Maakɨ 1
1
Jonɨ bavɨtaazɨya yadei wɨjɨwaakakevɨnesɨ.
(Matɨyui 3:1-12; Lukɨ 3:1-9,15-17; Jonɨ 1:19-28)
1Gotɨyare Gawaalɨvaangei Jizaazai Kɨraazɨtɨyai gamɨre yagaala tewaanya mudɨke' sɨnnawɨ yɨma'na'. 2Gotɨyare wɨ'nawɨjɨwaakakei Pɨropetɨya Aazaayai dara dɨnɨ' Jizaazarɨna,
“Yɨthaa, nɨmɨre wɨdaasadɨnyai gɨmɨnyɨna waamanɨ'.
‘Gɨmɨre tusavɨ nayaa yadera,’ gɨthɨwa.
3Wawɨnya maayaba ja'maanguraaya' yɨmanɨ',
‘Naangei batherɨne tusa' javada'galyɨlo!
Gamɨre tusangɨ yɨda'na jamakwilo!’ ”
4Sara dɨnɨke'na Jonɨ wawɨnya maayaba mwaalaka sɨnnawɨ sagaa' a'mweraavɨ aalyavɨ bavɨtaazɨya yada wɨdɨna “Sarɨmɨre sɨmunyabwi mudɨkebwi yawɨramaa'na kyapɨjɨ nɨmɨ bavɨtaazɨya yɨhyɨdeinyɨ. Gotɨyai sarɨmɨre kayaa'nanyabwi yɨhɨmarasɨ'nadelyɨra,” wɨdɨna Jonɨ. 5Sara wɨdɨna yadaa'nyɨ “Gamɨnyawɨnna wawaajɨ yagaala sa' kadɨka wɨ'naana!” deva Kwaaka Juthɨya mwaalyarajɨ Anga Jeruzaalemɨ mwaalyarajɨ yuyara wɨna. Mi'na wɨna yeva gamɨre yagaalya' wɨ'neva wɨjalɨkurakɨna “Nebulyasɨra. Nemɨ kayaa'nanyabwi sana sana yɨwosɨra.” Wɨdɨna kye' Aalya Jothanɨyavɨ bavɨtaazɨya ya' Jonɨ.
6Jonɨ baazɨ'ma'nya kaamelɨyavɨre arɨlya' yavɨkarinɨke' marira'nyɨna yaka bulɨmakaawomunnaanya marida mwaalakelyɨ. Gannya wapaaya baarɨnnajɨ aakangɨre kwarakajɨ tɨka nada mwaalakei. 7Yagaala da' wɨdɨna “Nɨmɨ bɨweinyɨ. Dɨvi pwai bathelyɨra. Nɨmɨre dɨragɨnya' wa'dɨ'nyɨ kɨrɨ' gamɨre dɨragɨnya naange' nabaai wavɨla'na yadesɨ nɨmɨrevɨ. Naangere kwaari'masɨvɨlyavɨ wɨla pwɨyɨnɨke' kwadaai gɨla'mwi galyaa'mune' nɨmɨ naangeinyɨ mɨka. Myɨwɨneinyɨra. 8Nɨmɨ aalya gavevɨ bavɨtaazɨya yɨhyɨvanɨge sa' Naangei Kurya Tewaanyarɨ bavɨtaazɨya yɨhyadelyɨra,” wɨdɨna ya'.
Aalyavɨ Jonɨ Jizaazarɨ bavɨtaazɨya yake'nesɨ.
(Matɨyui 3:13-17; Lukɨ 3:21-22)
9Jonɨ sara wɨdadaasɨyagaa' Kwaaka Galɨli Anga Naazaretɨdaa'nyai Jizaazai bɨna kya' Aalya Jothanɨyavɨ Jonɨ bavɨtaazɨya yɨna. 10Mi'na bavɨtaazɨya yɨna kya' aalyavɨ sai bilaawaka yɨme'nya'bɨ' dara wanganake' “Sɨgunya' tɨvɨ damujaangɨka! Kekwai Kuryai kwaamɨryaibɨsai daimwaabɨka!” Mena kada' Kuryai walaabɨna yaka gamɨre munyɨkɨ kusawɨ bulamwaaina. 11Bulamwaaina kya' Sɨgunyavɨdaasɨ Gotɨyarebadaasɨ Gotɨyai yagaala wɨdɨna “Saigɨ, nɨmɨre Nyɨbwaalɨvaangeigɨnyɨ. Kurya tewaanya gukadɨnyaigɨnyɨ. Sahwaigɨ yɨlaaya nyɨgaimanɨgɨ,” wɨda'.
