ܒܪܝܬܐ 26
26
ܐܝܼܣܚܵܩ ܫܲܢܘܼܝܹܐ ܠܓܵܪܵܪ
1ܗܘܹܐ ܠܹܗ ܟܸܦܢܵܐ ܒܐܲܪܥܵܐ، ܫܒ݂ܘܿܩ ܡ̣ܢ ܗ̇ܘ ܟܸܦܢܵܐ ܕܗܘܹܐ ܠܹܗ ܩܵܕ݇ܡ ܗܵܕܵܐ ܒܝܵܘܡܵܢܹ̈ܐ ܕܐܲܒ݂ܪܵܗܵܡ. ܘܐ݇ܙܝܼܠ ܠܹܗ ܐܝܼܣܚܵܩ ܠܓܵܪܵܪ، ܠܟܸܣ ܐܲܒ݂ܝܼܡܲܠܟ، ܡܲܠܟܵܐ ܕܦܠܸܫܬܵܝܹ̈ܐ. 2ܦܝܼܫ ܠܹܗ ܚܸܙܝܵܐ ܐܸܠܹܗ ܡܵܪܝܵܐ، ܘܐ݇ܡܝܼܪܹܗ، ”ܠܵܐ ܨܵܠܹܝܬ ܠܡܸܨܪܹܝܢ؛ ܫܪܝܼ ܒܐܲܪܥܵܐ ܕܐܵܡܪܹܢ ܐܸܠܘܼܟ݂. 3ܥܡܘܿܪ ܒܐܵܗܵܐ ܐܲܪܥܵܐ، ܘܒܸܬ ܗܵܘܹܝܢ ܥܲܡܘܼܟ݂ ܘܒܸܬ ܒܲܪܟܸܢܘܼܟ݂، ܣܵܒܵܒ ܐܸܠܘܼܟ݂ ܘܠܙܲܪܥܘܼܟ݂ ܒܸܬ ܝܵܗ݇ܒܹܢ ܟܠܲܝܗܝ ܐܲܢܹܐ ܐܲܪ̈ܥܵܬܹܐ، ܘܒܸܬ ܡܲܩܘܸܝܢ ܡܵܘܡܝܼܬܵܐ ܕܝ݇ܡܹܐ ܠܝܼ ܠܐܲܒ݂ܪܵܗܵܡ ܒܵܒܘܼܟ݂. 4ܘܒܸܬ ܡܲܦܪܸܝܢ ܠܙܲܪܥܘܼܟ݂ ܐܲܝܟ݂ ܟܵܘܟ݂ܒܹ̈ܐ ܕܫܡܲܝܵܐ، ܘܒܸܬ ܝܵܗ݇ܒܹܢ ܠܙܲܪܥܘܼܟ݂ ܟܠܲܝܗܝ ܐܲܢܹܐ ܐܲܪ̈ܥܵܬܹܐ، ܘܒܙܲܪܥܘܼܟ݂ ܒܸܬ ܦܵܝܫܝܼ ܒܘܼܪܟܹܐ ܟܠܲܝܗܝ ܐܸܡܘܵܬܹ̈ܐ ܕܐܲܪܥܵܐ، 5ܣܵܒܵܒ ܫܡܝܼܥ ܠܹܗ ܐܲܒ݂ܪܵܗܵܡ ܩܵܠܝܼ، ܘܢܛܝܼܪܹܗ ܗܹܡܸܙܡܵܢܝܼ̈، ܘܦܘܼܩܕܵܢܝܼ̈، ܘܩܵܢܘܿܢܝܼ̈، ܘܢܵܡܘܿܣܝܼ̈.“
6ܘܝ݇ܬܝܼܒ݂ ܠܹܗ ܐܝܼܣܚܵܩ ܒܓܵܪܵܪ. 7ܒܘܼܩܸܪܗܘܿܢ ܐ݇ܢܵܫܹ̈ܐ ܕܗ̇ܝ ܕܘܼܟܵܐ ܒܘܼܬ ܒܲܟ݂ܬܹܗ، ܘܗ̇ܘ ܐ݇ܡܝܼܪܹܗ، ”ܚܵܬܝܼ ܝܠܵܗ̇،“ ܣܵܒܵܒ ܙܕܝܼܥ ܠܹܗ ܕܐܵܡܹܪ ܗ݇ܘܵܐ، ”ܒܲܟ݂ܬܝܼ ܝܠܵܗ̇،“ ܕܠܵܐ ܩܵܛܠܝܼ ܗ݇ܘܵܘ ܠܹܗ ܐ݇ܢܵܫܹ̈ܐ ܕܗ̇ܝ ܕܘܼܟܵܐ ܒܘܼܬ ܪܲܦܩܵܐ، ܣܵܒܵܒ ܫܲܦܝܼܪܬܵܐ ܝܗ݇ܘܵܐ ܒܚܸܙܘܵܐ. 8ܐܝܼܡܲܢ ܕܦܝܼܫ ܠܹܗ ܬܵܡܵܐ ܪܵܒܵܐ ܝܵܘܡܵܢܹ̈ܐ، ܓܘܼܫܸܩ ܠܹܗ ܐܲܒ݂ܝܼܡܲܠܟ ܡܲܠܟܵܐ ܕܦܠܸܫܬܵܝܹ̈ܐ ܡ̣ܢ ܟܵܘܹܐ، ܘܚܙܹܐ ܠܹܗ ܐܝܼܣܚܵܩ ܡܲܒܣܘܼܡܹܐ ܥܲܡ ܪܲܦܩܵܐ ܒܲܟ݂ܬܹܗ. 9ܘܩܪܹܐ ܠܹܗ ܐܲܒ݂ܝܼܡܲܠܟ ܠܐܝܼܣܚܵܩ ܘܐ݇ܡܝܼܪܹܗ، ”ܫܲܪܝܼܪܵܐܝܼܬ ܒܲܟ݂ܬܘܼܟ݂ ܝܼܠܵܗ̇. ܕܵܐܟ݂ܝܼ ܐ݇ܡܝܼܪܘܼܟ݂ ܕܚܵܬܘܼܟ݂ ܝܼܠܵܗ̇؟“ ܓ̰ܘܼܘܸܒ ܠܹܗ ܐܸܠܹܗ ܐܝܼܣܚܵܩ، ”ܐ݇ܡܝܼܪܝܼ ܗܲܕܟ݂ܵܐ ܕܠܵܐ ܗܵܘܝܵܐ ܕܡܵܝܬܹܢ ܒܘܼܬ ܕܝܼܘܼܗ̇.“ 10ܐ݇ܡܝܼܪܹܗ ܐܲܒ݂ܝܼܡܲܠܟ، ”ܐܵܗܵܐ ܡܘܿܕܝܼ ܥܒ݂ܝܼܕ ܠܘܼܟ݂ ܐܸܠܲܢ؟ ܩܵܘܡܵܐ ܚܲܕ ܡ̣ܢ ܐ݇ܢܵܫܹ̈ܐ ܕܵܡܹܟ݂ ܗ݇ܘܵܐ ܥܲܡ ܒܲܟ݂ܬܘܼܟ݂، ܘܒܸܬ ܡܲܡܛܸܝܬ ܗ݇ܘܵܐ ܥܲܠܲܢ ܓܢܵܗܵܐ.“ 11ܘܦܩܝܼܕ ܠܹܗ ܐܲܒ݂ܝܼܡܲܠܟ ܠܟܠܹܗ ܥܲܡܵܐ ܒܹܐܡܵܪܵܐ، ”ܟܠ ܕܕܵܩܹܪ ܒܐܵܗܵܐ ܐ݇ܢܵܫܵܐ ܝܲܢ ܒܒܲܟ݂ܬܹܗ، ܡܵܘܬܵܐ ܒܸܬ ܦܵܐܹܫ ܡܘܼܡܝܸܬܵܐ.“
12ܙܪܝܼܥ ܠܹܗ ܐܝܼܣܚܵܩ ܓܵܘ ܗ̇ܝ ܐܲܪܥܵܐ، ܘܚܨܝܼܕ ܠܹܗ ܒܗ̇ܝ ܫܹܢ݇ܬܵܐ ܚܲܕ ܒܐܸܡܵܐܐ، ܘܒܘܼܪܸܟ݂ ܠܹܗ ܐܸܠܹܗ ܡܵܪܝܵܐ. 13ܘܗܘܹܐ ܠܹܗ ܐ݇ܢܵܫܵܐ ܥܲܬܝܼܪܵܐ، ܘܩܢܹܐ ܠܹܗ ܪܵܒܵܐ، ܗܲܠ ܕܗܘܹܐ ܠܹܗ ܪܵܒܵܐ ܥܲܬܝܼܪܵܐ. 