Kaala 12
12
Galekaa Tɔpejen dii
1Korowii bol waa baɡle Mosis ne Arɔn Ijipt harɛ ta ja, 2dɛ ŋɔ, “Hé kpɔ korobie nɔ ɛ he korobiloɡle bena bɛlbwa. 3Hé ŋɔ Israel tena be ŋɔ a ɡɛ korobie nɔ tɔpera fi ta la, bɛlbwa lawɛ pebie ó che tɛ o ne o dem tena. Dem te bɛlbwa lawɛ pebie beŋkpoŋ. 4Dɛ dem bɛl nɛra aa kanɛ dɛ́ won chwe pebir la aa, ba ne dem waa bɛna ɛɛ won bɔne. Hé bɔna ɡɛ del aa chɛ kɛ bɛlbwa dɔ. 5Kondɛɛre ombal waa wola kirihiah bɛlbwa dii, dɛ di benanyoa laanee chɛ kɛ hé lawɛ ba ɛ ɡɛ waa nɔ. He ta pebie dɔe yaa, bohnee chɛ kɛ hé lawɛ. 6Hé nyiŋa dɛ ka tel korobie nɔ tɔpera fi dɛ anaarɛ ta, a ɡɛ saŋee Israel tena ɛɛ ba a kpoora jɔmɔra.#2We 35:1-19 7Ásɛ ba kpɔ a chale la ane ɛ ba doonyoo daa nyundua, ne a keŋkeŋni dem bela baa dɛ ba ola la chwee la. 8Awola jwaana la tenten la, bá wɔɔ ola la, dɛ́ kpɔ papooni aa kpela ne paanoo baa wola iisi a ta doe la ja a ta dɛ́ di. 9He bɛ ola la an lwɛɛ kɛɛ an daala chwe. Hé wɔɔ ane a nyuune ne nakpale ne a tea bini kwaa te bwa. 10He bɛ di a ka tɔɔ per a ta. Anɔ la aa ka la bwa chɛ kɛ hé fuah. 11Gɛ haa dia laanee nɔ. Hé bini bɛlbwa kpɔ o batakaarejaŋ dɛ́ kpɔ kiriso vɔwɛ o ta, dɛ́ do naŋɡawa ásɛ dɛ kpoŋe o daŋɡbala kɛŋɔ waa dɛ ba ŋwɛnɛ bɛl kaala. Warane ɡee chɛ kɛŋɔ hé dia. Anee ɛ Galekaa kondikwa haa dɛ ba dii n sɔn ta.
12Awola jwaana la tenten la, mɛɛ valɛ Ijipt harɛ ta bwaa, dɛ́ kpo bibanloɡle bɛlbwa waa ɛ binyoa, ne kondɛɛre bɛlbwa ɡe biloɡle ombal. Mɛɛ chɔɡ voɡa aa lɔ Ijipt harɛ ta bwaa. Menee Korowii. 13Chal haa kpɔ ɛ he doonyoo laanee dɛ́ baɡle deene haa soɡe a bini. N teŋo baa kaa dɛ na chal laa, maa heyaa wobɛlbwaa ɛ, mɛɛ ɡale heyaa ta, ásɛ dɛ jo Ijipt tena la deremi dɛ́ tɛr ba deŋne. 14Hé di a ɡɛ tɔpere nɔ saŋ bɛlbwa dɛɛ la, dɛ́ kpɔ lii men Korowii waa maa ɛa tɛ heya. Hé ɡel tɔpere nɔ chɔ le tɛ he ne he naanar baa ka ba saŋ bɛlbwa dɛɛ la.
