Matalikilo 44
44
Josefa mbwaakasunka bananyina
1Lino wakalailila mupati waŋanda yakwe kuti, Zuzya masaka aabantu zilyo, mbubonya mbobakonzya kunyampula, alimwi bika mali aamuntu umwi aumwi mumulomo wasaka lyakwe. 2Ayalo inkomeki yangu, inkomeki yansiliva koibika mumulomo wasaka lyamuniini, antoomwe amali aakwe aazilyo. Nkabela wakacita mbubonya mbuli Josefa mbwaakalailila. 3Buce biyo, bantu bakasungulwa kuti beende balo ambongolo zyabo. 4Lino kabatana kuya kule kuzwa kumunzi Josefa wakaambila mupati waŋanda yakwe kuti, Nyamuka, ubatobele bantu. Wabeenzya, uleelede kubaambila kuti, Ino nkaambonzi mwandiboozezya bubi mucimanga cabubotu? Nkaambonzi mwabba inkomeki yangu yansiliva? 5Sa teensi njiyo mwami wangu mwaanywida? Sa teensi njiyo njasondya? Mwabisya kukucita obo.
6Wabeenzya, wabaambila majwi ayo. 7Lino bakamubuzya kuti, Ino nkaambonzi mwami wesu ulaamba majwi aya? Swebo tobalanda bako cilatondwa kulindiswe kucita obo. 8#Matl 43:21Mwabona kuti mali ayo ngetwakajana mumilomo yankomo zyesu twakaaboozya kulinduwe kuzwa kunyika ya-Kanana, Ino inga twabba buti insiliva na ingolida muŋanda yamwami wako? 9#Matl 31:32Kufumbwa muntu akati kesu tobalanda bako uujanwa kuti uli ankomeki, afwe, Aswebo toonse tulaba bazike bamwami wesu. 10Wakavuwa kuti, Kube mbubonya obo mboamba. Kufumbwa uujanwa kuti uli ankomeki abe mulanda wangu, pele bamwi banu tabakooyooba amulandu. 11Mpoonya awo bakafwambaana kwaangununa umwi aumwi isaka lyakwe, batula ansi, bajalula umwi aumwi isaka lyakwe. 12Nkabela wakayandaula moonse moonse, watalikila kumupati, wasyaalizya kumuniini, nkabela inkomeki yakajanwa munkomo ya-Benjamini. 13#Matl 37:29,34; My 14:6; 2 Sam 1:11Mpawo bakadelaula zyakusama zyabo, babopa umwi aumwi imbongolo zyakwe, bapilukila kumunzi.
14 #
Matl 37:7
Lino Juda abeenzinyina nebakasika kuŋanda ya-Josefa, bajana kuti mpacili, nkabela bakamuvundamina ansi. 15Elyo Josefa wakabaambila kuti, Ino ncinzi eco neemwacita? Sa tamuzi kuti muntu uuli mbuli ndime ncobeni ulikuzi kusonda? 16#Job 40:4; Matl 44:9Mpawo Juda wakati, Twaambenzi kumwami wangu? Twaambenzi? Tulilulamike buti? Leza ngowajana milandu yesu tobalanda bako, Toonse tuli bazike bamwami wangu, aswebo ayooyo moyajanwa inkomeki mujanza lyakwe. 17#Jos 22:29; 1 Sam 12:23; Lk 20:16; Rom 3:4,6; 1 Kor 6:15; Gal 2:17Pele wakati, Nee! Kulindime cilatondwa kucita obo, Muntu wajanwa kuti uli ankomeki mujanza lyakwe, ngonguwe alike uuelede kuba muzike wangu. Pele inywe nobamwi kamuya aluumuno kuli usowanu,
18 #
Matl 18:30,32; Kul 32:22; Tus 19:12; Matl 41:40 Mpawo Juda wakaswena afwaafwi kulinguwe, wati, Wence simalelaangu, ndemulanda wako Ŋambe ijwi mumatwi aasimalelaangu. Bukali bwako butabukili mulanda wako, nkaambo uli mbubonya mbuli Farao. 19Simalelaangu wakatubuzya swebo tobalanda bakwe kuti, Sa mulijisi uso na munyoko? 20#Matl 37:3Nkabela twakaambila simalelo wesu kuti, Tulijisi wiseesu munene, amwanike wesu mwana wabucembele bwakwe, Mukulana wakwe wakafwa, lino kwakasyaala nguwe alike mulibanyina, nkabela wisi ulamuyandisya. 21#Matl 42:15,20Lino yebo wakatwaambila tobalanda bako kuti, Amumulete kulindime, nkamu bone. 22Twakaambila mwami wesu kuti, Musankwa takonzyi kusia wisi pe. Asia wisi, wisi ulafwa. 23#Matl 43:3,5Pele yebo wakatwaambila tobalanda bako kuti, Na mwanike wanu tasiki anywebo, tamukooyoobona limbi busyu bwangu. 24Aboobo netwakapiluka kuliwiseesu mulanda wako, twakamulwiida majwi aamwami wangu. 25#Matl 43:2Nkabela tateesu naakaamba kuti, Amupiluke, mukatuulile tulyo, 26twakati, Tatukonzyi kuya pe, cita mwanike wesu alakwe kali wo, lino tulaya, nkaambo tatukonzyi kubona busyu bwamuntu oyo na mwanike wesu tawo. 27#Matl 46:19Amvwe obo, wiseesu mulanda wako wakatwaambila kuti, Mulizi kuti mwanakazi wangu wakandizyalila bana bobile. 28#Matl 37:33Umwi wakandisia, Ndakati, Ncobeni ulikwamwiidwe, Nsimubwene limbi mane kusikila sunu. 29#Matl 42:36,38Lino na mwatola oyu alakwe kuzwa kulindime, alimwi bubi bwamujana, muyooselusya imvwi zyangu abuusu mukabanda. 30#1 Sam 18:1Lino na ndasika kulitaata mulanda wako, alimwi musankwa tawo, —moyo wakwe ulisukeme musankwa, 31aboobo naayoobona kuti musankwa tawo, uyoofwa, Tobalanda bako tuyooselusya imvwi zyatateesu mulanda wako cabuusu mukabanda. 32#Matl 43:9Nkaambo mebo ndemulanda wako ndimususi musankwa kuti aye kulitaata. Ndakati, Na ndabula kumuboozya kulinduwe, njooba amulandu kulitaata mazuba oonse. 33#Kul 32:32Wence nsyaale, mebo ndemulanda wako, mucibaka camulombe, mbe muzike wamwami wangu, lino musankwa ainke abeenzinyina. 34Nkaambo nsikonzyi kupiluka kulitaata na mulombe tawo. Ndayoowa kubona bubi buti sikile taata.
موجودہ انتخاب:
Matalikilo 44: Ibbaib63
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
The Bible in Tonga (Zambia) © United Bible Societies, 1963.