Luka 1
1
1Koti lu baandu baangi bamalire ohutekeha bulai mu bwandiike ebiindu bitweholeehemo, 2haandi koti abo abataangira ohweboneraho abeene, mani bahalaabanira emboosi eyo batudiisa, 3ese syesi nimalire bulaanu ohumanyirisa bulai ebiindu bino,#1:3 ohumanyirisa bulai ebiindu bino: oba ohwehaliirisa. sibweene endi silai ohuhwandiikira ewe ow'oluyaali Teofiro, nindekeehe bulai ebiindu koti byaloondehana, 4hu weesi onyale ohumanya obwadyeeri bweene bw'ebiindu bi bahweekesa.
Ohulaangirirwa hw'ohwiibulwa hwa Yowaana Omubatiisi
(1:5—2:52)
5 #
1 Biha 24:10. Mu ndaalo chi Herode yali naali omutuki wa Buyudaaya, yaliwo omulaamisi olaangwa Sakaria, owali ow'enono y'abalaamisi ya Abbija. Omuhasi wae olaangwa Elisabbeeti, yali ow'enono ya Arooni. 6Mani boombi bali abaluungifu mu moni wa Nasaae, nibaloondakirira amalako koosi neende ebidahibwa by'Omwaami byoosi ataali ohudoondobanaho kata. 7Nae sibaliho neende omwaana haba, olwohuba Elisabbeeti yali omukuumba, haandi boombi bali bahulire mu myaka.
8Olwoola, Sakaria niyali ali ohuhola omulimo kw'obulaamisi muu moni wa Nasaae, olwohuba oluyia lwae nilwo olwali olw'ohuhalaabanira Nasaae mu biha ebyo, 9ohweema hu ndekeha yaabwe y'obulaamisi, eha yamukwaho achie anioohese obubbaani mu nyuumba y'Omwaami. 10Nae esidiiyiha sy'abaandu syoosi syali nisilaamira erwaanyi mu biha by'ohunioohesa obubbaani. 11Mani ao niwo yi malaika w'Omwaami yeecha yaamubonehera niyeemere hu lwaande lw'omuhono muluungi kw'alutaari y'ohuniooheseraho obubbaani. 12Nae Sakaria niyamubona, eholo yamubba muno mani obuti bwamudiira. 13Nae malaika yeecha yamuboolera ati, “Sakaria, otatya, olwohuba ohusaba hwao huwuliirwe, haandi omuhasi wao Elisabbeeti, achia ohuhwiibulira omwaana musyaani, mani wahamulaange eliita Yowaana.
14Haandi ochia ohuba neende esangaalo neende omwehoyo,
mani abaandu baangi bahehoye olw'ohwiibulwa hwae;
15 #
Hub 6:3. olwohuba yahabe omuhunuufu muno mu moni w'Omwaami,
siyahang'weeho efiini yoosi kata esyohung'wa simeesa syoosi,
achia ohwichusibwa Mwooyo Mwoolerefu,
ohutulira elalira mu nda ya ng'ina.
16Achia ohukaluuhania abaana ba Yisiraeli abaangi abakaluse eyiri Nasaae Omwaami waabwe,
17 #
Mal 4:5,6. haandi achia ohumutaangirira mu mwooyo neende amaani ka Elija,
akaluuhanie emyooyo kya basimwaana baandu chikaluhe hu baana baabwe,
neende ba nandawulira bakaluhe hu makesi k'abaluungifu;
achia ohuhola abaandu beetekehere Omwaami waabwe.”
18Nae Sakaria yaboolera malaika oyo ati, “Sino, ese ndahasimanye endye? Olwohuba bulaanu ese ndi omusaacha mukofu, haandi omuhasi waange yesi ahulire mu myaka.” 19#Dan 8:16; 9:21. Nae malaika yamukobolamo ati, “Niise Gabburieli, oweemere mu moni wa Nasaae; mani ndumirwe ohulomaloma yooli, haandi ohuhuleetera emboosi ndai chino. 20Mani bone, ochia ohuwuleera haandi bihuhae ohulomaloma, ohwoolera elalira hu ludaalo lu biindu bino byaholerere, olwohuba sofukiriire emboosi chaange, echichia ohwolerera mu biha byaachio.” 21Nae abaandu bali baliindiriire erwaanyi, bawuka olwohuba Sakaria yali ahiindire muno mu Nyuumba ya Nasaae. 22Niyatula erwaanyi, haba siyanyala ohulomalomaho nabo, mani bamanya sa bati, yali aboneheerwe mu Nyuumba ya Nasaae; nae yeecha yabaholera sa ebilolero, mani omweene yadoong'a n'atalomaloma. 23Mani ebiha byae eby'ohuhalaabanira Nasaae nibyawa, yakobolayo engo.
