ܒܪܝܬܐ 18
18
ܐܲܒ݂ܪܵܗܵܡ ܩܲܒܘܼܠܹܐ ܬܠܵܬܵܐ ܡܲܠܲܐܟܹ̈ܐ
1ܘܦܝܼܫ ܠܹܗ ܚܸܙܝܵܐ ܡܵܪܝܵܐ ܠܐܲܒ݂ܪܵܗܵܡ ܒܒܲܠܘܼܛܹ̈ܐ ܕܡܲܡܪܹܐ، ܟܲܕ ܗ̇ܘ ܝ݇ܬܝܼܒ݂ܵܐ ܩܵܕ݇ܡ ܬܲܪܥܵܐ ܕܡܲܫܟܢܹܗ ܒܚܸܡܵܐ ܕܝܵܘܡܵܐ. 2ܘܡܘܼܪܸܡ ܠܹܗ ܥܲܝܢܘܼ̈ܗܝ ܐܲܒ݂ܪܵܗܵܡ ܘܓܘܼܫܸܩ ܠܹܗ، ܘܗܵܐ، ܚܙܹܐ ܠܹܗ ܬܠܵܬܵܐ ܐ݇ܢܵܫܹ̈ܐ ܟܸܠܝܹܐ ܠܩܘܼܪܒܹܗ. ܐܝܼܡܲܢ ܕܚܸܙܝܲܝ ܠܹܗ، ܪܚܝܼܛ ܠܹܗ ܡ̣ܢ ܬܲܪܥܵܐ ܕܡܲܫܟܢܵܐ ܠܩܵܕ݇ܡܲܝܗܝ، ܘܡܘܼܟܸܦ ܠܹܗ ܓܵܢܹܗ ܠܐܲܪܥܵܐ، 3ܘܐ݇ܡܝܼܪܹܗ، ”ܐܸܢ ܒܵܣܡܵܐ ܠܘܼܟ݂ ܠܵܐ ܥܵܒ݂ܪܹܬ ܡ̣ܢ ܪܹܓܘܼܟ݂، ܡܵܪܝܼ، ܐܸܢ ܡܘܼܫ݇ܟ̰ܸܚ ܠܝܼ ܫܵܦܵܩܲܬ ܒܥܲܝܢܘܼ̈ܟ݂. 4ܫܒ݂ܘܿܩ ܚܲܕ݇ܟ̰ܵܐ ܡ̈ܝܼܵܐ ܦܵܝܫܝܼ ܡܘܼܐܬܝܹܐ، ܚܲܠܸܠܘܼܢ ܐܲܩܠܵܬܵܘ̈ܟ݂ܘܿܢ، ܘܡܲܢܝܸܚܘܼܢ ܬܚܘܿܬ ܐܝܼܠܵܢܵܐ. 5ܒܗ̇ܝ ܕܐ݇ܬܹܐ ܠܵܘܟ݂ܘܿܢ ܠܟܸܣ ܪܹܓܵܘܟ݂ܘܿܢ، ܫܒ݂ܘܿܩܘܼܢ ܕܡܲܝܬܸܝܢ ܚܲܕ ܩܸܛܥܵܐ ܕܠܲܚܡܵܐ ܕܣܵܢܕܝܼܬܘܿܢ ܠܸܒܵܘܟ݂ܘܿܢ، ܘܡ̣ܢ ܒܵܬ݇ܪ ܗܵܕܵܐ ܐܵܙܠ݇ܝܼܬܘܿܢ.“ ܘܐ݇ܡܝܼܪܗܘܿܢ، ”ܥܒ݂ܘܿܕ ܐܲܝܟ݂ ܕܐ݇ܡܝܼܪܘܼܟ݂.“ 6ܘܡܘܼܠܝܸܙ ܠܹܗ ܐܲܒ݂ܪܵܗܵܡ ܘܥܒ݂ܝܼܪܹܗ ܠܓܵܘ ܡܲܫܟܢܵܐ ܠܟܸܣ ܣܲܪܵܐ ܘܐ݇ܡܝܼܪܹܗ، ”ܡܲܠܝܸܙܝ، ܫܩܘܿܠܝ ܬܠܵܬܵܐ ܟܝܘܼܠܹ̈ܐ ܕܩܲܡܚܵܐ ܢܫܝܼܦܵܐ، ܠܘܼܫܝ ܠܹܗ، ܘܥܒ݂ܘܿܕ ܓܸܪ̈ܕܲܝܹܐ.