14ܗܘܹܐ ܠܗܘܿܢ ܐܸܠܹܗ ܦܸܣܩܹ̈ܐ، ܘܒܸܩܪ̈ܵܬܹܐ، ܘܪܹ̈ܓܵܘܵܬܹܐ ܒܦܸܪܝܘܼܬܵܐ، ܘܒܘܼܚܸܠ ܠܗܘܿܢ ܒܝܼܹܗ ܦܠܸܫܬܵܝܹ̈ܐ. 15ܟܠܲܝܗܝ ܒܹܐܪܹ̈ܐ ܕܚܦܝܼܪܲܝ ܝܗ݇ܘܵܘ ܪܹ̈ܓܵܘܵܬܹܐ ܕܒܵܒܘܼܗܝ، ܒܝܵܘܡܵܢܹ̈ܐ ܕܐܲܒ݂ܪܵܗܵܡ، ܡܘܼܚܪܸܒܲܝ ܠܗܘܿܢ ܦܠܸܫܬܵܝܹ̈ܐ ܘܡܸܠܝܲܝ ܠܗܘܿܢ ܥܲܦܪܵܐ. 16ܘܐ݇ܡܝܼܪܹܗ ܐܲܒ݂ܝܼܡܲܠܟ ܠܐܝܼܣܚܵܩ، ”ܦܠܘܿܛ ܡ̣ܢ ܠܟܸܣ ܠܲܢ، ܣܵܒܵܒ ܚܘܼܠܸܢܘܼܟ݂ ܒܘܼܫ ܪܵܒܵܐ ܡܸܢܲܢ.“
ܐܝܼܣܚܵܩ ܫܲܢܘܼܝܹܐ ܠܓܵܪܵܪ
17ܘܦܠܝܼܛ ܠܹܗ ܐܝܼܣܚܵܩ ܡ̣ܢ ܬܵܡܵܐ، ܘܢܨܝܼܒ݂ ܠܹܗ ܡܲܫܟܢܹܗ ܓܵܘ ܓܲܠܝܼܵܐ ܕܓܵܪܵܪ، ܘܝ݇ܬܝܼܒ݂ ܠܹܗ ܬܵܡܵܐ.
ܡܲܩܪܲܨܬܵܐ ܥܲܠ ܒܹܐܪܹ̈ܐ
18ܕܝܼܪܹܗ ܐܝܼܣܚܵܩ ܘܚܦܝܼܪܹܗ ܡܸܢܕܪܸܫ ܠܒܹܐܪܹ̈ܐ ܕܡ̈ܝܼܵܐ، ܐܵܢܝܼ ܕܦܝܼܫܹܐ ܝܗ݇ܘܵܘ ܚܦܝܼܪܹܐ ܒܝܵܘܡܵܢܹ̈ܐ ܕܐܲܒ݂ܪܵܗܵܡ ܒܵܒܘܼܗܝ، ܐܵܢܝܼ ܕܡܘܼܚܪܸܒܲܝ ܠܗܘܿܢ ܦܠܸܫܬܵܝܹ̈ܐ ܡ̣ܢ ܒܵܬ݇ܪ ܡܵܘܬܵܐ ܕܐܲܒ݂ܪܵܗܵܡ. ܘܪܫܝܼܡ ܠܹܗ ܐܸܠܲܝܗܝ ܫܸܡܵܢܹ̈ܐ، ܐܲܝܟ݂ ܫܸܡܵܢܹ̈ܐ ܕܪܫܝܼܡܲܝ ܝܗ݇ܘܵܐ ܐܸܠܲܝܗܝ ܒܵܒܘܼܗܝ. 19ܐܝܼܡܲܢ ܕܚܦܝܼܪܗܘܿܢ ܪܹ̈ܓܵܘܵܬܹܐ ܕܐܝܼܣܚܵܩ ܒܓܲܠܝܼܵܐ ܘܡܘܼܫ݇ܟ̰ܸܚ ܠܗܘܿܢ ܬܵܡܵܐ ܒܹܐܪܵܐ ܕܡ̈ܝܼܵܐ ܚܵܝܹ̈ܐ، 20ܡܘܼܩܪܸܨ ܠܗܘܿܢ ܪ̈ܵܥܝܹܐ ܕܓܵܪܵܪ ܥܲܡ ܪ̈ܵܥܝܹܐ ܕܐܝܼܣܚܵܩ، ܒܹܐܡܵܪܵܐ، ”ܐܲܢܹܐ ܡ̈ܝܼܵܐ ܕܝܼܲܢ ܝܼܢܵܐ.