Levis Kevcai 16
16
Nub Ua Kevcai Theej Txhoj
1Tug TSWV has rua Mauxes tomqaab kws Aloos ob tug tub raug tua tuag thaus obtug coj cov suavtawg kws tsi dlawbhuv moog fij rua tug TSWV. 2Tug TSWV has rua Mauxes has tas, “Koj has rua koj tug tijlaug Aloos has tas tsi yog nwg yuav laam tau laam moog rua tomqaab dlaim ntaub kws quas Chaav Dlawbhuv Kawg Nkaus thaus twg los tau, ruaqhov Kuv tshwm huv tauv fuab lug nyob rua sau dlaim hau npug lub Phijxaab Lug Cogtseg. Yog nwg tsi nooglug, nwg yuav tuag. #Henpl 6:16 3Nwg muaj cai moog tau rua huv Chaav Dlawbhuv Kawg Nkaus, tsuas yog thaus nwg coj tug ntsuag nyuj moog tua fij dlaws txim hab tug thaav yaaj moog tua hlawv fij nkaus xwb. #Henpl 9:7
4“Uantej Aloos yuav moog rua huv Chaav Dlawbhuv Kawg Nkaus, nwg yuavtsum dlaa dlej hab naav cev tsoogtsho povthawj hlub kws yog lub tsho ntaub maag ntev, lub rig tuablu, sa txuj hlaab ntaub maag, hab ntoo txuj phuam.
5“Cov tuabneeg Yixalayees yuavtsum muab ob tug laug tshis rua Aloos coj moog tua fij dlaws txim hab ib tug laug yaaj coj moog tua hlawv fij. 6Nwg yuavtsum muab ib tug txiv nyuj coj moog fij ua khoom theej txhoj dlaws nwg hab nwg tsev tuabneeg lub txim. 7Tes nwg yuavtsum coj ob tug laug tshis ntawd moog rua ntawm lub qhovrooj kws moog rua huv lub Tsevntaub Sisntsib. 8Aloos yuav tau muab ob lub pobzeb lug ua kev rhu twv saib seb yuav muab tug twg rua tug TSWV hab tug twg rua Axaxees.#16:8: Axaxees: Tsi paub sov lulug Henplais nuav txhais lecaag; tejzag yog ib lub npe rua ib tug dlaab kws nyob tom taj suabpuam. 9Aloos yuavtsum muab tug tshis kws rhu tau rua tug TSWV, tua theej txhoj hab muab fij dlaws txim. 10Hab muab tug tshis kws rhu tau rua Axaxees fij caj rua tug TSWV hab muab tso moog rua Axaxees tom taj suabpuam, kuas ris suavdlawg tej kev txhum moog povtseg.
11“Thaus Aloos muab tug txiv nyuj lug tua fij dlaws nwg hab nwg tsev tuabneeg lub txim, 12nwg yuavtsum moog muab ib lub taig rau ncaigtawg kws cov ncaigtawg tseem cig ntsaa thuav ntawm lub thaaj lug, hab yawm ob phoovteg moov tshuaj tswqaab coj moog rua huv Chaav Dlawbhuv Kawg Nkaus. 13Nwg muab cov moov tshuaj tswqaab tso rua sau cov ncaigtawg taabmeeg tug TSWV, kuas cov paa moov tshuaj tswqaab nchu tuaj roog lub hau Phijxaab Lug Cogtseg kuas Aloos tsi xob pum lub hau Phijxaab, sub nwg txhaj tsi tuag. 14Nwg yuavtsum nqaa ib cov ntshaav nyuj moog hab muab nwg tug ntivteg tub cov ntshaav ntawd nchus rua tom hauvntej lub hau hab muab mivntsiv nchus xyaa zag rua tom hauvntej lub Phijxaab Lug Cogtseg.
15“Tomqaab ntawd, Aloos yuav tau muab tug laug tshis kws fij dlaws cov pejxeem lub txim tua, hab nqaa cov ntshaav moog rua huv Chaav Dlawbhuv Kawg Nkaus; muab cov ntshaav ntawd nchus rua tom hauvntej lub hau hab tom hauvntej ntawm lub Phijxaab Lug Cogtseg, ib yaam le nwg nchus cov ntshaav nyuj. #Henpl 9:12 16Qhov kws Aloos ua le nuav, yog nwg ua kevcai ntxuav Chaav Dlawbhuv Kawg Nkaus kuas huv hab dlim ntawm taagnrho tej kev phem kev qas hab tej kev txhum kws cov Yixalayees tau ua lug. Nwg yuavtsum ua kevcai ntxuav le nuav rua lub Tsevntaub Sisntsib, ruaqhov lub Tsevntaub ntawd nyob rua huv lub plawv yeej kws yog qhov chaw tsi huv.
