मत्तायोस 19
19
अम्बरनख्रना ही पत्त नू येसुसी सिखाब'अना
(मर 10:1-12)
1येसुस इबड़ा कत्थन आना ख़च्चियस ख़ने आस गलिलेया जिला ती उरखस ती यरदन ख़ाड़ ही आ पक्खे यूदेया जिला नू बरचस। 2अरा कोहाँ गोंहड़ा आसी ख़ॊख़ा गुड़ीयारा, अरा असन आस आर ही रोगेन कोड़े नंजस।
3जोक्क फरिसीर आसिन बिढ़'आ गे आसी हेद्दे बरचर ती ब'आ हेलरर, “ओन्टा आलस गे तंग्है आलिन इन्द्रिइम चड्डे अम्बरनख्रना यहूदी धरम ही नॆग लेक्खा मानिम र'ई का?” 4आस आनाकिर्ताचस “एन्देर नीम नेम्हा पुथी नू मल्ला पढ़चका का? इकला धर्मेस ख़ॆख़लन गढ़चस, आस आरिन मॆत मुक्का गढ़चस।”#उत्प 1:27; 5:2 5अरा बाचस, “ ई चड्डे आलस तंग्यो तम्बन अम्बरकी तंग्है आली गने र'ओस।#उत्प 2:24 आर इरबरदिम ओन्टा आल लेक्खा मनोर। 6औंगे अक्कु आर धर्मेसी ऎरना नू ऎंड़ मला ओन्टा आल हिकनर। औंगे नॆकन धर्मेस जोड़चस आरिन नॆ हूँ अम्बोर छिंडा।”
7अबड़र आसिन बाचर, “होले एन्देरगे ओन्टा आलस अम्बरनख्रना ही पत्त नू लिखचका चिठी चि'अरकी तंग्है आलिन अम्बा गे मूसस आनियस?”#व्य 24:1-4; मत्ता 5:31 8येसुस आरिन आनाकिर्ताचस, “मूसस गा निम्है बेड़हा जिया चड्डेम मुक्कन अम्बरनख्रना चिठी चि'आ ती अम्बा गे चिच्चस। लिकिन हुल्लो नू अन्ने मल रहचा। 9अरा ऎन निमन ब'अदन का एकअम ओर्तस नन्ना आलस गुसन काना पाप ती नन्ना चड्डे तंग्है आलिन अम्दस ती नन्ना आलिन बेंज्रदस होले, आस नन्ना आली गुसन काना ही पाप नन्दस।”#मत्ता 5:32; 1कोरि 7:10,11
10ख़ने चेलर आसिन बाचर, “मॆतासी अरा मुक्का गने एन्ने दसा र'ई होले, मल बेंज्रना दौ हिके।” 11येसुस आरिन बाचस, “ओर्मर ई कत्थन इंझ्र'आ पोल्लोर, लिकिन अबड़र लेका इंझ्र'आ ओंगोर नॆका ई दान चीतारकी र'ई। 12एन्देरगेका जोक्क करबेलवर एन्ने र'अनर नॆ अयंग ही ओदर तिम एन्ने कुन्द्रकानर। अरा जोक्क करबेलवर एन्ने र'अनर, नॆकन आलर कमचर। अरा जोक्क करबेलवर एन्ने र'अनर एकाबड़र मेर्ख़ा राजी गे तमन करबेलवा कमचकानर। नॆ इदन इंझ्र'आ ओंगो आर इंझ्र'ओर।”
सन्नी ख़द्दारिन येसुस आसीस नन्दस
(मर 10:13-16; लूक 18:15-17)
13ख़ने आलर तंग्है सन्नी ख़द्दारिन येसुस गुसन ओन्द्रर का आस ख़द्दर ही मइय्याँ तंग्है ख़ेक्खा उइय्योस ती बिन्ती ननोस। लिकिन चेलर आरिन केप्पर। 14लिकिन येसुस आरिन बाचस, “ख़द्दारिन एंग्है गुसन बर'आ चि'आ, आरिन अमा छेक'आ, एन्देरगेका नॆ इबड़ा ख़द्दर लेक्खा र'अनर, आरिनिम धर्मेस राजी ननोस।” 15फिन येसुस आर ही मइय्याँ ख़ेक्खा उइय्यस ती असलेक किर्रिम बिच्चियस।
धनगर कुक्कोस