“ ܘܗ̇ܘ ܩܪܹܐ ܠܹܗ ܫܸܡܵܐ ܕܒܹܐܪܵܐ ”ܥܹܣܸܩ،“#26:20 ܥܸܒ݂ܪܵܐܝܼܬ ܒܡܲܥܢܵܝܵܐ: ܡܲܩܲܪܵܨܘܼܬܵܐ ܣܵܒܵܒ ܡܘܼܩܪܸܨ ܠܗܘܿܢ ܥܲܡܹܗ. 21ܘܚܦܝܼܪܗܘܿܢ ܒܹܐܪܵܐ ܐ݇ܚܹܪ݇ܢܵܐ، ܘܡܘܼܩܪܸܨ ܠܗܘܿܢ ܐܘܼܦ ܥܲܠ ܗ̇ܘ. ܘܩܪܹܐ ܠܹܗ ܫܸܡܹܗ ”ܣܸܛܢܵܐ.“#26:21 ܥܸܒ݂ܪܵܐܝܼܬ ܒܡܲܥܢܵܝܵܐ: ܕܲܠܩܘܼܒ݂ܠܘܼܬܵܐ، ܣܢܵܝܬܵܐ ܚܲܒܪܵܐ ܒܠܸܫܵܢܵܐ ܥܸܒ݂ܪܵܝܵܐ ܒܡܲܥܢܵܝܵܐ ܕ”ܕܲܠܩܘܼܒ݂ܠܘܼܬܵܐ، ܣܢܵܝܬܵܐ“ 22ܘܫܘܼܢܹܐ ܠܹܗ ܡ̣ܢ ܬܵܡܵܐ، ܘܚܦܝܼܪܹܗ ܒܹܐܪܵܐ ܐ݇ܚܹܪ݇ܢܵܐ، ܐܝܼܢܵܐ ܠܵܐ ܡܘܼܩܪܸܨ ܠܗܘܿܢ ܥܲܠ ܗ̇ܘ؛ ܘܩܪܹܐ ܠܹܗ ܫܸܡܹܗ ”ܪܚܘܿܒܘܿܬ،“#26:22 ܥܸܒ݂ܪܵܐܝܼܬ ܒܡܲܥܢܵܝܵܐ: ܡܲܪܘܲܚܬܵܐ؛ ܦܪܵܣܬܵܐ ܕܐܲܪܥܵܐ؛ ܓܲܪܘܲܣܬܵܐ ܕܕܘܼܟܵܐ ܣܵܒܵܒ ܐ݇ܡܝܼܪܹܗ، ”ܐܵܕܝܼܵܐ ܡܘܼܪܘܸܚ ܠܹܗ ܐܸܠܲܢ ܡܵܪܝܵܐ، ܘܒܸܬ ܩܵܢܲܚ ܦܸܪܝܘܼܬܵܐ.“
23ܡ̣ܢ ܬܵܡܵܐ ܐ݇ܣܝܼܩ ܠܹܗ ܠܒܹܪܫܒܲܥ. 24ܘܦܝܼܫ ܠܹܗ ܚܸܙܝܵܐ ܐܸܠܹܗ ܡܵܪܝܵܐ ܒܗ̇ܘ ܠܲܝܠܹܐ، ܘܐ݇ܡܝܼܪܹܗ ܐܸܠܹܗ، ”ܐܵܢܵܐ ܝܘܸܢ ܐܲܠܵܗܵܐ ܕܐܲܒ݂ܪܵܗܵܡ ܒܵܒܘܼܟ݂؛ ܠܵܐ ܙܵܕܥܹܬ، ܣܵܒܵܒ ܐܵܢܵܐ ܥܲܡܘܼܟ݂ ܝܼܘܸܢ؛ ܒܸܬ ܒܲܪܟܸܢܘܼܟ݂ ܘܒܸܬ ܡܲܙܝܸܕܸܢ ܠܙܲܪܥܘܼܟ݂، ܒܘܼܬ ܚܵܬܸܪ ܕܐܲܒ݂ܪܵܗܵܡ ܪܹܓܝܼ.“ 25ܒܢܹܐ ܠܹܗ ܬܵܡܵܐ ܡܲܕܒܚܵܐ، ܘܩܪܹܐ ܠܹܗ ܒܫܸܡܵܐ ܕܡܵܪܝܵܐ، ܘܢܨܝܼܒ݂ ܠܹܗ ܡܲܫܟܢܹܗ ܬܵܡܵܐ. ܬܵܡܵܐ ܚܦܝܼܪܗܘܿܢ ܪܹ̈ܓܵܘܵܬܹܐ ܕܐܝܼܣܚܵܩ ܒܹܐܪܵܐ.