Kayaa'nanya'na Saataanɨ Jizaazarɨ wɨdake'nesɨ.
(Matɨyui 4:1-11; Lukɨ 4:1-13)
12Yɨme'nya'bɨ' Kuryai “A'mwera maayabanna yarai dɨwo!” jɨrɨ'galaasa'. 13Jɨrɨ'galaasɨna kya' sahwai kaanna wɨna kya' yɨrɨka a'mweraare sɨvɨlatɨraai kwavɨlava' a'mwera maayaba mwaaidɨsɨ Saataanɨ “Kayaa'nanyabwi yana!” daka yaamɨjɨ yɨjɨwaala'. Yɨjɨwaaina yakegaa' malakayaawaryarana mwaaidapiyaba Jizaazai sarari ye'mwannamwaaina ya'. Sahwai saba mwaalakegaa' Gotɨyare mamaayara ejelɨyara wɨgaimwanna ye'.
Jawɨnya maaryaraavɨ wɨda' Jizaazai.
(Matɨyui 4:12-17; Lukɨ 4:14-15)
14Dɨvidaa'nyɨ Jonɨmɨ wɨla yɨrakɨna kye' Jizaazai Kwaaka Galɨlina wɨlaawɨna yaka saba Gotɨyare yagaala tewaanya' wɨjɨwakamarina. 15Wɨjɨwakamarina yakegaa' wɨda' “Dahaa' yemwaalyagaa' aayasɨra. Dahaa' yunegaa'nanyɨ. Gotɨyai a'mweraavɨ maremwaaidehaa' yɨma'nɨwa' dahaa'. Gotɨyarɨna sarɨmɨre sɨmunyabwi mudɨkebwi jawɨramaarila! Yagaala tewaanya' wɨ'napɨjɨ ‘Nebulyasɨra. Sara yaana!’ dɨthɨnyide'na yɨhɨthɨwa. Yagaala sa' nayaa dɨlɨmwagarila!” wɨjɨwaakɨna ya'.
(Matɨyui 4:18-22)
16Galɨli aalɨbumaangevɨ sahwai wodaa'nyɨ Saaimonɨjɨ Saaimonɨmɨre gahwaalaangei Edɨruyalyɨ sadaraai jawɨgɨlya' aalyavɨ marasɨ'na yadaakɨlyɨ wangamabɨna ya'. Marasɨ'nagɨle' dare'nesɨ. Jawɨnya mwagi'nagɨlyaraalyɨ. 17Wangamabɨna yaka wɨda' “Dɨnyɨmɨdɨnaabyɨla! Kanyɨmɨdɨnaabakɨlyɨ kihɨzɨwaaka'muri jawɨnya maa'ditabaaibɨ' Gotɨyarɨne a'mweraavɨ maarya'neraaihɨrɨ yɨhɨmwaaihɨderaaihɨlyɨra.” 18Mi'na kuda' yɨme'nya'bɨ' kɨrɨnnya jawɨgɨlya yagalya'ma'na yagɨla mɨdɨnna yagi. 19Mɨdɨnna kyagi Jizaazai pɨzɨ'gwa wawaka Sevathiyare gawaalɨ' kwaraai Jemɨzalyɨ Jonɨjɨ sadaraai wanganakeraai sɨpɨyavɨ mwaalagɨla jawɨgɨlya kayaaka yɨnɨke bɨ'nyɨna yagi. 20Bɨ'nadaakɨlyɨ yɨme'nya'bɨ' jaka wɨdɨna kya' “Yarai dulaabila!” kɨrɨnɨmaangei Sevathiyalyɨ gannya nɨgwɨwawɨnyarari sɨpɨyavɨ mwaalesaraavɨ yagalya'ma'na yagɨla kɨdaraai gamɨnyɨ mɨdɨnna yagi.
