मत्तायोस 15
15
भितरी ता सफा ही पत्त नू सिखाब'अना
(मर 7:1-23)
1तहाँ येरुसलॆम नगरे ती जोक्क फरिसीर अरा नॆग सिखाब'उर बरचर ती येसुसिन ब'आ हेलरर, 2“एन्देरगे निंग्है चेलर पूरखर ही मनता गुट्ठिन चाड़नर का बिगर ख़ेक्खा नॊंढ़रका असमा मॊख़नर?”
3येसुस आरिन आनाकिर्ताचस, “नीम हूँ निम्है मनता ही चड्डे एन्देरगे धर्मेसी पॆसकन चाड़दर? 4एन्देरगेका धर्मेस बाचकादस, ‘निंग्है अयंग अरा बंगासी मईन ननके’ अरा ‘नीकइम बंगस मलता अयंगन मलदौ ब'अदस, आस पिटतार'ओस।’#निर्ग 20:12; 21:17; व्य 5:16; लौव्य 20:9 5लिकिन नीम निम्है अयंग मलता बंगन ब'अदर का ऎन निमन सहाड़ा नना पोल्लोन, एन्देरगेका ऎन निमा एन्देर चि'अना रहचा अदन धर्मेस गे दान लेक्खा चि'आ गे किरया मोक्कन। 6होले नीम सिखाब'अदर का आलर अयंग मलता बंगासी मईन अम्बोर नना। एन्ने नीम निम्है मनता चड्डे धर्मेसी कत्थन ताँड़चकर चिच्चर। 7अना उतुरमाड़ू आलारो, निम्है पत्त नू धर्मेसी कत्था तिंगू यसायास ठौकम तिंकादस, एकासे का,
8‘इबड़ा आलर तम्है कत्था ती गा एंग्है मईन नन्नर,
लिकिन ईर मानिम नू एंगन मल पॆस्रनर।
9ईर अनभनियाँ नू एंग्है महबा नन्नर,
ईर गा आलर ही कमचका पॆसकन धर्मेसी पॆसका ब'अरकी सिखाब'अनर।’”#यसा 29:13
10तहाँ येसुस गोंहड़ा आबोन तंग्है गुसन मीख़ियस ती बाचस, “एंग्है कत्थन मेना ती बुझ्र'आ 11एकाद आलासी बई नू कुर'ई आद आसिन सोतबोड़'आ मल ननी, लिकिन एकाद आलासी बई ती उरखी आदिम आसिन सोतबोड़'आ ननी।”
12तहाँ आसी चेलर बरचर ती आसिन बाचर, “एन्देर नीन अख़दय का फरिसीर ई कत्था चड्डे मुड्डियर?” 13येसुस किर्त'अर बाचस, “एकाद एंग्है मेर्ख़ा बंगस मल्ला इदका उर्मी ख़ोप्पा चड़तार'ओ। 14फरिसीर ती तरकूटी र'आ, आर अन्धहा डहरे ईद'उर। अन्धहर अन्धहर गे डहरे ऎद'ओर होले, इरबर दिम गड्डी नू खत्र'ओर।”#लूक 6:39 15इदिन मेंजस ती पतरस आसिन बाचस, “ई जोक्खा ख़ीरिन एमन बुझाब'आ।”
16येसुस बाचस, “एन्देर नीम हूँ अक्कुन गूटी मल बुझ्र'उर हिकदर? 17एन्देर नीम बलदर का इन्द्रिइम लॊ बई नू कुर'ई आद कूल नू क'ई अरा तंग्है डहरे नू उरखी क'ई। 18लिकिन एकदा बई ती उरखी आद जिया ती उरखी अरा आदिम आलारिन सोतबोड़'आ ननी।#मत्ता 12:34 19एन्देरगेका मलदौ सोच, आल पिटना, नन्ना आली गुसन काना, पेहरन ही सोतरा नलख, ख़ड़ना, ठकवा गोवाह चि'अना अरा निंदा नन्ना जिया तिम उरखी। 20इबड़ा दिम एकाद आलारिन सोतबोड़'आ ननी, अन्ति ख़ेक्खा बिगर नॊंढ़रका ओन्ना-मॊख़ना आलारिन सोतबोड़'आ मल ननी।”
नन-यहूदी आली ही पत्ता'अना
(मर 7:24-30)
21फेन येसुस गलिलेया जिला ती उरखस ती तुरोस अरा सीदॊन जिला नू किर्रिम बिच्चियस। 22अय्या ता ओन्टा नन-यहूदी आली आस गुसन बरचा अरा चिच्चियारा ती ब'आ हेलरा, “अना उर्बायो, दाऊदसी ख़द्दायो, एंगन सोग्गे ऎरा, एंग्दन नाद धरचकी र'ई, आद एंग्दन नगदे खिलपत नना लगी।”