ܘܲܥܕܵܐ ܕܐܝܼܣܚܵܩ ܥܲܡ ܐܲܒ݂ܝܼܡܲܠܟ
26ܗ̇ܝܓܵܗ ܐ݇ܙܝܼܠ ܠܹܗ ܐܲܒ݂ܝܼܡܲܠܟ ܡ̣ܢ ܓܵܪܵܪ ܠܟܸܣ ܐܝܼܣܚܵܩ، ܥܲܡ ܐܲܚܘܼܙܲܬ ܡܵܠܘܿܟܹܗ، ܘܦܝܼܟܸܠ ܪܲܒ ܚܲܝܠܹܗ. 27ܐ݇ܡܝܼܪܹܗ ܐܸܠܲܝܗܝ ܐܝܼܣܚܵܩ، ”ܩܵܡܘܿܕܝܼ ܐ݇ܬܝܼܹܐ ܝܬܘܿܢ ܠܟܸܣ ܠܝܼ؟ ܐܲܚܬܘܿܢ ܣܢܹܐ ܠܵܘܟ݂ܘܿܢ ܐܸܠܝܼ، ܘܩܲܡ ܛܵܪܕܝܼܬܘܿܢ ܠܝܼ ܡ̣ܢ ܠܟܸܣ ܠܵܘܟ݂ܘܿܢ.“ 28ܐ݇ܡܝܼܪܗܘܿܢ، ”ܫܲܪܝܼܪܵܐܝܼܬ ܚܙܹܐ ܠܲܢ ܕܡܵܪܝܵܐ ܥܲܡܘܼܟ݂ ܝܼܠܹܗ؛ ܘܐ݇ܡܝܼܪܲܢ، ܐܵܕܝܼܵܐ ܗܵܘܝܵܐ ܡܵܘܡܝܼܬܵܐ ܒܹܝܠܲܢ ܘܒܹܝܠܘܼܟ݂، ܘܥܵܒ݂ܕܲܚ ܘܲܥܕܵܐ ܥܲܡܘܼܟ݂، 29ܕܠܵܐ ܥܵܒ݂ܕܹܬ ܥܲܠܲܢ ܒܝܼܫܬܵܐ، ܕܵܐܟ݂ܝܼ ܕܐܲܚܢܲܢ ܠܵܐ ܕܩܝܼܪܲܢ ܒܝܼܘܼܟ݂، ܘܥܒ݂ܝܼܕ ܠܲܢ ܥܲܡܘܼܟ݂ ܐܲܚܟ̰ܝܼ ܛܵܒ݂ܬܵܐ، ܘܩܲܡ ܫܲܕܪܲܚ ܠܘܼܟ݂ ܒܫܠܵܡܵܐ. ܐܵܕܝܼܵܐ ܒܪܝܼܟ݂ܵܐ ܕܡܵܪܝܵܐ ܝܘܸܬ ܐܲܢ݇ܬ.“ 30ܘܥܒ݂ܝܼܕ ܠܹܗ ܐܸܠܲܝܗܝ ܐܲܪܚܘܼܬܵܐ، ܘܐ݇ܟ݂ܝܼܠ ܠܗܘܿܢ ܘܫܬܹܐ ܠܗܘܿܢ. 31ܩܝܼܡ ܠܗܘܿܢ ܓ̰ܲܠܕܹܐ ܒܨܲܦܪܵܐ، ܘܝ݇ܡܹܐ ܠܗܘܿܢ ܚܲܕ ܠܗ̇ܘ ܐ݇ܚܹܪ݇ܢܵܐ، ܘܫܘܼܕܪܲܝ ܠܹܗ ܐܝܼܣܚܵܩ، ܘܐ݇ܙܝܼܠ ܠܗܘܿܢ ܡ̣ܢ ܠܟܸܣ ܠܹܗ ܒܫܠܵܡܵܐ.
