Levis Kevcai 24
24
Tu Hab Saib Cov Teeb
(Tsiv Dlim 27:20-21)
1Tug TSWV has rua Mauxes tas, 2“Koj has rua cov Yixalayees kuas cale nqaa tej tseem roj txivntoo kws zoo tshaajplawg tuaj saam rua cov teeb huv lub Tsevntaub, sub tej teeb txhaj yuav cig pumkev laamlug moog le. 3Txhua mo Aloos yuavtsum taws cov teeb kws nyob saabnrau dlaim ntaub thaiv lub Phijxaab huv Chaav Dlawbhuv Kawg Nkaus huv lub Tsevntaub Sisntsib, kuas cov teeb cig laamlug ib mos kaajntug. Mej yuavtsum coj txuj kevcai nuav ib tam rua ib tam moog le. 4Aloos yuavtsum tu ntshis cov teeb sau tug ncej kws muab tseem-tseem kub ua, hab saib cov teeb kuas cig laamlug taabmeeg tug TSWV moog le.
Tej Ncuav Kws Fij Rua Vaajtswv
5“Muab 12 kilus moov nplej coj lug ntse puab ua kaum-ob lub ncuav coj moog cub. #Tsiv 25:30 6Muab cov ncuav ntawd teeb ua ob leej, ib leej twg rau lub, rua sau lub rooj kws muab cov tseem-tseem kub vuam, kws yog nyob rua ntawm tug TSWV hauvntej. 7Muab tej tseem moov tshuaj tswqaab lug nphoo rua sau ob leej ncuav ntawd, ib yaam le muab ua khoom noj fij hloov cov ncuav ntawd chaw ua kev ncu txug rua tug TSWV. 8Txhua-txhua nub Xanpataus yuavtsum muab ncuav moog tso rua sau lub rooj taabmeeg tug TSWV. Nuav yog Yixalayees tegnum moog ibtxhis le. 9Cov ncuav nuav yog Aloos hab nwg caajceg ndlagtug, puab yuavtsum coj moog noj huv ib chaav kws dlawbhuv, ruaqhov nuav yog ib feem dlawbhuv ntawm cov khoom kws coj moog fij rua tug TSWV kws yog cov povthawj hlub ndlagtug.” #Math 12:4; Malak 2:26; Lukas 6:4
Yaamntxwv Txug Kev Rautxim Kws Ncaajnceeg
10-11Muaj ib tug txivneej, nwg txiv yog tuabneeg Iziv hab nwg nam, Selaumis, yog tuabneeg Yixalayees, kws yog Dinplis tug ntxhais, kws lug ntawm xeem Daas lug. Tug txivneej ntawd txawm nrug ib tug Yixalayees sistshe huv lub yeej. Thaus obtug taabtom sistshe, tug txivneej ntawd txawm tsawm foom tug TSWV, yogle ntawd, puab txhajle coj nwg moog cuag Mauxes, 12puab tso tuabneeg zuv nwg hab tog seb tug TSWV yuav qha kuas puab ua lecaag rua nwg.
13Tug TSWV has rua Mauxes tas, 14“Coj tug txivneej ntawd tawm huv lub yeej moog rua saabnrau; kuas taagnrho txhua tug kws tau nov tug txivneej ntawd tsawm foom lawm, tsaa puab txhais teg rua sau tug txivneej ntawd taubhau ua timkhawv has tas nwg yeej yog tuabneeg txhum tag, tes dlhau ntawd kuas cov pejxeem muab pobzeb ntaus nwg kuas tuag. 15Qha rua cov Yixalayees txhua tug has tas yog leejtwg tsawm foom Vaajtswv, nwg yuavtsum ris lub txim ntawd 16hab raug muab tua kuas tuag. Txhua tug Yixalayees lossis txhua tug tuabneeg txawv tebchaws kws nyob huv tebchaws Yixalayees, yog leejtwg tsawm foom tug TSWV, tes taagnrho lub zejzog yuavtsum muab pobzeb ntaus kuas tug ntawd tuag moog.
17“Yog leejtwg tua tuabneeg, yuavtsum muab tug ntawd tua kuas tuag, #Tsiv 21:12 18hab yog leejtwg tua lwmtug ib tug tsaj tuag, nwg yuavtsum muab ib tug tsaj moog pauj xwb. Lub ntsablug mas yog muab sav pauj sav.
19“Yog leejtwg ua rua lwmtug raug mob, kws yog nwg tau ua lecaag rua luas lawm, yuavtsum ua le ntawd rua nwg. 20Txhaa pauj txhaa, qhovmuag pauj qhovmuag, hab nav pauj nav. Nwg tau ua rua lwmtug raug mob lecaag, yuavtsum ua kuas nwg raug mob ib yaam le ntawd hab. #Tsiv 21:23-25; 2Kev 19:21; Math 5:38 21Yog leejtwg tua ib tug tsaj tuag, nwg yuavtsum them rovqaab, tabsis yog leejtwg tua ib tug tuabneeg tuag, yuavtsum muab nwg tua kuas tuag. 22Txuj kevcai nuav muab cob rua mej txhua tug kws yog tuabneeg Yixalayees hab cov tuabneeg txawv tebchaws kws nrug mej nyob, ruaqhov Kuv yog tug TSWV, kws yog mej tug Vaajtswv.” #Teev 15:16
23Thaus Mauxes has le nuav rua cov Yixalayees taag, puab txawm coj tug txivneej kws tsawm foom Vaajtswv ntawd moog rua nrau ntug yeej hab muab pobzeb ntaus nwg tuag lawm. Qhov nuav yog cov Yixalayees ua lawvle tug TSWV tau xaaj rua Mauxes lawm.
Àwon tá yàn lọ́wọ́lọ́wọ́ báyìí:
Levis Kevcai 24: HNJ2022
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2022 United Bible Societies. All rights reserved.