Matayo 26

Olukwe lw'ohwiita Yesu

(Mrk 14:1-2; Luk 22:1-2; Yow 11:45-53)

1Olwoola, Yesu niyamala ohulomaloma ebiindu bino byoosi, yabolera abeeki bae ati, 2#Hut 12:1-27. “Mumanyire muti endaalo chibiri nichiwa sa chiti, Esidyaalo sya Paasaka sichia ohwoola, mani Omwaana w'Omuundu achia ohudiiswa mu mahono k'abaandu bachia ohumubaamba hu musalabba.”

3Mani Abalaamisi bahuluundu neende abeemirisi b'abaandu beecha bahung'aanira mu lwaanyi lwa Omulaamisi muhuluundu olaangwa Kayaafa, 4mani baahola olukwe lw'ohudiira Yesu bamwiite mu bweekisi. 5Nae beecha baaboola bati, “Hutahola sino hu ludaalo luhuluundu, olwohuba abaandu banyala ohukwaamo esiisi.”

Yesu abahwa amafuta naali Bbetani

(Mrk 14:3-9; Yow 12:1-8)

6Yesu niyali Bbetani mu nyuumba ya Simooni, owali yalwaalaho obulwaae bw'ebigeenge, 7#Luk 7:37,38.omuhasi wuundi yeecha eyiri Yesu n'ali neende echupa y'amafuta k'esing'aari haandi ak'obukusi bw'aakulu, mani yaakamuchuha hu mutwe. Yesu yali niyehaale naalya. 8Nae abeeki bae nibabona batyo, haba sibawulira bulai daawe, baboola bati, “Ohunyaasa amafuta mutyo hwaasi? 9Olwohuba amafuta kano bahakakusiremo hu obukusi bw'aakulu muno, mani eseende chahatuliremo bahachikabiire abamanani.”

10Nae Yesu koti lu yali n'amanyire bino yababoolera ati, “Eng'we, omuhasi wuno mumufwaambya siina syeene? Koti sa luyaaholeere esiindu silai muno siti, kose? 11#Amal 15:11.Buli siha muli neende abamanani, nae simuchia ohuba naange ebiha byoosi. 12Olwohuba omuhasi wuno yaanjuhireho amafuta kano naatekeha omubiri kwaange ohuchia ohusiihwa. 13Mbaboolera obwadyeeri endi, buli abuundu woosi, mu syaalo syoosi, buli yibaneekeseenge Emboosi Endai yino, esiindu si yaholeere sino, bachia ohusilomalomaangaho sa ohumwiichulisa.”

Yuda afukiirira ohulya mu Yesu olukwe

(Mrk 14:10-11; Luk 22:3-6)

14Olwoola, mulala hu beeki ehumi-na-babiri, olaangwa Yuda Yisikarioti yachia eyiri Abalaamisi bahuluundu, 15#Sak 11:12.mani yaabateeba ati, “Munaamberesa siina syeene ni mbadiisa Yesu?” Mani ni bamubalira eseende ch'efeesa ebituundu amahumi kadatu bamuberesa. 16Ohutula ebiha ebyo, Yuda yachaaka ohukiiya engira yaanyala ohuliira mu Yesu olukwe.

Yesu alya Esidyaalo sya Paasaka neende abeeki bae

(Mrk 14:12-21; Luk 22:7-13,21-23; Yow 13:21-30)

17Bulaanu, hu ludaalo lutaangira lw'esidyaalo sy'Emigaati Ekitabbaahirwe, abeeki ba Yesu beecha yaali baamuteeba bati, “Mani odaha huhutekehere yeena bweene aw'ohuliira Esidyaalo sya Paasaka?”

18Nae yababoolera ati, “Muchie mu siko, mu daala ly'omuundu wuundi mani mumuboolere muti, ‘Omweekesa aboola ati, ebiha byaange mbao byoolere. Njia ohuliira Esidyaalo sya Paasaka alala neende abeeki baange mu nyuumba yao.’ ”

19Mani abeeki beemao baahola koti lu Yesu yababoolera, mani baachia baatekeha Esidyaalo sya Paasaka.

