ܒܪܝܬܐ 33
33
ܬܦܵܩܬܵܐ ܕܝܲܥܩܘܿܒ݂ ܘܕܥܹܣܘܿ
1ܡܘܼܪܸܡ ܠܹܗ ܝܲܥܩܘܿܒ݂ ܥܲܝܢܘܼ̈ܗܝ ܘܚܙܹܐ ܠܹܗ، ܘܗܵܐ، ܥܹܣܘܿ ܒܹܐܬܵܝܵܐ، ܘܥܲܡܹܗ ܐܲܪܒܲܥܡܵܐܐ ܐ݇ܢܵܫܹ̈ܐ. ܘܦܘܼܠܸܥ ܠܹܗ ܠܝܵܠܹ̈ܕ݇ܐ ܒܹܝܠ ܠܲܝܵܐ ܘܪܵܚܹܝܠ ܘܬܲܪܬܹܝ ܚܹܕܲܡܝܵܬܹ̈ܐ. 2ܡܘܼܬܸܒ݂ ܠܹܗ ܠܚܹܕܲܡܝܵܬܹ̈ܐ ܘܠܝܵܠܵܕ݇ܝ̈ܗܝ ܩܵܕ݇ܡܵܝܬܵܐ، ܘܠܠܲܝܵܐ ܘܠܝܵܠܕ݇ܘܼ̈ܗ̇ ܡ̣ܢ ܒܵܬ݇ܪ ܡܸܢܲܝܗܝ، ܘܠܪܵܚܹܝܠ ܘܠܝܵܘܣܸܦ ܒܚܲܪܬܵܐ. 3ܗ̇ܘ ܐ݇ܙܝܼܠ ܠܹܗ ܩܵܕ݇ܡܲܝܗܝ، ܘܡܘܼܟܸܦܵܐ ܠܹܗ ܓܵܢܹܗ ܠܐܲܪܥܵܐ ܫܒܲܥ ܓܵܗܹ̈ܐ، ܗܲܠ ܕܩܘܼܪܒܸܢܹܗ ܠܟܸܣ ܐܲܚܘܿܢܘܼܗܝ. 4ܐܝܼܢܵܐ ܪܚܝܼܛ ܠܹܗ ܥܹܣܘܿ ܠܐܘܼܪܚܹܗ، ܘܚܦܝܼܩ ܠܹܗ، ܘܢܦܝܼܠ ܠܹܗ ܥܲܠ ܩܕܵܠܹܗ ܘܢܫܝܼܩ ܠܹܗ، ܘܒܟܹܐ ܠܗܘܿܢ. 5ܡܘܼܪܸܡ ܠܹܗ ܥܹܣܘܿ ܥܲܝܢܘܼ̈ܗܝ ܘܚܙܹܐ ܠܹܗ ܠܒܲܟ݂ܬܵܬܹ̈ܐ ܘܠܝܵܠܹ̈ܕ݇ܐ، ܘܒܘܼܩܸܪܹܗ، ”ܡܵܢܝܼ ܝܢܵܐ ܐܲܢܹܐ ܕܥܲܡܘܼܟ݂؟“ ܓ̰ܘܼܘܸܒ ܠܹܗ ܝܲܥܩܘܿܒ݂، ”ܝܵܠܹ̈ܕ݇ܐ ܕܝܘܼܗ݇ܒܸܠ ܠܹܗ ܐܲܠܵܗܵܐ ܒܪ̈ܲܚܡܘܼܗܝ ܠܪܹܓܘܼܟ݂.“ 6ܩܘܼܪܒܸܢܗܘܿܢ ܚܹܕܲܡܝܵܬܹ̈ܐ، ܐܵܢܝܼ ܘܝܵܠܲܕ݇ܝ̈ܗܝ، ܘܡܘܼܟܸܦܵܐ ܠܗܘܿܢ ܓܵܢܲܝܗܝ. 7ܩܘܼܪܒܸܢܵܗ̇ ܐܘܼܦ ܠܲܝܵܐ ܘܝܵܠܕ݇ܘܼ̈ܗ̇، ܘܡܘܼܟܸܦܵܐ ܠܗܘܿܢ ܓܵܢܲܝܗܝ. ܡ̣ܢ ܒܵܬ݇ܪ ܗܵܕܵܐ ܩܘܼܪܒܸܢܗܘܿܢ ܝܵܘܣܸܦ ܘܪܵܚܹܝܠ، ܘܡܘܼܟܸܦܵܐ ܠܗܘܿܢ ܓܵܢܲܝܗܝ. 8ܒܘܼܩܸܪܹܗ ܥܹܣܘܿ، ”ܡܘܿܕܝܼ ܝܠܵܗ̇ ܟܠܵܗ̇ ܐܵܗܵܐ ܡܲܫܪܝܼܬܵܐ ܕܬܦܝܼܩ ܠܝܼ ܒܝܼܘܼܗ̇؟