Matalikilo 43
43
Lweendo lwabili lwakusunza
1 #
Matl 12:10; 26:1; 41:57; 1 Bam 18:2; 2 Bam 8:1; Jer 52:6 Lino inzala yakabija munyika. 2Nkabela nebakamanisya kulya zilyo nzebakasunzide ku-Egepita, wisaabo wakabaambila kuti, Amubweede, mukatuulile alimwi tulyo tuniini. 3#Matl 42:20; 44:23Pele Juda wakabaambila kuti, Ncobeni ulya muntu wakatukonkezya kuti, Tamukooyoobona busyu bwangu limbi cita mwaletelela mwanike wanu. 4Na wamuzumizya mwanike wesu kuti tuye awe, tulaya kuyookuulila zyakulya, 5pele na wakaka kumutuma tatukooinka pe, nkaambo ulya muntu wakatwaambila kuti, Tamukooyoobona busyu bwangu cita mwaletelela amwanike wanu. 6Elyo Israyeli wakati, Nkaambonzi mwakandibisizya kukulwiida muntu kuti mulijisi mwanike wanu? 7Bakati, Muntu wakatubuzisisya makani aaluzubo lwesu, Wakatubuzya kuti, Sa wisi wanu mpaacili? Sa mulijisi munyoko aumwi? Elyo twakamulwiida makani aya oonse. Sa twakalizi kuti ulaamba kuti, Amulete mwanike wanu? 8Mpawo Juda wakaambila Israyeli wisi kuti, Tuma mulombe ambebo, lino tulanyamuka akwiinka, kuti tupone tutafwi, swebo ayebo atwana twesu. 9#Matl 44:32; Flm 1:18,19Mebo nomususi; kujanza lyangu nkoelede kumulangawida. Na ndabula kumuboozya akumubika kubusyu bwako, mbe amulandu lyoonse akutamani. 10Ncobeni nitwatakali kulinelezya netubweede kale alimwi.
11 #
Matl 32:20; 37:25; Tus 18:16; Jer 8:22; Ezk 27:17 Mpoonya awo Israyeli wisaabo wakabaambila kuti, Mbubo, kamuya, alimwi mbuboobu mbumweelede kucita, Amutolelele micelo yanyika muzibwe zelo zyanu, mutolele muntu cipo. Amutole tumabbona, atuci, atulisyo twanikoa, atununkilizyo twaladunu, andongo aminsomwa yamaalmondi. 12#Matl 42:25,35Alimwi amubweze mali aamwi mumaanza aanu. Mali aakapilusigwa mumilomo yamasaka amwaapilusye mumaanza aanu; ambweni bakaaluba. 13Amwanike wanu amumutole, munyamuke, mubweede kumuntu oyo. 14#1 Sam 14:6; 2 Sam 22:3,31; Job 13:15; Int 22:4; 34:8,22; Tus 28:5; Is 57:13; Nah 1:7Leza Singuzuzyoonse amu pe luzyalo mumeso aamuntu oyo, kuti aangunune munyoko wanu uusyeede antoomwe a-Benjamini. Na ndalobelwa bana bangu, ndaloba. 15Mpawo bantu bakatolelela cipo eco, amali aambi mumaanza aabo a-Benjamini mwanike wabo, banyampuka, bainka kuEgepita, baakwiima kubusyu bwa-Josefa,
16 #
Matl 24:2; 39:4 Nkabela Josefa naakabona kuti beza a-Benjamini, wakaambila mubambi waŋanda yakwe kuti, Njizya aba bantu muŋanda, alimwi jaya munyama, utubambile, nkaambo bantu aba baleelede kulya kulindime ciindi casikati. 17Lino oyo muntu wakacita mbubonya mbuli Josefa mbwaakalailila. Wakanjizya bantu muŋanda ya-Josefa. 