20Nibwoola engoloobe, Yesu yeehala alala neende abeeki #26:20 abeeki: Ebyandiiko bihuluundu biindi bileha ‘abeeki.’ ehumi-na-babiri, bachaaka ohulya. 21Mani nibali balya, Yesu yaboola ati, “Mbaboolera obwadyeeri endi mulala hweeng'we achia ohuundyaamo olukwe.”

22Abeeki bawuka muno, baachaaka ohumuteebaanga sya mulala-mulala bati, “Omwaami, oli ohuboolaanga ese, kose?”

23 # Sab 41:9. Yesu yakobolamo ati, “Oyo odoonga naange mu saani ndala niye ochia ohuundyaamo olukwe. 24Mani Omwaana w'Omuundu achia ohufwa koti lu byandiiko byoolerefu bi muboolaho, nae chiakaanire oyo ochia ohulya mu Omwaana w'Omuundu olukwe! Byahahirire omuundu oyo obuteebulwa!”

25Abweene ao Yuda omuhobi yalomalomera aakulu ati, “Omweekesa, oli ohuboola ese, kose?”

Nae Yesu yaamuboolera ati, “Mbao omweene oboolere.”

Esy'engoloobe sy'Omwaami

(Mrk 14:22-26; Luk 22:14-20; 1 Kor 11:23-25)

26Bulaanu nibali nibasiilya, Yesu yabukula omugaati, yaakusabira ehabi, yaakumekula-mekula mani yaakuberesa abeeki bae n'aboola ati, “Mubukule mulye, kuno nikwo omubiri kwaange.”

27Haandi yabukula esikoombe, mani niyamala ohweebasa, yasiberesa abeeki bae n'aboola ati, “Mubukule, mung'we hu sino mweesi; 28#Hut 24:8; Yer 31:31-34.olwohuba kano niko amabaanga kaange #26:28 ak'Endagaano: Ebyandiiko bihuluundu bihale bimeedaho ‘njaaha.’ ak'Endagaano akachia ohwiidiha hulw'abaandu baangi hulw'ohuleherwamo ebyonoono. 29Mbaboolera endi siinjia hung'waaho haandi hu syaamo sy'efiini sino ohwoola hu ludaalo lundahang'weereho efiini njaaha alala naang'we mu Obwaami bwa Laata.”

30Mani nibamala ohweemba olweembo lw'ohufumia Nasaae, batula baachia hu lugulu lw'Emiseituuni.

Yesu atuumbula ohwekaana hwa Petero

(Mrk 14:27-31; Luk 22:31-34; Yow 13:36-38)

31 # Sak 13:7. Abweene ao, Yesu yababoolera ati, “Mweesi muchia ohwiiruha muundehe syeng'ene esiro sy'enyaanga yino, olwohuba syandiikwa siti, ‘Njia ohuhubba omwaayi, mani amakoondi k'omusidwooli kasalaane.’ 32#Mat 28:16.Nae niimalire ohusyuuha, njia ohubataangiriramo ohuchia Galilaaya.”

33Petero yalomalomera alafu naamuboolera ati, “Kata neende abaandi boosi bahulehe, ese haba siinjia huhuleha daawe.”

34Yesu yamuboolera ati, “Huboolera obwadyeeri bweene endi, esiro sy'enyaanga yino, engoho niyisisiiri ohuholyoohaho, onaba wundekaanire amahabi kadatu.”

35Petero nae yamuboolera ati, “Kata nihuli ohufwa naawe, haba siinjia ohuhwekaanaho daawe.”

Mani nilwo nasilala lu beeki baandi bosi baboola.

Yesu asaba Nasaae naali mu Getisemane

(Mrk 14:32-42; Luk 22:39-46)

36Bulaanu, Yesu yamala yaachia neende abeeki bae abuundu alaangwa ati, Getisemane, mani yaboolera abeeki bae ati, “Eng'we mudoong'eho ano, njieho aala ndekongooye.” 37Niyamala atyo, yabukula Petero neende abaana ba Sebbedaayo babiri mani yaachia nabo. Engisa yamudiira muno, yaaba neende esibeera siingi. 38Mani yaababoolera ati, “Engisa enyiingi yi ndi hu mwooyo, kata yinyala sa ohunjita-bwiita. Eng'we mudoong'eho sa ano mani mube #26:38 mube naange: Oba mube meeso. naange.”