Jizaazai yɨmakerɨ marasɨ'na'.
(Lukɨ 4:31-37)
21Kumɨ sara angeba Kaapanɨyamɨna wɨna kye' Juyaraavɨre Kwazaakegaa' yɨma'nyɨna kya' yɨme'nya'bɨ' gamɨ Juyaraavɨre Lotuangevɨ wɨlɨna yaka Gotɨyare yagaala wɨjɨwaakɨna. 22Wɨjɨwaakɨna kya' yuyara gamɨre yagaalya' wɨ'neva atɨka maru'na'muluna ye'. “Kɨwɨjaraavɨrebwi kwaasɨ kwaasɨya'bɨsabulyɨ. Jizaazai gannya sɨmunyavɨ yuya yawɨ'nɨkelyɨ,” dɨdaapi atɨka maru'na'na ye'. Sare' dare'nanyɨ. Jizaazai dɨragɨnya kɨnɨnnakei wɨjɨwaakake'nanyɨ.
23Yɨme'nya'bɨ' a'mwei yɨmaka widei Lotuangevɨ wɨlɨna yaka 24jaka danganna “Jizaazai Naazaretɨ mwaalyaigɨ, nemɨnyɨ berɨ' dɨneyɨde'na bahɨneka? Nemɨ aa'neinaavɨ kayaaka dɨneyɨgaide'na daaka? Gɨmɨnyɨna yawɨ'mwa. Gotɨyare tewaanyaigɨnyɨna yawɨ'mwa.” 25Mi'na jaka kada' Jizaazai maanga wɨdɨna “Yagaala madɨnnera! A'mwe sarɨdaasɨ dɨwona!” 26Sara kuda' yɨmakei a'mwerɨ yɨkɨlaaka wɨlaka jaka naanga daka kaanna wɨna ya'. 27A'mwera yuyara tɨnna wanganeva atɨka maru'nakulɨna yadɨvɨ' kumɨ sara dɨne' “Ai, da' berɨvaka? Wɨjɨwaakya'ne' mudɨkesɨ. A'mwe sai yagaala dɨragɨnna wɨdɨvanɨkelyɨ. Nabaai yɨmakeraavɨ sara wɨdɨwake sara yɨvanɨgava!” 28Kadɨne' yɨme'nya'bɨ' Galɨli yuyabanyara Jizaazai yake'na maalɨkegaa' wɨ'nyɨna ye'.
Jizaazai a'mweraavɨ tewaanya ya'.
(Matɨyui 8:14-15; Lukɨ 4:38-39)
29Yɨme'nya'bɨ' Jizaazai Lotuangevɨdaa'nyai bwalyuna kya' Jizaazalyɨ Jemɨzalyɨ Jonɨjɨ pwarajɨ sara kaanna wɨna yeva Saaimonɨjɨ Edɨruyalyɨ saraare angevɨ bwina ye'. 30Bwina kye' mɨdɨka wɨda'daasɨ Saaimonɨmɨ ganyaalɨmaange' wa'dɨsɨ yɨme'nya'bɨ' kumɨ Jizaazarɨ wɨdɨna. 31Mi'na wɨdɨna kye' nabalɨnakeyabanna bɨna yaka maradɨhaa'bwa'na ya'. Jizaazai sara kya' nabalya' mena yɨwɨna kya' a'mwe' kumɨnyɨne wapaaya yovɨrawakɨna ya'.
(Matɨyui 8:16-17; Lukɨ 4:40-41)
32Nyɨlyai mena walakyagaa' sabanyara nabalɨnakengɨjɨ yɨmaka widɨvɨsangɨjɨ sangɨ gamɨnyawɨnna makuna ye'. 33Makuna yeva saba mwaalyara yuyara tɨkuryaba davaabɨna ye'. 34Davaabɨna kye' Jizaazai a'mwe nabalya ge ge wa'dɨvɨsaraavɨ nabalya' wangadaa'nyɨ “Tewaanya jɨma'nana!” sana sana kuda' tewaanya yɨma'nɨgulɨna ye'. Nabaai aa'ne kwalaalyaraavɨ wɨdaasɨna ya'. Aa'nera gamɨnyɨna yawɨ'daapiya'na wangada “Yagaala madɨpɨnera! Kwaasɨ yadɨvɨsaihɨrɨ nayɨhu'nɨpɨdɨka!” wɨdaka wɨdaasɨna ya'.
