Tsiv Dlim 14
14
Hlaa Havtxwv Lab
1Tes tug TSWV has rua Mauxes has tas, 2“Koj cale kuas cov Yixalayees rovqaab moog tsuam chaw su rua ntawm Pis Hahilaus kws nyob huv ntu nruabnraab ntawm Minkadaus hab Havtxwv Lab, kws nyob ze Npa-aas Xefoos. 3Falaus yuav xaav tas cov Yixalayees yuav moog-moog lug-lug tom taj suabpuam vim puab tau kevtwg lawm. 4Kuv yuav ua kuas Falaus muaj lub sab tawv, hab nwg yuav caum mej qaab tuaj; qhov kws Kuv yeej Falaus hab nwg tej tubrog, yuav ua rua Kuv tau koobmeej. Thaus ntawd cov tuabneeg Iziv yuav paub tas kuv yog tug TSWV.” Cov Yixalayees ua lawvle tug TSWV tej lug kws has rua puab lawm.
5Thaus muaj tuabneeg moog qha rua Falaus has tas cov Yixalayees tsiv taag lawm, nwg hab nwg cov numtswv hloov dlua sab hab has tas, “Peb ua dlaabtsi le ntawd? Peb tso cov Yixalayees tsiv moog taag lawm, tes peb tsi tau puab lug ua peb qhev le lawm lau!” 6Yogle ntawd, Falaus txhaj txhij tubrog hab tej tsheb neeg caij ntaus rog nrug nwg moog caum cov Yixalayees qaab.
7Nwg kuas cov thawj tubrog caij 600 lub tsheb neeg caij ntaus rog kws zoo kawg nkaus, hab lwmyaam tsheb caij ntaus rog kws cov Iziv muaj, nrug nwg moog hab. 8Tug TSWV ua rua Falaus muaj lub sab tawv, hab nwg txawm moog caum cov Yixalayees kws taabtom taug kev moog nrug txuj kev muajyeej.#14:8: txuj kev muajyeej; lossis tug TSWV txuj kev tivthaiv. 9Taagnrho cov Iziv cov tubrog caij neeg hab tsaav tsheb neeg tuaj caum cov Yixalayees qaab. Puab tuaj caum cuag cov Yixalayees ntawm ntug Havtxwv Lab, qhov chaw kws puab tsuam chaw su nyob ze rua ntawm Pis Hahilaus hab Npa-aas Xefoos.
10Thaus cov Yixalayees pum Falaus hab nwg cov tubrog caum tuaj yuav cuag, mas puab ntshai kawg le; puab txhaj quaj zumzawg thov tug TSWV paab puab. 11Puab ywg Mauxes has tas, “Nyob tom tebchaws Iziv tsi muaj chaw log tuag lawm es koj txhaj coj peb lug tuag rua huv taj suabpuam nuav puas yog? Uacaag koj tseem coj peb tawm huv tebchaws Iziv lug ua dlaabtsi hab? 12Peb tub has rua koj thaus tseem nyob tom tebchaws Iziv lawm has tas, ca peb nyob tuabywv, peb yeej zoosab ua cov Iziv qhev nua ne! Peb ua cov Iziv qhev tseem zoo dlua peb lug tuag rua huv taj suabpuam nuav.”
13Mauxes teb puab has tas, “Tsi xob ntshai! Yuavtsum sawv khovkho, mej txhaj yuav pum tas nubnua tug TSWV yuav cawm mej lecaag; mej yuav tsi pum cov tuabneeg Iziv nuav ib zag ntxiv le lawm. 14Tug TSWV yuav tawmtsaam pub rua mej, yogle ntawd, mej cale nyob tuabywv xwb.”
15Tug TSWV has rua Mauxes has tas, “Vim lecaag mej ho quaj thov Kuv paab? Has kuas cov tuabneeg Yixalayees cale txaav moog lawm tom hauvntej. 16Muab koj tug paas nreg tsaa rua sau nplaimdlej havtxwv. Dlej yuav faib rua ob saab, kuas cov Yixalayees txhaj yuav tau taug kev qhuav qhawv hlaa moog lawm saab tim u. 17Kuv yuav ua rua cov Iziv muaj lub sab tawv heev, kuas puab caum mej qaab. Kuv yuav tau koobmeej lug ntawm qhov kws Kuv kovyeej Falaus, kovyeej nwg cov tubrog, nwg tej tsheb neeg, hab nwg cov tubrog tsaav tsheb neeg. 18Thaus Kuv kovyeej puab lawm, cov tuabneeg Iziv yuav paub tas Kuv yog tug TSWV.”
