Ёэль 1
1
Халкънынъ къаарь-къасевети
1Петуэлнинъ огълу Ёэльге РАББИнинъ айткъан сёзю.
2– Эй, акъсакъаллар, буны динъленъиз,
бу топракъта яшагъан эр кес, къулакъ асынъыз:
Сизинъ заманынъызда я да деделеринъизнинъ заманында
бойле бир шей олдымы?
3 #
Текр 4.9; Збр 77.4 Буны балаларынъызгъа анълатынъыз,
балаларынъыз озь балаларына,
оларнынъ балалары да келеджек несильге анълатсынлар.
4 #
Текр 28.38, 42 Тыртырлардан къалгъаныны сарынчкъалар ашады,
сарынчкъалардан къалгъаныны чегерткилер ашады,
чегерткилерден къалгъаныны къонъузлар ашап битирди.
5 #
Еш 24.11
Эй, сархошлар, уянынъыз!
Эй, шарап ичкенлер, агъланъыз ве сызланъыз, –
агъызларынъыздан юзюм шырасыны тартып алдылар!
6 #
Сыр 9.8
Меним топрагъыма бир халкъ кельди,
о кучьлю, оны саймагъа чаре ёкъ.
Тишлери – арсланнынъ тишлери,
ченгелери – ыргъачы арсланнынъ ченгелеридир.
7Олар юзюм кутюгимни къырды,
инджир терегимни йыкъты,
къабукъларыны айырып ерге атты,
пытакъларыны бем-беяз къалдырды.
8Яшлыгъында акъайыны джойып, тул къалгъан апай киби,
чувал безинен къушангъан къыз киби агъланъыз!
9РАББИнинъ Эвине кетириледжек
ашлыкъ ве ичерлик бахшышлары кесильди.
РАББИге хызмет эткен руханийлер агълайлар.
10 #
Еш 24.4, 7; Йрм 4.28; Хош 4.3 Тарлалар харап олды, топракъ зарлана,
ашлыкъ гъайып олды,
янъы шарап къуруды, зейтюн ягъы ёкъ олды.
11 #
Йрм 14.4
Эй, ыргъатлар, бетлеринъизни къызартынъыз,
эй, багъджылар, агъланъыз, –
тарлаларнынъ берекети гъайып олды,
богъдай ве арпа ич къалмады.
12 #
Еш 24.11
Юзюм кутюклери къуруды,
инджир тереги солып къалды.
Нар, хурма ве алма, бутюн тарладаки тереклер къуруды.
Адам огъулларынынъ шенълиги де ёкъ олды.
13 #
Йрм 4.8; Ёэль 1.9; 2.14 Эй, руханийлер, чувал безинен къушанып, агъланъыз!
Къурбан ерининъ янында хызмет эткенлер, зар чекинъиз!
Эй, Алламнынъ хызметчилери,
Алланынъ Эвине киринъиз, чувал безинде геджеленъиз.
Алланъызнынъ Эвинде ашлыкъ ве ичерлик бахшышы къалмады.
14 #
Ёэль 2.15-16
Ашаманъыз-ичменъиз, эр бирини топлашувгъа чагъырынъыз.
Акъсакъалларны ве мемлекетте эписи яшагъанларны
Алланъыз олгъан РАББИнинъ Эвине чагъырынъыз
ве РАББИге ялварынъыз.
15 #
Еш 13.6; Ов 1.15; Цеф 1.7 Ах, насыл кунь!
РАББИнинъ куню якъындыр.
О куню Къудретли Алла эр бир шейни ёкъ этеджек.
16 #
Текр 12.6-7
Козюмиз огюнде ашымыз алынды,
Алламызнынъ Эвинден шенълик ве къуванч айырылды.
17Урлукълар буюк топракъ кесеклери тюбюнде чюрюди;
ашлыкъ къуругъаны ичюн, анбарлар бошап къалды,
килерлер йыкъылды.
18Ах, айванлар насыл инълейлер!
Тувар сюрюлери шашмалады, –
оларгъа отлакъ къалмады.
Къой-эчки сюрюлери де къыйнала.
19 #
Йрм 9.10
Санъа, я РАББИм, ялварам,
чюнки атеш чёль отлакъларыны якъып ташлады,
алев тарладаки бутюн тереклерни кульге чевирди.
20 #
Збр 103.21
Кийик айванлар биле Санъа ялваралар,
чюнки акъкъан сувлар къуруды,
ве атеш чёль отлакъларыны ёкъ этти.
Àwon tá yàn lọ́wọ́lọ́wọ́ báyìí:
Ёэль 1: CTB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Институт перевода Библии, 2016