Kwaaka Galɨli Jizaazai wɨjɨwaaka'.
(Lukɨ 4:42-44)
35Jizaazai se wa'mwarakei yɨrɨkunyagaa' dɨkaa'na yaka walyuna yaka a'mwera maaya kunebanna kaanna wɨna yaka Gotɨyarɨ yagaala wɨdɨna. 36Kuna wɨdɨna yadaa'nyɨ Saaimonɨjɨ gamɨnyaba mwaalesarajɨ bɨrɨbɨrɨkaanyara wɨna yeva 37yɨrɨ'maa'na yeva wɨde' “Yuyara gɨmɨnyɨna bɨramarivanɨgava a'mweraava.” 38Tɨvi'na kude' gamɨ wɨdɨna “Angeba pɨnɨ aya kɨbanna nemɨ kaanyaana! Anga saba Gotɨyare yagaala wɨjɨwaakɨde'na bwalyuwa.” 39Wɨdaka Galɨli yuyaba kumɨre Lotuangengɨ yagaala Gotɨyare wɨjɨwakamarya'. Sagaa' a'mwe yɨmaka widɨvɨsaraavɨdaasa yɨmakeraavɨ wɨdaasa'.
Samatanakei tewaanya yɨma'na'.
(Matɨyui 8:1-4; Lukɨ 5:12-16)
40A'mwe samatanakei gamɨnyawɨnna bɨna yaka “Jizaazai naangelyɨ,” daka kwadaai gɨlɨna yaka yagaala naanga dɨragɨnna wɨda' “Nɨmɨre kɨlaakejɨ' ‘Tewaanya mwaalana!’ nyawɨ'dɨza' gɨmɨ sara dɨnyavada'gala! Sara yɨnneigɨnyɨ gɨmɨ.” 41Wɨdɨna kya' Jizaazai kale kwia' ata dathɨwanna yaka wɨdɨna “ ‘Sara yɨma!’ yawɨ'manɨge. Gɨmɨre kɨlaakejɨ' yɨhula dana!” 42Wɨdɨna kya' yɨme'nya'bɨ' samate sa' ya'ma'na yaka gamɨre kɨlaakejɨkɨ yarai yɨwɨna ya'. 43Kɨlaakejɨkɨ yɨwɨna kya' Jizaazai maanga wɨdɨna yaka 44wɨdɨna “Nayaa dɨnyu'nana! (Nɨmɨnyɨna najɨ'bwa'nemwaaibɨthɨka!) A'mwe aane pwai kwarɨ ‘Sara nyɨwaka,’ mudɨnna! Aane pɨrɨ' kɨrɨ' mujɨwaakɨnna! Aawa. Kaanna wawa'gɨzɨ sipɨzipɨya Gotɨyarɨna mubɨthɨka yɨra'derɨ pɨrizɨyarɨ duzɨwaainana! Dahaa' kɨlaake' tewaanya warɨke'na Mozɨzai dɨnɨke' Gotɨyarɨne' dumaaride'na a'mwera yawɨ'na ‘A'mwere samate' menanyɨra,’ gyawɨpɨ'dera.” Mi'na wɨdaka yɨme'nya'bɨ' wɨdaasɨna ya'. 45Sara kudaasa' a'mwei walyuna yaka yuyaba yagaala sa' wɨjɨwaakya'nei yuyaraavɨ wɨdɨvainadaa'na yɨkwaasa'. Gamɨ sara kya' “A'mwera nyanganapɨjɨ nɨmɨnyɨna nanyɨdahidɨwagamaremwaaibɨthɨka!” daka Jizaazai angeba mwɨyai yaayeba mwaalɨna yadɨsɨ gazabazabadaa'nyɨ gamɨnyawɨnna yɨkabɨna ye'.
موجودہ انتخاب:
Maakɨ 1: byr
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2013, Wycliffe Bible Translators, Inc. All rights reserved.