(मर 10:17-31; लूक 18:18-30)
16ओंग्होल ओर्त आलस येसुसी गुसन बरचस ती बाचस, “अना गुरु, मुंजामलका उज्जना ख़क्खा गे ऎन एन्देर दौ नलख नन्ना र'ई?” 17येसुस आसिन बाचस, “नीन एंग्है ती दौ ही पत्त नू एन्देरगे मेन्दय? धर्मेस लेका दौ र'अदस, अन्ति नीन जनमजुग उज्जना नू कोर'आ बेद्ददय होले, पॆसकन पॆस्र'आ।” 18आ आलस मेंजस, “एका पॆसका?” येसुस बाचस, “ईद का, अमके पिटा, नन्ना आली गुसन अमके काला, अमके ख़ड़'आ, बेगर नू अमके ब'आ, 19तंग्है अयंग बंगन मईन नना, अरा तंग्है अरबर-परबर गने तंग्है लेक्खा चोन्हा नना।”#निर्ग 20:12-16; व्य 5:16-20; लौव्य 19:18 20आ जॊंख़स बाचस, “इबड़ा उर्मिन गा ऎन पॆस्रकन, अक्कु एंग्है नू एन्द्रा खंग्रकी र'ई?” 21येसुस आसिन बाचस, “नीन बड़ीयर मना बेद्ददय होले, कला, निंग्है खुर्जिन बीसा ती मलकर गे चि'आ, फिन निंगा मेर्ख़ा नू खुर्जी ख़क्ख्र'ओ। फिन बरा ती एंग्है गने चॊंख़्र'आ।” 22लिकिन आ जॊंख़स हेन्दवारस ती किर्रिम बिच्चियस, एन्देरगेका आस नगदे उरुब रहचस।
23ख़ने येसुस तंग्है चेलर ती बाचस, “ऎन निमन मानिम ब'अदन का उरुब आलर मेर्ख़ा राजी नू कोरना कोड़हे सस्ती र'ई। 24निम्है ती अउरिम ब'अदन का उरुब आलस धर्मेसी राजी नू कोरना ती ओन्टा ऊंट सुजी ही भोंका नू तुरदना सेब्बा र'ई।” 25इदिन मेंजर ती चेलर नगदे अनचकरर ती बाचर, “ख़ने नॆ नाड़र'आ ओंगोर?” 26येसुस आर ही तरा इरियस ती बाचस, “आलर ती गा ईद मना पुल्ली, लिकिन धर्मेस ती उर्मी दिम मना उंगी।”
27तहाँ पतरस आसिन बाचस, “ऎरा, ऎम गा उर्मिन दिम अम्बकम ती निंग्है ख़ॊख़ा चॊंख़्रकादम, होले एमा गे एन्द्रा ख़क्ख्र'ओ?” 28येसुस आरिन बाचस, “ऎन निमन मानिम ब'अदन का इकला पुना सौंसे मनो अरा मनवा ख़द्दन ऎन एंग्है ओहमा ही बॆल-गदिया नू ओक्कोन, आ बारी एंग्है गने चॊंख़्रका नीम हूँ बारा गोटा बॆल-गदिया नू ओक्कोर ती इस्राऎल ही बारा गोतरन नेंवई ननोर।#मत्ता 25:31; लूक 22:30 29अरा एका ओर्तस तंग्है एड़पा पली महले भईर महले बहिनर महले अयंग महले बंग महले ख़द्द-ख़र्रा महले ख़ल्लन एंग्है चड्डे अम्बका र'अदस, आस गे सौ गुना ख़क्ख्र'ओ अरा मुंजामलका उज्जना ख़क्ख्र'ओ। 30लिकिन अजम आलर नॆ अक्कु कोहाँ पद नू र'अनर, आर बरना उल्ला नू उर्मी ती किइय्या पद मनोर क'ओर। अरा अजम आलर नॆ अक्कु उर्मी ती किइय्या पद नू र'अनर, आर बरना उल्ला नू कोहाँ पद मनोर क'ओर।#मत्ता 20:16; लूक 13:30
Àwon tá yàn lọ́wọ́lọ́wọ́ báyìí:
मत्तायोस 19: KURUXBSI
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
