Ekihsatahs 16
16
KaaTipenciketc Kii'ahshamaatc Isriyala'
1Kahkina tahsh entahshiwaatc Isriyalak (Israel) kiionci maacaawak i'imaa Iilam (Elim) ecikaatenik. Aasha niishokiisihs shikwa mitaahshinaano kiishik (15) eishihsenik ahpan kaakiih pi'onci maacaawaatc Iicipahkiink (Egypt), weti tahsh pikwatahkamik Sin (Zin) eshinihkaatenik kiianishi takohshinook. I'i hsa pikwatahkamik Sin nahsawaya'ii kii‑ishi'ayaa Iilamink, Saainaink (Sinai) kaye. 2Kahkina tahsh entahshiwaatc pemaatisiwaatc Isriyalak okii kihci kakanoonaawaan Moosihsoon (Moses), Eranoon (Aaron) kaye. 3Miihsh o'o kaa'inaawaatc, “Ampehshinaa intawaa kaaTipenciketc nihsiyamintipan weti Iicipahkiink. Siiyaaken iitok weti ninkii nihtaa namatapimin ekii miiciyaank wiiyaahs, ekii nihtaa temiiciyaank kaye pepahkaan iko miicim. Kiinawaa tahsh kikiih piishinaam o'omaa pikwatahkamik citashi kawaskateyaank piinihsh ciani nipoyaank,” kii‑ihkitowak.
4 #
Jhn 6.31. Miitahsh Moosihs kaa'ikotc kaaTipencikenitc, “Inashke ishpimink kiishikonk taonci pankihsin pahkweshikan. Pemaatisiwaatc hsa entahso kiishik oka mooshakinaanaawaa citepihsewaatc peshiko kiishik minihk. Niwii anta kihkenimaak taka tepwe ci‑ishihcikewaakwen i'i eshi antawenimakwaa. 5Ninkotwaahsokiishikwakaanik tahsh wiin niishink i'i minihk oka mooshakinaanaawaa kaanihtaa otaahpinamowaatc. Niishokiishik citepihsewaatc minihk tashi kwayaanciiwak.”
6Miitahsh Moosihs, a'a kaye Eran okii'inaawaa' pemaatisinitc Isriyala', “Mii hsa 'i ani onaakohshik cikihkenimek kaaTipenciketc kaakiih saakiciwininek weti Iicipahkiink. 7Kishepaawakahk ihsa kika waapantamowaam kaaTipenciketc okihci inentaakosiwin. Kinoontaakowaa aaniihsh i'i kaashi maci'inek a'a kaaTipenciketc. Awenenak tahsh niinawint tenowiyaank cikihci kakanooshiyaankipan?” 8Miihsh Moosihs kaa‑ani ihkitotc, “KaaTipenciketc ohsha kaawii miininek wiiyaahs kemiiciwek onaakohshininik. Kishepaawakaninik tahsh pahkweshikanan kika miinikowaa minihk iko entawenimimek, aaniihsh kinoontaakowaa aaniin minihk kaashi maci'inek. Inashke kiimaci'ishiyaank, kaaTipenciketc ohsha a'a kaamaci'inek,” okii inaa'.
9Miitahsh Moosihs kaa'inaatc Eranoon, “Wiintamaw kahkina kaatahshiwaatc Isriyalak, cipiishaawaatc kaashi ayaanitc kaaTipencikenitc, aaniihsh onoontaakowaan i'i kaashi kihci kaakiikitowaatc.” 10Mekwaa tahsh Eran ehkakanoonaatc kahkina Isriyala', kii‑inaapiwa' itahsh inahke eshi'ayaanik pikwatahkamik. Miihsh kaakii waapantaminitc kaaTipencikenitc okihci inentaakosiwinini ehnaakwaninik i'imaa wahkwiink. 11Miitahsh Moosihs kaa'ikotc kaaTipencikenitc, 12“Ninkii noontawaak hsa Isriyalak i'i kaaishi kihci kaakiikitowaatc. Wiintamaw ani onaakohshininik cimiiciwaatc wiiyaahs, kishepaawakaninik tahsh cite'amwaawaatc pahkweshikanan. Mii hsa tahsh i'i cikihkentamek niin kaaTipenciketc ehtinowiyaan, kiKishemanitoomiwaa,” okii'ikoon.