15Hé di paanoo iisi aa wola toole a ta tɔpera anuanɛ. Tɔpere waa tɔ sie la, hé laa iisi bɛlbwa kpɔ he deene bini. Nomɛlbwa waa di paanoo iisi aa do o ta a ɡɛ tɔpera nɔ ta la, dɛ o ta n nɛra baa ɛ Israel tena la bini jae kpa. 16Tɔpere waa tɔ sie ne tɔpenuanɛ wee la taa chɛ kɛ hé cheme dɛ́ tom mɛ. Nomɛlbwa ta chɛ kɛ ó ɛ toma bɛlbwa, nemenɛ kondikwaa waa ɛ dɛ́ di ɡbo. 17Hɛ́ɛ di Paanoo Iisi Aa Wola Toole a ta Tɔpejen la dɛ́ kpɔ lii men Korowii, dɛkalkɛ a ɡɛ tɔpere la taa n lawɛ heyaa le Ijipt harɛ ta denaa ta. Hé ɡel tɔpere nɔ chɔ le tɛ he ne he naanar baa ka ba saŋ bɛlbwa dɛɛ la. 18Korobie waa tɔ sie la, tɔpera fi dɛ anaarɛ ta jɔmɔra, hé pa mun di paanoo iisi aa wola toole a ta ka tel korobie la tɔpera fifraanɛ dɛ beŋkpoŋ la ɡe jɔmɔra. 19He bɛ ɡel ba na iisi he deremi tɔpera anuanɛ la ta. Nomɛlbwa wáa di kondikwa iisi do a ta la, bá doŋu le Israel tena bini. Dɛ nɛŋhɔɔh kɛɛ bwɛɛlembiee yoo, bá doŋu. 20He bɛ iisi kondikwa bɛlbwa di. Bobɛlbwa haa so la, hé di paanoo iisi aa wola toole a ta.”
21Belaa Mosis yerɛ Israel nomonome la bwa cheme dɛ ŋɔ, “He bɛlbwa ka lawɛ pee kɛɛ booh waa ka kpo o ne o dem tena kpɔ di Galekaa la. 22Hé kpɔ hesɔp daa li ola la chal ta loɡbaa bini ɛ he doonyoo keŋkeŋna ne a nyundua daa la ta. He bini bɛlbwa bɛ buse le ka tel kɛ tɔɔ aa pera chɔɔ mɔɔ. 23Korowii dɛ ba harɛ la ta joe, dɛ́ kpo Ijipt tena bibanloɡla bwa. O teŋo baa kaa dɛ na chal la doonyoo daa nyundua ne a keŋkeŋni ɡɛ naa, wɛɛ ɡelaa dɛ́ ba kaa. Waa ɡel Korowii nyundua torome waa dɛ kpoo Ijipt bibanloɡla la jo he deremi ta dɛ́ kpoo heya. 24Hé ne he bii ne naanar teŋɛ waa maa dɛ do heyaa nɔ ta saŋ bɛlbwa dɛɛ la. 25He baa tel harɛ Korowii aa baɡɛ heyaa nyoa ŋɔ wɛɛ kpɔɔ tɛ heyaa la ta naa, hé teŋɛ tɔpejen nɔ dii waa ta dɛɛ ɛa. 26Dɛ he bii baa bɔɔ heya ŋɔ, ‘Ɛrɛɛ a ɡɛ tɔpejen nɔ dii mun ɛɛ chaɡle aa,’ 27hé ŋɔ ba be ŋɔ, ‘Galekaa saraha taa Korowii kpoo Ijipt tena bibanloɡla bwa ba deremi ta, dɛ ɡale ya Israel tena deremi ta kaa.’ ”
Mosis aa bol waa tonɛ la, Israel tena ɡuŋo dɛ tomɛ Korowii. 28Asɛ ba la dɛ ka ɛ ɡɛ Korowii aa do Mosis ne Arɔn ŋɔ ba ɛ la.
29Bɔr aa joa harambaŋa la, Korowii kpo Ijipt tena bibanloɡla bwa. O kpɔɔ le Ijipt kooro waa soɡe kara ta la bibanloɡle nɛ, dɛ ba nɛn baa lawɔ do dea bibanloɡle nɛ, dɛ kondɛɛra bwa ɡe biloɡla nɛ.#Kaa 4:23 30Awola jwaana la, kooro ne o nomonome bwa ne Ijipt tena iro dɛɛ wi kohona harɛ la ta bobɛlbwa, dɛkalkɛ dɛ dem bɛlbwa toole nɛn aa wola o ta sewɛ. 31Jwaana la tenten la, Ijipt kooro yerɛ Mosis ne Arɔn dɛ ŋɔ, “Hé kaa! He ne Israel tena bwa ir le harɛ nɔ ta. Hé kaa dɛ́ ka tomɛ Korowii ɡɛ haa soŋa la. 32Hé kpɔ he peera ne boohna ne nae bwa kaa ɡɛ haa bola la, ásɛ dɛ soŋe andɛɛɡa le he Korowii be tɛ mɛ.”