19Vaajtswv tug timtswv kws moog ua cov tubrog Yixalayees ntej, txawm txaav tuaj tomqaab lawm. Tug ncej fuab txawm txaav peg hauvntej lug nreg rua tom puab qaab, 20kws yog nyob nruabnraab ntawm cov tubrog Iziv hab cov tubrog Yixalayees. Tug ncej fuab ntawd ua rua cov tuabneeg Iziv saab tsausntuj nti, tabsis ua rua cov Yixalayees saab pumkev kaajnrig;#14:20: Nqai nuav sau has tas Tug ncej fuab … kaajnrig; paub tsi meej tas lulug Henplais yog txhais lecaag tag txug qhov nuav. yogle ntawd, txhaj ua rua ob tog txaav tsi tau lug sisze ib mos nkaus.
21Mauxes tsaa teg rua sau tug dlej havtxwv, tes tug TSWV txawm tso cua tuaj saab nubtuaj tuaj ntsawj havtxwv ib mos kaajntug ua rua dlej havtxwv faib hlo rua ob saab ua kev qhuav qhawv; 22cov Yixalayees txhaj tau taug kev qhuav qhawv huv havtxwv moog rua saab tim u, ntawm ob saab phaabntsaa tes yog dlej xwb. #1Klt 10:2; Henpl 11:29
23Cov Iziv, kws yog taagnrho Falaus tej neeg, tej tsheb neeg, hab cov tuabneeg tsaav tsheb neeg, txawm caum cov Yixalayees qaab tuaj rua huv havtxwv. 24Thaus kaajntug txoog tug TSWV nyob huv tug ncej suavtawg hab huv tug ncej fuab saib lug rua cov tubrog Iziv hab ua rua puab ceeb hab ntshai kawg nkaus. 25Nwg ua rua puab tej lug tsheb neeg cale ndlais hab ndlog tsi taug le lawm. Puab sisthaam zumzawg has tas, “Peb cale tsiv rovqaab tsi xob caum cov Yixalayees lawm! Ruaqhov tug TSWV tuaj puab tog tawmtsaam peb lawm.”
26Tes tug TSWV has rua Mauxes has tas, “Cale tsaa koj txhais teg rua sau dlej havtxwv, kuas dlej nphau lug npug cov Iziv, npug puab tej tsheb hab cov tuabneeg tsaav tsheb huv tuabsi.” 27Mauxes txawm tsaa teg rua sau dlej havtxwv, tes thaus kaajntug uacav dlej rov ntum nkaus le qub. Cov Iziv tsiv taag zug kuas dlim, tabsis tug TSWV muab puab pov rua huv havtxwv. 28Dlej nphau lug npug tej tsheb neeg, cov tuabneeg tsaav tsheb neeg, hab cov tubrog Iziv kws taabtom tuaj caum cov Yixalayees txug huv plawv havtxwv tuag taag tsi seem ib tug le. 29Tabsis cov Yixalayees taug kev qhuav qhawv huv havtxwv moog rua saab tim u, ntawm ob saab ntsaa tes yog dlej xwb.
30Nub ntawd tug TSWV tau cawm cov Yixalayees dlim ntawm cov Iziv txhais teg; cov Yixalayees pum cov Iziv tuag pawglug lawv ntug havtxwv. 31Thaus cov Yixalayees pum tug TSWV lub fwjchim luj kws Nwg kovyeej cov Iziv, puab txhaj ntshai hab fwm tug TSWV, puab ntseeg tug TSWV hab Mauxes tug kws yog tug TSWV tug tubkhai.
Àwon tá yàn lọ́wọ́lọ́wọ́ báyìí:
Tsiv Dlim 14: HNJ2022
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2022 United Bible Societies. All rights reserved.