“ 7ܘܪܚܝܼܛ ܠܹܗ ܐܲܒ݂ܪܵܗܵܡ ܠܒܸܩܪܵܐ ܘܫܩܝܼܠ ܠܹܗ ܚܲܕ ܫܲܪܚܵܐ ܛܪܝܼܨܵܐ ܘܨܦܵܝܝܼ، ܘܝܘܼܗ݇ܒܸܠ ܠܹܗ ܠܚܲܕ ܥܠܲܝܡܵܐ، ܘܡܘܼܠܝܸܙ ܠܹܗ ܕܗܲܕܸܪ ܗ݇ܘܵܐ ܠܹܗ. 8ܘܫܩܝܼܠ ܠܹܗ ܡܲܣܬܵܐ ܘܚܲܠܒ݂ܵܐ، ܘܫܲܪܚܵܐ ܕܗܘܼܕܸܪܹܗ، ܘܡܘܼܬܸܒ݂ ܠܹܗ ܩܵܕ݇ܡܲܝܗܝ؛ ܘܟܠܹܐ ܠܹܗ ܠܟܸܣ ܠܲܝܗܝ ܬܚܘܿܬ ܐܝܼܠܵܢܵܐ ܟܲܕ ܐܵܢܝܼ ܒܹܐܟ݂ܵܠܵܐ. 9ܘܐ݇ܡܝܼܪܗܘܿܢ ܐܸܠܹܗ، ”ܐܲܝܟܵܐ ܝܠܵܗ̇ ܣܲܪܵܐ ܒܲܟ݂ܬܘܼܟ݂؟“ ܓ̰ܘܼܘܸܒ ܠܹܗ، ”ܓܵܘ ܡܲܫܟܢܵܐ ܝܠܵܗ̇.“ 10ܘܐ݇ܡܝܼܪܹܗ ܡܵܪܝܵܐ، ”ܡܸܢܕܪܸܫ ܒܸܬ ܕܵܝܪܹܢ ܠܟܸܣ ܠܘܼܟ݂ ܗܲܪ ܒܐܵܗܵܐ ܥܕܵܢܵܐ ܒܫܹܢ݇ܬܵܐ ܕܐܵܬܝܵܐ، ܘܣܲܪܵܐ ܒܲܟ݂ܬܘܼܟ݂ ܒܸܬ ܗܵܘܹܐ ܠܵܗ̇ ܒܪܘܿܢܵܐ.“ ܘܣܲܪܵܐ ܒܸܫܡܵܥܵܐ ܝܗ݇ܘܵܐ ܡ̣ܢ ܬܲܪܥܵܐ ܕܡܲܫܟܢܵܐ ܕܝܼܗ݇ܘܵܐ ܒܵܬ݇ܪ ܚܲܨܹܗ. 11ܐܲܒ݂ܪܵܗܵܡ ܘܣܲܪܵܐ ܣܵܒܹ̈ܐ ܝܗ݇ܘܵܘ، ܘܥܒ݂ܝܼܪܹܐ ܒܫܸܢܹ̈ܐ؛ ܘܥܒ݂ܝܼܪܬܵܐ ܝܗ݇ܘܵܐ ܡ̣ܢ ܣܲܪܵܐ ܕܗܵܘܹܐ ܗ݇ܘܵܐ ܠܵܗ̇ ܪܹ̈ܓ݂ܫܹܐ ܕܒܲܟ݂ܬܵܬܹ̈ܐ، 12ܘܓܚܝܼܟ ܠܵܗ̇ ܣܲܪܵܐ ܒܠܸܒܘܼܗ̇، ܒܹܐܡܵܪܵܐ، ”ܡ̣ܢ ܒܵܬ݇ܪ ܕܒܠܝܼܬܵܐ ܝܘܵܢ، ܘܡܵܪܝܼ ܣܵܒ݂ܵܐ ܝܠܹܗ، ܒܸܬ ܗܵܘܹܐ ܠܝܼ ܒܘܼܣܵܡܵܐ؟“ 13ܘܐ݇ܡܝܼܪܹܗ ܡܵܪܝܵܐ ܠܐܲܒ݂ܪܵܗܵܡ، ”ܩܵܡܘܿܕܝܼ ܓܚܝܼܟ ܠܵܗ̇ ܣܲܪܵܐ ܒܹܐܡܵܪܵܐ، ’ܫܲܪܝܼܪܬܵܐ ܝܠܵܗ̇ ܐܵܗܵܐ ܕܒܸܬ ܗܵܘܹܐ ܠܝܼ ܒܪܘܿܢܵܐ ܟܲܕ ܐܵܢܵܐ ܣܵܒ݂ܬܵܐ؟‘ 14ܐܝܼܬ ܡܸܢܕܝܼ ܥܲܣܩܵܐ ܠܡܵܪܝܵܐ؟ ܒܙܲܒ݂ܢܵܐ ܪܫܝܼܡܵܐ ܒܸܬ ܕܵܝܪܹܢ ܠܟܸܣ ܠܘܼܟ݂، ܗܲܪ ܒܐܵܗܵܐ ܥܕܵܢܵܐ، ܒܫܹܢ݇ܬܵܐ ܕܐܵܬܝܵܐ، ܘܣܲܪܵܐ ܒܸܬ ܗܵܘܹܐ ܠܵܗ̇ ܒܪܘܿܢܵܐ.“ 15ܐܝܼܢܵܐ ܣܪܝܼܒ݂ ܠܵܗ̇ ܣܲܪܵܐ، ܘܐ݇ܡܝܼܪܵܗ̇، ”ܠܵܐ ܓܚܝܼܟ ܠܝܼ،“ ܣܵܒܵܒ ܙܕܝܼܥ ܠܵܗ̇. ܘܗ̇ܘ ܐ݇ܡܝܼܪܹܗ، ”ܠܵܐ، ܐܝܼܢܵܐ ܓܚܝܼܟ ܠܵܟ݂ܝ.“
ܐܲܒ݂ܪܵܗܵܡ ܒܸܥܒ݂ܵܕܵܐ ܡܸܨܥܵܝܘܼܬܵܐ ܒܘܼܬ ܣܕܘܿܡ ܘܥܵܡܘܿܪܵܐ
16ܩܝܼܡ ܠܗܘܿܢ ܐܵܢܝܼ ܐ݇ܢܵܫܹ̈ܐ ܡ̣ܢ ܬܵܡܵܐ، ܘܓܘܼܫܸܩ ܠܗܘܿܢ ܠܓܹܒܵܐ ܕܣܕܘܿܡ، ܘܐܲܒ݂ܪܵܗܵܡ ܒܹܐܙܵܠܵܐ ܝܗ݇ܘܵܐ ܥܲܡܲܝܗܝ ܠܡܲܦܫܘܼܛܲܝ. 17ܘܐ݇ܡܝܼܪܹܗ ܡܵܪܝܵܐ، ”ܛܲܫܸܝܢ ܡ̣ܢ ܐܲܒ݂ܪܵܗܵܡ ܡܸܢܕܝܼ ܕܗܕܝܼܪܵܐ ܝܘܸܢ ܠܸܥܒ݂ܵܕܵܐ؟ 18ܐܲܒ݂ܪܵܗܵܡ ܫܲܪܝܼܪܵܐܝܼܬ ܒܸܬ ܗܵܘܹܐ ܒܵܒܵܐ ܠܐܘܼܡܬܵܐ ܓܘܼܪܬܵܐ ܘܙܲܪܒܵܢܬܵܐ، ܘܒܸܬ ܦܵܝܫܝܼ ܒܘܼܪܟܹܐ ܒܝܼܹܗ ܟܠܲܝܗܝ ܐܸܡܘܵܬܹ̈ܐ ܕܐܲܪܥܵܐ. 19ܣܵܒܵܒ ܓܘܼܒܝܹܗ ܝܘܸܢ ܕܡܗܲܕܹܐ ܠܒܢܘܿܢܘܼ̈ܗܝ ܘܠܒܲܝܬܹܗ ܡ̣ܢ ܒܵܬ݇ܪ ܡܸܢܹܗ، ܕܢܵܛܪܝܼ ܐܘܼܪܚܵܐ ܕܡܵܪܝܵܐ ܘܥܵܒ݂ܕܝܼ ܙܲܕܝܼܩܘܼܬܵܐ ܘܟܹܐܢܘܼܬܵܐ، ܕܡܲܝܬܹܐ ܡܵܪܝܵܐ ܠܐܲܒ݂ܪܵܗܵܡ ܡܸܢܕܝܼ ܕܩܘܼܘܸܠ ܠܹܗ ܐܸܠܹܗ.“ 20ܘܐ݇ܡܝܼܪܹܗ ܡܵܪܝܵܐ، ”ܣܵܒܵܒ ܙܝܼܕ ܠܵܗ̇ ܡܲܩܘܲܚܬܵܐ ܕܲܠܩܘܼܒ݂ܠ ܕܣܕܘܿܡ ܘܕܥܵܡܘܿܪܵܐ، ܘܝܘܼܩܪܸܢܵܗ̇ ܚܛܝܼܬܲܝܗܝ ܪܵܒܵܐ، 21ܒܸܬ ܨܵܠܹܝܢ ܐܵܕܝܼܵܐ ܘܚܵܙܹܝܢ ܕܐܸܢ ܡܲܩܘܲܚܬܵܐ ܕܲܠܩܘܼܒ݂ܠܲܝܗܝ ܕܡܛܹܐ ܠܵܗ̇ ܠܟܸܣ ܠܝܼ ܫܪܵܪܵܐ ܝܠܵܗ̇ ܝܲܢ ܠܵܐ، ܗ̇ܝܓܵܗ ܒܸܬ ܝܵܕܥܹܢ.“