“ ܓ̰ܘܼܘܸܒ ܠܹܗ ܝܲܥܩܘܿܒ݂، ”ܕܡܲܫ݇ܟ̰ܚܸܢ ܫܵܦܵܩܲܬ ܒܥܲܝܢܹ̈ܐ ܕܡܵܪܝܼ.“ 9ܐܝܼܢܵܐ ܐ݇ܡܝܼܪܹܗ ܥܹܣܘܿ، ”ܐܝܼܬ ܠܝܼ ܪܵܒܵܐ، ܐܲܚܘܿܢܝܼ. ܫܒ݂ܘܿܩ ܡܸܢܕܝܼܘܼܟ݂ ܩܵܐ ܓܵܢܘܼܟ݂.“ 10ܐ݇ܡܝܼܪܹܗ ܝܲܥܩܘܿܒ݂، ”ܠܵܐ، ܦܲܪܦܘܼܠܹܐ ܝܘܸܢ ܒܝܼܘܼܟ݂، ܐܸܢ ܡܘܼܫ݇ܟ̰ܚܵܐ ܝܘܸܢ ܫܵܦܵܩܲܬ ܒܥܲܝܢܘܼ̈ܟ݂، ܩܲܒܸܠ ܡܵܘܗܲܒ݂ܬܝܼ ܡ̣ܢ ܐܝܼܕܝܼ، ܒܗ̇ܝ ܕܚܙܵܝܬܵܐ ܕܦܵܬܘܼܟ݂ ܐܲܝܟ݂ ܚܙܵܝܬܵܐ ܕܦܵܬܵܐ ܕܐܲܠܵܗܵܐ ܝܠܵܗ̇، ܕܒܣܝܼܡ ܠܵܗ̇ ܠܘܼܟ݂ ܒܝܼܝܼ. 11ܩܲܒܸܠ، ܦܲܪܦܘܼܠܹܐ ܝܘܸܢ، ܚܲܠܥܲܬܝܼ ܕܦܝܼܫܬܵܐ ܝܠܵܗ̇ ܡܘܼܩܪܸܒ݂ܬܵܐ ܐܸܠܘܼܟ݂، ܣܵܒܵܒ ܥܒ݂ܝܼܕܵܐ ܝܠܹܗ ܐܲܠܵܗܵܐ ܪ̈ܲܚܡܹܐ ܥܲܡܝܼ، ܘܐܝܼܬ ܠܝܼ ܟܠ ܡܸܢܕܝܼ.“ ܘܡܘܼܠܝܸܨ ܠܹܗ ܐܸܠܹܗ ܗܲܠ ܕܫܩܝܼܠ ܠܹܗ.
12ܗ̇ܝܓܵܗ ܐ݇ܡܝܼܪܹܗ ܥܹܣܘܿ، ”ܐܵܙܲܠ݇ܚ ܒܐܘܼܪܚܲܢ، ܘܐܵܢܵܐ ܒܸܬ ܐܵܙܹܠ݇ܢ ܩܵܕ݇ܡ ܕܝܼܘܼܟ݂.“ 13ܐܝܼܢܵܐ ܐ݇ܡܝܼܪܹܗ ܐܸܠܹܗ ܝܲܥܩܘܿܒ݂، ”ܡܵܪܝܼ ܟܹܐ ܝܵܕܹܥ ܕܝܵܠܹ̈ܕ݇ܐ ܚܲܠܵܫܹ̈ܐ ܝܢܵܐ، ܘܦܸܣܩܹ̈ܐ ܘܒܸܩܪ̈ܵܬܹܐ ܕܥܲܡܝܼ ܡܲܡܸܨܵܢܹ̈ܐ ܝܢܵܐ. ܐܸܢ ܛܵܪܲܚ ܠܗܘܿܢ ܐܘܼܪܚܵܐ ܕܚܲܕ ܝܵܘܡܵܐ ܙܵܘܕܵܐ، ܟܠܲܝܗܝ ܦܸܣܩܹ̈ܐ ܒܸܬ ܡܵܝܬܝܼ. 14ܦܲܪܦܘܼܠܹܐ ܝܘܸܢ، ܐܵܙܹܠ ܡܵܪܝܼ ܡܩܵܕ݇ܡ ܪܹܓܹܗ، ܘܐܵܢܵܐ ܒܸܬ ܐܵܙܹܠ݇ܢ ܢܝܼܚܵܐ، ܒܐܲܩܠܵܐ ܕܪܸܣܩܵܐ ܕܝܼܠܹܗ ܥܲܡܝܼ، ܘܒܐܲܩܠܹ̈ܐ ܕܝܵܠܹ̈ܕ݇ܐ، ܗܲܠ ܕܡܵܛܹܝܢ ܠܣܵܥܝܼܪ، ܠܟܸܣ ܡܵܪܝܼ.