1 Ịsamụwẹrị 21
21
Idevidi ô zwe yị Ịsọọrụ na yà Inobi
1 #
Imt 12.3,4; Ịmk 2.25,26; Irk 6.3 Idevidi ọ na sị ngụ ịzị aā hị́ Inobi, dị ọ nọ ịda ohirẹsụ irehi Ohomorihi ana yà ịzọọ ana aā hị́ Ahimẹrẹkị nị. Ahimẹrẹkị mẹ̀ na gẹrị Idevidi, dị ẹngụ anị aa da ẹgahị nị. Dị ọ họ̀ Idevidi dị ọ ka, “Sị ẹ vẹ dị ahịka ẹwụ ịnyara aa vẹ nị? Sị ẹ vẹ dị ẹ̀ yị nyị ọza ana saasa awụ?” 2Di Idevidi tụ́ Ahimẹrẹkị ana vị ohirẹsụ irehi Ohomorihi ohi, dị ọ ka â nyị ụtụ oni ohinọyị tụ́ ọnị. Ọ kà ohinọyị ka asị a nyị ọza ọnị ọnị kà ụtụ ọnọọ zụ̀. Di Idevidi ẹ vara gẹrị ọnị aha ọnya aanị nị. 3Di Idevidi rẹ kà a yị Ahimẹrẹkị dị ọ ka, “Sị wụ nyị rị ụvọ booro aanị, navọ wa sị Ịbụrẹẹdị ẹẹhị mị. À yị vị avọọ, ịsị wàa nyị kẹnẹ ụ sị mị.” 4Di ohirẹsụ irehi Ohomorihi ọnọọ tụ́ Idevidi ohi dị ọ ka ẹ yị nyị Ịbụrẹẹdị kẹnẹ ana kụkụ tịtẹ, ama â nyị Ịbụrẹẹdị ana siī tụ́ ini eehi Ohomorihi. Dị ọ rẹ ka ezi ẹnẹnị yọ á vị ẹnịnị ẹ̀ yị kanyị ọnẹẹ? 5Di Idevidi ka yẹ mā kanyị ọnẹẹ yàa maanị aa jịnẹ. Aza ẹnịnị ẹ̀ẹ hyakụ aa jịnẹ kẹnẹ, vị ẹẹ̄ za ido nị, dị ma va na kà ụsẹ ẹnị ẹ yaa zị ajịnị aanị. 6#Ire 24.5-9Di Ohirẹsụ irehi Ohomorihi ọnọọ sị Ịbụrẹẹdị ọnọọ ana a sịị̄ tụ́ ini irehi Ohomorihi yọ nị, agụvị ka ẹ yị nyị Ịbụrẹẹdị ọsa ịzọọ. Â nyị Ịbụrẹẹdị ana a sị vaa tụ́ ọdọvịdị Ohomorihi, ama a raà sị ọ kwooze ka a sị Ịbụrẹẹdị ọsa ana ngụ ịra va dọ ọ ịrẹsụ ịnị ịhị ana a sị ọ hụụ ịzọọ.
7Ịhị ọnọọ â nyị ozi ahụ Ịsọọrụ ọnya aanị ana a za tụ́ ịzọọ. Ịrẹha anị ori Idowegi nị. Anedomi ọ vị nị, dị ahịka ọnị ọ vị ọga aza ana sị eyi pè ịsụpa Ịsọọrụ nị. 8Di Idevidi họ̀ Ahimẹrẹkị ka ọ́ọ nyị ọha àa vị ụhwọ nị. Idevidi ka ọnị ọ yị za ọha anị ọnịrị ụhwọ anị rị ụvọ, agụvị ka ụtụ eyiha-eyiha ohinọyị tụ́ ọnị nị. 9#1 Ịsa 17.51Di ohirẹsụ irehi Ohomorihi ọnọọ ka ụhwọ Igorayati Anihwirisiti ọnị ọ wụ ini ozi Era ịhị ọnọọ tịtẹ ịzẹnị. Â sị ịta para a tụ́ ịrẹma ịharamịra ịzọọ. Ọ kà òo sì ọnọọ dị ọ̀ sị ọ agụvị ka ẹ yị nyị ụhwọ ọsa ịzẹnị. Di Idevidi ka, “sị ọ mị, ka ẹ yị nyị ụhwọ ene huna ọnọọ.”
Idevidi yà Igati
10Di Idevidi kwẹẹtẹ ịhị ọnọọ di o si zwe hụrẹ ịda Ịsọọrụ nị. Di o zwe nọ ịdị Akisi ana vi ohinọyị ẹkụra Igati nị. 11#1 Ịsa 18.7; 29.5Di ezi ahụ Akisi hị́ Akisi dị ẹ ka, “wáá yẹ ka ohinọyị ẹtẹ ịhị ọnọọ yị? Wáá yẹ ka ọnị aza aa nyị ẹzẹ, dị ẹ yaa jị ahẹ gono o ka Ịsọọrụ ộ wụ̀ aza ẹnị akahị, ama Idevidi ọnị vị ana wụ̀ aza ẹnị otomiroku.”
12 #
Ahẹ 56
Di Idevidi ee ro ịrẹyị ẹnẹẹ ịnị ayị anị, dị angwa Akisi ana vi ohinọyị Igati kuku ee hị́ ọ nị. 13#Ahẹ 34Dị ọ kụkụ aa mẹ apẹ ka ọnụra ọnịvị éyi ẹnịnị nị. Ọ̀ọ sị vi eyi ẹnịnị dị aa mẹ anka ọnụra avọọ. Di aa chẹrẹ ịsaa hi ini ukere oze ana na ngụ ịnị ẹkụra, dị ọ raa và atẹẹ hi ịrẹwa nị. 14Di Akisi va hị́ ezi ahụ anị dị ọ ka, “wéē re ọnọrụ ọnọnị, ọnụra ọ vị nọ! Sị ẹ vẹ dị ụ sị ọ vẹ ịda amị nịnị? 15Aanị ka ọnụra ene hi ịzẹnị aanị ẹ yị hụ mị dị wụ rẹ na sị ọsọnị vẹ ka ọ̀ maanị vaa mẹ ịda amị ịzẹnị? Sị wụ daka sị ẹngụ ọza ọnọnị ve sì ịda amị nịnị?”
Àwon tá yàn lọ́wọ́lọ́wọ́ báyìí:
1 Ịsamụwẹrị 21: EBTP
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Ebira First Bible © Bible Society of Nigeria, 2014.