13Eani onaakohshininik tahsh kiihpakamihsewa' pinewi pinehshiinsha' misiwe ekii ayaanitc kaakii ishi kapehshiwaatc. Eani kiishepaawakaninik tahsh misiwe eshi kapehshiwaatc kiishahki'ayaani. 14Ahpii hsa i'i shahkinipiini kaa‑ankwaninik, kekoonini hsa ehpipakaanik, ehpaapihtoonaakwaninik mihtahkamik kiiayaani pikwatahkamik. Taapishkoo hsa kaa‑akaahsink kiininkiikwantink kii‑ishinaakwan. 15#1Co 10.3. Ahpii tahsh Isriyalak ewaapantamowaatc kii‑ihkitowak, “Wekonen hsanaa'i?” Kaawiin iitok okii kihkentansiinaawaa. Miihsh Moosihs kaa'inaatc, “Mii hsa ini pahkweshikanan kaaTipenciketc kaa‑ahshaminek ciamomek. 16Miitahsh o'o eninek kaaTipenciketc, minihk iko eshi noontehseyek entahso peshikoyek cimooshakinamowek. Aapihta tipa'oopaan minihk kika otaahpinaam citepa'oonekwaa minihk iko eyaawaatc kitaawiniwaank,” okii inaa'.
17Miitahsh o'o Isriyalak kaaishihcikewaatc, aaninta niipiwa' kiimooshakinikewak, aaninta tahsh na'ekaac. 18#2Co 8.15. Ahpii tahsh ekiih tipa'amowaatc minihk kaamooshakinamowaatc, iki hsa niipiwa' kaakii mooshakinamowaatc kaawiin awahshime okii ayaahsiinaawaa. Iki tahsh kaye pankii kaakii mooshakinamowaatc kaawiin noonta' okii ayaahsiinaawaa. Entahso peshikowaatc hsa okii mooshakinaanaawaa minihk eshi noontehsewaatc. 19Miitahsh Moosihs kaa'inaatc, “Keko awiya oka ishkonansiin kemiicitc waapaninik.” 20Aaninta tahsh kaawiin okiih pisintaakohsii' Moosihs, ekii ishkonaminitc kemiicinitc kishepaawakaninik. Mii hsa i'iweni kaakii wanaataninik, kaakii ohkwewaninik kaye. Wiinke hsa Moosihs okii nishki'ikoo'. 21Entahso peshikowaatc tahsh okii mooshakinaanaawaa entahso kikishepaawakaninik minihk iko kaakii ishi noontehsewaatc. Ahpii tahsh kiini kishaahtenik, i'i kaakii mooshakinikaatehsinok i'imaa mihtahkamik kiininkite.
22Ninkotwaahsokiishik (6) eishihsenik, niishink minihk okii mooshakinaani, peshik awiya niishin ekii mooshkina'aatc kaapeshiko tipa'oopaanesinitc ahkihkwa'. Kahkina tahsh kaaniikaaniihtamawaanitc kaapaahtiinonitc okiih pi naasihkaakoo' Moosihs ekii wiintamaakotc o'o. 23#Exo 20.8-11. Miitahsh o'o kaa'inaatc, “Mii hsa 'oweni kaaTipenciketc kaakii'itank, ‘Waapank hsa mii 'i ciAnwepiiwi kiishikahk, kaakihtentaakwahk Anwepiiwi kiishikan kaaTipenciketc onci. Noonkom itahsh kaakiishikahk kiishisamok waahkiishisamek, kapaahtook kaye waahkapaahtooyek. Minihk itahsh keishkohsek kika na'inaam, miihsh i'i waapank kemiiciyek,’ ” okii inaa'. 24Miitahsh kaaishihcikenitc Moosihs kaakii'inaatc, ekii na'inaminitc, paanimaa tahsh weyaapanink okii miicini. Kaawiin itahsh kiiwanaatahsinini, kaawiin kaye kiiohkwewansinini. 25Miihsh Moosihs kaaihkitotc, “Miitahsh i'i kemiiciyek noonkom kaakiishikahk aaniihsh noonkom kaakiishikahk mii 'i eAnwepiiwi kiishikahk cikihtencikaatek kaaTipenciketc onci. Noonkom hsa kaakiishikahk kaawiin kika mihkansiim miicim weti mihshawahkamik. 26Ninkotwaahsokiishik hsa kika maamooshakinaam, niishwaahsokiishik itahsh Anwepiiwi kiishikahk, kaawiin ta‑ayaahsinoon kekoon,” okii inaa'.