23लिकिन आस इन्द्रिइम हूँ उतारा मल चिच्चस। ख़ने तंग्है चेलर आसी गुसन बरचर ती गोहरारर, “इदिन उड्र'आ, एन्देरगेका ईद नम्है ख़ॊख़ा चिच्चियारनुम बर'आ लगी।” 24येसुस आनाकिर्ताचस, “धर्मेस एंगन इस्राऎलर ता एबस्रका भेंडो गुसन लेका तइय्कादस।” 25लिकिन आद अउरिम बरचा ती येसुसिन मोंजरा नंजा ती ब'आ हेलरा, “अना उर्बायो, एंग्हा सहाड़ा नना।” 26आस आनाकिर्ताचस, “ख़द्दर ही असमन अल्ला गे चि'अना दौ मलकी।” 27आद बाचा, “मानिम उर्बायो, लिकिन अल्ला हूँ उर्बासी टीबुल ता खत्रका जुट्टा अट्टन मूख़ी।” 28तहाँ येसुस आनाकिर्ताचस, “अनय ख़द्दो, निंग्है पत्त'अना कोहाँ र'ई, एकन्ने नीन बिद्दिन अन्नेम निंगा मनन।” अरा तंग्दा आ बारिम कोड़े मंजा केरा।
बग्गे रोगियारिन कोड़े नन्ना
29येसुस असलेक गलिलेया समुदर हेद्दे बरचस ती परता मइय्याँ अर्गियस ती उक्कियस केरस। 30ख़ने कोहाँ गोंहड़ा आसी गुसन ख़ोपरा केरा। आर तम्है गने लेंगड़ा, अन्धहा, कोंदा, ठुठा अरा नन्ना नगदे बग्गेरिन आसी हेद्दे ओन्द्रर, अरा आसी हेद्दे उइय्यर चिच्चर। आस अबड़ा आलारिन कोड़े नंजस। 31औंगे अक्कु आलर ईरियर का कोंदर कछनख्रनर अरा ठुठर कोड़े मन्नर अरा लेंगड़र ऎकनर अरा अन्धहर ऎरनर, ख़ने अकबक मंजर ती इस्राऎल ता धर्मेसी ओहमा नंजर।
चार हजार आलारिन ओन्त'अना
(मर 8:1-10)
32येसुस तंग्है चेलारिन तंग्है गुसन मॆख़रकी बाचस, “एंगा ई गोंहड़न सोग्गे लग्गी, एन्देरगेका ईर तीन उल्ला ती एंग्है गने र'अनर। अक्कुन गा आर ही गुसन ओन्ना-मॊख़ना मुंज्रा। ऎन आरिन कूल कीड़ा ती तइय्या गे मल बेद्ददन का आर डहरे नू पयहा मनोर क'ओर।” 33चेलर आसिन बाचर, “एमा गे ई टोड़ंग नू ई बग्गे असमा एसले ख़क्ख'ओ का ई कोहाँ गोंहड़न उड़त'आ ओंगोम।” 34ख़ने येसुस आरिन मेंजस, “निम्है गुसन ऎ बग्गे असमा र'ई?” आर बाचर, “सात गोटंगा अरा कटी गुना सन्नी इंजो।” 35ख़ने आस गोंहड़ा आबोन ख़ॆख़ेल नू ओक्का गे आनियस। 36अरा आस सात असमन अरा अबड़ा इंजोन होच्चस, अरा धर्मेसिन धन्यवाद ननरकी अदन किच्चियस। अरा अबड़न तंग्है चेलर गुसन चिच्चस। अरा चेलर अदन गोंहड़ा गे ख़ट्टियर। 37ई लेक्खा ओर्मर मॊख़रकी उड़चर केरर। अरा चेलर एंगरका कुटका असमन पेत्तर ती सात डउड़ा निन्दर। 38मुक्कारिन अरा ख़द्दारिन अम्बरकी मूख़ू आलर मॆतर लेका मलागूटी चार हजार रहचर। 39तहाँ आस गोंहड़न उड्राचस ती डोंगा नू अर्गियस केरस अरा मगदन चकभार नू बरचस।
Àwon tá yàn lọ́wọ́lọ́wọ́ báyìí:
मत्तायोस 15: KURUXBSI
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
