انجیلِ لوقا 23

محاکمه پیلاتُس و هیرودیس پیش

1اُخُری شورا هَمُّن اوپاب ببنده و عیسی شون بِبه پیلاتُس فرمانده وَر 2و چو کودَ شکایتشون بکه و بواتشون: «ام مردکمون بوینت که چَما قومه گمراه کره و اَجَما وا که امپراتور مالیات مدَیا و اِدعا کره که مسیح موعود یعنی پاتشاه اسّه.» 3پس پیلاتُس عیسی کودَ آپرسس: «مگم تَه یهودیان پاتشاهیش؟» عیسی چُو جواوَ بوات: «تَه هِمنَه وای!» 4پَس پیلاتُس سران کاهنان که معبده علما بِنده و جماعتِش اعلام بِکَه که: «هیچ تقصیری ام مردکِ محکوم کردنِ را نوینتِمه.» 5امّا اَون اصرارییَم بواتشون: «عیسی ام سَر تا اَ سَر یهودیه مردمش اِشتن تعلیمونییَم تحریک کره تا آشوب بکرنده. جلیلَ دَ شروش کرده و هَنِنه بییا آرَسِساسه.»

6وختی پیلاتُس اَمش بشنَوِس، گوِسِشه بزونه مگم عیسی جلیلی اسه. 7وختی بِزونسشه که هیرودیس اَ ناحیه حکم کره، عیسیش بِخِرسا هیرودیس وَر، چون که اَ زمُون هیرودیس اِشتن اورشلیمَ دَ بِه. 8هیرودیس وختی عیسیش بوینت پِر شاد ببه، چون خیلی وخت به گَوِسِش عیسی بِوینِه. چون، درباره عیسی زیادَ لاوَعونش اَشنوسِش به، اُمیدش دَ چو دَ معجزه ای بِوینِه. 9پس سوالانی عیسی کودَ آپرسس، امّا عیسی هیچ جواویش ندا. 10سران کاهنان و تورات معلمین که بِر بنده، اوشون تُیمت زَیَی. 11هیرودیس و چُو سربازِه عیسیشون بی‌حرمتی بِکَه و اَوشون مسخره بِکَه. اُخُری ای زرق و برق اَبایی عیسی شون دِکه و آگاردونِسِشونه پیلاتُس وَر. 12اَ روز هیرودیس و پیلاتُس هَمدیگَرییَم رفق بِبنده، چون پیش تر هَمدیگرییَم دِشمن بِنده.

13پیلاتُس سران کاهنان و قوم پیله ترون و مردمش وُنگ بِکه 14و اَجونش بوات: «شَما ام مردَکِرون چِمن وَر بایرد و بواتَیو مردمه راه دَ اَبَر کَرِه تا شورش بکرنده. اما از اِشتن شَما پیش چو کودَ بازجویییم بِکَه. دِدِسا هیچ دلیلیم نیوینتِه که شَما تُیمته راست بیبینده. 15هیرودیس نظرَم هَمِه، چون اَوِش آگِاردِونِسه چَما وَر. هِمنَه که وینو اَو کاری نِکرده که مرگ مستحق بیبی. 16پس اَجو شلاق زَنم و آزاد کَرم.» 17هر عیدی، پیلاتس گَوِسَن ای زندانی ای چون را آزاد بِکره. 18امّا اَون همُّن دادشون بکه: «اَجو بوکوش و بارْابّاس چَما را آزاد بِکه!» 19بارْابّاس کسی به که شهرَ دَ آشوب کرده به، و آدم کوشی خونین زندانَ به. 20پیلاتُس که گَوِسَی عیسی آزاد بکره، هَنی مردمییَم لاوش بِکَه. 21امّا مردم جیکیله کَردَیَ که: «اَجو صلیب سَر بوکوش! اَجو صلیب سَر بوکوش!» 22پیلاتس سوّمین سَفَر اَجون بوات: «چرا چِه بدیش کرده؟ از که هیچ تقصیری چو کوشتن را نیوینمه. پس اَجو شلاق زَنم و آزاد کَرم.» 23امّا مردمه اصرارییَم جیکیلشون کردَی که عیسی عه صلیبه سَر بوکوشه. آخر چون جیکیله کردن زور آرسس. 24و پیلاتُس حکمیش بدا که اَوُن گَوِسَینده. 25پیلاتُس هِمنَه که اَوه بگوسشون اَ مَردکی که آشوب و آدم کوشی خونَین زندان به، آزادش بکه و عیسیش اجون بدا تا هر کاری که گوِسِنده چوییم بکرنده.

