ịrẹsụ anị vị ezi-ezi. 33Di Idevidi kà a yọ dị ọ ka, “Wàa ka waa saasa amị, ụ vaa dọ mị oro nị. 34Ama wàa vana và nọ ịnị ẹkụra ọnị ọ gụ hụ nị. Wèe tù ịzọọ dị ụ kà a yị Abịsarọmị ka, ‘taarụ, maa yà ahụ awụ.’ Kà a ka ozi ahụ ada amị ụ vịdị vị ịyẹẹyẹ nị, ka u ree sì ka wa rẹ vị ozi ahụ ọnị Abịsarọmị. Wàa vavọọ mẹ, u ve zuu du iwe ana Ahitohwẹrị ee pè e jị. 35Idevidi rẹ ka Ịzadọkị ọnịrị Abiyata ẹnị ẹyịva ana vị ohirẹsụ irehi Ohomorihi vaa yà ịzọọ pè Ihusayi. Ọ kà ọ̀ kà ịrẹyị tụra ịrẹyị ẹnẹ ẹ̀ẹ wụ́ ịda ohinọyị yi wa. 36Ahimaazị ozi Ịzadọkị ọnịrị Ijonatani ozi Abiyata hi ịzọọ pè ada ẹnịnị. Idevidi ka ịrẹyị oni Ịzadọkị ọnịrị Abiyata ẹ̀ẹ wụ́ ẹ̀ sị tụ́ ezi ẹnẹẹ hị́ ọnị.”
37Abịsarọmị maanị aa yịị ngụ ịnị ẹkụra kẹnẹ dị Ihusayi ana vị ọta Idevidi na ngụ Ijerusarẹmị nị.
Àwon tá yàn lọ́wọ́lọ́wọ́ báyìí:
2 Ịsamụwẹrị 15: EBTP
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Ebira First Bible © Bible Society of Nigeria, 2014.