Рацыд 16
16
1Израилӕгтӕ Елимӕй куы рацыдысты, уӕд, Елим ӕмӕ Синайы ’хсӕн, Син, зӕгъгӕ, цы ӕдзӕрӕг быдыр ис, уырдӕм бафтыдысты. Уый уыди, Мысырӕй куы рацыдысты, уымӕн йӕ дыккаг мӕйы фынддӕсӕм бон. 2Израилы дзыллӕ та ӕдзӕрӕг быдыры ногӕй хъуыр-хъуыр кӕнын райдыдтой Моисей ӕмӕ Аароныл. 3Дзырдтой: «Фӕлтау Мысыры куы амардаиккам Дунедарӕджы къухӕй. Уым бадтыстӕм дзидзайы ӕгты уӕлхъус, нӕ фаг нын уыди дзул! Сымах та не ’ппӕты дӕр ацы ӕдзӕрӕг быдырмӕ сыдӕй амарынмӕ ракодтат». 4Ӕмӕ Дунедарӕг Моисейӕн загъта: «Дзул уын ӕруарын кӕндзынӕн арвӕй. Адӕм-иу алы бон дӕр рацӕуӕнт ӕмӕ-иу сӕхицӕн бонваг ӕруидзӕнт. Ӕз та сӕ бафӕлвардзынӕн, кӕддӕра Мын Ме ’Гъдау куыд ӕххӕст кӕнынц. 5Ӕхсӕзӕм бон та ӕруидзӕнт, цас сын бантыса, уый бӕрц, ӕмӕ фендзысты, иннӕ бонтимӕ абаргӕйӕ, дыууӕ хатты фылдӕр кӕй ӕруыгътой, уый».
6Моисей ӕмӕ Аарон израилӕгтӕн загътой: «А изӕр базондзыстут, Мысырӕй уӕ Дунедарӕг кӕй ракодта, уый. 7Куы ӕрбабон уа, уӕд та фендзыстут Дунедарӕджы кад. Уымӕн ӕмӕ Дунедарӕг фехъуыста, куыд Ыл бустӕ кодтат, уый. Мах та чи стӕм? Махыл нӕ, фӕлӕ Хуыцауыл кӕнут бустӕ!»
8Ноджы ма Моисей загъта: «Дунедарӕг уын уӕ фаг ратдзӕн: изӕры — дзидза, райсомӕй та — дзул. Уымӕн ӕмӕ уын фехъуыста уӕ хъуыр-хъуыр. Сымах Дунедарӕгыл бустӕ кодтат, махыл нӕ, фӕлӕ. Мах чи стӕм?!» 9Моисей Ааронӕн бафӕдзӕхста: «Израилы дзыллӕйӕн зӕгъ, цӕмӕй Дунедарӕджы раз ӕрлӕууой, уымӕн ӕмӕ сын Дунедарӕг фехъуыста сӕ хъуыр-хъуыр».
10Аарон уыцы ныхас израилӕгтӕн куы рафӕзмыдта, уӕд адӕм се ’ргом ӕдзӕрӕг быдырмӕ сарӕзтой — ӕмӕ дын сӕм ӕврагъӕй куы разынид Дунедарӕджы кад. 11Дунедарӕг Моисейӕн загъта: 12«Израилӕгты хъуыр-хъуыр фехъуыстон, ӕмӕ сын афтӕ зӕгъ: изӕры хӕрдзыстут дзидза, райсом та уын уӕ фаг уыдзӕн дзул. Ӕмӕ уӕд бамбардзыстут, Ӕз Дунедарӕг кӕй дӕн, уӕ Хуыцау, уый».
13Изӕры рӕсӕнуат уӕрццытӕй байдзаг ис, райсомӕй та йӕ алыварс зӕххыл ӕртӕх ӕрбадт. 14Ӕртӕх куы байсыст, уӕд зӕххы уӕлцъарыл разынди халасы хуызӕн цыдӕр лӕхурӕг. 15Израилӕгтӕ йӕ куы федтой, уӕд кӕрӕдзийы фарстой: «Уый цы уа, цымӕ?» Ницы йын зыдтой. Моисей сын загъта: «Уый дзул у, Дунедарӕг уын ӕй хӕрынӕн дӕтты. 16Дунедарӕг уын фӕдзӕхсы, цӕмӕй дзы алчи йӕ бинонты фаг ӕруидза — алы адӕймагӕн дӕр иу омеры бӕрц»#16:16 Омер у дзуттаг дзырд, бӕрцуат амонӕг — 1–1,5 литры. Хӕстӕг Скӕсӕны цӕрӕгӕн уый бӕрц хор уыди йӕ боны хойраг..