عیسی مَردن صلیب سر

26وختی عیسی شون بَردَی اعدام بکرنده، ای مردکی که چو نوم شَمعون به و قیرَوان اهالی به وَ مزرعه دَ آگَردِسَی شهر، بِگَتِشون. و صلیبشون چو دوش سر اونا و اَوِشون مجبور بِکَه که عیسی صلیبه چُو پش بِبره. 27جماعتی مردم دَ و ایسری زنَکون که اِشتن سینه شون ایکوعِسَی و شیونشون کردَیَ چُو پَش راه دِکَتِندِه. 28اما عیسی آگَردس و اَجونش بوات: «ای اورشَلیمه کیلگون چِمنا مَورما، شَما و شَما خوردگونِ را بِورما. 29چون اَ روزونی آ که وایو: ”خُش به حال اَ زنَکونی که چون را خوردگ نِبی، خُش به حال اَ ماعونی که هرگیز خوردِگشون نِزَنته و اَ سینه‌ایی که هرگیز شِتش نِدایه!“ 30اُخُری کوهون وانده: ”چِما سر ایگِنو!“ و تپه‌هان وانده : ”آجَما جا بیدیا 31چون اگم تَرَه چوییَم هِمنَه کرنده، دِدِسو خشک چو سر چه آ؟»

32دِ مردکی که جنایتکار بِنده نی، بردشون تا عیسی خَمنا بوکوشنده. 33وختی ای یقایی آرَسسنده که چو نوم جمجمه بِه، عیسی شون اَ دِ جنایتکار خمنا صلیب سر میخ کوشون بِکه، ایو چو راسته طَرَف و اَ ایو چو چَپَ طَرف. 34عیسی بوات: «ای په، اَجِمون ببخش، چون نزونِنده که چه کرِنده.» اُخُری قرعه شون دراینت تا چو خلاون اِشتن میان آبخشنده. 35مردم وندَردَ بِنده و تماشاشون کردی اما قومه پیله تره ریشخندییَم واتشونَی: «دیگرونِش نجات بدا! اگم اَم مردک مسیح و خدا بَرگزیدیه، هَنِنه اِشتن نجات بیدی.» 36سربازه عیسی شون مسخره بِکَه. اَون پیش اومَینده و اوشون تُرشسه شراوی آدایَی 37و واتَینده: «اگم ته یهودیان پاتشاهیش، اِشتن نجات بده.» 38چو صلیبِ سر نویشتشون به «ام یهودِ پاتشاه اسه.»

39ای نفر از اَ دِ جنایتکاری که صلیب سر بنده، طعنه ییَم عیسیاش بِوا: «مگم تَه مسیح موعود نیش؟ پس اَجَما و اِشتن نجات آده!» 40امّا اَ ایو چو را غَیضش بِکَه و بِوات: «خدا کودَ نترسی؟ تَه ای هه حکم بِنیش! 41چَما مجازات حقِ چون چَما اعمال سزا وینوم. امّا اَم مردک هیچ تقصیری نداره.» 42اُخُری عیساش بِوات: «ای عیسی، وختی اِشته پاتشاهی آرَسه، اَمِن ویر بایر.» 43عیسی جواو بدا: «حقیقتا، اتَه وام ته هارو چمن خمنا بهشتَ دَ بی.»

عیسی مَردن

44دویر و بر ساعت دونزه ظهر بِه که تاریکی تمام اَ سرزمینش بِگَت و تا ساعت سه بعدظهر همه یقا تاریک به. 45چون آوتاو نور دِ نبه. هه لحظه معبده پرده وسطَ دَ دِ پاره ببه. 46اُخُری عیسی بِلَنده صَصییم جِیکیلش بِکه: «ای په، چِمن روحه اِشته دسان اوس بَرم.» امش بوات و آخرین نفسش بِکَشس. 47سربازان فرمانده اَم اتفاقه وینتَنییَم خداش شکر بِکَه و بِوات: «واقعا که ام مردک بی‌گناه بِه.» 48مردمی که تماشا کردنه را جمع بییه بنده، وختی ماجراشون بِوینت اِشتن سینه ایکوسن ایکوسنییَم آگردِسنده اِشتن کییَه. 49امّا چو آشناعه همُّن اَ زنَکون خمنا که جلیلَ دَ چو پش اومیه بنده، دورَ دَ وندرده بنده و ام اتفاقشون دِدِشتَی.

عیسی خشاردن

50بِر ای مردکی به چُو نوم یوسف به که رامه اهالی، یهودیه شهرَ به. اَو چاک و صالح به و خدا پاتشاهی را چشم براه به. 51یوسف با اَم که یهودیان شورا اعضا به، شورا تصمیم و کارییَم موافق نبه. 52اَو بِشه پیلاتُس وَر و عیسی جنازش بگوس. 53پس عیسی جِنازه شون صلیبِ سر اشنیوَ بایردنده و ای کتان کفنی آپیچِسش و ای مقبره‌ای دلَ که صخره دلَ تاشسشون بِه و تا الان هیچکسشون چو دِل نِناعه به، بِناشون. 54اَ روز «یهودیان آماده بیینه روز» بِه. یهودیان آماده بیینه روز ای روز عید پسخ پیش به که یهودیان اِشتنشون پسخه عید را آماده کردَی، و چیزی نِمَنتَه به که یهودیان مقدس شنبه روز شروع بیبی. 55زَنَکونی که جلیلَ دَ عیسی پَش اومییه بنده، یوسفه پش راه دکَتِنده. اَوُن هَم چو مقبرَشون بوینت هم بیوینتشون که عیسی جنازشون چه طَرَه بِر بِنا. 56اُخُری آگَردسنده کییه، اَدویه و عطریه روعَن شون حاضر بِکَه و شنبه روزَ، عین خدا فرمان استراحت شون بِکَه.

Ekhethiweyo ngoku:

انجیلِ لوقا 23: KTT

Qaqambisa

Yabelana

Kopa