22ܘܕܝܼܪܗܘܿܢ ܐܵܢܝܼ ܐ݇ܢܵܫܹ̈ܐ ܡ̣ܢ ܬܵܡܵܐ، ܘܐ݇ܙܝܼܠ ܠܗܘܿܢ ܠܣܕܘܿܡ، ܘܐܲܒ݂ܪܵܗܵܡ ܗܹܫ ܟܸܠܝܵܐ ܝܗ݇ܘܵܐ ܩܵܕ݇ܡ ܡܵܪܝܵܐ. 23ܘܩܘܼܪܒܸܢܹܗ ܐܲܒ݂ܪܵܗܵܡ ܘܐ݇ܡܝܼܪܹܗ، ”ܒܸܬ ܛܲܠܩܸܬ ܐܘܼܦ ܠܙܲܕܝܼܩܵܐ ܥܲܡ ܒܝܼܫܵܐ؟ 24ܩܵܘܡܵܐ ܕܐܝܼܬ ܚܲܡܫܝܼ ܙܲܕܝܼܩܹ̈ܐ ܓܵܘ ܡܕܝܼܢ݇ܬܵܐ؛ ܒܸܬ ܛܲܠܩܸܬ ܠܕܘܼܟܵܐ، ܘܠܹܐ ܫܵܒ݂ܩܹܬ ܠܵܗ̇ ܒܘܼܬ ܚܲܡܫܝܼ ܙܲܕܝܼܩܹ̈ܐ ܕܝܼܢܵܐ ܓܵܘܘܼܗ̇؟ 25ܚܵܣ ܠܘܼܟ݂ ܡ̣ܢ ܠܸܥܒ݂ܵܕܵܐ ܐܲܝܟ݂ ܕܐܵܗܵܐ ܫܘܼܠܵܐ، ܠܡܲܡܝܘܼܬܹܐ ܙܲܕܝܼܩܵܐ ܥܲܡ ܒܝܼܫܵܐ، ܕܗܵܘܹܐ ܙܲܕܝܼܩܵܐ ܐܲܝܟ݂ ܒܝܼܫܵܐ، ܚܵܣ ܠܘܼܟ݂. ܗܵܐ، ܠܹܐ ܕܵܐܹܢ ܒܙܲܕܝܼܩܘܼܬܵܐ ܕܲܝܵܢܵܐ ܕܟܠܵܗ̇ ܐܲܪܥܵܐ؟“ 26ܓ̰ܘܼܘܸܒ ܠܹܗ ܡܵܪܝܵܐ، ”ܐܸܢ ܡܲܫ݇ܟ̰ܚܸܢ ܚܲܡܫܝܼ ܙܲܕܝܼܩܹ̈ܐ ܓܵܘ ܡܕܝܼܢ݇ܬܵܐ ܕܣܕܘܿܡ، ܒܸܬ ܫܵܒ݂ܩܹܢ ܠܡܕܝܼܢ݇ܬܵܐ ܒܘܼܬ ܕܝܼܲܝܗܝ.“ 27ܘܐ݇ܡܝܼܪܹܗ ܐܲܒ݂ܪܵܗܵܡ، ”ܩܘܼܫܕܸܪܝܼ ܠܗܲܡܙܘܼܡܹܐ ܥܲܡ ܡܵܪܝܵܐ، ܘܐܵܢܵܐ ܥܲܦܪܵܐ ܘܩܸܛܡܵܐ. 28ܩܵܘܡܵܐ ܕܗܵܘܝܼ ܚܲܡܫܵܐ ܙܲܕܝܼܩܹ̈ܐ ܒܵܨܘܿܪܹ̈ܐ ܡ̣ܢ ܐܵܢܝܼ ܚܲܡܫܝܼ، ܒܸܬ ܡܲܚܪܸܒܸܬ ܠܟܠܵܗ̇ ܡܕܝܼܢ݇ܬܵܐ ܒܘܼܬ ܚܲܡܫܵܐ ܕܝܼܢܵܐ ܒܵܨܘܿܪܹ̈ܐ؟“ ܘܐ݇ܡܝܼܪܹܗ ܡܵܪܝܵܐ، ”ܠܹܐ ܡܲܚܪܸܒܸܢܵܗ̇ ܐܸܢ ܡܲܫ݇ܟ̰ܚܸܢ ܬܵܡܵܐ ܐܲܪܒܥܝܼ ܘܚܲܡܫܵܐ.