Iivesi zeBhayibhile ezithandwayo ezisuka Ef 4

Yabelana

Caw wach' tzlaj eyutc e nab'en 'ayx junjn ex. Tzlaj 'o'ch e c'ojl 'ayex. An̈jtona', tzlaj eya'lac niwnc'ojlal 'ayx junjn ex, 'icha xyutj Dios ya'n niwnc'ojlal 'ayn̈ec yuj Cristo.

'Emmquilal tzlaj eyutc e b'a, wach' tzeyutj e b'a. Tzlaj eyac' techjoc 'a eb' tz'och smul 'ayex. Niwn tzlaj eyutc e c'ojl 'ayx junjn ex. An̈jtona', tzlaj e chamc'ojloc pax e b'a.

Man̈x eyal jun tzo'n̈ comn tu paxti'al. Cojn jun tzo'n̈ paxti wach' tzlaj eyala', sec 'oj laj b'o snab'en eb' tz'ab'xni 'ayex, ax swach' 'och ste'nal eb' eyu'uj.

Caw tzeyactj can smasnil e chichnc'ojlal, e c'a'lc'ojlal. Man̈ comnoc tzchacb' e sat scot eyowal. An̈jtona', man̈ comnoc tzq'ue eyaw e tumwji. Caw tzeyactj can e b'on jantcn̈ej tas maysch'olnil.

Toto 'ay 'aj tzlaj cot eyowal, man̈ e b'o junc maysch'olnil yuj jun eyowl cha. Matz tac' an̈j 'ijnoc 'ay cot eyowal tz'ejm c'u. Man̈ eyac' spermiso win diablo sjun 'el e nab'en yuj eyowl cha.

Ax jun eyichm b'eyb'al, yowlal tze wach' 'actj can 'a jun 'ejmn̈ej. Yujto a jun eyichm b'eyb'al cha, ton̈j tzwach' juw yuj jun tzo'n̈ tas tze nib'j 'ochi. Yuj cha, yowlal tzwach' b'o e nab'en 'a junjn c'u. Yowlal tze chaj jelmjoc e nab'en, tze chan junx 'a't tzb'o Dios 'icha tznib'ej. Toto 'ixta', tojl 'oj eyutc e b'eyb'al, caw wach'n̈j 'oj eyutc e b'a, 'icha tzyal jun 'ab'x caw yel.

Yuj Yespíritu Dios, junxn̈ej nab'enal on̈ 'ajec. Yuj cha, tzeyac' 'ip laj e nanoc, sec junc'ojlal tzex 'aji. Toto 'ixta', junxn̈ej tz'aj e nab'en 'a smasnil tiempo.

Yuj cha, a tz'a'n copiso junjn on̈ec. 'Ayn̈ schecb' caji. 'Ayn̈ tzyac' cal-l spaxti'. 'Ayn̈ tzcal-l wach' 'ab'x yic colnb'il. 'Ayn̈ tz'ajx quil eb' quit creyenteal, tzqui cuyn pax eb'. 'Ixta tzyutj ya'n copiso junjn on̈ an̈ yic on̈c xo, yic tzca'nec servil, sec 'oj wach' te'nb'oc qui nab'enec, yujto an̈ec tic, 'icha to sniwnal Cristo cajec. 'Ixta tzon̈ yutjec, sec wach' qui masnil, jun lajn 'oj cutquec ca'n 'och qui c'ojl 'a 'a. Ax qui wach' 'ojcan 'el Yunnal Dios. Toto 'ixta', 'oj te'nb'oc qui nab'enec. Caw lajn 'oj 'aj qui nab'enec 'icha Cristo, atn jun may jac spaltail.

Yujto tznib'ej, man̈xtoc lajn on̈ 'icha eb' 'unn c'un somchj snab'en. A ticnec, 'ay eb' lajn 'icha junc barco ton̈j tz'eytz'n 'ec' yuj 'ic', yujto ton̈j tzsomchj snab'en eb' yuj jun tzo'n̈ chuc cuynb'ilal tzalx 'a eb'. Ton̈j tz'ixtx paxti eb' yuj jun tzo'n̈ eb' jeln ya'n 'es. A eb' cha, tznib'j eb' tzon̈ yij 'at 'a junc comn b'eyb'al. Palta an̈ec tic, yowlal an̈j jun tzo'n̈ yel tzcalec, qui ch'oxc qui chamc'ojlal. Yowlal tzon̈ wach' te'nb'iec, sec caw lajnn̈ej tzon̈ 'ajc yet' Cristo. Yujto 'icha qui jolom, 'ixta yaj 'ayn̈ec.