Matayo 22
22
Olukaado lw'obugole
(Luk 14:15-24)
1Yesu haandi yalomaloma nabo mu ngaado n'aboola ati, 2“Obwaami bwo Muukulu bufwaanana neende omutuki watekehera omwaana wae musyaani Esidyaalo sy'obweeya. 3Yatuma abahalaabani bae bachie baboolere abakeni balaange beeche hu sidyaalo sy'obweeya esyo, nae baahaya ohwiicha. 4Haandi yatuma abahalaabani baandi n'aboola ati, ‘Muboolere abakeni balaange abo muti, Mbao malire ohutekeha buli siindu syoosi esidahibwa hu sidyaalo. Njitire elaawu chaange alala neende emoosi nginu, mwiiche hu sidyaalo sy'obweeya.’ 5Nae, abakeni balaange abo sibadeebayo haba, buli otula yechiiraanga sa mu mirimo kyae; mulala yachia mu ndalo yae, owuundi yaachia mu huchurusa, 6nae abadoong'ereo nabo bakwa hu bahalaabani bae, baabatoocha, baabeeta. 7Omutuki oyo yanyoolera muno; mani yaatuma abasikaari bae ohuchia ohwiita abatemo abo, alala neende ohusaamba esiko syaabwe. 8Yaboolera abahalaabani bae, ati, ‘Mbao malire ohutekeha Esidyaalo sy'obweeya, nae koti lu bakeni balaangwa hu sidyaalo beekese bati sibahoyera ohusibaaho, 9mani muchie hu ngira, mulaange abaandu boosi ba mubonayo, beeche hu sidyaalo sy'obweeya.’ 10Mani abahalaabani abo bachia hu ngira, baabuusa abaandu boosi ba banyoolayo, ababi neende abalai nasilala; mani esibaanja syeechula abakeni du.
11“Nae omutuki niyeengira mu sibaanja ohubona abakeni, yabona omuundu wuundi otefwaalire engubo chohu sidyaalo. 12Yamuteeba ati, ‘Waasyaange, wiingiire otye muno nootaali neende engubo chohu sidyaalo sy'obweeya?’ Nae omuundu oyo yeesiinduha, mani yaabulera sa. 13#Mat 8:12; 25:30; Luk 13:28.Omutuki oyo yeemao yaaboolera abahalaabani bae ati, ‘Mumuboye amahono neende amakulu, mani mumusukune erwaanyi mu siirima. Eyo niyo yaanalirira niyeesia ameeno.’ ” 14Yesu yeemao yaamaliirisa ati, “Abalaangwa baangi, nae abalobolwamo badiidi.”
Esiteebo sidiira hu hutooya omusolo
(Mrk 12:13-17; Luk 20:20-26)
15Olwoola, Abafarisaayo bachia beehoba ohuteka Yesu bati bamudiirire mu nomanoma yae. 16Batuma abeeki baabwe alala neende abaloondi ba Herode baandi bati bachie eyiri Yesu, mani bamuboolere bati, “Omweekesa, humanyire huti oli omuundu w'obwadyeeri. Weekesaanga engira ya Nasaae mubwadyeeri bweene, n'otadeeba hu bi baandu babaasa, olwohuba sodeebaanga hu luyaali lw'abaandu daawe. 17Bulaanu tuboolereho ebibaaso byao? Silai mu malako keefwe, ohutooya omusolo kwa Kaisaari, kose haba?”
18Yesu nae yali amanyire hale echoomo lyaabwe ebi elyo, mani yaababoolera ati, “Abebachirisi eng'we, lwasiina mu ndeka omuteego? 19Mani muunjekeseho eseende yi mutooyeraanga omusolo.” Bamuleetera eseende y'emwaamwa, #22:19 eseende y'emwaamwa: Mu Lugiriki bati, edinaari. 20mani yaabateeba ati, “Huno, huliho esifwaanani sya naanu, neende eliita lya naanu?”
21Bamukobolamo bati, “Bya Kaisaari.” Mani Yesu yaababoolera ati, “Mukalusire Kaisaari, ebya Kaisaari, nae Nasaae, ebya Nasaae.”
22Nae nibawulira batyo, bawuka muno, baamuleha ao mani baawaao.
