Sak 2
2
Nɔtɛ kɛlákɛ́na bɔsɔ́ɔ́kɔ́ mebeé
1Baláamɛ, banɔ́ ebé nu ŋa nɔ́ háya mɔŋɔlɛ́ né uusú Otéŋí a Waáŋá Yésus *Kilís a wáŋa ne nuúmi ɔ ɔhɔla, nɔtɛ kɛlákɛ́na bɔsɔ́ɔ́kɔ́ mebeé. 2Túá kɔɔ́na anyía baacɔ béfendí me bú oofine ekúlú ɔ́mɔtɛ́ a nyɛ́ánɔ́ nyɛbɛ́bándána. Ɔmɔtɛ́ eé beébe ɛnɔ́mɛ cɛ ɔɔcɔ, na nɔbánda nú kóolo a hɛnɔɔ́nɔ́ hɛ́ ɔɔbɔ́, na bɛlaŋa bɛ́ mɔɔnyɛ́ meéŋí aá cɛɛ́tɔ ; a wɔmɔtɛ́ hɛsɔ́kásɔ́ka hɛ́ ɔɔcɔ, ne bilunénú bɛ́ bɛlaŋa. 3Aáná, mbɔ́kɔ ɔmɔtɛ́ aá banɔ́ ŋeé kéke ɔ ɔhɔla ɔɔcɔ u bɛlaŋa bɛ́ mɔɔnyɛ́, yó wuúci laana ɔsɛ : « Taatá, limíne aaha e nyilimíné nyɛ́ bɔɔcɔ eenyi. » Mbá u laana hɛsɔ́kásɔ́ka hɛ́ ɔɔcɔ ɔsɛ : « Kuɔŋɔ́, baabá eeye, ká ka tálɛ́mɛ́na ehenyíé », ta anyía « Ká ka bɛ́nyɔ́kɔ́lɛ́ána ɔ ɔmɛsɛ́ ehenyíé » ; 4mbɔ́kɔ ɔɔcɔ aá banɔ́ ŋaá kɛ́laka aáná, tɛ́ka ɛ́cɛ anyía u ŋa kɛ́lɛna bɔsɔ́ɔ́kɔ́ mebeé e ? Tɛ́ka mutáfána eémú muáŋa e mú ŋé húle a bɛɛbɛ́ bɛ́ ɛbɛ́táá e ?
5Benyíinyí bá ɔtɛ́má, yááŋa anyíaʼo, Bandɔ́mɛsɛ́ ŋaá táfáka eebe a bá bɔ́ŋa tɔsɔ́kásɔ́ka eé buúse bɔ́ baacɔ bá ɔmɛsɛ́ ooci anyía bábɔ́ bámɔ́kɔ́nɛ́na ɛnɔ́mɛ o olumitinine eeyé eé buúse, mbá bé oofine eeyé e Butéŋí abɔ́ u ŋaá bɛ́tánɛ́ná baacɔ e bé ŋé bú wuúci léne. 6Mbá ta híáná banɔ́, nu ŋa nɔ́ bábɛ́na basɔ́kásɔ́ka. Yaŋɔ́ ɛsɛ ɛnɔ́mɛ cɛ́ baacɔ náŋa cɛ́ á banɔ́ tékeseke, cɛ́ banɔ́ télímíkínyi a akála bɛsana e ? 7Ɔ́kɔ, tɛ́ka beébe tɔ́na naŋa bábɔ́ cáŋgɛna yáánɔ́ ambányɛ yí nyiínyi eeye yí belumitinine Kilís ayɛ́ bá ŋaá banɔ́ iínjie e ? #2.7 E nyibíótíne. Bɔ́mɔtɛ́ baacɔ ŋa bɔ́ lɔ́kɔ́ma anyía : « Ambányɛ́kɛ́ yí nyiínyi ayɛ́ Bandɔ́mɛsɛ́ ŋaá banɔ́ iínjie ». 8Ɛ́ɛ, nu ŋa nɔ́ kɛ́la bɔmbányɛ ɔ ɔlátɛ́na okotí a yɛ́ á hɔ́la *bikotí bikime.#2.8 Nyɛkɔ́ŋɔ́na a nyɛ́mɔtɛ́ : « okotí yí Butéŋí bɔ́ Bandɔ́mɛsɛ́ ». Yiíyi yɛ́áŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ noómi anyía : « Lénéke sɔ́ɔ́kɔ́ háyɛ ciɔwɔ cɛɛ́tɔ cɛ bɛ́muátá ».