24Endaalo echio nichawa, omuhasi wae Elisabbeeti yanyoola amabaanga, mani olw'embaka y'emyoosi chitaanu yekisa abaandu, n'aboola ati, 25“Omwaami mweene niye owumbaasireho yaholera sino mu ndaalo chino, yandusaho esoni mu moni ch'abaandu.”
Ohulaangirirwa hw'ohwiibulwa hwa Yesu
26Mu mwoosi kwohusaasaba, Nasaae yatuma malaika Gabburieli ohuchia mu siko sya Galilaaya esilaangwa Nasareeti, 27#Mat 1:18. eyiri omuhaana otaamanyireho eby'abasaacha, owali afukiirisaanie ohudeehisania neende omusaacha olaangwa Yosefu, owomu nyuumba ya Daudi; nae eliita ly'omuhaana otaamanyireho eby'abasaacha oyo lyali Maria. 28Malaika oyo yeecha yaali mani n'aboola ati, “Muleembe, Ewe owabereswa ehabi, Omwaami ali naawe!” #1:28 Ewe owabereswa ehabi: Ebyandiiko bihuluundu bihale biindi bemeedaho biti, ‘Ewe niiwe oli neende ehabi mu bahasi boosi!’ 29Nae enomanoma eyo yamusindusa muno, yachaaka ohubaasa mu mwooyo kwae amahuluundu k'eheesa yino. 30Nae malaika yamuboolera ati, “Maria, otatya, olwohuba Nasaae ahubeere ehabi. 31#Mat 1:21. Mani bone, ochia ohunyoola amabaanga, wiibule omwaana musyaani, mani wahamulaange eliita oti Yesu.
32 #
2 Sam 7:12,13,16; Yis 9:7. Achia ohuba omuhunuufu, haandi yahalaangwe Omwaana wa Nasaae w'Aakulu Muno;
haandi Omwaami Nasaae achia ohumuberesa esisaala sy'obutuki bwa Daudi kukaang'ene,
33haandi achia ohutuka enyuumba ya Yakobbo, emyaaka choosi;
mani obutuki bwae sibuchia huwaao.”
34Nae Maria yaboolera malaika ati, “Sino sichia ohunyalihana sitye, olwohuba ese siimanyire eby'abasaacha?” 35Nae malaika yamuboolera ati,
“Mwooyo Mwoolerefu achia ohuhwiihaho,
haandi amaani kooyo oli Aakulu Muno kachia ohuhubwiiha;
mani sakira omwaana ochia ohwiibulwa achia ohulaangwa omwoolerefu,
Omwaana wa Nasaae.
36Mani bona, omuhasi w'oluyia lwao Elisabbeeti, mu myaka chae ch'obukofu, yesi yaamalire ohunyoola amabaanga k'omwaana musyaani; mani kuno nikwo omwoosi kwae kwohusaasaba naali asito, oyo yibalangaanga omukuumba. 37#Huc 18:14. Olwohuba, sibulao esiindu syoosi esitanyaliha eyiri Nasaae.” 38Maria yaboola ati, “Ese mbano, ndi omuhalaabani w'Omwaami; leha si ndeeholeho koti lu oboola.” Malaika yaamuleha.
Maria akeniya Elisabbeeti
39Mu ndaalo echo, Maria yasiingira yacha bwaangu mu syaalo sy'engulu, mu siko sya Yudea, 40mani yeengira mu nyuumba ya Sakaria, yaheesa Elisabbeeti. 41Nae Elisabbeeti niyawulira sa ati ohuheesa hwa Maria, omwaana yachaaka ohutachula mu nda; mani Elisabbeeti yamala yechuswa Mwooyo Mwoolerefu 42mani yaalomalomera mu kono ly'aakulu n'aboola ati, “Oli neende ehabi mu bahasi boosi, haandi esiri mu nda yao siri neende ehabi! 43Sino si njolereho sitye, ng'ina Omwaami waange ohwiicha yi ndi? 44Olwohuba boneho, ohuheesa hwao nihuungwiire mu matwi sa huti, ni omwaana aduumakala mu nda yaange olw'esangaalo. 45Haandi w'ehabi oyo owafukiirira ati, ebyo ebyamuboolerwa ohutula eyiri Omwaami byaholerere.”
Olweembo lwa Maria olufumia Nasaae
46Maria yaboola ati,
“Omwooyo kwaange kufumia muno Omwaami,
47haandi omwooyo kwaange kwehoyera mu Nasaae Omuwonia waange,
48 #
1 Sam 1:11. olwohuba abweene obuloonga bw'omuhalaabani wae.
Olwohuba boneho, ohutula buti, enjibulo choosi chichia ohunangaanga ow'ehabi;
49olwohuba oyo ow'Obunyala bwoosi, yaholeere eby'amaani,
haandi eliita lyae lyoolerefu.
50Haandi esisa syae siri hu bamutya
ohutula hu lwiibulo lulala ohwoola hu luundi.