39Mani niyasudaho budiidi mu moni ati, yeenama, yageng'a aasi obweeni bwae mani yaasaba n'aboola ati, “Laata, nisinyalihana, esikoombe syohusaandisibwa sino sihaye ohuunjolaho; nae sitaba koti lu ese ndaha, ohutusaho sibe koti lu ewe odaha.”

40Nae niyakaluha eyiri abeeki bae yabanyoola nibakona mani naaboolera Petero ati, “Eng'we haba simunyala ohumokaho #26:40 ohumokaho: Oba ohubaaho meeso. naange kata esaa ndala yoong'ene? 41Muliinde, #26:41Muliinde: Oba ‘mube meeso.’ mani musabe hu muhaye ohukwa mu mateemo. Omwooyo kweenya sa nae omubiri nikwo omukata.”

42Haandi ehabi lyohubiri, yasiingira yaachia ohwekongooya n'aboola ati, “Laata, esikoombe sino, nisitachia ohuundulaho nitasing'weere, leha syoodaha nisyo esiba siholebwe.” 43Yakobola haandi yanyoola nibakona olwohuba emoni chaabwe chali chisidooye, chichuule endoolo.

44Mani yaabaleha ao, haandi yaachia ohwekongooya ehabi lyohudatu n'aboola emboosi nasilala echo. 45Yakobola eyiri abeeki bae mani yaboola ati, “Eng'we musiikonere sa nimwewuluhira? Bone! Ebiha mbano byahoola eby'ohuliiramo Omwaana w'Omuundu olukwe, bamudiise mu mahono k'abonooni. 46Musiingire huweeo; omuhobi nguno amalire ohwoola.”

Ohudiirwa hwa Yesu

(Mrk 14:43-50; Luk 22:47-53; Yow 18:3-12)

47Yali nasiilomalomaanga atyo, Yuda, mulala hu beeki ehumi-na-babiri niyoola. Yaba ali neende esidiiyiha sy'abaandu nibakiingire engaanga neende endabuhi nibatula eyiri Abalaamisi bahuluundu neende abeemirisi b'Abayudaaya. 48Bulaanu omuhobi oyo yali amalire ohuwuliirisania neende esidiiyiha esyo ohubaberesa ahalolero mbwe, “Oyo yindaakwe mu sirifu niye yi mweenya, mumukweeho mumudire.”

49Yuda niyoola yachooma sa Yesu tiiri mani n'aboola ati, “Omweekesa, omuleembe kube naawe!” #26:49 Omweekesa: Oba ‘Rabbi.’ Mani yaamukwa mu sirifu.

50Yesu yaamukobolamo ati, “Wasyaange, siina esihuleetere?” #26:50 siina esihuleetere: Oba hola esyo si wiichiriire. Mani beecha baakwa hu Yesu mani baamudiira. 51Nae bone, mulala hu abo abali neende Yesu, yachoolayo olugaanga yaatemaho ohutwi hw'omuwaambe w'Omulaamisi muhuluundu. 52Nae Yesu yamuboolera ati, “Kalusa olugaanga lwao mu silaalo syalwo, olwohuba abo boosi abehoonyera olugaanga, balifwa olugaanga. 53Mubaasa muti sinyala ohwekongooya Laata yamberesa obuhoonyi, ni abweene ao atume eye lya bamalaika emikaanda kihira ehumi-na-kibiri? 54Nae nibyahabeere bityo, ebyandiiko byoolerefu ebiboola biti, bino bihoyere ohuholwa, byahoolerere bitye?”

55 # Luk 19:47; 21:37. Esiha esyo, Yesu yalomaloma neende esidiiyiha esyo yaboola ati, “Mwiichire neende engaanga alala neende endabuhi ohundiira, koti abeechera omwiibi? Buli ludaalo mbechaanga niinjekesa mu Nyuumba ya Nasaae nae lwasiina haba simundiiraangaho. 56Nae bino byoosi biholwe hu byandiiko byoolerefu bi banabbi baandiika byoolerere abweene.”

Mani abeeki boosi beecha beeruha baleha Yesu yeeng'ene.