“ 15ܐ݇ܡܝܼܪܹܗ ܥܹܣܘܿ، ”ܒܲܣ ܒܸܬ ܫܵܒ݂ܩܹܢ ܠܟܸܣ ܠܘܼܟ݂ ܚܲܕ݇ܟܡܵܐ ܡ̣ܢ ܐ݇ܢܵܫܹ̈ܐ ܕܝܼܢܵܐ ܥܲܡܝܼ.“ ܓ̰ܘܼܘܸܒ ܠܹܗ ܝܲܥܩܘܿܒ݂، ”ܩܵܡܘܿܕܝܼ؟ ܐܸܢ ܡܘܼܫ݇ܟ̰ܚܵܐ ܝܘܸܢ ܫܵܦܵܩܲܬ ܒܥܲܝܢܹ̈ܐ ܕܡܵܪܝܼ.“ 16ܘܕܝܼܪܹܗ ܒܗ̇ܘ ܝܵܘܡܵܐ ܥܹܣܘܿ ܠܐܘܼܪܚܹܗ ܠܣܵܥܝܼܪ. 17ܐܝܼܢܵܐ ܝܲܥܩܘܿܒ݂ ܐ݇ܙܝܼܠ ܠܹܗ ܠܣܵܟܘܼܬ،#33:17 ܥܸܒ݂ܪܵܐܝܼܬ ܒܡܲܥܢܵܝܵܐ: ܒܹܝܬ ܓܵܘܣܵܐ؛ ܣܸܬܪܵܐ ܘܒܢܹܐ ܠܹܗ ܐܸܠܹܗ ܒܲܝܬܵܐ، ܘܥܒ݂ܝܼܕ ܠܹܗ ܡܛܲܠܠܹ̈ܐ ܩܵܐ ܩܸܢܝܵܢܹܗ. ܒܘܼܬ ܐܵܗܵܐ ܩܪܹܐ ܠܹܗ ܫܸܡܵܐ ܕܗ̇ܝ ܕܘܼܟܵܐ، ܣܵܟܘܼܬ.
ܝܲܥܩܘܿܒ݂ ܒܸܒܢܵܝܵܐ ܡܲܕܒܚܵܐ
18ܐ݇ܬܹܐ ܠܹܗ ܝܲܥܩܘܿܒ݂ ܫܲܠܡܵܐ ܠܡܕܝܼܢ݇ܬܵܐ ܕܫܟܹܝܡ، ܕܝܼܠܵܗ̇ ܒܐܲܪܥܵܐ ܕܟܢܲܥܢ، ܒܐܘܼܪܚܹܗ ܡ̣ܢ ܦܵܕܵܢ ܐܵܪܵܡ، ܘܫܪܹܐ ܠܹܗ ܩܵܕ݇ܡ ܡܕܝܼܢ݇ܬܵܐ. 19ܘܡ̣ܢ ܒܢܘܿܢܹ̈ܐ ܕܚܡܘܿܪ، ܒܵܒܵܐ ܕܫܟܹܝܡ، ܙܒ݂ܝܼܢܹܗ ܚܲܕ ܩܸܛܥܵܐ ܕܚܲܩܠܵܐ ܒܐܸܡܵܐܐ ܩܹܣܝܼܛܹ̈ܐ، ܐܲܝܟܵܐ ܕܢܨܝܼܒ݂ܵܐ ܝܗ݇ܘܵܐ ܡܲܫܟܢܹܗ. 20ܘܒܢܹܐ ܠܹܗ ܬܵܡܵܐ ܡܲܕܒܚܵܐ، ܘܩܪܹܐ ܠܹܗ ܫܸܡܹܗ ”ܐܹܝܠ ܐܸܠܘܿܗܲܝ ܝܼܣܪܵܝܹܠ.“#33:20 ܥܸܒ݂ܪܵܐܝܼܬ ܒܡܲܥܢܵܝܵܐ: ܐܲܠܵܗܵܐ، ܐܲܠܵܗܵܐ ܕܝܼܣܪܵܝܹܠ
Àwon tá yàn lọ́wọ́lọ́wọ́ báyìí:
ܒܪܝܬܐ 33: ABTAB
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Aramaic Bible Translation Assyrian Bible © 2025 Aramaic Bible Translation