51Yekeese amaani mu biindu bi mahono kae kahola,
asakuulire ebibaaso byomu myooyo ky'abeniinia abeene,
52 #
Yob 5:11; 12:19. yeesere aasi abahunuufu ohutula hu bisaala byaabwe by'obutuki,
haandi yaniinia aakulu abaloonga;
53yekuuse abayala enjala neende ebiindu bilai,
nae abayiinda abatusireyo bihaya.
54Ahoonyere Yisiraeli omuhalaabani wae,
niyechuliise esisa syae,
55 #
Huc 17:7. #
1 Sam 2:1-10. koti lu yaboolera bakuuka yeefwe,
Abburahamu neende abeechuhulu bae endaalo choosi-choosi.”
56Mani Maria yamenya neende Elisabbeeti ohumala aambi w'emyoosi kidatu, mani yamala yaakobola engo wae.
Ohwiibulwa hwa Yowaana Omubatiisi
57Bulaanu, ebiha bya Elisabbeeti ohweetusaho nibyoola, yeebula omwaana musyaani. 58Nae abanaluyia bae alala neende abo abasibirana nae nibawulira bati Omwaami akwiriire Elisabbeeti esisa siingi sityo, beecha basangaalira alala nae. 59#Lef 12:3. Nae oludaalo lwa chitaanu-na-chidatu nilwoola, beecha ohuheba omwaana oyo; mani bali badaha ohumukuliha eliita lya laatang'ene bati Sakaria, 60nae ng'ina yaboola ati, “Haba daawe; achia ohulaangwa Yowaana.” 61Nae bamuboolera bati, “Mu luyia lwao, muwumamo omuundu yeesi olaangwa, Yowaana.” 62Mani baholera laatang'ene ebilolero nibadaha ohumanya koti luyahamulaangire. 63Nae yabasaba ekina ly'ohwandiikaho, mani yandiika ati, “Eliita lyae nilyo Yowaana.” Mani abaandu boosi bawukaho muno. 64Abweene ao, omunwa kwa Sakaria nikwiikuha, olulimi lwae niluboololoha, mani n'achaaka ohulomaloma, n'afumia Nasaae. 65Obuti bwadiira abaandu bamenya aambi nae boosi. Mani abaandu balomaloma hu biindu bino byoosi mu syaalo sy'engulu sya Yudea syoosi; 66abo boosi ababiwulira, babibiiha mu myooyo kyaabwe nibaboola bati, “Nae omwaana wuno yahabe siina?” Olwohuba omuhono kwa Nasaae kwali nae.
Sakaria atuumbula ebidiira hu mwaana oyo
67Mani Sakaria laatang'ene Yowaana yeecha yeechula Mwooyo Mwoolerefu, mani yatumbula ebidiira hu mwaana oyo n'aboola ati,
68“Nasaae Omwaami wa Yisiraeli akinisibwe,
olwohuba akeniiye abaandu bae haandi yaabanunula,
69mani atusiingisiire olwiika lw'obuwonia
mu nyuumba ya Daudi omuhalaabani wae,
70koti lu yalomaloma hale mu minwa ch'abanabbi bae boolerefu,
71ati, achia ohutuwonia atutuse mu basuku beefwe,
haandi atutuse mu mahono k'abaandu batusyuula boosi;
72atweekese esisa siyalaka bakuuka yeefwe,
haandi niyechulisa Endagaano yae enjoolerefu,
73esichubo si yechubira Abburahamu seefwe,
74ohutuberesa
ati efwe, nihununuulwe ohutula mu mihono ch'abasuku beefwe,
hunyale ohumuhalaabanira ataali ohutya hwoosi,
75mu bwoolerefu neende obuluungifu mu moni wae mu bulamu bweefwe bwoosi.
76 #
Mal 3:1. Nae ewe, mwaana ewe, ochia ohulaangwa omunabbi wa Nasaae w'Aakulu Muno;
olwohuba ochia ohutaangiriramo Omwaami, ohumutekehera engira chae, 77ohuberesa abaandu bae amakesi k'obuwonia,
mu huleherwamo hw'ebyonoono byaabwe,
78ohubitira mu sisa siingi sya Nasaae weefwe,
oludaalo luuhyereere ohutula aakulu.
79 #
Yis 9:2. Ohuberesa obulafu abaandu abo abehala mu siirima neende mu siiniha sy'ohufwa,
ohuluungiha amakulu keefwe mu ngira y'omuleembe.”
80Mani omwaana yahula, haandi yaaba omwomiifu mu mwooyo, mani yamenya mu siparara ohwoola hu ludaalo lu yeyekesera alafu eyiri abaandu ba Yisiraeli.
Àwon tá yàn lọ́wọ́lọ́wọ́ báyìí:
Luka 1: SAMIA
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©Bible Society of Kenya, 2019
©Bible Society of Uganda, 2019
