SAN MATEO 22
22
Menda iarete re oyembojaanga vae
(Lc 14.15-24)
1Jare Jesús imiari ye joko pe ñogüɨnoi vae reta pe ombojaanga reve, körai:
2“Araɨgua mborookuaía metei mburuvicha guasu taɨ omendata oï vae rami ko. 3Jayave omondo jembiokuai reta ombou vaerä oparea ma chupe vae reta. Ërei jae reta ñäteɨ yogüeru. 4Jayave mburuvicha guasu oyókuai ye ïru jembiokuai reta; jei vaerä oparea ma chupe vae reta pe: ‘Mase, jaema oï tembíu. Ayuka guaka jare ïru cherɨmba reta amongɨragüe. Jaema oï. Peyu mendaa pe.’ 5Ërei jae reta mbaetɨ yogüeru. Amogüe vae ojo iko pe. Ïru vae ojo omaemee. 6Jare ïru reta oipɨɨ mburuvicha guasu jembiokuai reta, oyapo ikavimbae vae chupe reta jare oyuka reta. 7Ërei mburuvicha guasu oikuaa yave kuae, iyarasɨ yae. Jáeramo omondo isundaro reta opa vaerä oyuka jókuae oporoyuka vae reta jare opa oapɨ jëta guasu. 8Jayave mburuvicha guasu jei jembiokuai reta pe: ‘Kuae menda jare iarete oyeapo vaerä ma ko oï; ërei aparea chupe vae reta jupiä yogüeru vaerä. 9Jáeramo pekua tape rupi jare pere opaete peväe chupe vae pe yogüeru vaerä menda pegua aretea pe.’ 10Jayave mburuvicha guasu jembiokuai reta yogüɨraja tape rupi jare omboatɨ opaete oväe chupe vae reta; jeko kavi vae reta jare jeko kavimbae vae reta. Jare jökorai mburuvicha guasu jo tɨnɨe vae.
11Jare mburuvicha guasu oike omae vaerä jókuae oyeparea chupe vae reta re yave, oecha joko pe metei kuimbae mbaetɨ oyemonde temimonde menda pegua pe vae 12Jayave jei chupe: ‘Chevɨa-ïru, ¿kërai pa reike kuae pe temimonde menda peguambae reve?’ Ërei jókuae kuimbae mbaetɨ etei iñee omoë. 13Jayave mburuvicha guasu jei jembiokuai reta pe: Peipokua jare peraja pemombo oka pe pɨtumimbía pe. Joko pe toyaeo jare jäi tombokɨrɨrɨu.#Mt 8.12; 25.30; Lc 13.28. 14Echa jeta ko oñeenɨi vae, ërei mbovɨño oyeparavo vae.”
¿Jupi pa yamboepɨ vaerä César pe?
(Mc 12.13-17; Lc 20.20-26)
15Jayave fariseo reta oyomboatɨ, jare oyomboemboe kërai oyavɨuka vaerä Jesús pe, iñee rupi aeño. 16Jayave jae reta omondo jemimboe reta herodiano#22.16 Emae Glosario pe. reta ndive Jesús oïa pe. Jae reta jei Jesús pe:
—Oporomboe vae, roikuaa nde rere vae añete ko. Jare nde reporomboe kavi Tumpa jemimbota re. Nde mbaetɨ reipoɨu kia güi ave, echa nde mbaetɨ remae kuimbae jova reño. 17Jáeramo emombeu oreve, ¿Mbae pa rere? César okovara vae, ¿jupi pa yamboepɨ vaerä?, ani ¿mbaetɨ pa?
18Ërei Jesús oikuaa jae reta iyemongeta ikavimbae vae ramo jei chupe reta:
—¿Maera pa peipota peyavɨuka cheve? jova mókoi vae reta. 19Peechauka cheve korepoti reare pembaemboepɨ pɨpe vae.
Jayave güeru reta chupe metei denario. 20Jayave Jesús oparandu chupe reta:
—¿Kia iä pa kuae?, jare ¿kia jee pa kuae oyekuatía oï jese vae?
21Jei reta:
—¡César iä ko!
Jayave Jesús jei chupe reta:
—Pemee César pe César imbae, jare pemee Tumpa pe Tumpa imbae.
22Kuae oendu reta yave, ipɨakañɨ yae reta jese. Jare oeya reta Jesús, opa yogüɨraja.