Esiteebo sidiira hu husyuuha hw'abafu
(Mrk 12:18-27; Luk 20:27-40)
23 #
Biho 23:8. Ludaalo lweene olwo, Abasadukaayo batafukiirira mu husyuuha hw'abafwa, beecha eyiri Yesu, 24#Amal 25:5.baamuteeba esiteebo nibaboola bati, “Omweekesa, Musa yaboola ati, ‘Omuundu naafwa, naataalehereho omwaana, mwaanang'ina ahoyere ohukerama omuhasi mufwiirwe oyo, mani yeebulira omusyaani waabwe wafwa oyo, abaana.’ 25Olwoola, yaliwo abasyaani bataanu-na-babiri ab'enyuumba ndala. Omuhuluundu waabwe, yadeehya omuhasi wae mani yaafwa n'ateebuuleho nae omwaana. Koti lu yali n'ataalehereho omwaana, yalehera mwaanang'ina omuhasi wae oyo. 26Sino syosi syeeholeha haandi hu mwaanang'ina wohubiri, haandi hu wohudatu, ohwoolera elalira hu wa hataanu-na-habiri. 27Luunyuma, omuhasi oyo yesi yeemao yaafwa. 28Bulaanu, hu ludaalo lumaliirihayo lu bafu balisyuuhiraho, omuhasi oyo yahabe muha wiina mweene? Olwohuba boosi bali nibamudeehyaho?”
29Nae Yesu yabakobolamo ati, “Ao mudoondobaane muno! Olwohuba mukoterwe kata ebyandiiko byoolerefu, alala neende amaani ka Nasaae. 30Olwohuba mu husyuuha hw'abafu, muwumamo ohudeehya kata ohudeeha, nae abaandu bahabe sa koti bamalaika #22:30 bamalaika: Ebyandiiko bihuluundu bihale biindi bimeedaho ano biti, ‘ba Nasaae.’ Muukulu. 31Nae, ebidiira hu husyuuha mu bafu, eng'we musisiiri ohusomaho bi Nasaae yababoola naalomaloma ati, 32#Hut 3:6. ‘Niise Nasaae wa Abburahamu, haandi Nasaae wa Yisaka haandi Nasaae wa Yakobbo’? Amahuluundu keene mbwe, siindi Nasaae wa abafu, nae ndi Nasaae wa balamu.”
33Nae esidiiyiha sy'abaandu nisyawulira sityo, syatya mani syaawuka muno enjekesa yae eyo.
Elako Ehunuufu
(Mrk 12:28-34; Luk 10:25-28)
34Nae Abafarisaayo nibawulira bati Yesu amalire ohuwukisa Abasadukaayo, beebuusa alala, 35mani mulala hu Bafarisaayo owali omweekesa w'amalako yaachooma Yesu neende esiteebo sy'ohumuteema ati, 36“Omweekesa, lako siina elihiramo mu malako kaandi koosi obuhunuufu?”
37 #
Amal 6:5. Nae Yesu yakobolamo ati, “Heeraanga Nasaae Omwaami wao neende omwooyo kwao kwoosi, neende obulamu bwao bwoosi, neende amakesi kao koosi. 38Lino nilyo elako lyaamberi haandi elihira akaandi koosi obuhunuufu. 39#Lef 19:18. Haandi ely'ohubiri elifwaanana nalyo, nilyo, heeraanga owaasyo koti lu weeheera omweene. 40#Luk 10:25-28. Amalako ka Musa koosi, neende enjekesa y'abanabbi yoosi, yeema hu Malako kabiri kano.”
Esiteebo sidiira hu Kristo
(Mrk 12:35-37; Luk 20:41-44)
41Bulaanu Abafarisaayo nibali nibeebuusire alala, Yesu yabateeba esiteebo n'aboola ati, 42“Mubaasa mutye hu Kristo? Mwaana wa wiina mweene?”
Bamukobolamo bati, “Mwaana wa Daudi.”
43Yesu yabateeba ati, “Lwasiina Daudi niyeemereerwe neende Mwooyo Mwoolerefu, #22:43 Daudi niyeemereerwe neende Mwooyo Mwoolerefu: Oba Daudi niyechuule Mwooyo Mwoolerefu. yamulaanga ati, ‘Omwaami’? n'aboola ati,
44 #
Sab 110:1. ‘Omwaami yaboolera Omwaami
waange ati, yihala hu muhono
kwaange muluungi ohwoola
lu ndahaholere abasuku bao
baaba esiteeni sy'ohulaambisaho
amakulu kao’?
45Mani Daudi niyamulaanga ati, Omwaami, sinyaliha sitye haandi Kristo ohuba omwaana wa Daudi?”
46Nae abulao omuundu wuundi, kata mulala owanyalaho ohukobola mu Yesu. Mani ohutula hu ludaalo olwo, abulao omuundu wabechaanga neende amaani k'ohumuteebaho esiteebo siindi.
Àwon tá yàn lọ́wọ́lọ́wọ́ báyìí:
Matayo 22: SAMIA
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©Bible Society of Kenya, 2019
©Bible Society of Uganda, 2019
