Chibkees 4
4
Ka-ees has Anpees
1Adaas nrug Evas kwg yog niz puj pw, ces Evas txiad xees tus. Evas yug taw is tug tus has niz has tas “Vid tuz Tswb paas kud, kud ha taw is tug tus.” Yog ni qhai, niz ha tis tuz tus qhai npe hu ua Ka-ees.#4.1 Ka-ees: Lus npe na has ni Henplais lu luz kwg has tas, “taw liad.” 2Tod qaas qhai niz rob yug taw is tug tus, has niz tis npe hu ua Anpees. Anpees yog is tug tus yug yaaj, tadsis Ka-ees yog is tug tus ua qoosloo. 3Muaj is hnoos Ka-ees coj tej qoosloo kwg niz saw taw luz coj tuaj fij tu tuz Tswb. 4Ces Anpees kuj muas niz tej minyuas yaaj kwg yog thiaj tug, coj tuaj tua, has niz xaib tej nqaj zoo coj tuaj fij tu Vaajtswb. Tuz Tswb txaws sas heeb tu Anpees has niz tej khood fij, #Hen 11.4 5tadsis Ka-ees has niz tej khood fij tsi hud Vaajtswb sas. Yog ni qhai, Ka-ees ha chid has ua ntsejmuag npaw tiaz vog. 6Ces tuz Tswb has tu Ka-ees has tas, “Vid nicaaz koj yiad chid ua luaj ni? Vid nicaaz koj ua ntsejmuag npaw tiaz vog ni ko?” 7Yog koj yeej ua qhob zoo,#4.7 Yog koj yeej ua qhob zoo; lossis kud yiad txais koj tej khood fij. Kud yiad txais koj tej khood fij, tadsis yog koj ua phed, txuj keb txhud zub riab qhais koj qhob rooj yiad tud koj. Txuj keb txhud xaab ua tuz kaab koj, tadsis koj yiadtsud ua kuas koj kobyeej niz.
8Tod qaas qhai, Ka-ees has tu niz tuz kwb Anpees has tas, “Ws tiad muz ncig ua si nraaz tes.”#4.8 Tej phaw qus txais has tas Ws tiad muz yos ua si nraaz tes; phaw Henplais tsi muaj cob luz na. Thaws ostug muz txug nraaz tes liad, Ka-ees txiad ntxeeb sas tu niz tuz kwb has muas niz tuz kwb tua tuag liad.#Mat 23.35; Luk 11.51; 1 Yhs 3.12
9Tuz Tswb noog Ka-ees has tas, “Koj tuz kwb Anpees muz tu qhob twg liad?”
Niz tes has tas, “Kud tsi paws. Kud yog tuz kwg tsodkwd kud tuz kwb los?”
10Ces tuz Tswb has tas, “Vid nicaaz koj yiad ua nruj ua tsib ni ko? Koj tuz kwb cob ntshaab kwg ntwz tu hub aab ted quaj hu kud, thob kuas kud ua pawj tu koj ntaag.#Hen 12.24 11Nizna koj rawg lu luz food tsi zoo has rawg liab tiad tsib qhais thaaj aab kwg nquz koj tuz kwb kwg koj muas tua cob ntshaab. 12Txiad yog koj khwb cog qoosloo ntaw npawd nicaaz los tej aab qhai yiad ua tu koj tej qoosloo hlus tsi tawz. Koj yiad ua neeg ncigntuj muz thoos qaas ntuj tsi muaj vaaj tsi muaj tseb nyos.”
13Ka-ees has tu tuz Tswb has tas, “Koj raw txid tu kud hnyaab tshaaj qhob kud yiad ris tawz liad. 14Koj liab kud tiad qhais thaaj aab na has tiad qhais koj lus xusntag muz. Kud yiad ua neeg ncigntuj muz thoos qaas ntuj tsi muaj vaaj tsi muaj tseb nyos, has tuz twg ntsis kud los yiad tua kud laidtaa.”
15Tadsis tuz Tswb tes has tas, “Yeej tsi taw ni, yog tuz twg tua Ka-ees laidtaa, mas tuz qhai yiad rawg txid xyaa npawg ntxib.” Yog ni qhai, tuz Tswb ha ntaws cid tu Ka-ees lus ceb kuas tuz twg pud los tsi xod tua Ka-ees laidtaa. 16Ces Ka-ees ha tsib qhais tuz Tswb lus xusntag has muz nyos tu is lus teschias Nawj hu ua “Ncig Muz Ncig Luz” kwg yog nyos qhais lus Vaaj Edees saas hnoostuaj.
Ka-ees Cob Xeesntxwz
17Ka-ees has niz tuz puj yug taw is tug tus, ostug tis niz lus npe hu ua Enawj. Ka-ees rhawb taw is lus nroog has niz muas lus nroog qhai tis npe hu ua Enawj rias ni niz tuz tus lus npe. 18Enawj muaj is tug tus hu ua Iladis, niz yog Mehuya-ees vaid, Mehuya-ees muaj is tug tus npe hu ua Methuxa-ees, has Methuxa-ees muaj is tug tus hu ua Lamej. 19Lamej yuab os tug puj, is tug hu ua Adahes has is tug hu ua Xilas. 20Adahes yug taw is tug tus hu ua Yanpales, Yanpales yog yiadkoos qhais cob neeg kwg yug tsaj txhu has nyos tseb ntaws. 21Yanpales muaj is tug kwb hu ua Yunpas, Yunpas yog yiadkoos qhais cob neeg kwg txiaj ntaws nkawj nogncaas has tshub raaj. 22Xilas yug taw is tug tus hu ua Tunpas Ka-ees, niz txiaj ntaws txhua yaad cuasyeej#4.22 niz txiaj ntaws txhua yaad cuasyeej; is phaw qus txhais has tas, niz yog yiadkoos qhai cob neeg kwg txiaj ntaws tooj ntaws hlaw. kwg yog muas tooj muas hlaw ntaws. Tunpas Ka-ees tuz muad hu ua Na-amas.
23Lamej has tu niz os tug puj tas,
“Adahes has Xilas, mej ca ni noog kud has:
Kud taw tua is tug yias laidtaa vid niz ua tu kud rawg mos,
kud tua is tug tus hluas tuag liad vid niz ntaws kud.
24Yog tuz twg tua Ka-ees niz yiad rawg txid xyaa npawg,
yog tuz twg tua kud tuz qhai yiad rawg txid xyaa cawd xyaa npawg.”
Xej has Enawses
25Adaas rob nrug niz tuz puj pw, Evas ha rob yug taw is tug tus, Evas has tas, “Vaajtswb pus kud muaj kua is tug tus luz siab Anpees tuz kwg Ka-ees muas tua liad chia.” Yog ni qhai, niz ha tis tuz tus qhai npe hu ua Xej.#4.25 Xej: Lus npe na luz Henplais txhais has tas, “muas pus.” 26Xej muaj is tug tus, has Xej muas tis npe hu ua Enawses. Txij thaws qhai luz neeg txiad pib tuab tuz Tswb lus npe pehiad tuz Tswb.
Ekhethiweyo ngoku:
Chibkees 4: CQD2024
Qaqambisa
Yabelana
Kopa
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2024 Bible Society Vietnam. All rights reserved.