27Niishwaahsokiishik itahsh eishihsenik, aanciko hsa aaninta awiya' kiiawi maamooshakinikewa', kaawiin itahsh kekoon okii mihkansiini. 28Miitahsh Moosihs kaakii'ikotc kaaTipencikenitc, “Aaniin itahsh minihk waahshashiipihtawiyek ehkanawentansiwek nintinaahkonikewinan, eshi kihkino'amawinakook kaye? 29Inashke maamihkawik, niin kaaTipencikeyaan kaamiininakook i'i kaaAnwepiiwi kiishikahk: miitahsh eninkotwaahsokiishikahk kaaonci miininakook miicim niishokiishik minihk citepihseyek. Kahkina hsa awiya entahso peshikotc ta‑ayapi aaniinti piko keayaakwen, niishwaahsokiishikaninik kaawiin awiya inkoci taishaahsii,” okii'ikoon. 30Miitahsh pemaatisiwaatc kaakii anwepiwaatc eniishwaahsokiishikaninik.
31 #
Num 11.7,8. Isriyalak itahsh mena (manna) okii ishinihkaanaawaan ini pahkweshikanan. Kiiwaapishkisiwan itahsh taapishkoo kaawaapiminakisitc Koriyaantar (coriander) kaaishinihkaacikaniwitc. Miitahsh kaaihpokositc taapishkoo pahkweshikanehs kiihtakonikaatek aamoowi siinsipaahkwat. 32Miihsh Moosihs kaaihkitotc, “KaaTipenciketc hsa kitanoonikonaan cikanawenimimank menawan, aapihta tipa'oopaan minihk cikanawentamawimank kipiiwesiiminaani'. Miitahsh ciani waapamaanitc pahkweshikanan kaakii ahshaminankitc kiiayaawankitc pikwatahkamik ahpii Iicipahkiink kiionci saakiciwininankitc,” okii inaa'. 33#Heb 9.4. Miihsh Moosihs kaa'inaatc Eranoon, “Otaahpinan i'i ahtoopaan, miitahsh i'imaa ishi piina'o aapihta tipa'oopaan minihk a'a mena. I'imaa ishi ahtoon enaahsamiitc kaaTipenciketc, keni kanawencikaasotc mena minihk iko keni ayayaanihke nihtaawiki'itiyank,” okii'inaan. 34KaaTipenciketc itahsh kaakii'inaatc Moosihsoon, mii 'i Eran kaaishihciketc ekii ahsaatc menawan enaahsamiayaanik tipaacimowinini, i'imaa ci‑ishi kanawentaakosinitc. 35#Jos 5.12. Niimitana (40) tahso pipoon hsa minihk Isriyalak okii amwaawaan menawan, piinihsh kiiotihtamowaatc ahkiini kaawii ishi nehpici kapehshiwaatc. Mii 'i kaainancikewaatc piinihsh kiihtakohshinowaatc eshi maacihsenik Kenan (Canaan) ahki. 36Naano tipa'oopaaneyaak hsa kiinihtaa aapatan i'i ahpii kekoon ehtipinikaatek.
Àwon tá yàn lọ́wọ́lọ́wọ́ báyìí:
Ekihsatahs 16: OJBR
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Ojibwe Shorter Bible (Roman Script) © 2008 Canadian Bible Society