Matɨyui 28
28
Jizaazai ayɨna dɨkaavake'nesɨ.
(Maakɨ 16:1-10; Lukɨ 24:1-10; Jonɨ 20:1-18)
1Kwazaakegaa' mena kabawo' wikɨyarɨkɨne yɨrɨka mudɨkerɨkɨ yɨrɨkunyagaa' Maarɨyaa' Maahɨthaala mwaalyasɨ Maarɨyaa pɨrɨsɨ gɨlekavi'nɨnnyabanna wanganya'newaai wɨna. 2Yɨthaanyi! Sagaa' wɨnɨnya naange' yɨna. Sare' dare'nesɨ. Sɨgunyavɨdaa'nyɨ Naangere ejelɨyai walaabɨna yaka sɨlyai birɨkwasamakulaawɨna yɨna yaka sɨlyarɨ a'ba yɨlamwaaina. 3Sahware sɨnnyɨ' yɨnamɨraasa'bɨ' wannyɨna, nabaai gamɨre baazɨ'ma'nya' sɨgujaakavɨre yaakebɨ' wannyɨna yakelyɨra. 4Gamɨnyɨna aawɨlasara lɨka naanga yɨna yeva bɨ'bɨta yɨna yeva a'mwe mena bainɨkerabɨ' yɨma'nyɨna. 5Yɨma'nyɨna kye' ejelɨyai a'mwe sawaarɨ wɨdɨna “Kɨrɨmɨ lɨka mɨkanera! Nɨmɨ yawɨ'na ‘Jizaazarɨ yɨsavɨri tamarɨmuwa'daasarɨna bɨrɨkaanyawaaihi bɨvanɨgɨla.’ Sare'na lɨka mɨkanera! 6Sai dava mamwaalyɨka! Sare' dare'nesɨ. Kɨgaa' dakabaaibɨ' mena yɨdɨkaa'mwakerɨna! Gamɨ wa'de adava bulanganyɨla! 7Nabaai yarai wawakɨlyɨ gamɨre mɨdɨdɨvɨsaraavɨ duthaawila! ‘Kavi'nɨnnyavɨdaa'nyɨ mena yɨdɨkaa'mwakelyɨ. Nabaai, yɨthaanyi, Galɨlinei sarɨmɨnyɨ sɨnnawɨ waanadelyɨ. Dazɨmagɨ sahwarɨ tɨnna danganyiderɨna.’ Yɨthaanyi, mena yɨhɨthɨwa.” 8Wɨdɨna kya' sawaai lɨka yadi' yɨlaaya kuna kuna yɨna yadi' simaangeyaba yarai yagalya'ma'na yagɨla gamɨre mɨdɨdɨvɨsaraavɨ wɨja'newaai kaanyave'na wɨna. 9Kaanyave'na wɨna yadaakɨlyɨ, yɨthaanyi, tusavɨ Jizaazai sawaaryabanna yɨma'nadavaabɨna yaka wɨdɨna “Nya'mwewaaihi! Tewaanya kwaamu'nanyabwi yɨhwarana!” Wɨdɨna kya' sawaai aya kɨbanna wɨlaabɨna yagɨla gamɨre sɨvɨlyaraarɨ lɨmwanna yagɨla lotuya wina. 10Dazagaa' Jizaazai sawaarɨ wɨdɨna “Lɨka mɨkanera! Wawakɨlyɨ nya'mweraavɨ Galɨlina wɨpɨ'de'na duthaawila! Nabaai dazahimagɨ nyangabɨ'deinyɨra.”
Dame daavesaraavɨnesɨ.
11A'mwe sawaai kuna wodaakɨri, yɨthaanyi, dame pwara gɨlekavi'nɨnnyaba maredaavesara anga naangeba wɨlɨna yɨna yeva yuya yɨma'naka sanna Gotɨyarɨna yɨra'dɨvɨta naangeraavɨ wɨdɨna. Sara wɨdɨna kye' 12sahwara a'mwe naangerajɨ yɨ'bwa'nemwaaina yɨna yeva yagaala pɨrɨ' jamungajakɨna yeva dameraavɨ nɨgwia kwalaalya wɨjaavɨna yɨna yeva 13wɨdɨna “Nɨgwia dazanna maarapɨri dara dɨzideihɨlyɨ ‘Sawɨsavɨ nemɨ se wa'dori gamɨre mɨdɨdɨvɨsara lɨka yulya'na beva gɨlaayarɨ kuka bamaryawaaihasarera.’ Duzide'na yɨhɨmubɨwo. Sara kadapɨjɨ 14Ga'maanɨya naangei yagaala daza' kadɨka wɨ'najarɨ woyagaala wɨdawaajɨ sarɨmɨ sɨmunya kwalaalya myawɨrya'neihɨrɨ yɨhɨmwaihaadeihɨlyɨ.” 15Sara wɨdɨna kye' damera nɨgwia sa maarɨna yɨna yeva sara wɨdetabaaibɨ' sara yɨna. Sara yɨna yadɨvɨ' yagaala daza' Juyara gazabazaba wɨ'nyɨna ye'. Nabaai dahaasagaa' daza' Juyara kuna wɨdadɨvɨsasɨ.
Jizaazai gamɨreraavɨ wawɨnya wɨjaavake'nesɨ.
(Maakɨ 16:14-18; Lukɨ 24:36-49; Jonɨ 20:19-23; Apozelɨyara 1:6-8)
16Sɨvɨlɨrɨdaa'nyɨ pwainanyara Galɨlinera kaanna wɨna yeva mugunya Jizaazai sahɨbanna sara dakebanna yɨ'mavaawɨna. 17Yɨ'mavaawɨna yeva gamɨnyɨ tɨnna wanganna yeva lotuya wɨmarina. Lotuya sara wɨmarina yadɨvɨ' kɨrɨ' pwai pwai sɨmunya pɨrɨwaai yawɨ'na. 18Sara yadɨvɨ' yuyaraayawɨnna wɨlaabɨna yaka dara wɨdɨna “Sɨgunyavɨjɨ Kwaakevakɨjɨ sabanyaarɨ dɨragɨnya' Gotɨyai nyɨjaavakeinyɨ. Dɨragɨnya yuya pɨnɨngɨna wavɨla'dɨnyainyɨra. Wawɨnya yuya sabanyaai maremwaaidɨnyainyɨ. 19Sarevɨdaa'nyɨ sarɨmɨ Kwaaka davakɨya ajɨmya pɨnɨngɨyara nɨmɨre nyɨmɨdɨdɨvɨsara yɨma'nɨpɨ'de'na duthaawila! Nɨmwalyɨ Gawaalɨvaangeinyɨjɨ Kurya Tewaanyalyɨ sainaavɨre yayavɨ a'mweraavɨ aalyavɨ bavɨtaazɨya jideihɨlyɨ. 20Nabaai sara yapi yagaala yɨhɨzaave gazazanna mɨdɨnya'neraavɨ duziwakamaryideihɨlyɨra. Yɨthaanyi! Yuyagaa' yune aaya'ne dazagaa'na sarɨmɨjɨ ye'mwannamwalaadeinyɨra.”
موجودہ انتخاب:
Matɨyui 28: byr
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2013, Wycliffe Bible Translators, Inc. All rights reserved.