Yesu ayaasibwa mu siina

(Mrk 14:53-65; Luk 22:54-55,63-71; Yow 18:13-14,19-24)

57Abo abali badiirire Yesu beemao baamuyira ewa Kayaafa omulaamisi muhuluundu, yi abeekesa b'Amalako neende abeemirisi b'abaandu bali nibebuusiire. 58Nae Petero yamuloondaangaho sa enyuma ohwoola lu boola mu lwaanyi lw'omulaamisi muhuluundu oyo. Yeengira mu lwaanyi mani yeehala aasi neende abaliindi naadaha ohubona koti lu buli siindu sinaabe. 59Bulaanu Omulaamisi Muhuluundu neende ab'esiina boosi bateemaho ohukoonyeresa obuloli bw'obubacha obudiira hu Yesu obunyala ohukera bamwiita; 60nae haba sibanyoolaho esiindu syoosi. Kata katyo mbwe abaandu baangi bateemaho ohulomaloma eby'obubacha hu Yesu. Luunyuma abaandu babiri bamala beema, 61#Yow 2:19.baboola bati, “Omuundu wuno yaboola ati, ‘Nyala ohulikula enyuumba ya Nasaae yino, haandi ndayoombahira mu ndaalo chidatu.’ ”

62Mani Omulaamisi muhuluundu, yasiingira yateeba Yesu ati, “Obulaho neende esy'ohukobolamo kata silala? Siina syeene si bano bahufwaambya?” 63Yesu nae yabuleera-buwuleera. Omulaamisi muhuluundu, yakobolamo n'aboola ati, “Mu liita lya Nasaae mulamu, ndaha weechube: Tuboolere nooli Kristo Omwaana wa Nasaae.”

64 # Dan 7:13. Yesu nae Yamuboolera ati, “Niiwe oboolere otyo. Nae mbaboolera endi, ohutula enyaanga yino, muchia ohubona Omwaana w'Omuundu niyehaale hu muhono muluungi kw'oyo oli n'obunyala bwoosi, haandi niyeechera mu maleesi ko Muukulu.”

65 # Lef 24:16. Mani Omulaamisi muhuluundu, yataandula engubo chae yaboola ati, “Ngandi enomanoma yino y'ohufwoola Nasaae. Lwasiina haandi hukoonya obuloli buundi? Mbao abeene mweewuliirireho emboosi chae embi echo. 66Nae eng'we muheengao mutye?”

Bakobolamo bati, “Ahoyera ohufwa sa.”

67 # Yis 50:6. Abweene ao bachaaka ohumufuuchaho amate mu moni alala neende ohumuhuya; nae abaandi bamupaama nibaboola bati, 68“Ewe Kristo, tutumbulireho. Wiina mweene ohuhuyire?”

Petero yekaana Yesu

(Mrk 14:66-72; Luk 22:56-62; Yow 18:15-18,25-27)

69Esiha esyo, Petero yali yehaale erwaanyi mu lwaanyi, nae omuhaana mulala hu bahalaabani b'Omulaamisi Muhuluundu yeecha yali yamuboolera ati, “Ewe wesi obeere neende Yesu Omugalilaaya.”

70Nae Petero yekaana muno mu moni w'abaandu boosi ati, “Ese ngoterwe byooli ohuboola ebyo.” 71Niyamala atyo yasiingira yaachia mu siruwa. Omuhaana wuundi yamubona ao, yaboolera abali beemere ao ati “Omusaacha wuno yesi abeere neende Yesu Omunasareeti.”

72Petero haandi yekaana niyechuba ati, “Omuundu oyo, ese haba simumanyireho daawe.”

73Ebiha bidiidi nibyabitao, abali nibeemere ao, beecha eyiri Petero mani baamuboolera bati, “Mubwadyeeri bweene, ewe oli mulala hu baandu bae, olwohuba engeri yoolomalomeramo yihubuula sa.”

74Haandi Petero yachaaka ohwekaana niyechuba ati, “Omusaacha oyo ese mukoterweho.” Abweene ao, edaaywa niyiholyooha.

75Mani Petero yeechulisa bulai bweene bi Yesu yaboola ati, “Edaaywa niyisisiiri ohuholyooha, onaabe wundekaanire amahabi kadatu.” Mani yaatula erwaanyi yaalira muno.

Àwon tá yàn lọ́wọ́lọ́wọ́ báyìí:

Matayo 26: SAMIA

Ìsàmì-sí

Daako

Ṣe Àfiwé

Pín