Iivesi zeBhayibhile ezithandwayo ezisuka 1 ᑯᕆᓐᑎᔭᓇ 12

Yabelana

ᒥᓯᐛ ᐊᐛᓐ ᑲ ᑕᑈᑕᐧᒃ ᑎᑯᓂᔪᐤ ᐊ ᐃᓯ ᒋᔅᒐᔨᑕᑯᐃᓱᔨᒋ ᑲ ᐸᔭᒋᓯᔨᒋ ᐊᒐᒂ ᐊ ᑕᔨᒋ ᐊᓐᑕ ᐊ ᑕᑦ᙮ ᒋ ᐃᑐᑎᒪᑯᓇᓄᐤ ᐅᔭ ᒥᓯᐛ ᐸᐸᐃᒄ ᐊ ᑎᓯᔭᐧᒄ ᒐᒋ ᐛᐎᒋᐃᑐᔭᐧᒄ᙮

ᒋᔨᐛᐤ ᒪᒃ ᐊᐅᒄ ᙭ ᐎᔪᐤ᙮ ᒥᓯᐛ ᐸᐸᐃᒄ ᒋ ᐎᒋᐃᐛᓇᐛᐤ ᐊᓐᑕ ᐃᔅ᙮

ᑎᒂᒐ ᐊ ᐃᓯ ᐊᐧᑯᓯᒥᑲᒡ ᐊᓐ ᒥᔪᐤ, ᒥᓯᐛ ᐊ ᐃᔅᐱᓴᒡ ᒥᔪᐤ ᒋᑭ ᒧᓯᑕᒐᒥᑭᓐ᙮ ᑭᔭ ᐸᐃᒄ ᐱᔅᒐᓯᐅᓐ ᐊᓐᑕ ᒥᔭᒡ ᒥᔪᐧᑲᑭᓄᐅᒐ, ᒥᓯᐛ ᐊ ᐃᔅᐱᓴᒡ ᐊᓐ ᒥᔪᐤ ᒋᑭ ᒥᔽᔨᒧᒥᑭᓐ᙮

ᐊᐅᒄ ᒪᒃ ᐅ ᑲ ᐸᔭᒋᓯᑦ ᐊᒐᐧᒄ ᒪᔭᑦ ᐱᔅᒐ ᐊᐛᔪᐛ ᒐᒋ ᐛᐎᑎᒥᔨᒋ ᒋᓴᒪᓂᑐᐛ ᐅᑭᒐᑕᐛᔨᑎᒧᐅᓂᔪᐤ, ᐊᑯ ᑯᑎᑲ ᒪᔭᑦ ᒐᒋ ᐎᑎᒪᒐᔨᒋ ᑕᓐ ᐛ ᐃᓯ ᒋᔅᒐᔨᑎᒥᐊᔨᒋ ᒋᓴᒪᓂᑐᐛ ᐊᐛᔪᐛ᙮ ᐊᑯ ᑯᑎᑲ ᐊᐛᔪᐛ ᒪᔭᑦ ᓇᔅᒡ ᒐᒋ ᑕᑈᔭᔨᒪᔨᒋ ᒋᓴᒪᓂᑐᐛ᙮ ᒥᓐ ᑯᑎᑲ ᒥᔭᐤ ᓱᐧᑲᑎᓯᐅᓂᔪᐤ ᒐᒋ ᒥᓏᒋᐊᔨᒋ ᐊᐛᔪᐛ᙮ ᑯᑎᑲ ᐊᐛᔪᐛ ᓱᐧᑲᑎᓯᐅᓂᔪᐤ ᒥᔭᐤ ᒐᒋ ᒪᒥᔅᑲᒡ ᐃᑎᔨᒋ᙮ ᒥᓐ ᑯᑎᑲ ᐊᐛᔪᐛ ᒥᔭᐤ ᒐ ᒋᔅᒋᐛᐃᒐᔨᒋ᙮ ᐊᑯ ᒥᓐ ᑯᑎᑲ ᒪᔭᑦ ᓇᔅᒡ ᒐᒋ ᒐᔅᑎᓇᐅᔨᒋ ᒋᓴᒪᓂᑐᐛ ᐅᐸᔭᒋ ᐊᒐᐧᑯᔪᐛ ᐊ ᐊᑐᔅᒐᔨᒂᓂ ᒪᒃ ᒥᒋ ᐊᒐᒂ ᐊ ᐊᑐᔅᒐᔨᒂᓂ᙮ ᐊᑯ ᒥᓐ ᑯᑎᑲ ᒪᔭᑦ ᒐᒋ ᒂᔅᒋᐃᔨᒥᔨᒋ᙮ ᐊᑯ ᑯᑎᑲ ᐊᐛᔪᐛ ᒪᔭᑦ ᒐᒋ ᐱᔭᑭᔅᒋᑕᑯᑕᔨᒋ ᑕᓐ ᑲ ᐃᔅᒋᔄᔨᒋ ᐊᓂᔭᔪᐛ ᑲ ᒂᔅᒋᐃᔨᒥᔨᒋ᙮

