Амос 9
9
Раббининъ суду
1 #
Къад 16.26-30
Мен Раббининъ къурбан ери янында тургъаныны корьдим. О, бойле деди:
– Колонналарнынъ башларына ур,
къапу башы сарсылсын,
тёпеси адамларнынъ башына тюшсюн.
Сагъ къалгъанларны исе Мен къылычнен ольдюреджегим.
Оларнынъ кимсеси къачып оламайджакъ,
къуртулмагъа истегенлери де къуртулмайджакъ.
2 #
Збр 138.8-10
О бир дюньягъа къадар къазып етселер,
къолумнен оларны андан чыкъараджагъым.
Коклерге котерильселер,
оларны андан тюшюреджегим.
3 #
Збр 67.23
Къармел дагъынынъ тёпесинде сакълансалар,
анда да оларны тапып, тутаджагъым.
Козюмнинъ огюнден денъизнинъ тюбюнде гизленселер,
денъиз йыланына оларны тишлемеге буюраджагъым.
4Душманлары оларны сюргюн этселер,
анда оларны къылычнен ольдюрмеге эмир береджегим.
Козьлеримни оларгъа чевиреджегим,
лякин ярдым дегиль, джеза береджегим.
5 #
Збр 45.7; Ам 8.8 Ордуларнынъ РАББИ-Таалясы
ерге тийгенинен, ер ирер,
устюнде яшагъан эр кес агълар.
Бутюн ер, Нил дерьясы киби, котериледжек,
Мысыр дерьясы киби къабарып, ашагъы тюшеджек.
6 #
Збр 103.3; Ам 4.13 Рабби Озь эвини коклерде ерлештирген,
къуббесини ернинъ устюнде къургъан.
О, денъизнинъ сувларыны чагъыра
ве оларны ер юзюне тёкип ёллай.
Онынъ Ады – РАББИ!
7 #
4 Пад 16.9; Еш 22.6; Йрм 47.4; Ам 1.5 – Эй, Исраиль огъуллары,
сиз Меним ичюн хушлулар киби дегильмисиз? – дей РАББИ.
– Мен исраиллилерни – Мысыр мемлекетинден,
фелестинлилерни – Къафтор адасындан,
арамлыларны – Кир шеэринден алып чыкъардым!
8– Мына, РАББИ-ТААЛЯнынъ козьлери
бу гуналы падишалыкъны коре.
Оны ер юзюнден къырып ташлайджагъым,
амма Якъупнынъ эвини бус-бутюн ёкъ этмейджегим, – дей РАББИ.
9 #
Лк 22.31
– Мына, Мен буюраджагъым
ве Исраиль эвини бутюн халкълар арасында сачаджагъым.
Элекнен ун элеген киби, Мен оларны элеп темизлейджегим,
бир урлукъ исе ерге тюшмейджек.
10 #
Ам 6.3
Халкъымнынъ гунакярлары эписи оледжек;
«Беля бизге кельмез,
башымызгъа тюшмез», – дегенлер къылычнен ольдюриледжек.
Давут падишалыгъынынъ гъайрыдан тикленмеси
11 #
Фаал 15.16-18
– О куню йыкъыкъ эвге ошагъан Давутнынъ падишалыгъыны
Мен янъыдан тиклейджегим,
диварларыны тюзетеджегим,
йыкъылгъан ерлерни янъыдан къураджагъым,
оны эски замандаки киби япаджагъым.
12Сонъ олар Эдомнынъ къалгъан топрагъыны енъеджек
ве Меним Адымнен адландырылгъан бутюн халкъларны запт этеджек,
– дей бунынъ эписини япаджакъ РАББИ.
13 #
Ёэль 3.18
– Мына, бойле куньлер келир ки, – дей РАББИ, –
сабанджылар топракъ сюрмеге кельгенде, берекетни джыйып етиштирмеген оракъчыларгъа расткеледжек,
урлукъ сачмагъа кельген адамлар исе юзюмни басып етиштирмегенлерни расткетиреджеклер.
Юзюм шырасы дагълардан тамлайджакъ,
бутюн байырлардан акъаджакъ.
14 #
Эюп 3.14; Еш 58.12; 61.4; Йрм 31.5 Халкъым Исраильни сюргюнликтен къайтараджагъым,
ве олар бош шеэрлерни янъыдан къурып,
анда яшайджакълар,
юзюм багъларыны сачып,
шарабыны ичеджеклер,
багъчалар япып,
махсулыны ашайджакълар.
15Мен оларны озьлерининъ топрагъында ерлештиреджегим,
ве бир даа Мен оларгъа берген топракътан оларны къуваламайджакълар, – дей РАББИ, сизинъ Алланъыз.
Àwon tá yàn lọ́wọ́lọ́wọ́ báyìí:
Амос 9: CTB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Институт перевода Библии, 2016