Mumpar 26
26
Aesek ne Abemɛlɛk
1Asɛ lɔr bɛl chole harɛ la ta. Gɛ lɔr nɔ korɛ Abraham saŋ lɔr la ta. Anee Aesek ir kaa Filisti tena Kooro Abemɛlɛk be Gerar. 2Dɛ Korowii fa kpɔ o te baɡle Aesek dɛ ŋɔ, “Dɛɛ berɛ Ijipt laŋa kpa. So harɛ maa chaɡle nɔ ta. 3So bonɔ tama. Mɛɛ che he mun taa dɛ́ tɛɛ hɛɛra, dɛkalkɛŋɔ he ne he naanaree mɛɛ ba ń kpɔ harɛ nɔ bwa tɛ, ɡel n nyoa maa baɡɛ he mɛɛ Abraham la che kɛrɛdɛ.#Mum 12:2; 22:16-18 4Mɛɛ ɡeloo he naanar warɛ kɛŋɔ weweela, dɛ́ kpɔ harɛre nɔ bwa tɛɛ ba. He naanar nɛɛ aa ba cheɡa harɛ nɔ ta nɛra bwa dɔ hɛɛra. 5Dɛkalkɛŋɔ Abraham no n be, dɛ ɛ ɡɛ maa dɛ nyin, ne ɡɛ maa doo ŋɔ o ɛ, dɛɛ teŋɛ me Mmara te bɛlbwa ta.”#Mum 22:18 6Asɛ Aesek so Gerar.
7Asɛ bela tena bɔɔro o haah wa, anee o chaŋ ba ŋɔ, “N nimambiee.” Dɛ o dɛ ɔmɛ kɛŋɔ o bol ŋɔ o haahnee. Gɛ laa aa, Rebɛka wer waa doo la nomanta, bela tena ɛɛ kpoo.#Mum 12:11-13 8Waa ba dɛ biɡri bela tama la, Filisti tena Kooro Abemɛlɛk cheɡɛ tokoro ta, dɛ na kɛŋɔ Aesek ne o haah dɛ hɛlɛ. 9Anee kooro la yerɔ dɛ pɛɛro ŋɔ, “Tolo la, he haahnee. Aah ɛrɛɛ a ɛ asɛ he ŋɔ ya be ŋɔ he nimambiee yɔ?” Asɛ Aesek ŋɔ, “N liiro kɛŋɔ a ɡɛ ken ɛɛ ɡeloo n dɔ seo.”
10Belaa Kooro Abemɛlɛk ŋɔ, “Bɔkwaa he ɛ yaa ken? A ka tamaa ken ya bini bɛl fe nyin he haah nɔ, dɛ he fe ɡelɔ ya ɛ wechɔɡa dawɛ ya nɛ.” 11Ate, kooro la kah nɛra la bwa ŋɔ, bɛlbwa waa leɡe baa nɔ kɛɛ o haah la, a chɛ kɛ ba kpoo.
12A bena la, Aesek parɔ dɛ dɔ kondikwaa kohona. Kwaa waa para la bele lafaa o dɔ dɛkalkɛ Korowii tɛo hɛɛra. 13O teŋɔ dɔ kwaa ɡɛ naaa ka tel kɛŋɔ waa baa ɛ kondɔɔh tenten.
14O dɔ kondɛɛra ne bonɔɔna kohona, asɛ Filisti tena la sie beɡre o nɛ. 15A cheɡɛ a ta ba che teera tɔɔɡe kɔlɔŋa o mɛɛ Abraham bonɔɔna aa kwia o bere saŋ la.
16Belaa Kooro Abemɛlɛk ŋɔ Aesek be ŋɔ, “Le ya harɛ nɔ ta. He berɔ dɔ he te kohona ɡwaa yaa.” 17Anee o ir dɛ kaa nenabɔjen Gerar ta, dɛ ka so bela. 18Asɛ o berɛ ka kwaa pili kɔlɔŋa la baa kwia o mɛɛ bere saŋ mɔɔ o sewɛ la, dɛ berɛ paa sɔna la o mɛɛ fa aa paa la.