ᒥᒄ ᒪᒃ ᐸᐃᑯᓱᐤ ᑲ ᐸᔭᒋᓯᑦ ᐊᒐᐧᒄ, ᒥᓯᐛ ᒪᒃ ᐸᐸᐃᒄ ᐊᐛᔪᐛ ᒥᔭᐤ ᓂᓇᐧᑯᐤ ᐊᒐᐧᑯ ᒥᔨᐛᐅᓇ᙮ ᐎᔾ ᒪᒃ ᑲ ᐸᔭᒋᓯᑦ ᐊᒐᐧᒄ ᒋᔅᒐᔨᑎᒻ ᒐᒄ ᒥᔨᐛᐅᓂᔪᐤ ᒐ ᒥᔭᑦ ᐊᐛᔪᐛ᙮

ᐊᐅᒄ ᐅᔭ ᑲ ᐃᓯᑕᑦ ᒐ ᐊᑲ ᒋ ᑎᒂᒡ ᑎᐸᓂᐃᓱᐅᓐ ᒥᔭᒡ, ᒋᓴᒪᓂᑐᐤ ᒋ ᓂᑐᐛᔨᑎᒻ ᐊᓂᔭᔪᐛ ᐱᔅᒐᓯᐅᓇ ᐊᓐᑕ ᒥᔭᒡ ᑲ ᑎᑯᓂᔨᒋ ᒥᓯᐛ ᐸᐃᑯᓄᒡ ᒐᒋ ᐛᐎᒋᐃᑐᒥᑭᓂᔨᒋ, ᓇᒪ ᐎ ᒐᒋ ᑕᑎᐸᓂᐱᔨᐃᓱᒥᑭᓂᔨᒋ᙮

ᓂᓇᐧᑯᐤ ᒥᔨᐛᐅᓇ ᔅᒋ ᒥᔨᑯᓇᓄᐤ, ᐸᐃᑯᓱᐤ ᒪᒃ ᐊᓐ ᑲ ᐸᔭᒋᓯᑦ ᐊᒐᐧᒄ ᑲ ᒥᔨᑕᐧᒄ ᐅᔭ ᒥᔨᐛᐅᓇ᙮ ᓂᓇᐧᑯᐤ ᑎᑯᓐ ᑕᓐ ᒐᒋ ᐃᓯ ᐛᐎᒋᐊᑭᓄᐅᒡ ᐊᐛᓐᒋ ᒥᒄ ᒪᒃ ᐸᐃᑯᓱᐤ ᐊᓐ ᐅᑎᐸᔨᒋᒐᐤ ᑲ ᐊᑐᔅᑯᐛᑭᓄᐅᑦ᙮ ᓂᓇᐧᑯᐤ ᑭᔅᒋᐅᓇ ᑎᑯᓇ ᒐᒋ ᐛᐎᒋᐊᑭᓄᐅᒡ ᐊᐛᓐᒋ ᒥᒄ ᒪᒃ ᐸᐃᑯᓱᐤ ᐊᓐ ᒋᓴᒪᓂᑐᐤ ᑲ ᒥᔨᐛᑦ ᒐᒋ ᐃᑐᑕᑭᓄᔨᒋ ᐅᔭ ᒐᒂᔪᐛ᙮