17Израилӕгтӕ бакодтой, куыд загъд сын уыд, афтӕ. Чи сӕ фылдӕр ӕруыгъта, чи та — къаддӕр. 18Цы ӕруыгътой, уый омерӕй куы барстой, уӕд рауад афтӕ, ӕмӕ, бирӕ чи ӕрӕмбырд кодта, уымӕ уӕлдай нӕ уыди, къаддӕр чи ӕрӕмбырд кодта, уый та нӕ баййӕфта хъуаг. Алчидӕр сӕ ӕруыгъта йӕ бинонты фаг. 19Моисей сын загъта: «Райсоммӕ дзы мацы ныууадзут». 20Фӕлӕ йӕм нӕ байхъуыстой. Чидӕртӕ дзы ныууагътой райсоммӕ, ӕмӕ сын скӕлм ӕмӕ сысмаг ис, ӕмӕ сӕм уый тыххӕй Моисей смӕсты. 21Алы райсом алчидӕр уыгъта йӕ бинонты фаг. Зӕххыл ма-иу цы баззад, уый та-иу фӕстӕдӕр хуры хъарммӕ атад.
22Ӕхсӕзӕм бон ӕруыгътой дыууӕ хатты фылдӕр — алкӕмӕн дӕр дыууӕ омеры бӕрц. Дзыллӕйы хистӕртӕ йӕ Моисейӕн куы загътой, 23уӕд сын Моисейы ныхас уыди: «Уый тыххӕй Дунедарӕг дзырдта. Райсом ӕнцойбон у, Дунедарӕджы уаз сабат. Цы фыцинаг стут, уый абон сфыцут, уӕ хӕринагӕй ма цы баззайа, уый та райсоммӕ бавӕрут». 24Ӕмӕ сын Моисей куыд загъта, афтӕ, сӕ хӕринагӕй ма цы баззад, уымӕй дыккаг бонмӕ ныууагътой, ӕмӕ сын нӕ сысмаг ис ӕмӕ не скӕлм ис. 25Моисей загъта: «Хӕрут ӕй абон. Абон Дунедарӕджы сабат у, ӕмӕ быдыры ницы ссардзыстут. 26Уидзут-иу ӕхсӕз боны дӕргъы, ӕвдӕм бон та сабат у, ӕмӕ уыцы бон ницы ссардзыстут».
27Адӕмӕй чидӕртӕ ӕвдӕм бон дӕр ацыдысты уидзынмӕ, фӕлӕ ницы ссардтой. 28Дунедарӕг Моисейӕн загъта: «Кӕдмӕ уӕхи тигъ кӕндзыстут Мӕ фӕдзӕхстытӕ ӕмӕ Мӕ уагӕвӕрдтыл? 29Хъусгӕ кӕнут: Дунедарӕг уын радта сабат, ӕмӕ уын уымӕ гӕсгӕ ӕхсӕзӕм бон дыууӕ боны фаг хӕринаг ӕрвиты. Ӕвдӕм бон-иу уӕ алчи йӕ хӕдзары бадӕд ӕмӕ макуыдӕм цӕуӕд». 30Ӕмӕ ӕвдӕм бон адӕм сӕ фӕллад уагътой.
31Израилы адӕм уыцы хойраг схуыдтой маннӕ. Уыди хъонтхорайы нӕмыджы хуызӕн, урс, мыдамӕстыты ад кодта. 32Моисей загъта: «Дунедарӕг бафӕдзӕхста, цӕмӕй маннӕйы иу омер бафснайат мыггагмӕ, ӕмӕ фыдӕй-фыртмӕ алчидӕр уына, Мысырӕй ракӕнгӕйӕ уӕ ӕдзӕрӕг быдыры Дунедарӕг цы дзулӕй хаста, уый». 33Моисей Ааронӕн загъта: «Райс дурын, ныккӕн дзы маннӕйы иу омер ӕмӕ йӕ ӕрӕвӕр Дунедарӕджы раз, цӕмӕй уе ’ппӕт фӕлтӕртӕн дӕр уым ӕфснайдӕй лӕууа».
34Аарон маннӕйы дурын сӕвӕрдта Фидыды Чырыны раз, цӕмӕй уыцы ран ӕфснайд уа, Дунедарӕг Моисейӕн куыд бафӕдзӕхста, афтӕ. 35Цалынмӕ израилӕгтӕ Ханаанмӕ нӕ бахӕццӕ сты, уӕдмӕ дыууиссӕдз азы дӕргъы ӕдзӕрӕг быдыры маннӕйӕ цардысты.
36(Омер у ефӕйы дӕсӕймаг хай.)
Àwon tá yàn lọ́wọ́lọ́wọ́ báyìí:
Рацыд 16: ОссБ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Bible Society in Russia, 2002, 2009, 2011-2015, 2018.