19Aesek bonɔɔna la kwi kɔlɔŋ nenabɔɔ la bini, asɛ dɛ ka pu ne. 20A kaa ba kɛ nɛra bane baa dɛ nyiŋi kondɛɛra nɛ dɛ le Gerar balɔ, ba ne Aesek bonɔɔna baa dɛ nyiŋi o ɡe kondɛɛra ta la ɛɛ yo. Asɛ bela tena la baɡle ŋɔ, “Ya konee kɔlɔŋ la.” Anomanta, Aesek pa kɔlɔŋ la sɔn Esɛk. O munii webeɡra. Dɛkalkɛŋɔ ba beɡre o wa.
21Belaa ba berɛ kwi onfale, asɛ ba yo o ɡe waa ja. Anee o pa o sɔn Sitna. O munii nɛn nɛɛ cheɡa. 22O berɔ le bela kwara dɛ ka kwi onfale, kɛ o te la, o ne nomɛlbwa ta o waa beɡrɛ kpa. Asɛ o pa o sɔn Rɛhɔbɔt. O munii bɔr dɔe. Dɛ ŋɔ, “Taraken Korowii tɛ yaa bɔr ya so dɛ́ ya.”
23Asɛ Aesek ir bela dɛ berɛ kaa Beɛseeba ka so. 24Awola jwaana la ne la, Korowii ba o be kɛŋɔ deera ta ken dɛ ŋɔ, “Menee Korowii he mɛɛ Abraham aa tomɔ la. Bɛ dɛɛ ɔmɛ, mɛɛ che he habɔɔ. Mɛɛ koh n bonɔndɛɛɡe Abraham waa dɛ́ tɛɛ hɛɛra dɛ́ ɡel he naanar warɛ.” 25Belaa Aesek ɛ kon baa ɛ saraha o ta dɛɛ tɛ Korowii bela dɛɛ tomɔ. O baŋre o tɛnte dea, asɛ o bonɔɔna la kwi kɔlɔŋ bela ja.
26Kooro Abemɛlɛk ne o nomoa Ahusat ne o laa tena nomoa Fekɔl le Gerar dɛ ba Aesek be. 27Asɛ Aesek bɔɔ ba ŋɔ, “Ɛrɛ waa he berɛ dɛɛ ba n be nɔɔ, kɛ he hah mɛ dɛ doŋ mɛ le he be nɔ?”
28Ba chaŋo ŋɔ, “Ya nao kɛŋɔ Korowii teŋɛ he nɛ. Anomanta, ya liiro ŋɔ a chɛ kɛ ya ne he fɔwɛ fɔo. Gel ya ne he fɔwɛ fɔo, 29ásɛ he bɛ yaa wechɔɡa bɛlbwa ɛ, ɡɛ ya fa aa wola hen hɔhɔrɔwa bɛlbwa ɛɛ, dɛ nyiŋi kɛrɛdɛ dɛ tae ŋwɛnɛ deŋnesɔɔhna ta he kaa la. Taraken ya nao kɛŋɔ Korowii tɛɛ hɛɛra.”
30Asɛ Aesek ɡel ba daa kondikwaa tɛɛ ba ba di, dɛ nyɔ sen lɛ ba sie. 31Tɔ aa pera chɔmbibi la, ba ŋwɛɛrɔ baɡle dɔŋa, asɛ ba fɔo la che, o ta ba ŋwɛnɛ deŋnesɔɔhna ta ba kaa.
32Awola tɔpere la, Aesek bonɔɔna balɔ dɛ ba bol kɔlɔŋ baa kwiu la waa o be ŋɔ, “Ya pu ne.” 33Asɛ baa yerɔ Seeba. Anomanta, dɛ ba le fini, ba dɛ yerɛ bwɛɛ la Beɛseeba.
34Esɔ aa di bene fifraanaarɛ la, o mo Hiti bihaahna banɛ. Beeri bihaah Judit dɛ Ɛlɔn bihaah Basemat. 35Ba baa do Aesek ne Rebɛka bonyɛɡa ba bambile chɔɡ.#Mum 28:8
Àwon tá yàn lọ́wọ́lọ́wọ́ báyìí:
Mumpar 26: mzw
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.