“ 29ܡܘܼܙܝܸܕ ܠܹܗ ܠܗܲܡܙܘܼܡܹܐ ܐܲܒ݂ܪܵܗܵܡ ܥܲܡ ܡܵܪܝܵܐ ܘܐ݇ܡܝܼܪܹܗ، ”ܩܵܘܡܵܐ ܗܵܘܝܼ ܬܵܡܵܐ ܐܲܪܒܥܝܼ.“ ܓ̰ܘܼܘܸܒ ܠܹܗ ܡܵܪܝܵܐ، ”ܠܹܐ ܡܲܚܪܸܒܸܢܵܗ̇ ܐܘܼܦ ܒܘܼܬ ܐܲܪܒܥܝܼ.“ 30ܘܐ݇ܡܝܼܪܹܗ ܐܲܒ݂ܪܵܗܵܡ، ”ܦܲܪܦܘܼܠܹܐ ܝܘܸܢ، ܠܵܐ ܟܵܪܹܒ ܡܵܪܝܵܐ، ܘܐܵܢܵܐ ܒܸܬ ܗܲܡܙܸܡܸܢ، ܩܵܘܡܵܐ ܕܦܵܝܫܝܼ ܡܫ݇ܟ̰ܝܼܚܹܐ ܬܵܡܵܐ ܬܠܵܬܝܼ.“ ܘܓ̰ܘܼܘܸܒ ܠܹܗ ܡܵܪܝܵܐ، ”ܠܹܐ ܥܵܒ݂ܕܹܢ ܡܸܢܕܝܼ ܐܸܢ ܡܲܫ݇ܟ̰ܚܸܢ ܬܵܡܵܐ ܬܠܵܬܝܼ.“ 31ܘܐ݇ܡܝܼܪܹܗ ܐܲܒ݂ܪܵܗܵܡ، ”ܗܵܐ، ܩܘܼܫܕܸܪܝܼ ܡܸܢܕܪܸܫ ܠܗܲܡܙܘܼܡܹܐ ܠܡܵܪܝܵܐ، ܩܵܘܡܵܐ ܕܦܵܝܫܝܼ ܡܫ݇ܟ̰ܝܼܚܹܐ ܬܵܡܵܐ ܥܸܣܪܝܼ.“ ܐ݇ܡܝܼܪܹܗ ܡܵܪܝܵܐ، ”ܠܹܐ ܡܲܚܪܸܒܸܢܵܗ̇ ܐܘܼܦ ܒܘܼܬ ܥܸܣܪܝܼ.“ 32ܗ̇ܝܓܵܗ ܐ݇ܡܝܼܪܹܗ ܐܲܒ݂ܪܵܗܵܡ، ”ܦܲܪܦܘܼܠܹܐ ܝܘܸܢ، ܠܵܐ ܟܵܪܹܒ ܡܵܪܝܵܐ، ܒܸܬ ܗܲܡܙܸܡܸܢ ܚܕܵܐ ܓܵܗܵܐ ܐ݇ܚܹܪ݇ܬܵܐ، ܩܵܘܡܵܐ ܕܦܵܝܫܝܼ ܡܫ݇ܟ̰ܝܼܚܹܐ ܬܵܡܵܐ ܥܸܣܪܵܐ.“ ܘܐ݇ܡܝܼܪܹܗ ܡܵܪܝܵܐ، ”ܠܹܐ ܡܲܚܪܸܒܸܢܵܗ̇ ܐܘܼܦ ܒܘܼܬ ܥܸܣܪܵܐ.“ 33ܘܐ݇ܙܝܼܠ ܠܹܗ ܡܵܪܝܵܐ ܟܲܕ ܦܪܝܼܩ ܠܹܗ ܠܗܲܡܙܘܼܡܹܐ ܥܲܡ ܐܲܒ݂ܪܵܗܵܡ؛ ܘܐܲܒ݂ܪܵܗܵܡ ܕܝܼܪܹܗ ܠܕܘܼܟܬܹܗ.
Àwon tá yàn lọ́wọ́lọ́wọ́ báyìí:
ܒܪܝܬܐ 18: ABTAB
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Aramaic Bible Translation Assyrian Bible © 2025 Aramaic Bible Translation