Mbarandu oikove ye vae regua
(Mc 12.18-27; Lc 20.27-40)
23Jare jókuae ara etei amogüe saduceo reta yogüeru Jesús oïa pe. Jókuae “mbaetɨ ko omanogüe vae reta oikove ye”#Hch 23.8. jei vae reta. Oparandu reta Jesús pe, jei reve:
24—Oporomboe vae, Moisés jei. Kia omano yave imichiambae, tɨvɨ togüɨreko tɨkeɨ amɨri jembirekogüe, jare jókuae kuña imembɨ rupi, tɨkeɨ amɨri oime vaerä iñemuña.#Dt 25.5. 25Oiko orepɨte pe chiu kuimbae reta metei tu vae. Jókuae kuimbae tenondegua ete omenda, ërei omano imichiambae reve. Javoi tɨvɨ omenda, tɨkeɨgüe jembirekogüe ndive. 26Ërei jae omano vi imichiambae reve. Jökoraiño vi tɨvɨ mboapɨa, irundɨa jare opaete ïru tɨvɨ reta omenda jókuae kuña ndive, ërei opa omano reta chiu reve imichiambae. 27Taɨkue ete jókuae kuña omano vi. 28Jayave omanogüe reta oikove ye yave, ¿kia nunga vae jembirekorä pa oikota jókuae kuña? Echa opaete chiu reve omenda jae ndive.
29Ërei Jesús jei chupe reta:
—Peyavɨ ko. Mbaetɨ ko peikuaa kavi Tumpa Iñee jare Tumpa imbaepuere. 30Omanogüe reta oikove ye yave, ngaraa ma omenda reta ani oyomomenda reta. Echa Tumpa iaraɨgua reta ramita ko. 31Ërei omanogüe reta oikove yeta vae regua, ¿mbaetɨ etei pa pemongeta Tumpa Iñee pe oyekuatía oï vae? 32Echa oyekuatía oï körai: “Che ko jae Abraham, Isaac jare Jacob iTumpa.”#Ex 3.6. Tumpa mbaetɨ ko omanogüe vae reta iTumpa. Jae ko oikove vae reta iTumpa.#Lc 20.38.
33Jare jeta vae reta kuae oendu yave, ipɨakañɨ Jesús iporomboe re.
Mborookuai tuichagüe vae
(Mc 12.28-34)
34Fariseo reta oikuaa yave Jesús omokïrii ko saduceo reta, oyomboatɨ reta Jesús oïa pe. 35Jayave metei mborookuai re oporomboe vae oparandu Jesús pe. Oyavɨuka vaerä chupe, jei:
36—Oporomboe vae, ¿mbae nunga mborookuai pa ko jae tuichagüe yae ete?
37Jayave Jesús jei chupe:
—Eaɨu ndeYa Tumpa opaete ndepɨa reve, opaete nderekove ndive, jare opaete ndeyemongeta ndive.#Dt 6.5. 38Kuae ko jae mborookuai tenondegua jare tuichagüe yae ete vae. 39Jare mokoía jökorai etei vi: “Eaɨu nderapicha nde reyeaɨu rami.”#Lv 19.18. 40Kuae mókoi mborookuai re oï, opaete mborookuai jei vae jare ñeemombeúa reta jei vae.#Lc 10.25-28.
¿Kia iñemuña pegua pa ko Cristo?
(Mc 12.35-37; Lc 20.41-44)
41Jare fariseo reta Jesús oïa pe oyemboatɨ yave, Jesús oparandu chupe reta:
42—¿Mbae pa peyemongeta Cristo re? ¿Kia iñemuña pegua pa?
Jare jae reta jei chupe:
—David iñemuña reta pegua.
43Jei ye chupe reta,
—Jökorai yave, ¿maera pa David etei Espíritu rupi jei “CheYa”?
44Echa David jei körai:
“YandeYa jei cheYa pe:
‘Eguapɨ cheakatu kotɨ,
nderovaicho reta opa regua añono ndepɨ igüɨ pe.’ ”#Sal 110.1.
45David etei jei yave chupe: “CheYa” ¿Kërai pa ipuere oiko David iñemuñarä?
46Jare mbaetɨ kia ipuere mbae jei chupe. Jare jókuae ara güive mbaetɨ ye kia oipota oparandu Jesús pe mbae re.
موجودہ انتخاب:
SAN MATEO 22: GUABD
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Biblia DC Guaraní Bolivia © Bolivian Bible Society, 2001.