33Ijipt tena la iro che ba nɛɛ ŋɔ, “Hé ɛ warane dɛ́ le ya harɛ nɔ ta.” Ba liiro ŋɔ dɛ ba ta ɡelɛ ba kaa laa, ba bwa ɛɛ serewoo. 34Anomanta, ba kpɔ men baa wola iisi a ta doe mɔɔ dɛ kpɔ ɛ paanoo do loɡa bini, dɛ kpɔ yale vɔrɔwa dɛ kpɔ chɔŋɛ ba vaama ta. 35Ba ɛ ɡɛ Mosis aa do ba la, dɛ soŋe Ijipt tena la suuɡapoŋa ne suuɡaswɛm kwa dɛ yale.#Mum 15:14 36Korowii ɡelɔ Ijipt tena sie lɛ ba nɛ, dɛ ɡel ba tɛɛ ba komɛlbwa baa soŋ ba la. Anɔ taa a che ba che Ijipt kondɔɔh bwa kaa.#Kaa 3:21-22
37Israel tena le Rameses waa lɔ Ijipt harɛ ta dɛ ba Sukot. Baala baa valɛ naa ta la ɡbo ɛɛ ɛ kaɡboŋa lafraanumɛlee. Haahna ne bechale te ta jae. 38Nɛmpɛɛne warɔ dɛ ja ba nɛɛ kaa. Peera ne boohna dɛ nae kohona bwa ɡe jao. 39Ba kpɔ men baa ɛa dɛ le ane Ijipt la ɛ paanoo iisi aa wola toole a ta. Dɛkalkɛ baa doŋ ba le bela la, ba ta bɔr dɔe dɛ́ ɛ ba kondikwa bɛlbwa.
40Bene lafraanaarɛ fifraatoroo Israel tena so Ijipt harɛ ta. 41A ɡɛ bene lafraanaarɛ fifraatoro nɔ jaɡa taa Korowii nɛra baa lɔ Ijipt harɛ la bwa ir le bela. 42Awola baa le harɛ la ta la ɛ jwaana, asɛ Korowii kpɔ nɔn tɔ ba nɛ dɛ daah ba. Anomanta, benanyoa bɛlbwa chɛ kɛ Israel tena bwa nyiŋi daahna Korowii aa daah ba dɛ kpɔ ba le Ijipt harɛ awola jwaana la kɛrɛdɛ, dɛ́ ɡe so dɛɛ daah dɛ́ kpɔ jirima tɛ Korowii, á chɔ le tɛ ba naanar baa ka ba.
Mmara aa lɔ Galekaa Tɔpejen dii ta
43Belaa Korowii ŋɔ Mosis ne Arɔn be ŋɔ, “Ŋwɛnɛre haa kpɔ a ta di Galekaa kondikwa laanee nɔ. A ta chɛ kɛŋɔ hɔɔh dia. 44Yom bɛlbwa haa yawɔ ba teŋe o pen la ɛɛ won di, 45kɛ hɔɔh waa baa choɡe tama dɛ kaa, ne nɛn waa ba toma ɛɛ bɔr dɛ́ ba nyin o suuɡa kaa la aa won dia.” 46“Hé dɛ ba a dii yaa, dembeŋkpoŋ taa chɛ kɛŋɔ hé dia, dɛ bɛ ol la bɛlbwa kpɔ le fɔɡ. He bɛ a hoɡa ɡe paɡre. 47Israel tena bwaa chɛ kɛ bá di a ɡɛ tɔpere nɔ. 48Nɛŋhɔɔh bɛlbwa waa baa so he bini dɛ nyin o di Galekaa kondikwaa nɔ Korowii sɔn ta naa, a chɛ kɛŋɔ ó teŋe o bibaala ne baala baa lɔ o dem bwa pena, ásɛ he ne ba bwa ɛ nɛnsiwi beŋkpoŋ mɔɔ dɛ́ won di ane. Bibaa te bɛlbwa baa wola o pen teŋe la ta chɛ kɛŋɔ ó di ane.#Mum 17:10 49Gɛ mmara nɔ chɔɔ tɛ harɛ nɔ ta bie ne nɛŋhɔɔhra baa soɡe o ta bwa.” 50Asɛ Israel tena la bwa ɛ ɡɛ Korowii aa do Mosis ne Arɔn ŋɔ ba ɛ la.#Yel 77:20 51Awola tɔpere la tentenee Korowii lawɛ o nɛra Israel tena bwa le Ijipt harɛ denaa ta.
Àwon tá yàn lọ́wọ́lọ́wọ́ báyìí:
Kaala 12: mzw
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.