ܒܪܝܬܐ 23
23
ܡܵܘܬܵܐ ܕܣܲܪܵܐ
1ܚܝܹܐ ܠܵܗ̇ ܣܲܪܵܐ ܐܸܡܵܐܐ ܘܥܸܣܪܝܼ ܘܫܒܲܥ ܫܸܢܹ̈ܐ؛ ܐܲܢܹܐ ܝܗ݇ܘܵܘ ܫܸܢܹ̈ܐ ܕܚܲܝܹ̈ܐ ܕܣܲܪܵܐ. 2ܘܡܝܼܬ ܠܵܗ̇ ܣܲܪܵܐ ܓܵܘ ܩܘܼܪܝܲܬ ܐܲܪܒܲܥ ܕܝܼܠܵܗ̇ ܚܸܒ݂ܪܘܿܢ، ܒܐܲܪܥܵܐ ܕܟܢܲܥܢ. ܘܐ݇ܬܹܐ ܠܹܗ ܐܲܒ݂ܪܵܗܵܡ ܠܸܥܒ݂ܵܕܵܐ ܬܵܥܙܝܼ ܥܲܠ ܣܲܪܵܐ ܘܠܸܒܟ݂ܵܝܵܐ ܥܲܠܘܼܗ̇. 3ܘܩܝܼܡ ܠܹܗ ܐܲܒ݂ܪܵܗܵܡ ܡ̣ܢ ܠܟܸܣ ܡܝܼܬܬܵܐ، ܘܗܘܼܡܙܸܡ ܠܹܗ ܥܲܡ ܒܢܲܝ̈ ܚܹܝܬ، ܒܹܐܡܵܪܵܐ، 4”ܢܘܼܟ݂ܪܵܝܵܐ ܝܘܸܢ ܘܡܵܫܵܚܲܛ ܓܵܘܵܘܟ݂ܘܿܢ؛ ܗܲܒ݂݇ܠܘܼܢ ܠܝܼ ܕܘܼܟܵܐ ܕܩܒ݂ܵܪܬܵܐ ܥܲܡܵܘܟ݂ܘܿܢ، ܕܩܵܒ݂ܪܹܢ ܠܡܝܼܬܬܝܼ ܡ̣ܢ ܩܵܕ݇ܡ ܥܲܝܢܝܼ.“ 5ܓ̰ܘܼܘܸܒ ܠܗܘܿܢ ܒܢܲܝ̈ ܚܹܝܬ ܠܐܲܒ݂ܪܵܗܵܡ، ܒܹܐܡܵܪܵܐ، 6”ܫܡܸܥ ܐܸܠܲܢ ܡܵܪܲܢ، ܓܘܼܪܵܐ ܕܐܲܠܵܗܵܐ ܝܘܸܬ ܓܵܘܲܢ. ܩܒ݂ܘܿܪ ܠܡܝܼܬܬܘܼܟ݂ ܓܵܘ ܒܹܝܬ ܩܒ݂ܘܼܪܹ̈ܐ ܓܘܼܒܝܹ̈ܐ ܕܕܝܼܲܢ؛ ܐܘܼܦ ܚܲܕ ܡܸܢܲܢ ܠܹܐ ܚܵܣܹܟ݂ ܒܹܝܬ ܩܒ݂ܘܼܪܹܗ ܡܸܢܘܼܟ݂ ܡ̣ܢ ܠܸܩܒ݂ܵܪܵܐ ܠܡܝܼܬܬܘܼܟ݂.“ 7ܘܩܝܼܡ ܠܹܗ ܐܲܒ݂ܪܵܗܵܡ ܘܡܘܼܟܸܦܵܐ ܠܹܗ ܓܵܢܹܗ ܩܵܕ݇ܡ ܐ݇ܢܵܫܹ̈ܐ ܕܗ̇ܝ ܐܲܪܥܵܐ، ܠܚܹܝܬܵܝܹ̈ܐ، 8ܘܗܘܼܡܙܸܡ ܠܹܗ ܥܲܡܲܝܗܝ ܒܹܐܡܵܪܵܐ، ”ܐܸܢ ܝܼܠܹܗ ܨܸܒ݂ܝܵܢܵܘܟ݂ܘܿܢ ܕܩܵܒ݂ܪܹܢ ܠܡܝܼܬܬܝܼ ܡ̣ܢ ܩܵܕ݇ܡ ܥܲܝܢܝܼ، ܦܲܪܦܸܠܘܼܢ ܡ̣ܢ ܓܹܒܝܼ ܒܥܸܦܪܘܿܢ ܒܪܘܿܢܵܐ ܕܨܵܚܵܪ 9ܕܙܲܒܸܢ ܐܸܠܝܼ ܓܸܦܝܼܬܵܐ ܕܡܲܟ݂ܦܹܠܵܐ ܕܐܝܼܬ ܠܹܗ، ܕܝܼܠܵܗ̇ ܒܡܲܪܙܵܐ ܕܚܲܩܠܹܗ، ܒܛܝܼܡܵܐ ܡܸܠܝܵܐ، ܙܲܒܸܢܵܗ̇ ܐܸܠܝܼ ܩܵܕ݇ܡܵܘܟ݂ܘܿܢ، ܕܗܵܘܝܵܐ ܝܵܪܬܘܼܬܵܐ ܐܸܠܝܼ ܠܒܹܝܬ ܩܒ݂ܘܼܪܵܐ.“ 10ܥܸܦܪܘܿܢ ܝ݇ܬܝܼܒ݂ܵܐ ܝܗ݇ܘܵܐ ܓܵܘܵܐ ܕܒܢܲܝ̈ ܚܹܝܬ. ܓ̰ܘܼܘܸܒ ܠܹܗ ܥܸܦܪܘܿܢ ܚܹܝܬܵܝܵܐ ܠܐܲܒ݂ܪܵܗܵܡ، ܩܵܕ݇ܡ ܒܢܲܝ̈ ܚܹܝܬ، ܩܵܕ݇ܡ ܟܠܲܝܗܝ ܚܘܵܪ̈ܕܸܩܢܹܐ ܕܡܕܝܼܢ݇ܬܵܐ، ܒܹܐܡܵܪܵܐ، 11”ܠܵܐ ܡܵܪܝܼ، ܫܡܸܥ ܐܸܠܝܼ، ܒܝܼܵܗ݇ܒ݂ܘܼܗ̇ ܝܘܸܢ ܚܲܩܠܵܐ ܐܸܠܘܼܟ݂، ܘܒܝܼܵܗ݇ܒ݂ܘܼܗ̇ ܝܘܸܢ ܓܸܦܝܼܬܵܐ ܕܝܼܠܵܗ̇ ܓܵܘܘܼܗ̇ ܐܸܠܘܼܟ݂. ܩܵܕ݇ܡ ܥܲܝܢܹ̈ܐ ܕܒܢܲܝ̈ ܐܘܼܡܬܝܼ ܒܝܼܵܗ݇ܒ݂ܘܼܗ̇ ܝܘܸܢ ܐܸܠܘܼܟ݂. ܩܒ݂ܘܿܪ ܠܡܝܼܬܬܘܼܟ݂.“ 12ܘܡܘܼܟܸܦܵܐ ܠܹܗ ܐܲܒ݂ܪܵܗܵܡ ܓܵܢܹܗ ܩܵܕ݇ܡ ܥܲܡܵܐ ܕܐܲܪܥܵܐ. 13ܘܗܘܼܡܙܸܡ ܠܹܗ ܐܲܒ݂ܪܵܗܵܡ ܥܲܡ ܥܸܦܪܘܿܢ ܩܵܕ݇ܡ ܥܲܡܵܐ ܕܐܲܪܥܵܐ، ܒܹܐܡܵܪܵܐ، ”ܐܝܼܢܵܐ ܐܸܢ ܫܵܡܥܹܬ ܠܝܼ، ܒܸܬ ܝܵܗ݇ܒܹܢܘܼܟ݂ ܛܝܼܡܵܐ ܕܚܲܩܠܵܐ. ܩܲܒܸܠ ܠܹܗ ܡܸܢܝܼ، ܕܩܵܒ݂ܪܹܢ ܠܡܝܼܬܬܝܼ ܬܵܡܵܐ.“ 14ܓ̰ܘܼܘܸܒ ܠܹܗ ܥܸܦܪܘܿܢ ܠܐܲܒ݂ܪܵܗܵܡ، ܒܹܐܡܵܪܵܐ، 15”ܡܵܪܝܼ، ܫܡܸܥ ܐܸܠܝܼ. ܐܲܪܥܵܐ ܕܐܲܪܒܲܥܡܵܐܐ ܡܲܬܩܵܠܹ̈ܐ ܕܣܹܐܡܵܐ، ܡܘܿܕܝܼ ܝܠܵܗ̇ ܒܹܝܠܝܼ ܘܒܹܝܠܘܼܟ݂؟ ܩܒ݂ܘܿܪ ܠܡܝܼܬܬܘܼܟ݂.“ 16ܘܫܡܝܼܥ ܠܹܗ ܐܲܒ݂ܪܵܗܵܡ ܠܥܸܦܪܘܿܢ، ܘܬܩܝܼܠ ܠܹܗ ܐܸܠܹܗ ܠܣܹܐܡܵܐ ܕܗܘܼܡܙܸܡ ܠܹܗ ܩܵܕ݇ܡ ܒܢܲܝ̈ ܚܹܝܬ، ܐܲܪܒܲܥܡܵܐܐ ܡܲܬܩܵܠܹ̈ܐ، ܐܲܝܟ݂ ܛܝܼܡܵܐ ܕܝܼܗ݇ܘܵܐ ܒܹܝܠ ܬܲܓܵܪܹ̈ܐ.
17ܘܙܒ݂ܝܼܢܵܐ ܠܹܗ ܐܲܪܥܵܐ ܕܥܸܦܪܘܿܢ ܕܝܼܗ݇ܘܵܐ ܒܡܲܟ݂ܦܹܠܵܐ، ܠܡܲܕܢܚܵܐ ܕܡܲܡܪܹܐ. ܐܵܗܵܐ ܒܸܚܒ݂ܵܫܵܐ ܝܗ݇ܘܵܐ ܠܚܲܩܠܵܐ، ܓܸܦܝܼܬܵܐ ܕܓܵܘܘܼܗ̇، ܘܟܠܲܝܗܝ ܐܝܼܠܵܢܹ̈ܐ ܕܚܵܕܸܪ̈ܘܵܢܘܼܗ̇. 18ܗܘܹܐ ܠܵܗ̇ ܠܐܲܒ݂ܪܵܗܵܡ ܝܵܪܬܘܼܬܵܐ، ܩܵܕ݇ܡ ܥܲܝܢܹ̈ܐ ܕܒܢܲܝ̈ ܚܹܝܬ، ܓܵܘ ܟܠܲܝܗܝ ܥܵܒ݂ܪ̈ܵܢܹܐ ܒܕܲܪܘܵܙܵܐ ܕܡܕܝܼܢ݇ܬܵܐ. 19ܡ̣ܢ ܒܵܬ݇ܪ ܐܵܗܵܐ، ܩܒ݂ܝܼܪܹܗ ܐܲܒ݂ܪܵܗܵܡ ܠܣܲܪܵܐ ܒܲܟ݂ܬܹܗ ܓܵܘ ܓܸܦܝܼܬܵܐ ܕܚܲܩܠܵܐ ܕܡܲܟ݂ܦܹܠܵܐ ܠܡܲܕܢܚܵܐ ܕܡܲܡܪܹܐ، ܕܝܼܠܵܗ̇ ܚܸܒ݂ܪܘܿܢ، ܒܐܲܪܥܵܐ ܕܟܢܲܥܢ. 20ܦܝܼܫ ܠܵܗ̇ ܫܘܼܚܠܸܦܬܵܐ ܚܲܩܠܵܐ ܘܓܸܦܝܼܬܵܐ ܕܓܵܘܘܼܗ̇ ܠܐܲܒ݂ܪܵܗܵܡ، ܠܝܵܪܬܘܼܬܵܐ ܕܒܹܝܬ ܩܒ݂ܘܼܪܹ̈ܐ، ܡ̣ܢ ܒܢܲܝ̈ ܚܹܝܬ.
Àwon tá yàn lọ́wọ́lọ́wọ́ báyìí:
ܒܪܝܬܐ 23: ABTAB
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Aramaic Bible Translation Assyrian Bible © 2025 Aramaic Bible Translation