ᑕᔪᐛ ᒪᒃ ᐅᒪᒧᐊᔭᒥᐊᐛ ᒋᓴᒪᓂᑐᐤ ᐊᒋ ᐅᑎᓇᑦ ᑕᓐ ᒐ ᐃᑕᐱᑎᓯᔨᒋ᙮ ᐊᓂᔭᔪᐛ ᓂᔅᑎᒻ ᑲ ᐅᑎᓇᑦ ᐊᐅᒄ ᐅᔭ ᐊᑈᔅᑕᓇ ᐊᑯ ᒥᓐ ᐅᒋᔅᒋᐛᐃᒐᓱᐛ, ᐊᑯ ᒥᓐ ᒋᔅᑯᑎᒪᒐᓱᐛ, ᑭᔭ ᐊᐛᔪᐛ ᒪᒥᔅᑲᒡ ᒐᒂᔪᐤ ᒐ ᐃᑐᑎᒥᔨᒋ᙮ ᒋ ᐅᑎᓇᐤ ᑭᔭ ᐊᐛᔪᐛ ᒐ ᒥᓏᒋᐃᐛᔨᒋ, ᑭᔭ ᐊᓂᔭᔪᐛ ᓂᓇᐧᑯᐤ ᒐ ᐃᓯ ᐎᒋᐊᔨᒋ ᐊᐛᔪᐛ᙮ ᒋ ᐅᑎᓇᐤ ᑭᔭ ᐊᐛᔪᐛ ᐊ ᐛᐎᐱᔨᑕᔨᒋ ᒐᒂᔪᐤ ᒐ ᐃᑕᐱᑎᓯᔨᒋ, ᑭᔭ ᐊᐛᔪᐛ ᒐ ᒂᔅᒋᐃᔨᒥᔨᒋ᙮

ᓇᒪ ᒥᒄ ᐸᐃᑯᓐ ᐊ ᐃᓯ ᐱᔅᒐᓯᒥᑲᒡ ᒥᔪᐤ᙮ ᓂᓇᐧᑯᐤ ᐃᓯ ᐱᔅᒐᓯᒥᑭᓐ᙮

ᑎᑯᓇ ᑭᑈ ᑕᑈ ᐱᔅᒐ ᒐᒂᔪᐛ ᐊᓐᑕ ᒥᔭᒡ ᐊᑲ ᓴᐱᓯᒥᑲᒋ ᐊ ᐃᓯᓇᒂᒋ᙮ ᒥᒄ ᒪᒃ ᐃᔭᐱᒡ ᓂᑐᐛᔨᑕᑯᓇ ᐅᔭ᙮

ᐛᔅ ᒥᔪᐤ ᒥᓯᐛ ᒥᒄ ᒥᔅᒋᓯᒄ ᒋ ᐃᓯᓇᑯᓂᒂ, ᓇᒪ ᒋᐸ ᐅᒋ ᐸᑎᒻ ᐊᐛᓐ᙮ ᒪᒃ ᒥᓯᐛ ᒥᒄ ᒥᑐᑲᒡ ᓇᒪ ᒋᐸ ᒋ ᒥᔭᒐᐤ ᐊᐛᓐ᙮ ᓇᒪ ᒪᒃ ᐊᓐᑕ ᐃᓯᓇᑯᓐ᙮ ᒋᓴᒪᓂᑐᐤ ᒥᓯᐛ ᒋ ᐅᓯᑕᐤ ᑕᓐ ᓂᓇᐧᑯᐤ ᐊ ᐃᓯ ᐱᔅᒐᓯᒥᑭᓂᔨᒡ ᒥᔭᔪᐤ᙮ ᑭᔭ ᐎᔾ ᒥᓯᐛ ᒋ ᐎᔭᔨᑎᒻ ᑕᓐ ᒐ ᐃᓯ ᐱᔅᒐᓯᒥᑭᓂᔨᒡ ᒥᔭᔪᐤ ᑭᔭ ᑕᓐᑕ ᒐ ᐊᑎ ᒋᑭᒧᔨᒋ ᐱᔅᒐᓯᐅᓇ᙮ ᓇᒪᐎᔾ ᒥᔪᐤ ᒋᐸ ᐅᒋ ᐃᓯᓇᑯᓐ ᒥᒄ ᐸᐃᒄ ᒐᒂᓐ ᑎᒂᒡ ᒥᔭᒡ᙮