2 Ịsamụwẹrị 1
1
 kà enube usu Ịsọọrụ yi Idevidi
1Ịnị ụmẹ ọnya Idevidi ộ kụ́ ịrẹkụ ne tù Anamarẹkị, dị ọ wụ̀ wa nị. Ọ mẹ̀ sị wa wụ dị ọ vavẹ dị ọ va yà Izikiragi mẹ ẹkụhị ẹẹva nị. Ịjọnọọ Ịsọọrụ ọnị ô wusu, 2dị ahịka eyinẹhẹ oni Idevidi vavọọ vẹ ọ́za ịnya zwe hụrẹ ịnị isoja Ịsọọrụ di o ve tù Idevidi nị. Ọ màa vẹ, awuru anị vị ọnị ọ na, dị ọ ká ezi và hi ịrẹsụ ana si zụ̀ ka ayị anị vị ana nyayịnẹ du nị. O mè ve tù Idevidi dị ọ tana tụra ẹtẹ dị ọ kụ́ ọ nị.
3Di Idevidi va họ̀ ọ ka ịzị ọ hụrẹ vẹ? Dị ọza ọnọọ ka ini isoja Anisirẹrị ọnị zwe hụrẹ vẹ nị. 4Di Idevidi ka, “kà a mị a vị à yị nyị ịrẹyịị?” Dị ọnọrụ ọnọọ ka, “Anda ayị vi ene zwe hụrẹ ọvịdị ịrẹkụ. A kụ́ ọrụrụ-ọrụrụ ẹnịnị wụ̀. Ịsọọrụ ọnịrị Ijonatani ozi anị ệ hyakụ wusu bẹẹ.”
5Di Idevidi va họ̀ ozi ọnọrụ ọnọọ ana maanị va kà enube yọ dị ọ ka, “Ụ mẹmẹ yẹ ka Ịsọọrụ ọnịrị Ijonatani ozi anị ê wusu?” 6#1 Ịsa 31.1-6; 1 Ịtọ 10.1-6Di ozi ọnọrụ ọnọọ ka ẹnị va na yà ịnị ataba Igibiya ịhị ọnọọ. Di oni re ka Ịsọọrụ ộ jẹẹ vàrịrẹ ụhwọ ọbanyị anị nị. Di oni re ka isoja ọnịrị ẹnịnị ana tụra ịkẹkẹ oni umaata ee tura ọnịrị isoja anaā tụra umaata nịnị maa dụ Ịsọọrụ, ẹ yaa vaa za a nị. 7Ọ kà Ịsọọrụ mẹ̀ kana eyi di o re ọnị, dị ọ hị́ ọnị nị. Dị ọnị zẹẹ, dị ọnị ka ọ́ mẹ kà nị? 8Di ozi ọnọrụ ọnọọ ka dị Ịsọọrụ va họ̀ ọnị use ka ẹnị ọnị vị nị? Dị ọnị ve tù ohi dị ọnị ka Anamarẹkị ọnị vị nị. 9Dị ọ ka Ịsọọrụ ọ va kà a yị ọnị ka aarịhịnị ọnị ọ̀ vẹ dị ọnị ọ̀ wụ̀ ọnị Ịsọọrụ, ka ọnị aa tịị tụ́ ụhwẹ, ama a sị ọnị tụ̀ ụnava odivi, oni ee vee sú. 10Di ozi ọnọrụ ọnọọ ka dị ọnị va na, dị ọnị wụ ọ nị, agụvị ka ọnị ộ yẹ ka ọ mẹ̀ nọ ẹtẹ avọọ, ọ yị kụkụ va zụụ rị ọ, vi ee sú nị. Ọ kà dị ọnị kụ́ amu ohinọyị ọnị Ịsọọrụ kú ne beri ịsị ọ kụ́ hi ụvọ, dị ọnị kụ́ wa va yị Idevidi aanị nị.
11Di Idevidi ọnịrị aza ene hi ịzọọ pè e za awuru ẹnịnị dị ẹ na a, áyị màa kụ́ wa nị. 12Dị ẹ jị òrèrè Ịsọọrụ ọnịrị Ijonatani ozi anị pooro nị. Avọọ ẹ mẹ̀ re jị òrèrè agụvị isoja Ẹnẹyịmavara ọnịrị agụvị avaba Anisirẹrị ene sú éyi ịrẹkụ nị. Ẹnịnị ẹ yị rị ịsa hụrẹ ẹnẹnẹ pooro na ngụ oruva.