32ܗܘܹܐ ܠܵܗ̇ ܒܗ̇ܘ ܝܵܘܡܵܐ ܐ݇ܬܹܐ ܠܗܘܿܢ ܪܹ̈ܓܵܘܵܬܹܐ ܕܐܝܼܣܚܵܩ ܘܡܘܼܕܸܥ ܠܗܘܿܢ ܐܸܠܹܗ ܒܘܼܬ ܒܹܐܪܵܐ ܕܚܦܝܼܪܗܘܿܢ. ܐ݇ܡܝܼܪܗܘܿܢ ܐܸܠܹܗ، ”ܡܘܼܫ݇ܟ̰ܸܚ ܠܲܢ ܡ̈ܝܼܵܐ.“ 33ܩܪܹܐ ܠܹܗ ܫܸܡܹܗ ”ܫܸܒ݂ܥܵܐ.“#26:33 ܥܸܒ݂ܪܵܐܝܼܬ ܒܡܲܥܢܵܝܵܐ: ܡܵܘܡܝܼܬܵܐ ܒܘܼܬ ܐܵܗܵܐ ܫܸܡܵܐ ܕܗ̇ܝ ܕܘܼܟܵܐ ܒܹܪܫܒܲܥ#26:33 ܥܸܒ݂ܪܵܐܝܼܬ ܒܡܲܥܢܵܝܵܐ: ܒܹܐܪܵܐ ܕܝ݇ܡܵܝܬܵܐ ܝܲܢ ܒܹܐܪܵܐ ܕܫܲܒ݂ܥܵܐ ܝܠܹܗ ܗܲܠ ܐܵܗܵܐ ܝܵܘܡܵܐ.
ܙܘܼܘܵܓܹ̈ܐ ܕܥܹܣܘܿ
34ܐܝܼܡܲܢ ܕܥܹܣܘܿ ܒܲܪ ܐܲܪܒܥܝܼ ܫܸܢܹ̈ܐ ܝܗ݇ܘܵܐ، ܫܩܝܼܠ ܠܹܗ ܒܲܟ݂ܬܵܐ، ܠܝܼܗܘܼܕܝܼܬ ܒܪܵܬܵܐ ܕܒܹܪܝܼ ܚܹܝܬܵܝܵܐ، ܘܠܒܸܣܡܲܬ ܒܪܵܬܵܐ ܕܐܲܝܠܘܿܢ ܚܹܝܬܵܝܵܐ؛ 35ܘܥܒ݂ܝܼܕܲܝ ܠܗܘܿܢ ܡܲܪܝܼܪܹ̈ܐ ܚܲܝܹ̈ܐ ܕܐܝܼܣܚܵܩ ܘܪܲܦܩܵܐ.
Àwon tá yàn lọ́wọ́lọ́wọ́ báyìí:
ܒܪܝܬܐ 26: ABTAB
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Aramaic Bible Translation Assyrian Bible © 2025 Aramaic Bible Translation