Saŋ Waah wa weeyem wa ti púkoo eyye
Waah wa weeyem wa ti púkoo eyye
Eehe hiyem ekooŋan ya éesuume ya eti Yéesu Krista, eeha Saŋ naakiice ha. Akina Saŋ, neetaat Saŋ-Patis pale akee ti pupoñapoñ pa ŋaasuwan niŋ pákasupak paka pakati Yéesu. Naakiic pikee púkuu empa Mark, Máciya niŋ Luk nkakiicut.
Púkoo eyye esoke nii, Yéesu ayem Hilim ha hiti Pútuun pa; apan Hilim ha niŋ Pútuun pa, poko kayem nantoonool kápiliŋ. Hilim eehuu híkeyii pikin niŋ pakan paka, níhihin kéeyinane ka teeho kápiyini éyenoonii epuuk Pútuun.
Saŋ naakaman weecukantee wa uti Yéesu wéeyisane wa nii, akina ayem Eenucee ya, Añii ya ati Pútuun pa (20:30-31); naakaman lompo pucukool pa piti Yéesu niŋ pakakee pakan samat nii: Nikodem (3:1-21), aal a eekine ya Samali (4:1-12), páhut pa piti Petusata (5:1-18) niŋ aŋa epukee ya te acukantoo (9:1-41). Ti kakalaŋan ka kiteyoo, Yéesu naasok akina ayem paliyal pa empa mpuwufan pa eloŋ ya (6:35); akina ayem afaasa ya eenape ya (10:11); akina ayem lompo ecaaŋ ya eti púlunta pa (8:12). Fiyuu Yéesu náayisane pakan paka akina ayem ayme.
Saŋ náakup ta Yéesu afaakatan mah emme kati akaay pati Paapaa ateyoo (14:28; 16:5-10). Eehuu hiwune Yéesu náakup niŋ pinapana pa pakateyoo náayisanii waah ewwa nkañaŋe wa íhinu niŋ akina aneetaat le (15:22-27). Naaluum Pútuun pa kiti pinapana pa pakateyoo naañomanii Paapaa ateyoo (17).
Pale, Saŋ, Máciya, Mark niŋ Luk, ti waah wa ewwa nkasoke wa, taakaataak weemeeŋe weenakoole (18–19). Asokaasok akina ayem Añii ya aŋa Pútuun pa mpúpoñii ya ti púlunta pa (5:38; 6:29); aŋa álafiye kameye Paapaa ateyoo, niŋ akina anapaa teyoo, áfaameyiyoo (14:6; 16:26).
Kikee kilim
Inci yem - Naakalaŋaa púkoo ya, aafacuk Yéesu nasok faŋoo tan óo tan: “Inci yem”, samat nii: “Inci yem afaasa ya eenape ya,” niŋ ekina tom: “Inci yem paliyal pa piti eloŋ ya.” Ta naasoke ta eehe, an óo an náameyi nii, hisoku naayaake nii akina Pútuun pa, kaatuko ta Pútuun pa mpupoñe ta Móyiis pati Amansa ya ati Esipt, mpusokoo nii: “Caacawam, 'Inci Yem'.”
Hilim ha - Ta Saŋ naasoke ta “Hilim ha héeyenoonii ha an,” niŋ Yéesu naayem.
Kunuu - Pikee pa niŋ Saŋ asokaa Kunuu, ekina eyem Kunuu ka keenape ka (6:63), pale pikee pa lompo Kunuu ka keenape ka tom. Niŋ Yéesu asokaa: “Pútuun pa Kunuu” (4:24), aŋa náalafiye ya hisoku eyem: Pútuun pa pucukantee, kaatuko an tom.
Púlunta pa - Púlunta pa, pikina piyem dúniyaa ya. Ti ekooŋan ya éesuume ya eyya Saŋ naakiice ya, pakan paka pakati púlunta pa, poko kayem kéeyinanut ka nii Yéesu Añii ya ati Pútuun pa.
Fa púkoo ya neekiicee fa:
1:1-18 Hilim ha héeyenoonii ha An.
1:19-34 Káatuunan ka kiti Saŋ-Patis.
1:35-51 Yéesu naamamal pinapana pa pakateyoo pákayaañ paka.
2:1–11:57 Yéesu náahin píyisan piyema isak niŋ súsupak.
12:1–19:42 Yéesu lóokuŋ ya eteyoo ekelan ya le t’etaam, le niŋ éfikahinoo kíiti nkamukoo.
20:1-10 Yéesu náalitoonii ti eket ya.
20:11–21:25 Yéesu náafulii ti pinapana pa pakateyoo.
Àwon tá yàn lọ́wọ́lọ́wọ́ báyìí:
Saŋ Waah wa weeyem wa ti púkoo eyye: KRX
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
(Active) © Wycliffe Bible Translators, Inc