#Lef 19.18 9Mbá, mbɔ́kɔ nu ŋa nɔ́ kɛ́la bɔsɔ́ɔ́kɔ́ mebeé, nu ŋa nɔ́ kɛ́la bɔɔbɛ́ anyía nua nɔ́ŋa bɔnɔkɔ́kɔ́nɔ́ bikotí bɛ́ Bandɔ́mɛsɛ́. 10Yááŋa anyía, mbɔ́kɔ ɔɔcɔ awɔ́ u ŋa látɛ́na bikotí bɛ́ Bandɔ́mɛsɛ́ bikime ŋé kúféténe hú o okotí ɔmɔtɛ́, wa yáaŋa na nyɛkua e bikotí bikime eé buúse bɔ́ Bandɔ́mɛsɛ́. 11Yááŋa anyía hú waáta ɔɔcɔ ɔmɔtɛ́ awɔ́ u ŋá kɔ́ɔ́na anyía : « Atɛ kandáka tusɔmɔ », hú wuúci tɔ́na ú ŋaa kɔ́ɔna anyía : « Atɛ ɔ́ɔ́nɔ́ ɔɔcɔ ».#2.11 Nyh 20.13, 14 ; Tet 5.17, 18 Aáná, te hú ɔkanda tusɔmɔ ɔ́ɔ kandáka, te hú ɔwɔɔ́nɔ ɔ́ɔ wɔɔ́nɔ ɔɔcɔ, ɔ́ mɔɔ́ caŋgɛna bikotí bɛ́ Bandɔ́mɛsɛ́. 12Yaátɛ́ asana, na a bɛsana abɛ́ nu ŋa nɔ́ kɛ́la na a bɛsana bikime abɛ́ nu ŋa nɔ́ táŋa, énu menyí anyía Bandɔ́mɛsɛ́ káá banɔ́ kélísíki e bikotí a bɛ́áŋa bíɔ basɔ́ kátɔ́naka a bɔɔbɛ́. 13Mbɔ́kɔ ɔɔcɔ tɛ ŋá bɛ́cáma bɔsɔ́ɔ́kɔ́ mahana, Bandɔ́mɛsɛ́ tí ké wuúci bɛ́cáma mahana ekúlú eyí u kéé wuúci kélísíki. Mbá, mbɔ́kɔ ɔɔcɔ ŋa bɛ́cáma bɔsɔ́ɔ́kɔ́ mahana, u tɛ ɔ́mɔ́ nyɛ́mana wu olíkíméke nyɛkála.
Ne olumitinine ne mekilíkínyí
14Baláamɛ, mbɔ́kɔ ɔɔcɔ ɔmɔtɛ́ ŋá kɔ́ɔ́na bɔ kɔɔna ne nyuúté anyía wáŋa mulumitinine Bandɔ́mɛsɛ́, wuúci tɛ́ka ne mekilíkínyí, bú ŋɔ yɔ́ɔlɔ aátɛ́ e ? Anyána nyɛnamá nyí olumitinine eényí áŋa nyí o wuúci ɔɔ́lɛ́ta e ? 15Yáakɛlá mulumitinine a mumɔtɛ́ áŋa aáhá a muáŋa onuti etémbí, muúmu tɛ́ka tɔ́na na bɔkɔ bú ɔnyíáka mɔɔ́sɛ́ mekime ; 16mbɔ́kɔ ɔɔcɔ ɔmɔtɛ́ aá banɔ́ é muúmu laána anyía : « Oóʼo, a cɔba bɔmbányɛ ; bɛ́kɛ́ndɛ́na ɔbɔ́ŋɔ na bɛlaŋa na bɛnyɛ́ma bɛ́ ɔnyíá », mbá u ti muúmu iínjíé bɛnyɛ́ma e bí ŋe muúmu bɛ́ámbɛ́na, bú ŋɔ yɔɔ́lɔ aátɛ́ e ? 17Híáná tɔ́na olumitinine áŋa ; mbɔ́kɔ ɔɔcɔ ŋá kɔ́ɔ́na bɔ kɔɔna anyía wáŋa ne olumitinine ɔ ɔtɛ́má, wuúci tɛ́ka ne mekilíkínyí, olumitinine oócí áŋa owéénú buúse bukime.