13Di Idevidi va hị́ ozi ọnọrụ ana va kà enube yọ aanị dị ọ ka ịzị ụ hụrẹ vẹ? Di ozi ọnọọ ka ọnị vị ọzọga Anamarẹkị ọnị vị nị. 14Di Idevidi ka, “Wâ kụ̀rà ụvọ awụ wâ wụ̀ ọza ọnị Ẹnẹyịmavara nyị mẹ ohinọyị angwa ọ yị daba hi wu?” 15Di Idevidi hị́ isoja anị ọnya dị ọ ka ọ̀ kà pè e dị ọ wụ̀ ọ nị. Ịzẹyịza dị ọ kà pè e, dị ọ và ịsa hị́ ọ ẹngụ, dị ọ wụ̀ ọ nị. 16Di Idevidi ka, “Wèe sú, ẹwa rị ịvị ẹngụ awụ nị. Ịrẹyị ọnị ẹwụ ụvọta kà vi ivenu, ka ẹwa wụ̀ ọza ọnị Ẹnẹyịmavara nyị mẹ ohinọyị nị.”
Idevidi ộ jị òrèrè Ịsọọrụ ọnịrị Ijonatani
17Ahẹ ọnọnị Idevidi jị ọnị ọ sị jị òrèrè Ịsọọrụ ọnịrị Ijonatani ozi anị nị. 18#Ijos 10.13Ahẹ ọkịta aā hị́ ahẹ ọnọnị nị. Idevidi ka à sị kọ Anijuda. Â chẹrẹ ahẹ ọnọnị tụ́ ini iwe Ijasari.
19Anisirẹrị oo! a kụ́ ọdọvịdị awụ wụ ịrẹsụ ataba
Isoja ayị ọkọọka ê wusu
20Asị a zẹẹ ka à wụ ọ Igati
Asị eyi ha ọza na kà a ịnị ubooro Asikeroni oo!
Wàa kà a di ezi anẹẹ Anihwirisiti wụ́ nị
vị ẹ vaa jẹ nị.
Mị ka ezi anẹẹ anị ẹẹ mẹ kẹnẹ-kẹnẹ nị,
ẹ̀ẹ wụ vị ẹ yaa jẹ nọ!
21Ẹwụ ataba Igibiya eguhi o mē vene chire
hi wu di ò ve si tù orihi oo.
Ẹwụ ataba Igibiya, wẹ mā vana mẹ̀ ịsa ana aā
sị ịnị anị naa yị Ohomorihi pàá.
Ịzọọ a yà du ogonto ọka isoja ayị ẹngụ nị,
asị a kụkụ nyị ọza ana aa sị angwẹ sisi
ogonto Ịsọọrụ oo!
22Ijonatani, wàa sị ọkịta awụ, ọnịvị ệ yẹ ka isu ộ vẹ
Ịsọọrụ wàa sị ụhwọ awụ, wẹ ma vayị ọza
Ọnịvị ana kata vị ọnị ụ maanịị wụụ vaa ha.
23Ịsọọrụ oo! Ijonatani oo!
Ẹ́ mè yi yà ẹhẹ ệ sị̀ ayị yị ẹngụ
Dị ẹ daka yi sú, ẹ yị hụrẹ ẹngụ ụvọ.
Ệ rẹ huna irepe, ẹnịnị ệ nyị ụkata huna idu
24Ẹwụ anyẹnẹẹ Anisirẹrị, waā jị òrèrè Ịsọọrụ nịnị,
Ịsọọrụ anaā kụ́ ịta ozoza va wụ nịnị,
dị ọ rẹ kụ́ igooru ọnịrị iweyi yị wụ ka wa sịị
mẹ ọvị nịnị.
25Nda o! Isoja ayị ọkọọka ê wusu éyi ịrẹkụ.
Ijonatani o, ịrẹkụ ọ sị ọ rị ịnị ataba.
26Ijonatani, ọhụva amị, isu awụ ộ zị mị
Ewee re sì ịrẹyị amị pooro, ọnị ọza ọ̀ yị
zụ ka.
Wâ hyakụ sì ịrẹyị amị hụụnị ọnẹẹ
mè zụ sì ịrẹyị ọza
27Isoja ayị ọkọọka ê wusu
Ohirẹkụ ayị nịnị ê wusu va ha.
Àwon tá yàn lọ́wọ́lọ́wọ́ báyìí:
2 Ịsamụwẹrị 1: EBTP
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Ebira First Bible © Bible Society of Nigeria, 2014.