2 Ịsamụwẹrị 10
10
Idevidi ô hú Anamọnị nịnị ẹtẹ éyi ịrẹkụ
(1 Ịtọ 19.1-19)
1Ịjị ọ dà kù oni Idevidi vavọọ na raà sị Imehwibọsẹtị, di ohinọyị Anamọnị nịnị wusu nị. Di ozi ohinọyị ọnọọ ana aā hị́ Ihanuni rị ohinọyị dọ ada anị ịrẹsụ nị. 2Di Idevidi ve ro o ka ọnị aa naa mẹ ayamvaa yị Ihanuni ọnọọ nị. Ihanuni vi ozi Inahasi. Idevidi kà Inahasi ada Ihanuni ọ rẹẹ̀ vịdị mẹ ayamva yị ọnị da. Di Idevidi va tụ́ aza ka ẹ̀ na kụ́ Ihanuni nyaarị ọ agụvị ada anị ene sú nị. Ịjị aza ọnị Idevidi vavọọ tụ́ na sị ngụ ẹtẹ Anamọnị, 3dị ọdọvịdị Anamọnị ne si tù Ihanuni ọga ẹnịnị dị ọ ka, “Taarụ, wáá yẹ ka aza oni Idevidi tụ́ ka ẹ̀ va kụ́ wụ aanị, ẹ yị vị ọ sị sị ụbanyị yị wụ? Wáá yẹ ka vị ọ tụ́ wa vẹ ka ẹ̀ va ngụ ịnị ẹtẹ ọnọnị di è re ẹtẹ mẹmẹ yà nị? Wáá yẹ ka vi eyee sì ka ẹnị ẹ̀ kụ́ ịrẹkụ va hụ́ yị nị?” 4Ihanuni mẹ̀ vavọọ wụ́, dị ọ za aza oni Idevidi tụ́ na, dị ọ kụ̀ achẹva ịrẹwa ẹnịnị nị. Dị ẹ rẹ za wa awuru dị ẹ yẹrẹ ẹ hụụnị akakana na ngụ iruvo nị. Ịjị ẹ vavọọ sị wa mẹ, dị ẹ dụ wa varẹma nị.
5Ịjị a va kà a yi Idevidi, dị ọ tụ́ ka à na gẹrị aza ẹnẹẹ nị. Aza ẹnẹẹ vị ana a mẹ̀ ụhị nyị ẹtẹẹtẹrẹ. Dị Idevidi ohinọyị tụ́ hi wa ka ẹ̀ jẹẹ Ijeriko pooro dị ịrẹwa ẹnịnị ò nyị, dị ẹ̀ vavẹ.
6Anamọnị e si re ka ẹnị ẹ sị ayị mẹ kụ́ Idevidi ẹnẹmẹhị, dị ẹ wụsẹ sị ẹkẹhị na hị́ isoja Anarami ẹnị akawụ-akawụ oze ẹẹwụ hụrẹ Ịbẹtị-Ịrẹhọbị ọnịrị Izoba nị. Ẹ rẹ na hị́ ohinọyị Imaaka isoja anị akahị. Dị ẹ rẹ na hị́ isoja ẹnị akawụ-akawụ oze ịhịnọnyị hụrẹ Itobi nị.
7Idevidi mẹ̀ vavọọ sị wụ́, dị ọnị rẹ tụ́ Ijowabi ọnịrị avaba isoja anị ka è ne tù aza Anamọnị nị. 8Anamọnị ê tenyi ẹngụ ịrẹkụ tụ́ oze ana a zị naa ngụ ẹkụra ẹnịnị, dị Anarami ana hụrẹ Izoba ọnịrị Ịrẹhọbị vẹ ne beri Anịtọbị ọnịrị Animaaka ẹnị tenyi ẹngụ ịrẹkụ tụ́ ịnị avị chapaa nị.
9Ijowabi mè re ka a sị ịrẹkụ gu tụ́ ọvịdị ọnịrị ịrẹma anị, dị ọ tọ̀ọ́ isoja ana nyị ẹngụ ẹnịnị ini isoja Anisirẹrị dị ọ ka ẹnịrị Anarami ẹ̀ na gẹ ịrẹkụ nị. 10Dị ọ ka Abisayi ọyịnyara anị ò sị eyi pè isoja ana vọ dị ọ̀ kụ́ wa dị ẹnịrị isoja Anamọnị ẹ̀ na gẹ ịrẹkụ nị. 11Di Ijowabi ka, “Anarami ẹ̀ẹ sị kata huna mị, dị ụ va dọ mị ha. Àa vị Anamọnị sị kata huna wụ nị, dị ẹmị rẹ va dọ wụ̀ ha.” 12Dị ọ rẹ ka, “Asị u hí angwa, vẹ ya sị ọtụtụrụma kụ̀ ịrẹkụ agụvị ẹkụra ayị ọnịrị agụvị ẹkụra Ohomorihi ayị. Ẹnẹyịmavara vaa mẹ̀ ịsa ene zee e eyi.”
13Di Ijowabi ọnịrị isoja anị tere pè Anarami ịnị ịrẹkụ nị. Anarami mè re wa, e kú zwe. 14Anamọnị mè re ka Anarami e zi zwe, dị ẹnị re si zwe hụụ ịda Abisayi na ngụ ịnị ẹkụra nị. Di Ijowabi varẹma hụrẹ ịrẹkụ Anamọnị dị o si hu aa vẹ Ijerusarẹmị nị.
15Anarami mè re ka Anisirẹrị ẹ sị ẹnị dụ, dị ẹ rẹ varẹma kụ́ ẹngụ gụ nị. 16Ọnọrụ ọnya ana aā hị́ Ihadadeza ộ tụ́ na hị́ Anarami hụrẹ akẹnẹ okuha Eyihureti vẹ. Ọnọrụ ana aā hị́ Isobaki ana vị ọga isoja Ihadadeza ọ kụ́ aza ẹnẹẹ aa vẹ nị.
17Á mẹ̀ vavọọ va kà a yi Idevidi, dị ọnị rẹ kụ́ avaba Anisirẹrị gụ dị ẹ jịnẹ nọ akẹnẹ Okuha Ịjọdanị dị ẹ na ngụ Iheramị nị. Dị Anarami gù ịrẹkụ ẹnịnị di e si hu aa naa gẹrị Idevidi ka ẹnịrị ọ ọ̀ na kụ̀ ịrẹkụ nị. 18Ẹ mẹ̀ gẹ, Anisirẹrị ẹ sị wa dụ, di Idevidi wụ̀ isoja ẹnịnị ana aā sị umaata kụ̀ ịrẹkụ ẹnị akatarẹchẹhị, dị ọ rẹ wụ̀ isoja anahụ ẹnị akawụ-akawụ oze oohu nị. Ọ rẹ za Isobaki ọga isoja Anarami, dị ọ và ịsa hị́ ọ ẹngụ, dị ọ wụ̀ ọ tụ́ ịzọọ nị. 19Ịjị ohinọyị ana vọ ana vịdị vị ozi ahụ Ihadadeza re ka Anisirẹrị ẹ sị wa huna, dị ẹ ka ẹmịrị Anisirẹrị ọ yị kụkụ zyaazị nị. Dị ẹ kụkụ va vara ọrịhị Anisirẹrị nị. Angwa kuku ee hi Anamọnị nịnị, dị ẹ yị kụkụ nyayịnẹ na gụ Anamọnị nịnị ụvọ nị.
Àwon tá yàn lọ́wọ́lọ́wọ́ báyìí:
2 Ịsamụwẹrị 10: EBTP
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Ebira First Bible © Bible Society of Nigeria, 2014.