18Asana ɔmɔtɛ́, ɔɔcɔ a wɔmɔtɛ́ áŋa wu ɔlaana sɔ́ɔ́kɔ́ anyía « O ŋoó lumitinine, mbá yaŋɔ́ ya mɛ́ŋa ne mekilíkínyí ».#2.18 Bɔ́mɔtɛ́ baacɔ ŋa bɔ́ lɔ́kɔ́ma anyía : « Kuɔŋɔ́, mulumitinine mu ne nyuúté, a kɔɔnaka asɛ o ŋoó lumitinine ; mbá, yaŋɔ́, ya mɛ́ŋa ne mekilíkínyí a mambányɛ. Ɛ́ná, mi tóŋínyi… » I ké mi wuúci bɛ́káma ɛsɛ́ : « Mi tóŋínyi uuwe olumitinine awɔ́ ú tɛ á bá ne mekilíkínyí, mbá yémi o tóŋínyi maamɛ mekilíkínyí e mé ŋe húle e uumi olumitinine ». 19Ɔ nɔŋɔ oó lumitekine anyía Bandɔ́mɛsɛ́ áŋa hú wuúci ɔmɔtɛ́. Búáŋa bɔmbányɛ aáná ; ta *bɛɛbɛ́ bí bililé ŋe bú lúmitine tɔ́na aáná, bá ndándamaka ne bulíkílíki. 20Mbá kuɔŋɔ́, yaála yɛ́ ɔɔcɔ ! Ɔ ŋɔɔ́ waámba anyía yémi o tóŋínyi anyía olumitinine awɔ́ ú tɛ a bá ne mekilíkínyí tɛ ŋɔ́ yɔɔ́lɔ buúse bukime e ? #2.20 Cɛ́mɔtɛ́ Ciɔɔ́ŋɛ́ cɛ́ buáyá áŋa na « …áŋa owéénú ». 21Bɛ́táá asana yɛ́ *Abɛ́laham cíásɔ́ sɔ́kɔ́nɔ́, anyána Bandɔ́mɛsɛ́ ŋaa kɛ́la anyía wá bá atálɛ́mánánɔ́ yɛ́ ɔɔcɔ eeyé eé buúse anyía u ŋa sɛ́ wé wuúci bɛ́sámbɛ́na uuyé ɔɔ́nɔ́ *Isak. 22Ɔ ŋɔɔ́ lɛca anyía ne olumitinine ne mekilíkínyí ŋe bú kendikinyi e ? Ɛ́ɛhɛ́ mekilíkínyí ŋo nyióyísínyi bɔmbányɛ uúye olumitinine. 23Aáná yááŋa yɔɔ́ŋɔ́kɔ́nɔ́ anyía : « Abɛ́laham ŋaá háya mɔŋɔlɛ́ ná Bandɔ́mɛsɛ́, ɛ́ɛhɛ́ Bandɔ́mɛsɛ́ ŋeé wuúci hiíte háyɛ atálɛ́mánánɔ́ yɛ́ ɔɔcɔ eeyé eé buúse,#Sɛn 15.6 yó wuúci lɔ́ŋɛ́ta anyía yááyɛ́ ekendinyi. »#Ɛsa 41.8 24Menyí bɔmbányɛ anyía Bandɔ́mɛsɛ́ ŋaá kɛla anyía ɔɔcɔ okime á bá atálɛ́mánánɔ́ yɛ́ ɔɔcɔ eeyé eé buúse a asana na maayɛ́ mekilíkínyí ɔlata tɔ́na ne uúye olumitinine.
25Bɛ́táá tɔ́na asana yɛ́ Laháb, okendí u oónjú. U ŋeé tétényíki ɛndɔ́ma cí *Besuif a cɛ́ ŋgaá hámá e uuyé ooki, yó beébe káha, u ŋé beébe óólísi o ohónyí wú etémbí. Ɛ́ɛhɛ́ Bandɔ́mɛsɛ́ ŋaa kɛla anyía wá bá atálɛ́mánánɔ́ yɛ́ ɔɔcɔ eeyé eé buúse anyía maayɛ́ mekilíkínyí.#2.25 Fanáka Sos 2.1-21.
26Aáná yááŋa anyíaʼo, háyɛ cɛɛ́tɔ ikime a cɛ́ tɛ á bá tɔ́na na hɛtányɛ́ áŋa iwéénú, híáná tɔ́na olumitinine okime awɔ́ ú tɛ á bá ne mekilíkínyí áŋa owéénú.
© 2008, Wycliffe Bible Translators, Inc. All rights reserved.