17“Thaus Aloos moog rua huv Chaav Dlawbhuv Kawg Nkaus, kws yog moog ua kevcai ntxuav nwg tugkheej, nwg tsev tuabneeg, hab cov Yixalayees kuas huv, mas tsi pub ib tug tuabneeg nyob huv lub Tsevntaub Sisntsib moog txug thaus kws nwg tawm rov lug. 18Nwg yuavtsum moog hlawv khoom fij ntawm lub thaaj hab ua kevcai ntxuav lub thaaj. Nwg yuavtsum muab mivntsiv ntshaav nyuj hab ntshaav tshis pleev rua plaub tug kub sau plaub cegkaum thaaj. 19Hab nwg yuavtsum muab nwg tug ntivteg tub cov ntshaav ntawd nchus rua lub thaaj xyaa zag. Qhov kws nwg ua le nuav yog nwg ua kevcai ntxuav lub thaaj kuas huv hab dlim ntawm cov Yixalayees tej kev txhum hab ua kuas lub thaaj dlawbhuv.
Tug Tshis Kws Ris Kev Txhum Tawm Moog
20“Thaus Aloos ua kevcai ntxuav Chaav Dlawbhuv Kawg Nkaus, ntxuav lub Tsevntaub Sisntsib, hab lub thaaj taag lawm, nwg yuav tau muab tug tshis kws tau xaiv tseg ca rua Axaxees#16:20: Axaxees: Saib 16:8. lug fij caj rua tug TSWV. 21Nwg yuavtsum tsaa nwg ob txhais teg rua sau tug tshis ntawd lub taubhau hab leeg taagnrho cov Yixalayees tej kev phem kev qas, tej kev txhum, hab tej kev ntxeevsab, muab tej ntawd xaa moog kua taag rua sau tug tshis lub taubhau. Tes kuas tug tuabneeg kws tub npaaj tau lawm caab tug tshis ntawd moog tso rua tom taj suabpuam. 22Tug tshis ntawd yuav ris puab tej txim sau nwg lub taubhau nrug nwg moog rua tom thaaj chaw kws tsi muaj tuabneeg nyob hlo le.
23“Tes Aloos yuavtsum rov moog rua huv lub Tsevntaub Sisntsib, muab cev tsoogtsho povthawj hlub kws nwg naav uantej nwg moog rua huv Chaav Dlawbhuv Kawg Nkaus hle hab muab tso rua huv. #Exek 44:19 24Nwg yuavtsum moog dlaa dlej huv ib chaav dlawbhuv hab muab nwg cev rigtsho lug naav. Tomqaab ntawd, nwg maamle tawm lug hab muab khoom moog hlawv fij dlaws nwg hab cov Yixalayees lub txim. 25Nwg yuavtsum muab cov nqaj rog moog hlawv rua sau lub thaaj fij dlaws txim.
26“Tug tuabneeg kws caab tug tshis moog rua Axaxees tom taj suabpuam, yuavtsum muab nwg cev rigtsho ntxhua hab dlaa dlej uantej kws nwg rov lug rua huv lub yeej. 27Tug txiv nyuj hab tug laug yaaj kws muab tua fij dlaws txim, kws tub muab cov ntshaav nqaa moog ua kevcai dlaws txim rua huv Chaav Dlawbhuv Kawg Nkaus lawm, yuavtsum coj moog rua saabnrau ntug yeej; ob dlaim tawv, cov nqaj hab cov plaab nyuv yuavtsum muab hlawv kuas taag huv tuabsi. #Henpl 13:11 28Tug kws moog hlawv tej ntawd, nwg yuavtsum muab nwg cev rigtsho ntxhua hab dlaa dlej uantej kws nwg rov lug rua huv lub yeej.
Ua Lawvle Nub Ua Kevcai Theej Txhoj
29“Tej kevcai nuav yog tej kws mej yuavtsum coj ua moog ibtxhis. Lub xyaa hli ntuj nub xab kaum, cov Yixalayees hab cov tuabneeg txawv tebchaws kws nrug mej nyob uake, yuavtsum ua kevcai yoo mov hab tsi xob ua ib yaam num le. 30Ruaqhov nub ntawd yuav muaj ua kevcai theej txhoj, kws yog ntxuav taagnrho mej tej kev txhum, mej txhajle yuav ua tau tuabneeg huv. 31Nub ntawd yog nub Xanpataus kws yog nub su, nub ntawd mej yuavtsum yoo mov hab tsi xob ua ib yaam num dlaabtsi le. Tej nuav yog tej kevcai kws mej yuavtsum coj hab ua moog ibtxhis le. 32Tug povthawj hlub kws tau raug tsaa lug ua tug Tuam Povthawj Hlub hloov nwg txiv chaw, yog tug kws ua kevcai ntxuav rua suavdlawg kuas huv. Nwg yuavtsum naav cev tsoogtsho povthawj hlub 33hab ua kevcai ntxuav Chaav Dlawbhuv Kawg Nkaus, ntxuav lub Tsevntaub Sisntsib, lub thaaj, cov povthawj hlub, hab cov Yixalayees suavdlawg.
34“Tej kevcai nuav yog tej kws mej yuavtsum coj hab ua moog ibtxhis. Yuavtsum ua txuj kevcai nuav ntxuav taagnrho cov Yixalayees tej kev txhum ib xyoos ib zag.” #Levi 23:26-32; Teev 29:7-11
Yogle ntawd Mauxes#16:34: Mauxes; lossis Aloos. txhaj ua lawvle tej kws tug TSWV tau xaaj tseg rua nwg lawm.
Àwon tá yàn lọ́wọ́lọ́wọ́ báyìí:
Levis Kevcai 16: HNJ2022
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2022 United Bible Societies. All rights reserved.