Yela 111
111
Korowii kpɛɛra yel
1Hé kpɛɛ Korowii!
Mɛɛ jam Korowii
n bambile bwa nee,
o nɛnlaa baa chema bini.
2Waa Korowii aa dɛ ɛ dɔ
nyokpoa,
nɛra ba sie aa dɛ lɛ a ta kpɔa
do ba liire ta
dɛɛ lii saŋ bɛlbwa.
3Jirima ne nyanyini
lɔ waa waa dɛ ɛ ta.
O waa toɡrɔ saŋ bɛlbwa
dɛɛ la.
4O ɡelɔ yaa lii nyokpowaa
waa ɛa,
Korowii dɔ tedoma tɛ yaa
dɛɛ na ya sum.
5O dɛ tɛ banɔ la baa dɛ tomɔ
kondikwa,
waa o fɔo o ne baa fɔwa la
waa soh saŋ bɛlbwa bwa.
6O ɡelɔ o nɛra na o kpeɡri
waa kpɔa dɛɛ ɛ toma,
dɛ lɛ harɛre nɛra bane
harɛre tɛɛ ba.
7O waa waa dɛ ɛ
bwa dɔ kasinteŋ dɛ toɡre.
Waa waa dɛ do
nɛra a ta bwa wer,
baa hwɛɡɛ a ta.
8A lole saŋ bɛlbwa dɛɛ la,
Korowii cheɡɛ toɡra o wa
aa toɡra ne kasinteŋ ta,
dɛ kpɔ tɛ o nɛra.
9O berɔ kwaa lɛ o nɛra,
dɛ ɡel ba di ba nyu.
O ne ba fɔwɛ fɔo waa do le
saŋ bɛlbwa dɛɛ la.
O sɔn do ɡoroŋ
dɛ do ɔma kohona.
10Korowii ɔmaa dɛɛ ba ɡela
he dɔ wejema.
Nɛra baa dɛ teŋɛ
o waa ta la,
o ɡelɔ baa no waa mun
kohona.
Onee chɛ kpɛɛra
saŋ bɛlbwa dɛɛ la.#Sɛɡ 9:10
Àwon tá yàn lọ́wọ́lọ́wọ́ báyìí:
Yela 111: mzw
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.