18Mpawo bantu bakayoowa nkaambo kakunjizigwa muŋanda ya-Josefa, bati, Nkaambo kamali aakaboozegwa mumasaka esu mulweendo lutaanzi, ncencico ncitwaletelwa. Ulayanda kutupa mulandu akutwaanga, atutole mubuzike swebo ambongolo zyesu. 19Lino bakaswena kufwaafwi kumubambi waŋanda ya-Josefa akwaambaula awe kumulyango waŋanda. 20Bakati, Koswiilila, mwami. Ncobeni twakeza mulweendo lutaanzi kuzoosunza zilyo. 21#Matl 42:27,35Elyo netwakasika kucilo, twakajalula masaka esu, twabona kuti mali esu mwaali, mali aaumwi aumwi kumulomo wasaka lyakwe, mali oonse buyo. Lino sunu twaaboozya mumaanza esu. 22Alimwi twaleta mali aamwi mumaanza esu kuzooula zilyo. Tatuzi na nguni wakabika mali esu mumasaka esu. 23Elyo wakabavwiila kuti, Amube aluumuno. Mutayoowi. Leza wanu a-Leza wabamausowanu nguwakamupa coolwe mumasaka aanu. Ndakatambula mali aanu. Amane kwaamba obo, wakaleta Simeoni kulimbabo. 24#Matl 18:4; 24:32; Lk 7:44; Joh 13:5; 1 Tim 5:10Lino oyo muntu naakanjizya bantu muŋanda ya-Josefa, wakaleta maanzi kuti basambe kumaulu, alimwi wakasanina imbongolo zyabo. 25Nkabela bakabamba cipo kuti bape Josefa asika isikati, nkaambo bakamvwa kuti nkobazoolida insima ciindi casikati.
26 #
Matl 27:29; 33:6; Rut 2:10 Lino Josefa naakasika kuŋanda, bakamuletela mumonya muŋanda cipo ncebakeza aco, nkabela bakamukotamina cakuvundama ansi. 27#Matl 42:11-13Mpawo wakababuzya mbobapona, alimwi wababuzya kuti, Sa usowanu uli kabotu, munene ngomwakandaambila? Sa ucipona? 28#Matl 37:7,10; Tus 14:19Bakamuvwiila kuti, Mulanda wako wiseesu uli kabotu, ucipona. Elyo bakasintama, bakotama.
29 #
Matl 35:17,18; 42:13 Atambye meso aakwe, wakabona mwanike wakwe Benjamini, mwana wabanyina, nkabela wakababuzya kuti, Sa Oyu ngomwanike wanu ngomwakandaambila? Alimwi wakati, Leza akupe coolwe, mwanaangu. 30#1 Bam 3:26; Jer 31:20; Matl 42:24; 2 Sam 18:33Mpawo Josefa wakafwambaana kuyandaula cilililo, nkaambo moyo wakwe wakali kuyandisya mwanike wakwe. Wakanjila muŋanda yakoonena, walilila nkuko. 31#Matl 43:25Amane kulila, wakasamba kumeso, wazwa, walisimyasimya, wati, Amubike cakulya. 32#Matl 46:34; Kul 8:26Nkabela bakamubikila cakwe alike, abalo cabo abalike, aba-Egepita mbaakali kulya abo balike, nkaambo ba-Egepita tabakonzyi kulya insima mucilido comwe aba-Hebrayo, nkaambo kucita obo kulatondwa kuba-Egepita. 33Nkabela bakakazikwa kunembo lyakwe, mupati mbuli bupati bwakwe, muniini mbuli buniini bwakwe. Lino bantu bakali kulangana cakugamba. 34#Matl 45:22Lino bakabikilwa zipampwido kubusyu bwakwe, pele cipampwido ca-Benjamini cakainda zipampwido zyabo zyoonse zyeelelo zyosanwe. Elyo bakanywa akunywisya awe.
موجودہ انتخاب:
Matalikilo 43: Ibbaib63
سرخی
شئیر
کاپی
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.